Posts Tagged ‘ transparencia ’

O PSdeG-PSOE de Maceda acada a unanimidade do pleno para catro iniciativas ante a parálise do PP

A portavoz, Ana María Rodríguez, destaca a “satisfacción do PSOE para seguir traballando nestas iniciativas útiles que recollen as necesidades reais da vila, co fin de que executen en tempo e forma”

Os socialistas denuncian a falta de transparencia e a absoluta parálise do grupo de goberno do PP ante as demandas dunha veciñanza que se sinte abandonada

Ourense, 8 de outubro de 2018. O PSdeG-PSOE do concello ourensán de Maceda acadou a unanimidade para as catro iniciativas que presentou a debate durante o último pleno municipal. En contraposición coa absoluta parálise do goberno local do PP, os socialistas traballan e dan cara desde a oposición. Desta forma, os socialistas lograron acordos para paliar os danos ocasionados polas tormentas e as cheas; para mellorar a calidade da auga da traída; para implementar axudas municipais en material escolar funxible e impreso do alumnado de educación infantil e para acometer melloras nas obras executadas na rúa da Pena.

A portavoz municipal dos socialistas, Ana María Rodríguez, destaca a “satisfacción do PSOE para seguir traballando nestas iniciativas co fin de que se poidan executar en tempo e forma”. “Estamos a falar de mocións útiles que recollen as necesidades reais da vila e dos seus habitantes, fronte a situación de deixadez absoluta do goberno local que practica a vagancia dunha forma constante”, denuncia. “Nós traballamos para ofrecer solucións e damos a cara atendendo as demandas dunha veciñanza que se sinte totalmente abandonada polo seu concello”, asevera antes de recordar que estarán “vixiantes para que estes compromisos unánimes se cumpran á maior brevidade posible ou volveremos á carga, porque nos debemos ó pobo e como o PP non traballa pola veciñanza desde a alcaldía, estamos a facelo os socialistas desde a oposición”.

A labor do PSdeG-PSOE de Maceda fronte o desleixo do goberno local, permitirá orzamentar axudas municipais para material escolar funxible e impreso destinado ó alumnado de educación infantil –de 3 a 6 anos– tras redactar unha sinxela ordenanza municipal que regulará a tramitación e concesión. Trátase dunha idea que o grupo municipal socialista reitera ante o pleno, posto que xa fora levada a debate con anterioridade, pero que o PP non materializou. A sesión tamén acordou demandar da empresa adxudicataria das obras na rúa da Pena unha execución correcta das mesmas, ademais de instar ó Concello a habilitar medidas de seguridade viaria para residentes e peóns, e a ordenar adecuadamente a circulación e aparcadoiros de vehículos nesta rúa.

Así mesmo, a corporación aprobou realizar un plan de prevención de danos causados por tormentas e cheas, solicitando axuda á Xunta de Galicia para a súa realización. Tamén se elaborará un estudo sobre o estado dos sumidoiros e dos desaugues naturais das vertentes dos ríos do municipio. O acordo unánime promovido polo PSdeG-PSOE tamén servirá para establecer mecanismos de control municipal sobre o mantemento da depuradora da auga da traída, así como esixir auga de calidade á empresa de abastecemento, e compensación económica ós usuarios e usuarias a causa dos prexuízos derivados dos cortes e a turbidez da auga da traída.

A portavoz cuestiona unha vez máis a absoluta falta de transparencia do goberno local conservador, que se nega a celebrar os plenos segundo o estipulado na Lei 7/1985 reguladora das Bases do Réxime Local, que determina que as sesións ordinarias do pleno terán lugar cada tres meses nos municipios de hasta 5.000 habitantes, caso de Maceda. “A falta de transparencia é absoluta porque están a convocar as sesións ordinarias totalmente fóra de prazo, cada 4 ou 5 meses, incumprindo flagrantemente a lexislación, xa que o alcalde quere furtar á veciñanza o seu dereito a estar informados, a participar activamente na vida municipal a través do pleno, mentres tamén nos coarta o exercicio do control democrático dende unha oposición construtiva”, conclúe Rodríguez.

Noela Blanco denuncia unha “complicidade escandalosa” entre Feijóo e Baltar Blanco para “manter unha rede clientelar impropia do século XXI” coas axudas da Deputación aos concellos

A nosa deputada no Parlamento galego Noela Blanco, vén de denuncia-la “complicidade escandalosa entre os gobernos de Feijóo e Baltar Blanco para manter unha rede clientelar impropia do século XXI” na Deputación. Blanco presentou unha pregunta parlamentaria denunciando que a institución provincial reparte os fondos para os concellos con criterios “clientelares”. “Basta de insultar e de faltarlle ao respecto aos alcaldes”, sinalou a deputada cando o goberno galego se negou onte a responder das prácticas da Deputación, a pesares de que esta última “trata á cidadanía como ‘de segunda’ e castiga aos que decidiron non votar ao PP”, nunha “mostra de sectarismo político”.

A compañeira apelou á “responsabilidade directa” da Xunta, por canto lle entrega fondos á Deputación e “mira para outro lado” no seu reparto, e destacou a proposta dos alcaldes da provincia, que veñen de reivindicar, diante da Deputación, un Plan Único que permita un reparto de investimentos con criterios de equidade e transparencia, criterios, xa que logo, “obxectivos, independentemente da cor política“, en lugar dos seis plans que o PP usa agora para reparti-los fondos con criterios clientelares.

Blanco lembrou que, mentres a Deputación de Lugo inclúe o 25% dos seus orzamentos para obras no Plan Único, a de Pontevedra o 27% e a de A Coruña o 43, a nosa “apenas chega ao 6%”, e advertiu de que hoxe, máis da metade dos fondos son repartidos con criterios subxectivos, poñendo como exemplo os casos de dous concellos da nosa provincia que rozan os 10 000 habitantes, no que o gobernado polo PP recibe 185 000€, e o que ten un alcalde socialista apenas 74 000, mentres que, cun Plan único, o primeiro recibiría 582 000, e o segundo 534 000.

O PSOE denuncia que o goberno de Xinzo atrasa o urxente pleno sobre a tala masiva de árbores escudándose nunha obra innecesaria adxudicada a dedo a unha empresa do entorno do PP

04/05/2017
By

A voceira do PSdeG-PSOE, Elvira Lamadestaca que o debate sobre a reforma da avenida de Celanova “sí que é urxente e necesario porque ten a meirande parte da vila en pé”

 A moción conxunta impulsada por toda a oposición municipal esixe ó grupo de goberno que se posicione en contra da tala indiscriminada de árbores, debido á alarma social xerada

 reforma pleno xinzo

Proxecto da innecesaria reforma do salón de plenos de Xinzo

 

Ourense, 3 de maio de 2017. O goberno local de Xinzo de Limia aproveita unha obra totalmente innecesaria para porse de lado ante as clamorosas demandas dos veciños e veciñas da vila ó atrasar o urxente e necesario debate sobre o vergoñento proxecto arboricida que o PP pretende executar na avenida de Celanova. E o fai escudándose nunha obra –a reforma do salón de plenos da Casa do Concello– que, para colmo, adxudicou a dedo por mais de 38.000 euros a unha empresa do entorno do PP.

Os populares están encaprichados coa tala masiva a pesar de que a meirande parte dos veciños e veciñas da vila reclaman unha reforma que non afecte dunha forma tan perxudicial ó patrimonio natural mais relevante do concello. Sen embargo, o perentorio debate da moción conxunta presentada pola oposición, na que lle esixen ao grupo de goberno que se posicione en contra da tala indiscriminada, está a ser atrasado deliberadamente porque o goberno local inutilizou o salón de plenos cunhas obras de reforma innecesarias, que foron adxudicadas por 38.187 € mediante un procedemento negociado sen publicidade –e dicir, a dedo– á empresa ‘Anquín Torre SL’, do entorno do PP. Unha vez mais, todo queda na casa.

O pasado 27 de abril celebrouse un pleno extraordinario e urxente, na sala na que se convocan habitualmente as comisións, no que unicamente se tratou o plan económico-financieiro pola desviación da regra de gasto de 2016, xa que a alcaldía se negou a introducir na orde do día a moción sobre tala, que aínda non ten data para o seu debate. Mentres, a Xunta segue a traballar con presa e sen pausa para materializar o atentado contra o patrimonio natural.

voceira do PSdeG-PSOE en Xinzo, Elvira Lama, destaca que o debate sobre a reforma da avenida de Celanova “sí que é urxente e necesario porque ten a meirande parte da vila en pé mentres que o salón de plenos foi remodelado hai 14 ou 15 anos con madeira nobre e na actualidade non precisa de cambio algún porque está en perfectas condicións”. “A vila volveu perder habitantes e nas próximas eleccións locais imos pasar de 17 a 13 concelleiros, así que non se necesita unha maior bancada para a corporación municipal, que é do que fundamentalmente trata a reforma do salón de plenos”, asegura.

Lama cree que “hai intereses escuros do alcalde” para atrasar o debate sobre un arboricidio que ninguén quere salvo o PP. “O alcalde desenténdese porque non a vai pagar pero está claro que el tivo que reclamar esa obra á Xunta de Galicia”, asevera. A concelleira e deputada provincial reclama o debate inmediato da moción conxunta presentada por todos os grupos da oposición, na que se esixe ó grupo de goberno que se posicione en contra da tala indiscriminada de árbores, debido á alarma social xerada.

A iniciativa que o goberno local quere evitar sinala que o proxecto de remodelación impulsado directamente pola consellería contempla a tala de 56 árbores, o que “a todas luces supón un atentado contra a humanización do entorno e contra o patrimonio común”. Lama insiste en que “non se trata de paralizar a remodelación, xa que dende os socialistas non estamos en contra de que se acometa esta reforma necesaria mais si que nos opoñemos a que a obra se a faga a costa de atacar sen sentido o medio natural mais singular”.

 

 

 

O PP d´O Bolo fai méritos para gañar o premio ó goberno máis nugallán de Galicia tras enviar recibos de taxas de hai 4 anos ós veciños e veciñas

02/03/2017
By

O inoperante goberno local non ten as bases de datos do padrón municipal actualizadas o que provoca importantes desaxustes no cobro de taxas 

Os socialistas do Bolo inician unha campaña informativa porta por porta para informar ós veciños e veciñas dos seus dereitos e das posibles reclamacións

 

Ourense, 1 de marzo de 2017. O portavoz socialista no Concello de O Bolo, Juan Ferreira, ven de anunciar unha campaña informativa, entre a veciñanza, para suplir a inoperancia do goberno municipal do PP. Dada a alarma social xerada entre  veciños e veciñas, ao recibírense facturas polo saneamento da auga con ata 4 anos de atraso, os socialistas decidiron indagar nas causas para informar á cidadanía dos seus dereitos. O servizo de recadación –delegado na Deputación de Ourense– e de emisión de taxas municipais, faise en base dun padrón elaborado polo concello. No caso de O Bolo todo parece indicar que o censo está desactualizado e mal feito, sen atender aos cambios que se producen nos fogares.

A “desidia” do goberno presidido por Manuel Corzo chega ata o punto de non ter as bases de datos ao día, provocando desaxustes nos cobros de taxas, algo moi prexudicial para as economías familiares bolenses. “Os veciños e veciñas tiñan que estar, a estas alturas, informados dos recibos que teñen que pagar pola depuración das augas residuais e dos seus dereitos á hora de reclamar contra os que fosen emitidos de xeito inxusto”, recordan os socialistas do Bolo. O goberno non só da a calada por resposta, senón que se desentende de toda responsabilidade, delegando na Deputación.

Dáse a circunstancia, tal como sinala o portavoz socialista, que nestes casos de delegación da recadación, a institución provincial só pode actuar en base aos datos que lle proporcione o concello, polo que a responsabilidade última é do que goberna no municipio. No caso de O Bolo “as evidencias falan de desgoberno e pura desidia”, insiste Ferreira. Dende o Grupo Municipal Socialista cren que o alcalde pode estar demasiado ocupado atendendo á imputación por presunta prevaricación administrativa coma para centrarse nas necesidades da vila, polo que lle suxiren que “deixe paso a quen si queira ocuparse dos problemas que afectan á veciñanza”.

Por todo isto, Ferreira vai iniciar unha campaña informativa, porta a porta, para aclarar dúbidas sobre os recibos emitidos con carácter retroactivo e explicar así  os dereitos de posibles reclamacións ás que poden recorrer. “Ante o abandono aos que os somete o alcalde, o Partido Socialista ofrece asistencia e axuda ante posibles casos de cobros inxustos”, conclúe.

 

O PSdeG-PSOE de Allariz propón a adopción dunha ordenanza de transparencia que asegure o acceso á información por parte da veciñanza

24/02/2017
By

 

Zaida Rodríguez, anuncia a formulación dunha pregunta en pleno para que os veciños e veciñas as coñezan as medidas do goberno local ante o grave suceso acontecido en San Mamede de Urrós

 

Ourense, 23 de febreiro de 2017. Co gallo de mellorar a saúde democrática e ser exemplo de boas prácticas, a portavoz socialista no Concello de Allariz, Zaida Rodríguez, leva, para o seu debate en Pleno, unha moción encamiñada a aprobación dunha ordenanza municipal de transparencia e acceso á información. Coa intención de que Allariz lidere a implementación de medidas que melloren a vida democrática do municipio, a voceira do PSdeG-PSOE quere que se afonde nas medidas encamiñadas a render contas ante a cidadanía. Tal como destaca, “non abonda con cumprir o estipulado na Lei de Transparencia nin cos prazos marcados polo goberno para adaptarnos á mesma, debemos ir un paso máis aló e facer realmente comprensible e accesible toda canta información sexa de interese para os nosos veciños e veciñas”.

Calquera concello, con independencia do seu tamaño, pode mellorar substancialmente en transparencia. Ese é o caso de Allariz, no que se puxeron en marcha medidas a prol dunha maior transparencia nos asuntos públicos e se apostou por estes principios. Nembargante, tal como defende a voceira socialista, non se pode perder ritmo e hai que estar permanentemente innovando e mellorando esta cuestión vital para a vida democrática.

Tal como é coñecido, o pasado 10 de decembro, rematou o prazo de dous anos concedido para adaptarse á Lei de Transparencia. Dende ese día, todos os concellos teñen a obriga legal de teren publicados, nas súas páxinas web, “de maneira clara, estruturada e entendible”, os orzamentos municipais e os salarios dos seus cargos, contratos asinados e subvencións concedidas, entre outros datos. Sen embargo, para cumprir coa normativa, non abonda con publicar estes datos, sen traballalos. “Cómpre que a información que se comparte coa cidadanía sexa comprensible, de fácil acceso e de xeito gratuíto”, engade Zaida Rodríguez. Por isto, o PSOE, insta a que o pleno adopte medidas que faciliten esa accesibilidade e comprensión.

Para os e as socialistas de Allariz, é imprescindible que para mellorar en termos de transparencia e bo goberno, se aposte pola rendición de contas ante os cidadáns. “A crise do noso modelo de democracia que vimos atravesando, onde se pon en cuestión o papel dos representantes políticos, fai que sexa máis necesario ca nunca, apostar pola transparencia na xestión e que entendamos a necesidade de combinar os instrumentos da democracia representativa cos da democracia participativa. A cidadanía non se conforma con ser un mero votante cada certo tempo, esixe participar na toma de decisións e fiscalizar as nosas accións en canto que representantes”, declara Rodríguez. Para a voceira socialista, xa non se trata dunha oportunidade de mellorar a forma de gobernar, senón dunha necesidade derivada das demandas da cidadanía, á que se debe responder dende as institucións públicas, sobre todo, dende a administración máis próxima aos veciños e veciñas. O obxectivo último é recuperar a lexitimidade perdida e a confianza cidadá así coma previr eventuais casos de corrupción e reforzar a eficiencia das administracións públicas nas que, lembremos, se xestionan os recursos de todas e todos.

Nos tempos que corren, reiteran dende o PSOE alaricano, cómpre airear as institucións, abrilas á cidadanía, que os veciños e veciñas se sintan parte da xestión diaria do seu concello. Por isto, Zaida Rodríguez, insta a que o concello de Allariz se poña á vangarda destas medidas de transparencia e bo goberno, apostando por unha administración local máis achegada ás demandas e necesidades da cidadanía. Por todo isto, os e as socialistas de Allariz reclaman ó pleno que o concello se adhira ao portal de transparencia da FEGAMP e que aprobe unha ordenanza propia de transparencia, acceso á información pública e reutilización de datos.

Asalto en San Mamede de Urrós

Nesa mesma sesión plenaria, a concelleira socialista preguntará polo acontecido na parroquia de San Mamede de Urrós, no que dous veciños foron asaltados, agredidos, torturados, extorsionados e roubados, veu a convulsionar a vida diaria dos veciños e veciñas de Allariz ao ver comprometida a súa seguranza. Respecto a este desgrazado acontecemento, os veciños e veciñas precisan coñecer, pormenorizadamente,o tipo de actuacións que se levaron a cabo para salvagardar a integridade dos e das alaricanos. O temor, fundado, que se instalou nunha poboación avellentada e dispersa, propia do noso país, fai que sexa esixible que o goberno de Allariz dea a coñecer todos as medidas postas en marcha para asegurar a protección dos habitantes do concello. Por todo isto, Zaida Rodríguez demanda, da equipa gobernante, que explique que datos manexa sobre este deplorable suceso e se foi convocada a preceptiva Xunta de Seguridade Local, tal como debe ser oportuno, dadas as circunstancias.

 

O alcalde d´O Bolo, denunciado polos socialistas, traslada a responsabilidade da súa imputación por prevaricación ós funcionarios do concello

24/02/2017
By

O rexedor do PP, que é titulado universitario e que leva 24 anos de alcalde, fíxose o sueco asegurando que descoñece a lei que o obriga a respostar e entregar copias á oposición 

A denuncia destapou feitos graves como a reiterada negativa de información sobre un cento de cuestións ou a non celebración de sesións plenarias extraordinarias

  

Ourense, 23 de febreiro de 2017. O alcalde do Bolo, Manuel Corzo (PP), declarou hoxe en calidade de investigado –imputado– por un presunto delito de prevaricación administrativa, ante a titular do xulgado de Primeira  Instancia e Instrución número 1 da Pobra de Trives, por impedir o traballo de control e fiscalización do PSdeG-PSOE dende a oposición municipal. O rexedor popular físoxe o sueco ante a xustiza, xa que descargou toda responsabilidade dos seus actos nos funcionarios, asegurando que a secretaria lle dixo que, por lei, non podía dar copia dos expedientes. Ademais, afirmou descoñecer o regulamento que obriga a dar resposta ás peticións feitas pola oposición.

Corzo, que se negou a responder á totalidade das preguntas do avogado do edil denunciante, Juan Ferreira, non explicou, entre outras cuestións, se deu orde á secretaria e unha funcionaria para que non se abrisen expedientes sobre as cuestións formuladas polos socialistas ou se denegou o acceso a información relativa ós orzamentos municipais. Sen embargo, sí manifestou, a interpelación do seu avogado, que algúns dos escritos non foron respondidos porque non dispón de persoal no concello.

Os socialistas do Bolo aseguran que Corzo, que leva 24 anos na alcaldía e que é titulado universitario, non pode escudarse no descoñecemento da lei para xustificar os seus reiterados incumprimentos dunha obriga democrática. “O alcalde amosa coñecer a lexislación cando suspende ou interrumpe os plenos durante as nosas intervencións facendo valer as súa función de presidente do pleno; pois o igual que coñece esa normativa, tamén debe coñecer a que obriga a dar trámite e a responder ás cuestións da oposición municipal”, advirten antes de recordar o principio do Dereito Ignorantia juris non excusat, é dicir, que a ignorancia da lei non escusa do seu cumprimento.

O PSdeG-PSOE deste concello denunciou o pasado mes de decembro no xulgado que o alcalde e a secretaria non facilitan, dende hai anos, a información e documentación solicitada para exercer o control da activade política e administrativa do goberno local, sobre un cento de cuestións de interese pública. Durante a instrución do caso, a xuíza ordenou que o Concello remitise testemuño da documentación relacionada cos expedientes e respostas solicitadas polos socialistas dende novembro de 2014, así como copia das instancias nas que reclamaba a celebración de plenos extraordinarios que nunca foron convocados.

A prevaricación administrativa é un delito no que un cargo público emite ou practica unha resolución inxusta a sabendas. Segundo o artigo 404 do Código Penal, a condena pode supor unha pena de inhabilitación especial para emprego ou cargo público e para o exercicio do dereito de sufraxio pasivo por tempo de nove a quince anos.

 

Os socialistas d´O Bolo denuncian no xulgado ó alcalde do PP por bloquear durante unha década solucións para potabilizar a traída de auga dunha aldea

17/02/2017
By

O servizo de control de riscos medioambientais da Xunta de Galicia ditaminou que a agua que beben os veciños e veciñas non é apta para consumo debido a parámetros microbiolóxicos

 O Valedor do Pobo abriu tres expedientes para investigar o asunto e o alcalde recoñeceulle por escrito que non adoptou ningún acordo para solucionar o problema

 

 Ourense, 16 de febreiro de 2017. Os socialistas do Bolo acaban de denunciar no xulgado unha nova falcatruada do alcalde do PP, Manuel Corzo. Desta vez, os feitos afectan directamente ós veciños e veciñas do Cruceiro das Ermitas, xa que o rexedor “obstrúe sistemáticamente a potabilización da auga” dende hai unha década, segundo se explica polo miúdo na denuncia rexistrada no xulgado de Trives, na que, ademais, se relata o carrusel de reclamacións dos habitantes da zona a diversos organismos e o propio concello sen que ninguén faga nada, a pesar de que diferentes analíticas destaparon que auga dos mananciais da zona non é apta para consumo humano por superar oS parámetros microbiolóxicos máximos.

O propio presidente da Xunta, Alberto Núñez Feijóo, manifestou mediante unha carta remitida a unha veciña o seu “compromiso”, pero tamén lle recorda que se trata dun asunto de competencia municipal. “As queixas non foron atendidas durante máis de nove anos e o rexedor puxo todo tipo de trabas”, relata a denuncia, antes de recordar que o Valedor do Pobo abriu tres expedientes para investigar os feitos.

Por outra banda, en 2014, o servizo de control de riscos medioambientais da Xunta de Galicia ditaminou que a agua dos mananciais que abastecen os habitantes da zona non é apta para consumo humano, xa que superan o parámetros microbiolóxicos máximos. O rexedor do PP xa coñecía esta grave situación de risco para a saúde a través de informes analíticos encargados polos veciños e veciñas ó Colexio de Farmacéuticos de Ourense. “O alcalde dedicouse a torpedear sistemáticamente o expediente para levar adiante a potabilización da auga”, insiste a denuncia.

Tras presentar numerosos escritos mediante rexistro e despois de levar o asunto ó pleno municipal en varias ocasións, a veciñanza está farta de ser ignorada polo alcalde, e por iso o PSdeG-PSOE decidiu levar novamente ante a xustiza o alcalde xa imputado por presunta prevaricación. Incluso se fixeron xestións coa Sociedade Provincial de Aguas e Medio Ambiente da Deputación de Ourense sen ningún resultado tácito por parte do goberno local do Bolo, que incluso recoñeceu ó Valedor do Pobo, mediante un escrito datado o 19 de decembro de 2016, que “non se adoptou ningún acordo sobre a subministración de auga ás Ermitas”.

 

O PSOE d´O Bolo consegue a unanimidade a prol da moción en defensa da venda física dos billetes de tren, contando co apoio veciñal.

01/02/2017
By

2017-01-31-PHOTO-00000317 (1)

O Grupo Municipal Socialista, após a denuncia que tiveron que presentar contra o Alcalde e Secretaria, viuse arroupado por numerosos veciños e veciñas, así coma compañeiros-as do partido.

 

O Bolo, 1 de febreiro de 2017. Onte, ás 10:30h da mañá, celebrouse o primeiro Pleno da Corporación no concello d´ O Bolo após da denuncia que o Portavoz socialista, Juan Ferreira, interpuxo contra o Alcalde e a Secretaria do concello por imposibilitar, reiteradamente, o seu labor na oposición. É coñecido que o auto recolle os feitos que resultan das actuacións denunciadas, fan presumir a posible existencia dun delito de prevaricación administrativa. Na denuncia, Juan Ferreira, tamén, fai referencia á reiterada negativa a contestar, aproximadamente, 100 peticións de información, extremo este que provocou que no auto se faga unha petición ao Xulgado de toda a documentación solicitada dende o 2014.

 

A pesares da merma democrática que teñen que soportar no exercicio das súas funcións, o Grupo Municipal Socialista d´ O Bolo, presentou unha moción a prol do mantemento da venda física de billetes nas estacións da comarca, que foi aprobada por unanimidade no Pleno celebrado hoxe. Tal iniciativa foi apoiada coa presenza de numerosos veciños e veciñas, preocupados por esta nova afronta á cidadanía da comarca. Os socialistas consideran intolerable esta decisión xa que, unha vez máis, supón un castigo a unha comarca con importantes carencias en servizos públicos de mobilidade e unha importante fenda dixital que dificulta o acceso dos veciños e veciñas das zonas rurais aos servizos de venda en liña.

 

Juan Ferreira quixo agradecer, unha vez rematado o Pleno, a asistencia de compañeiros-as socialistas, así coma veciños-as, facendo que se sentiran arroupados, despois de teren sufrido tantas actitudes antidemocráticas por parte do Alcalde e Secretaria. O Grupo Municipal Socialista quere destacar que, a pesares das trabas, seguirán traballando a reo e levando adiante todas aquelas iniciativas que beneficien os intereses da veciñanza.

 

O Concello de Castrelo do Val vén de renovar a súa páxina web e muda o seu dominio ao .gal, o dominio galego en internet.

16/05/2016
By

O Concello de Castrelo do Val vén de renovar a súa páxina web, e mellora a súa arquitectura da información para ofrecer un mellor servizo aos cidadáns.

Na nova web cobra especial importancia a transparencia da información municipal, e por ese motivo estarán dispoñibles os datos económicos.

Ademais, tamén será posible coñecer, un a un, os dezaséis núcleos de poboación que conforman o noso concello, na sección “os nosos pobos“.

Tamén está dispoñible para todos os veciños o arquivo histórico das revistas municpais que edita o propio concello e que reparte en papel aos seus veciños, na sección “revista de información muncicipal

A “Estela de Pedra Alta” tamén terá o seu oco nesta páxina web, con información sobre o achádego arqueolóxico

Aproveitando o lanzamento da nova web, o concello muda o seu dominio ao .gal, o dominio galego en internet.

O DECRETO 74/2015, do 13 de maio que regula a organización da presenza na internet na administración galega baixo o dominio .gal. Este decreto será de aplicación a todos os órganos e entidades da Administración xeral e do sector público autonómico de Galicia. A finalidade é a proxección dunha imaxe homoxénea da presenza da Administración xeral e do sector público autonómico baixo o dominio .GAL.

Con esta medida, a web do concello pasa a ser castrelodoval.gal, e convértese no primeiro concello da comarca en asumir o .gal como dominio principal para a súa presenza en internet.

 

O Alcalde do Irixo convoca o Pleno, con máis dun mes de atraso, o único día da semana que o Voceiro socialista non pode acudir, tal coma avisara por escrito.

16/03/2016
By

Iago_Fariñas_Valiña (1) (1)

NA CONVOCATORIA DO PLENO NON INCLÚE 7 DAS 10 MOCIÓNS PRESENTADAS POLOS SOCIALISTAS

IAGO FARIÑAS: ” TEMOS UN ALCALDE ANTIDEMOCRÁTICO E RETRÓGRADO QUE DESPOIS DE 30 ANOS PENSA QUE O CONCELLO É DA SÚA PROPIEDADE  E TENTA DIFICULTAR E OCULTAR O TRABALLO DA OPOSICIÓN”

OS TRES GRUPOS DA OPOSICIÓN SOLICITARÁN UN PLENO EXTRAORDINARIO AO QUE O ALCALDE NON SE PODE NEGAR, PARA TRATAR TODOS OS TEMAS E MOCIÓNS QUE O GOBERNO, COA SÚA ACTUACIÓN DESPÓTICA, TENTA AGOCHAR

 

O Voceiro do Grupo Municipal socialista no concello do Irixo, Iago Fariñas Valiña, presentou, dende o último pleno celebrado pasado 24 de Novembro de 2015, un total de 10 mocións como Grupo Socialista e unha en conxunto co resto de grupos da oposición. As 10 mocións socialistas son as que seguen;

  • MOCIÓN DE APOIO Á VIVENDA COMO BEN SOCIAL, presentada o 31 Decembro 2015.

  • MOCIÓN SOBRE A DERROGACIÓN DA LEI 27/2013, DO 27 DECEMBRO (LRSAL) , presentada o 31 Decembro 2015.

  • MOCIÓN SOBRE O FOMENTO DA NATALIDADE CUNHA AXUDA DE TRES MIL EUROS AOS NENOS NACIDOS NO IRIXO, presentada o 31 Decembro 2015.

  • MOCIÓN SOBRE O USO POR TÓDOLOS VECIÑOS E VECIÑAS DA MAQUINARIA MUNICIPAL RETROESCAVADORA  E TRACTOR DESBROZADOR, presentada o 31 Decembro 2015.

  • MOCIÓN SOBRE A CREACIÓN DUN PORTAL WEB DO CONCELLO DO IRIXO, presentada o 12 Febreiro de 2016.

  • MOCIÓN SOBRE A SOLICITUDE ÁS ENTIDADES OU AXENTES BANCARIOS PARA A INSTALACIÓN DUN CAIXEIRO AUTOMÁTICO NAS SÚAS OFICINAS, presentada o 12 de Febreiro de 2016.

  • MOCIÓN RELATIVA Á REVISIÓN CATASTRAL DO CONCELLO DO IRIXO, presentada o 19 de Febreiro de 2016.

  • MOCIÓN RELATIVA Á MOCIDADE E EMPREGABILIDADE NO CONCELLO DO IRIXO, presentada o 19 de Febreiro de 2016.

  • MOCIÓN RELATIVA Á ADQUISICIÓN PARA A SÚA CONSERVACIÓN E POSTA EN VALOR DAS CASAS REITORAIS ABANDONADAS NO CONCELLO DO IRIXO, presentada o 4 de Marzo.

  • MOCIÓN RELATIVA Á  CELEBRACIÓN DOS PLENOS DO CONCELLO AS FINS DE SEMANA E/OU EN HORARIO DE TARDE E NUNHA DATA PREFIXADA PARA TODO O MANDATO NO CONCELLO DO IRIXO, presentada o 11 de marzo de 2016.

 

O Alcalde do Irixo só incluíu 3 destas  10 mocións presentadas polo Grupo Socialista, ao seu libre albedrío e tenta ocultar e cercenar o traballo dos socialistas, elaborando, despoticamente, a orde do día do Pleno Municipal.

Ademais, o Alcalde vén de convocar un Pleno para este vindeiro Xoves 17 de Marzo de 2016  no que, ademais de so incluír 3 das 10 mocións presentadas polos socialistas nas ultimas datas, trátase do único dia da presente semana que o Voceiro socialista non pode asistir por un compromiso profesional a esa mesma hora nos Xulgados da Coruña, tal como lle indicou por escrito.

Os socialistas, xa o pasado 26 de Febreiro, ante a falla de información sobre a convocatoria do Pleno, dado que o último se celebrara o 24 de Novembro do ano 2015, informaron por escrito a Alcaldía que; “…para o coñecemento do Sr. Alcalde-Presidente convocante, infórmase que este concelleiro por motivos profesionais, sen prexuízo de novos compromisos profesionais que xurdan dende hoxe á convocatoria do pleno, non podería asistir ao pleno no mes de Marzo os días que se sinalan; martes 1 de Marzo, luns 7 de Marzo, mércores 9 de Marzo, xoves 10 de Marzo, sábado 12 de Marzo, domingo 13 de Marzo, xoves 17 de Marzo, sábado 26 de Marzo e 29 de Marzo de 2016…” E no que solicitaba, entre outras cuestións “…atendendo a que a maioría temos obrigas profesionais que nos impiden conciliar a nosa actividade profesional coa municipal, no seu caso de convocarse Pleno no mes de Marzo de 2016, non se faga nas datas indicadas…”

Ante a actitude despótica do Sr. Alcalde, do seu Tenente-Alcalde, que é o que actualmente dirixe o día a día do Concello, e o seu grupo de goberno; os tres grupos da oposición solicitarán un Pleno Extraordinario, ao que o alcalde non se pode negar, para tratar todos os temas que o Voceiro socialista non poderá defender no vindeiro Pleno, uns, debido a que non pode asistir e, outros, porque non foron incluídos na orde do dia polo Sr. Alcalde. Ademais, coa convocatoria de Pleno Extraordinario, poderanse incluír outros moitos asuntos que os tres grupos da oposición consideran importantes e dos que, o grupo de goberno, ante numerosos escritos reclamando información, gardan silencio dende hai meses.

Lamenta, o Voceiro socialista, que o grupo de goberno do Irixo actúe de forma despótica, con falta de transparencia e bo goberno. Considera unha mágoa que esteamos ante un goberno que ten ao Irixo, paralizado dende hai décadas e todo isto, a pesares de aumentaren os traballadores do Concello e dispoñer de dous Alcaldes remunerados que suman un gasto mensual de 4.059,43 euros/mes, por 14 pagas ao ano, o que supón un gasto total para o Concello de 56.832,02 € por tres adicacións parciais. Ao tempo, non se respectan os dereitos dos concelleiros da oposición e non cumpren coas súas obrigas legais.