Posts Tagged ‘ PP ’

Denunciamos o desleixo da Xunta ante as pragas que asolan Ourense


Solicitan crear e aumentar partidas económicas e liñas de axuda e a creación dun centro de investigación fitopatolóxica en colaboración coa universidade, para que realice traballos de prevención e loita

Denuncian que a Xunta claudicou resignada e nin tivo nin ten un protocolo efectivo de actuación global para evitar estas pragas, así como problemas de persoal e material

bee-close-up-fictional-37144

Ourense, 6 de agosto de 2018. O PSdeG-PSOE de Ourense denuncia o desleixo da Xunta de Galicia ante as invasións de vespa asiática, vespa do castiñeiro e praga do carballo que está a sufrir a provincia, e reclámanlle ó goberno galego –que ten as competencias nesta materia– a inmediata declaración de praga, así como a adopción de medidas máis eficientes de prevención, control e información. A secretaría provincial de medio ambiente destaca que a “falla de reacción e a absoluta incapacidade do PP para facer fronte á incontrolada expansión destas especies, está asolando os campos e xa está a producir importantes danos a sectores primarios, debilitando aínda máis o sustento económico das nosas zonas rurais”.

Os socialistas critican que o Goberno galego non se está a tomar as medidas científicas, sociais e económicas necesarias, deixando boa parte da problemática en mans dos concellos, moitos xa desbordados. Por iso solicitan crear e aumentar as partidas económicas e liñas de axuda. Así mesmo reclaman a creación dun centro de investigación fitopatolóxica na provincia, en colaboración coa universidade, para que realice traballos de prevención e loita destas pragas. Tamén demandan máis persoal; a posta en marcha plans de información, formación e prevención sobre a invasión destas especies; e a mellora dos contratos e as metodoloxías dos traballos que realizan as empresas que están a loitar contra estas pragas. Así mesmo recordan que hai meses que se aprobaron iniciativas no Concello e na Deputación de Ourense nas que se instaba a implementar medidas máis efectivas.

“A Xunta, que nin tivo nin ten un protocolo efectivo e de actuación global para evitar a chegada destas pragas, claudicou resignada e parece asumir que estas especies foráneas viñeron para quedar definitivamente”, aseveran desde o PSdeG-PSOE antes de denunciar problemas de persoal. A desorganización dos responsables do PP está a provocar situacións absurdas: moitos niños non poden ser retirados de árbores rodeadas de maleza porque o persoal contratado para retirar niños non pode rozar esa vexetación xa que a Xunta non lles paga ese traballo.

Achegamos un breve resumo facilitado pola secretaría provincial de medio ambiente do PSdeG-PSOE, sobre os efectos destas pragas:

Efectos da vespa asiática

A vespa asiática ten incidencia directa sobre a fauna local, a polinización e os produtos agrícolas. Son moitas as froitas que son roídas, mordidas e comidas (uvas, peras, mazás, figos ou kiwis), particularmente en froiteiras próximos aos niños. Na apicultura constatouse que houbo unha redución do censo de apicultores de ata o 26%; descensos da poboación de abellas ou incluso a morte da totalidade das colonias nalgúns colmenares; falla de pole e mel no outono ou importantes déficits nas reservas de alimentos, problemas que repercuten seriamente na economía deste sector.

Efectos da vespiña do castiñeiro

A vespiña do castiñeiro produce unhas tumoracións nos brotes das diversas especies de castiñeiro. Estas tumoracións causan un enfraquecemento xeral da árbore que o fan máis susceptible a outras pragas e enfermidades, chegando mesmo, en situacións extremas, a ocasionar a morte. O seu principal efecto é a perda de produción, danando un sector esencial na economía da provincia, tanto na súa produción como no sector de secundario transformación e elaboracións de produtos con castaña ( fariñas, bicas e marrón glace. Tras localizarse en Cataluña en 2012, nun lustro xa colonizou a práctica totalidade das rexións castañeiras de España, non tanto polo voo do insecto senón polo transporte de árbores infectadas.

Efectos da praga dos castiñeiros

Os ataques da Altica Quercetorum Foudr. que sofren os carballos provócanlles a desfoliación, un efecto que ocasiona un dano visual e paisaxístico que pode danar o turismo rural. Ademais, os bosques infestados poden sufrir ataques de Mycrosphaera alphitoides (Oidio do carballo), o que ocasiona un gran enfraquecemento das masas que se podería traducir en posibles ataques de insectos xilófagos e, en consecuencia, na morte dos pés afectados.

O PSdeG-PSOE de Ourense denuncia que os orzamentos do Estado son un espellismo para Ourense creado por un Partido Popular que se desentende da provincia

O PSdeG-PSOE ven de denunciar que os orzamentos xerais do estado de 2018 son, para Ourense, un espellismo creado por un Partido Popular que se desentende do futuro da provincia.Aa deputada no Congreso, Rocío de Frutos Madrazo, e o secretario provincial, Rafael Rodríguez Villarino, aseguran que “os populares, ano tras ano, cegan a mirada dos ourensáns con cifras fabulosas de inversión na liña do AVE que logo non se executan, mentres propoñen gastos en inversións pírricas e alleas ó desenvolvemento real. Para os dirixentes do PP, o futuro de Ourense non existe”.

Sinalan que “ó longo dos anos de goberno, o PP segue un manual no que se prometen de xeito sistemático grandes inversións, sabendo que nunca se realizarán, porque a finalidade real é tratar de liquidar débeda”. Proba desta estratexia simuladora son os 120.000 millóns que deixaron sen executar desde 2012, dos que uns 2.000 corresponden a Galicia nos catro últimos anos, a maior parte para o tren de alta velocidade en Ourense. De feito, na pasada anualidade só se gastaron 3,4 dos 461 millóns orzamentados para o ferrocarril.

Así, destacan que os investimentos estratéxicos se limitan a dous eclesiásticos e dous museisticos, no mosterio de Melón e en Santa Comba de Bande, así como a cartos insuficientes para o eternamente pechado museo arqueolóxico e o arquivo histórico.  “Unha boa nova sería levar á práctica a inversión prevista para a alta velocidade, a pesares de que non serva para xerar desenvolvementos produtivos rematadas as obras. Trátase dunha intervención que transcorre pola provincia e non dunha inversión finalista para o desenvolvemento de Ourense”.

“Nós non pretendemos realizar ilusionismo político, queremos presupostos executables e axustados ás necesidades de desenvolvemento da nosa terra”, afirman Rodríguez Villarino e de Frutos Madrazo. “Non entendemos a quen se sente a gusto cuns orzamentos ilusorios e pobres ata a exasperación, a nivel de desenvolvemento estratéxico. Ao parecer, eles están a gusto con estes orzamentos inflados, enganosos e desapegados do futuro das nosas fillas e dos nosos fillos, pero nós non”, insisten.

Ante unhas cifras tan vergoñentas, o PSOE presenta emendas estatais con efecto directo en Galicia por valor de 142 millóns de euros, e o PSdeG-PSOE de Ourense propón 56 emendas de adición, que contemplan actuacións estratéxicas provinciais que suman case 78 millóns.

coins-1015125_640

Emendas concretas

No sector agrícola formúlanse cinco intervencións de 37 millóns, destacando os 26 millóns para o regadío na Limia; tres millóns de apoio ás denominacións de orixe vitivinícolas; e 2,5 millóns para o plan da castaña. O apartado medioambiental acumula emendas por valor de 8,7 millóns, entre as que destacan dous millóns para a recuperación do Parque Natural do Xurés, e 1,5 millóns para a recuperación do embalse das Conchas e o río Támega.

No que respecta á liña de AVE, as emendas do socialismo ourensán engaden 4,6 millóns € para a estación intermodal, sen esquecerse dos 10 millóns e os  150.000 € necesarios para un plan de implementación do ferrocarril de cercanías na área da cidade de Ourense. O eido das infraestruturas viarias inclúe tres millóns para a mellora integral da A-52, así como inversións na A-56  no tramo Cambeo-Ourense que, xunto a outras, totalizan case 10 millóns.

A proposta socialista aposta polo termalismo, para o que se solicita unha partida de 7 millóns. Tamén impulsa o patrimonio con perspectivas turísticas, ó reclamar case 10 millóns en total, destacando tres millóns para o museo arqueolóxico (fronte aos 400.000 do PP); dous millóns para o plan director do románico, e a mesma cantidade para o futuro museo do viño de Ribadavia. Por outro lado, entre as emendas estatais específicamente para Galicia destacan o plan integral de emprego (100 millóns); o plan de prevención de incendios e rexeneración forestal (25 millóns); o plan de supresión de pasos a nivel (10 millóns); e o programa do Camiño de Santiago (dous millóns).

 

O PSdeG-PSOE de Ourense apoia a folga indefinida na xustiza galega ante a bochornosa desvergoña da Xunta cos empregados e empregadas públicas

Membros da executiva provincial acudiron á concentración celebrada hoxe nos xulgados de Ourense, en solidariedade coas reivindicacións dun colectivo discriminado con respecto ao resto do Estado

Os socialistas din que: “é un paro nacido da dignidade dun sector que ve como se pisotean os seus dereitos e non se atenden as demandas de aumento de persoal que redundaría en beneficio de todas e todos”

WhatsApp Image 2018-02-09 at 13.14.35 (1)

 

Ourense, 9 de febreiro de 2018. O PSdeG-PSOE de Ourense apoia  e secunda a folga indefinida dos e das empregados e empregadas públicas da xustiza galega na súa loita contra os recortes que leva practicando o goberno de Núñez Feijóo desde hai 5 anos. Membros da executiva provincial do PSOE acudiron á concentración celebrada hoxe nos xulgados de Ourense, en solidariedade coas xustas reivindicacións dun colectivo discriminado con respecto ao resto do Estado. Os socialistas reclaman, ademais, que o goberno autonómico se sente a negociar e acabe coa folga para evitar que se produzan máis atrasos nos procedementos xudiciais.

Desde o PSdeG-PSOE consideran que esta folga iniciada o pasado mércores 7 de febreiro “é un paro nacido da dignidade duns traballadores e traballadoras que ven como se conculcan os seus dereitos salariais e como non se atenden as súas demandas de aumento de persoal que redundaría en beneficio de todas e todos”. O malestar do colectivo de empregados e empregadas públicos da xustiza que xa provocara xornadas de protesta anteriores ven xustificado polo maltrato continuo que exerce o goberno da Xunta de Galicia sobre uns 2.500 funcionarios e funcionarias xudiciais, aplicando desde hai anos recortes que levaron a unha redución de salario dun 20%.

Os e as socialistas consideran que esta folga vai provocar aínda máis lentitude nuns xulgados ateigados de traballo e non entenden que provoca a pasividade da Xunta ante unhas reivindicacións que están sendo secundadas por unha media do 95% do persoal. Desde o PSOE consideran que o goberno de Feijóo, asemade, está sendo contraditorio coas propias consignas do Partido Popular posto que “se eles andan pregoando que xa chegou a recuperación económica non se entende que non se lles devolva o equivalente á redución que lles foi aplicada entre os anos 2013 e 2016”. “Ademais falamos da única comunidade do Estado español na que se aplicou este recorte salarial sobre o colectivo de traballadores/as xudiciais cuxo salario depende en parte do goberno autonómico”, destacan.

Por outra banda, os socialistas indican que os sindicatos falan de reclamacións de subas salariais do 16% co obxectivo de recuperar parte dos cartos perdidos cando se lles aplicaron as reducións. É dicir, están a reclamar unha suba que está 4 puntos por baixo da porcentaxe que se lles aplicou no seu momento. Ademais, coidan que sendo os e as empregados e empregadas da xustiza galega, os e as únicos en sufrir estes retallos que oscilaron entre os 10.000 e 3.500 euros por traballador, están a padecer unha clara discriminación e desvantaxe comparativa. Porén, este colectivo tamén reclama a actualización dos seus salarios, toda vez que levan desde 2010 sen facelo.

De todos xeitos, segundo denuncian os propios sindicatos dos e das traballadores e traballadoras, o presidente da Xunta non só fai caso omiso das reivindicacións senón que ata parece usar a prepotencia ante colectivo agraviado. No día de onte retou ás organizacións sindicais a que cuestionaran a súa oferta de suba salarial cando, coas cifras na man, o goberno autonómico oferta un aumento para aplicar aínda no ano 2021 que deixaría aos e ás empregados públicos xudiciais por debaixo da media do que se cobra no resto dos territorios estatais na actualidade, sen contar coas subas que se lles efectúen no resto do Estado. Desde o PSdeG-PSOE ourensán conclúen que Feijóo falta á súa responsabilidade como máximo gobernante deste país ao permitir que continúe unha folga que vai prexudicar ao conxunto de toda a sociedade, mentres el non atende as xustas reclamacións laborais e de mellora do servizo dun colectivo especialmente castigado polo goberno galego.

O Concello de Vilardevós volta a perder unha subvención, desta vez básica na loita contra os incendios

Os socialistas de Vilardevós denuncian que o goberno municipal voltou a perder unha subvención moi necesaria para os intereses do Concello. Desta volta, o desleixo municipal afecta á loita contra os incendios, lacra que verán tras verán asedia a zona de xeito moi especial, e, concretamente, non se dispón de condutor do tractor-desbrozadora ao non lIe ter solicitado a correspondente subvención á Deputación.

Interpelado polo Grupo Municipal Socialista no último pleno, o alcalde tivo que recoñecer que non pedira a axuda provincial porque, segundo el, a Deputación o usa para Iimpa-las cunetas das estradas provinciais. Porén, mentres o goberno municipal do PP acusa ao goberno provincial, do seu mesmo partido, de facer un mal uso dun recurso do Concello, a maleza segue a medrar nos camiños Vilardevós.

O voceiro socialista no concello, Julio Prada, denuncia que “mentres eles dirimen as súas diferenzas e o noso alcalde pasa de conseguir recursos vitais para o municipio, os veciños seguen sen o servizo por falta de cartos para contratar ao condutor, e hai moitas áreas sen limpar expostas a que prenda o lume nelas”.

O contrato que se derivaría da percepción da subvención suporía un posto de traballo de tres a catro meses de duración, que redundaría no beneficio de todo o concello, que contaría así cun servizo de maquinaria especializada para face-las rozas contra os incendios.

Asemade, o Concello de Vilardevós non foi quen de reunir este ano xente suficiente para conforma-la brigada anti-incendios que se contrata cunha subvención da Xunta, co que tiveron que publicar de novo as súas bases. Tal como denuncian os compañeiros: “metidos xa en agosto, non contamos nin con brigada nin con tractor para rozar: a desprotección fronte aos lumes é practicamente absoluta”.

Nestes intres, o Concello só conta, en materia de loita contra o lume, cunha subcontrata feita a través dunha empresa de construción, que só permite destinar a face-las rozas a dúas persoas usando desbrozadoras de man. Como resultado destas decisións, as rozas feitas hoxe por hoxe no municipio de Vilardevós, resultan claramente insuficientes.

A pesares de que o historial de perdas de subvencións por parte do goberno municipal de Vilardevós é notorio e crecente, non deixa de sorprender que nin sequera estean cómodos coas subvencións dos seus propios compañeiros do PP, de xeito que lle aquel lle pon pegas a todo, deixando aos veciños “a velas vir”. Así, ao desleixo habitual que fai perder axudas, tamén da Deputación, para actividades físico-deportivas, hai que suma-lo inflado das cantidades solicitadas, coa conseguinte perda das propias subvencións: non hai moito que se pediu unha axuda para facer un parque engomado, que custou máis do dobre que o mesmo tipo de parque no veciño Concello de Oímbra.

Os socialistas, xa que logo, denunciamos que a mala xestión e o desleixo, están a levar a unha perda progresiva de recursos para un concello precisado deles, ademais de servizos esenciais para o medio natural a e a seguridade das persoas.

Os socialistas da cidade estudan emprender accións xudiciais en relación coa tramitación do proxecto de estación para o AVE

O pasado 31 de maio, o Grupo Municipal Socialista no Concello da cidade presentou catro alegacións relativas a tramitación do “Proxecto Integrador da Estación Intermodal de Ourense”, en cadansúa relación a:

- os sobrecustos das partidas de investimento para a adaptación da estación ferroviaria actual

- os sobrecustos das partidas de investimento da nova estación de autobuses

- as consecuencias xurídicas da recualificación de terreos da actual estación de autobuses para aproveitamentos lucrativos prevista no Proxecto Integrador

- o incumprimento, por parte do Ministerio de Fomento, do Protocolo asinado o 12 de abril do 2011 co Concello de Ourense para a integración do ferrocarril no seu territorio

Todas estas alegacións foron rexeitadas polo goberno municipal encabezado por Xesús Vázquez, claudicando novamente fronte os intereses do Ministerio de Fomento, do ADIF e, en definitiva, do PP.

Pero para os socialistas, ditas alegacións continúan a manter lexitimidade, sobre todo a partir da mobilización social que se está a desenvolver en contra do proxecto de estación intermodal imposto polo PP.

Ademáis, consideramos que o alcalde Xesús Vázquez asumiu lexitimamente competencias que son propias do Pleno do Concello, cando o 22 de xuño do 2016 asinou un Convenio-Marco de Colaboración co Ministerio de Fomento, a Xunta de Galicia e ADIF, para o desenvolvemento dunha futura estación intermodal, convenio que é parte substantiva do Proxecto Integrador da Estación Intermodal de Ourense, pois dito acordo obrigaba ao Concello en compromisos urbanísticos e económicos para os que non está habilidado o alcalde, ao ser estas cuestións competencias exclusivas do Pleno.

Por todos estes motivos, o Grupo Municipal Socialista no Concello da cidade está a estudar accións xudiciais contra a tramitación do “Proxecto de Estación Intermodal” do AVE, co obxectivo de preservar os lexítimos intereses dos ourensáns.

O PSdeG-PSOE de Boborás denuncia que o desleixo do goberno local do PP cunha aldea impide o paso de ambulancias ante unha emerxencia

27/02/2017
By

Os socialistas deste municipio da provincia de Ourense xa recolleron e rexistraron no concello as sinaturas dos veciños e veciñas nas que mostran o seu malestar e preocupación

Hai meses que o goberno local prometeu arranxar estes calamitosos camiños pero, polo de agora, esas promesas non pasaron de palabrería barata

foto_boboras

 

Ourense, 26 de febreiro de 2017. Os socialistas de Boborás denuncian que “desleixo” do goberno local do PP cos calamitosos camiños da aldea de arriba de Pazos de Arenteiro, está a por en grave risco a seguridade dos veciños e veciñas, xa que no caso dunha emerxencia sanitaria, unha ambulancia non pode chegar ata as vivendas. Os habitantes desta zona reclaman que remate o “abandono” ao que están sometidos por parte do goberno municipal.

E que, hai meses que o goberno local prometeu arranxar estes camiños pero, polo de agora, esas promesas non pasaron de palabrería barata, a pesar de que durante o inverno, as sendas se volven moi perigosas pola choiva e polas evidentes deficiencias. O socialista, Javier Lamas, recorda que “aínda que o turismo non chega á aldea de arriba de Pazos, esta obra é moi necesaria porque alí vive xente de avanzada idade, co risco que comporta para a súa seguridade andar a diario por camiños en estado ruinoso ou os graves problemas de acceso dos servizos de emerxencia”.

O PSdeG-PSOE de Boborás recorda que “non hai escusas para atrasar máis o arranxo porque a veciñanza cedeu numerosos muros para as obras prometidas por edís e cargos do PP en numerosas ocasións”. Durante os últimos meses, os socialistas deste concello de Ourense recolleron e rexistraron as sinaturas dos veciños e veciñas para que, tanto o alcalde, Cipriano Caamaño, coma o seu equipo de goberno, teñan constancia documentada do malestar e non se dediquen a desmentir o evidente problema de acceso pero, sobre todo, as deficiencias de seguridade que se están a dar na aldea de arriba de Pazos. “O peor de todo e que o PP tampouco ten intención de facer nada, segundo as propias palabras da concelleira, Patricia Torres, que dixo que estaban en perfecto estado”, insiste Lamas.

Os habitantes están indignados co trato que están a recibir do executivo local do PP, que traballou activamente nos camiños e espazos públicos da aldea de abaixo, pero non fixo “absolutamente nada” na aldea de arriba. Unha mera comparativa fotográfica do estado actual das sendas nas dúas aldeas destapa a “evidente e intolerable marxinación” a que están sendo sometidos, cos riscos  que implica esta inacción municipal da que alertan os socialistas.

 

Os socialistas d´O Bolo denuncian no xulgado ó alcalde do PP por bloquear durante unha década solucións para potabilizar a traída de auga dunha aldea

17/02/2017
By

O servizo de control de riscos medioambientais da Xunta de Galicia ditaminou que a agua que beben os veciños e veciñas non é apta para consumo debido a parámetros microbiolóxicos

 O Valedor do Pobo abriu tres expedientes para investigar o asunto e o alcalde recoñeceulle por escrito que non adoptou ningún acordo para solucionar o problema

 

 Ourense, 16 de febreiro de 2017. Os socialistas do Bolo acaban de denunciar no xulgado unha nova falcatruada do alcalde do PP, Manuel Corzo. Desta vez, os feitos afectan directamente ós veciños e veciñas do Cruceiro das Ermitas, xa que o rexedor “obstrúe sistemáticamente a potabilización da auga” dende hai unha década, segundo se explica polo miúdo na denuncia rexistrada no xulgado de Trives, na que, ademais, se relata o carrusel de reclamacións dos habitantes da zona a diversos organismos e o propio concello sen que ninguén faga nada, a pesar de que diferentes analíticas destaparon que auga dos mananciais da zona non é apta para consumo humano por superar oS parámetros microbiolóxicos máximos.

O propio presidente da Xunta, Alberto Núñez Feijóo, manifestou mediante unha carta remitida a unha veciña o seu “compromiso”, pero tamén lle recorda que se trata dun asunto de competencia municipal. “As queixas non foron atendidas durante máis de nove anos e o rexedor puxo todo tipo de trabas”, relata a denuncia, antes de recordar que o Valedor do Pobo abriu tres expedientes para investigar os feitos.

Por outra banda, en 2014, o servizo de control de riscos medioambientais da Xunta de Galicia ditaminou que a agua dos mananciais que abastecen os habitantes da zona non é apta para consumo humano, xa que superan o parámetros microbiolóxicos máximos. O rexedor do PP xa coñecía esta grave situación de risco para a saúde a través de informes analíticos encargados polos veciños e veciñas ó Colexio de Farmacéuticos de Ourense. “O alcalde dedicouse a torpedear sistemáticamente o expediente para levar adiante a potabilización da auga”, insiste a denuncia.

Tras presentar numerosos escritos mediante rexistro e despois de levar o asunto ó pleno municipal en varias ocasións, a veciñanza está farta de ser ignorada polo alcalde, e por iso o PSdeG-PSOE decidiu levar novamente ante a xustiza o alcalde xa imputado por presunta prevaricación. Incluso se fixeron xestións coa Sociedade Provincial de Aguas e Medio Ambiente da Deputación de Ourense sen ningún resultado tácito por parte do goberno local do Bolo, que incluso recoñeceu ó Valedor do Pobo, mediante un escrito datado o 19 de decembro de 2016, que “non se adoptou ningún acordo sobre a subministración de auga ás Ermitas”.

 

Os Socialistas da comarca do Carballiño acoden á área afectada polo incendio que sacudiu ao Concello de Boborás, na semana pasada.

19/09/2016
By

Dende Brués, esixen un cambio inmediato na política forestal e de loita contra os incendios da Xunta, baseada na extinción e non na prevención.

A candidata ao Parlamento de Galicia, María Quintas, declarou que: “Galicia rexistra a metade dos incendios forestais do Estado e Ourense, en concreto, a metade dos de Galicia, namentres isto acontece, a Xunta segue sen desenvolver políticas activas de aproveitamento dos nosos montes”.

IMG_5830

O sábado pasado, pola tarde, os compañeiros e compañeiras da Agrupación Socialista de Boborás, convidaron ao resto dos compañeiros  da comarca do Carballiño así coma á candidata ao Parlamento de Galicia e S.O. provincial, María Quintas a realizar un recoñecemento da área afecta polo gran lume que afectou á zona de Brués, entre outros lugares do Concello de Boborás, na semana pasada. A desolación que produce a visión da zona arrasada polas lapas só é comparable ao pánico que experimentaron os veciños e veciñas da zona. O lume chegou a estar ao pé das casas e vivíronse escenas de verdadeiro perigo para a poboación. Tal como denunciaron dende a Agrupación Socialista de Boborás, os medios de extinción tardaron unhas 3 horas en chegar ao lugar do incendio, desbordados, nesa mesma tarde, por numerosos lumes ao longo da provincia de Ourense, no que supuxeron os peores días para o monte ourensán. De todos os xeitos, os socialistas de Boborás queren agradecer a todos os bombeiros forestais, brigadas e veciños/as que estiveron loitando contra o lume dende o primeiro minuto, no que pareceu un incendio claramente intencionado, á espera que se aclaren as causas. A desesperación foi absoluta e o risco moi alto para a integridade dos habitantes dos lugares afectados e para as vivendas e fincas da contorna. Como xa indicaron, dende o PSOE de Boborás, nos pasados días, non chega cun bando municipal que indique a necesidade de limpar o perímetro dos fogares, senón que se precisa unha política municipal máis activa que procure axuda alí onde os recursos propios non chegan e demande da Xunta asistencia na limpeza e roza da contorna, antes que chegue o período de alto risco de incendio. “A zona afectada causa un grande impacto e unha sensación absoluta de desolación e esiximos que se actúe dunha vez por todas e se adopten medidas de prevención e aproveitamento forestal dos nosos montes, no canto de lamentar as consecuencias”, indicou Francisco Fraga, deputado provincial presente onte pola tarde.

Pola súa banda, María Quintas, candidata ao Parlamento de Galicia por Ourense nestas vindeiras eleccións, declarou, baseada na súa experiencia como deputada autonómica, que: “A única política da Xunta de Galicia é a baseada na extinción. E, mesmo esta, está a sufrir unha fragmentación dende que Feijóo é Presidente, que a fai cada vez máis cara e inoperativa. Hoxe en día, no servizo de extinción traballan, o persoal da Xunta, SEAGA, Brigadas Municipais, GES e empresas privadas como INAER e NATURTECNIA. Trátase dun operativo totalmente ingobernable e carente de toda eficacia”. Tamén engadiu que a contratación de persoal de extinción de incendios perdeu a fin que debería ter e pasou a ser unha política de contratación pura e dura para os Concellos e para a Xunta. Estanse a empregar fondos europeos, destinados á prevención e á extinción, para, no mellor dos casos, ter patrullas de Protección Civil. Respecto da política de prevención, os socialistas manteñen que non existe coma tal, non hai nin unha planificación de cultivos forestais nin de ordenación do territorio. A Dirección Xeral gasta o seu orzamento en apagar os lumes, indican dende o PSOE, non en previlos nin en políticas sostibles, non se potencia a investigación nin se preocupan, dende a Xunta, en coñecer e detectar as causas para poder aportar solucións a un problema que acaba cos bens naturais da nosa terra.

Tal como explica María Quintas, Galicia rexistra a metade dos incendios forestais do Estado e Ourense, en concreto, a metade dos de Galicia, aumenta a superficie queimada e aumentan os incendios de máis de 500 Ha que son máis virulentos e perigosos para a poboación. Namentres esto acontece, o monte galego e, particularmente, o ourensán segue sen aproveitar e sen que os responsables políticos incentiven e favorezan este aproveitamento tan beneficioso para o medio ambiente e, tamén, para o desenvolvemento económico do nosos rural. A única política que fai este goberno de Feijóo é a da persecución mediática de incendiarios, mediática porque, na realidade, tampouco é efectiva. Galicia é unha das poucas Comunidades do Estado que nos últimos 5 anos baixa na súa superficie agraria útil, co que isto supón en termos de rendibilidade das explotacións e tamén para cobrar as axudas da PAC. A superficie das explotacións pechadas pasan ao abandono e non se transfiren as que quedan, posiblemente pola falta de incentivos e valorización do propio sector primario. Feijóo dixo, en numerosas ocasións, que este era o gran problema do país, nembargante, non puxo en marcha ningún tipo de medida para corrixilo.

En conclusión, os socialistas denuncian que, no eido dos lumes forestais, estase a confiar todo na extinción e, concretamente, nos medios aéreos privados, caros e cada vez menos operativos xa que co arborado e a altura do matorral, a auga que descargan non é, totalmente, efectiva. As pistas e camiños deberían estar limpos e con faixas auxiliares ás beiras pero están con matorral alto, o que produce que , en época de seca, actúen como verdadeiro combustible e lle dean continuidade ao lume. Os e as socialistas da comarca do Carballiño esixen un cambio na política forestal da Xunta, cada vez máis enfocada á privatización de medios de extinción e menos á prevención e aproveitamento da nosa superficie de monte. É intolerable, rematan, que ano tras ano se vivan sucesos coma o acontecido en Boborás e que afecten ao benestar dos veciños e veciñas, de nada serve lamentar senón se lle pon solución previa.

 

O PSOE de Os Blancos denuncia o corte no subministro de auga potable dende o pasado luns, sen que o Alcalde dera explicación algunha á veciñanza.

18/09/2016
By

Dáse a circunstancia, declara a Portavoz socialista, Emilia López, que esta fin de semana están en festas e a situación persiste sen que, dende o Concello, poñan remedio.

Emilia López Blanco, portavoz socialista no Concello de Os Blancos, faise eco das numerosas queixas dos veciños e veciñas que levan padecendo un corte no subministro da auga potable que xa dura dende o pasado luns 12 de setembro. Dáse a circunstancia, ademais, que dende o 15 deste mes, levan festexando a celebración da Virxe das Dores, cos atrancos que a falta de auga conleva para a hostalería e as familias que reciben aos seus convidados/as. De todos os xeitos, tal como denuncian dende o PSOE, a situación é o suficientemente grave xa no día a día, á marxe de celebracións, posto que os veciños e veciñas carecen de auga para beber, asearse e cociñar. Asemade, ao despropósito de levaren tantos días sen un servizo prioritario e fundamental, únese a total desidia por parte do Alcalde do Concello, quen non diu explicación algunha á cidadanía e ofrece a calada por resposta. Supónse, tal como relatan os socialistas, que hai unha avaría que impide o subministro da auga corrente pero non hai unha explicación oficial nin se publicou Bando de Alcaldía algún nin se anunciaron medidas.

Dende o Grupo socialista no Concello de Os Blancos coidan que se trata dunha deixadez absoluta de funcións por parte do Alcalde do PP. Están a estudar, de feito, a asunción de medidas legais en contra dunha actuación denigrante para co pobo que gobernan, deixando á cidadanía sen un dos servizos máis básicos. Non houbo, nin tan sequera, por parte do goberno municipal, un anuncio de restricción, onde se deixen unhas horas de subministro á veciñanza para poderen levar a cabo funcións básicas e, tampoco, houbo a intención de pedir axuda para paliar esta grave situación. É por isto que, o luns vindeiro, os socialistas van rexistrar un escrito perante o Concello esixíndolle que realice as xestións oportunas para reverter esta penosa situación e devolverlle o servizo de auga corrente ao pobo. Non é de recibo, declara Emilia López, que o Alcalde non pedira axuda á Xunta ou á Deputación para que mandasen un camión-cisterna que puidese aliviar a falta absoluta de auga potable.

 

Os socialistas sinalan que o fracaso da política forestal do PP está a por en risco aos veciños e veciñas da provincia de Ourense.

08/09/2016
By

Noela Blanco apunta á redución da distancia de seguridade entre as vivendas e a biomasa, a privatización e precarización dos operativos de extinción e a falla de medidas de revitalización do rural

Considera o anuncio dun parque acuático para Monterrei “unha broma de mal gusto á altura da foto da mangueiriña”

 

Noela Blanco

 

A cabeza de lista pola candidatura do PSdeG-PSOE para Ourense,  Noela Blanco, sinalou hoxe á xestión de Feijóo como principal responsable de que os lumes teñan queimado 6.100 hectáreas nunha semana, 3.250 en Ourense nun só día. Dixo que “dende logo que os incendiarios son os responsables directos, pero é simplista e reducionista que o presidente da Xunta queiran sinalalos como único factor para que Galicia arda cada ano”.

A responsable socialista ofreceu unha rolda de prensa monográfica sobre a situación que se está a vivir estes días no interior de Galicia, con vivendas ameazadas polas lapas e pobos desaloxados.

Sinalou que a redución da distancia de seguridade entre a biomasa e as vivendas dos 50 metros sinalados polo goberno de Touriño ata os 30 de Feijóo, xunto coa anulación da agrupación de terreos forestais ou a privatización, descoordinación e lamentable situación de precariedade dos operativos de extinción está a poñer “en risco” aos veciños e veciñas e aos operarios que loitan cointra as lapas.

Criticou duramente a falla de medidas para recuperar a poboación do rural e a crise demográfica das provincias dun interior que fica abandonado mentres o goberno galego hipoteca 100 millóns de euros cada ano en tarefas de extinción en lugar de afrontar o problema dende a súa raíz.

Broma de mal gusto

A responsable socialista considera “unha broma de mal gusto” que o presidente da Xunta, xunto co presidente da Deputación de Ourense, anunciaran precisamente onte un parque acuático para Monterrei. “Que nos veñan anunciar un tobogán e unha piscina mentres arde Ourense está ao nivel da foto de Feijóo apagando un lume cunha mangueiriña de xardín e os seus zapatos castellanos”, remachou.

Sinalou que o parque acuático “da a medida da irresponsabilidade e incompetencia dun presidente lesivo para o noso país, e ademais constitúe unha grave falta de respecto para os veciños e veciñas que ven en risco os seus fogares”.

Blanco reclamou a convocatoria do Consello Forestal para acordar medidas concretas que reduzan os lumes, así como a posta en marcha dunha política ambiciosa e eficaz de recuperación demográfica do rural a través da creación de emprego e o aumento das rendas de gandeiros, agricultores e silvicultores, construíndo ademais unha cultura forestal integrada no medio rural galego.

Ademais, esixiu a derrogación dos artigos da Lei 7/2012 de 28 de xuño, que volvían permitir recualificar os terreos queimados, e recuperar medidas de prevención das vivendas e edificacións como a distancia de seguridade de 50 metros.