Posts Tagged ‘ Ourense ’

Denunciamos o desleixo da Xunta ante as pragas que asolan Ourense


Solicitan crear e aumentar partidas económicas e liñas de axuda e a creación dun centro de investigación fitopatolóxica en colaboración coa universidade, para que realice traballos de prevención e loita

Denuncian que a Xunta claudicou resignada e nin tivo nin ten un protocolo efectivo de actuación global para evitar estas pragas, así como problemas de persoal e material

bee-close-up-fictional-37144

Ourense, 6 de agosto de 2018. O PSdeG-PSOE de Ourense denuncia o desleixo da Xunta de Galicia ante as invasións de vespa asiática, vespa do castiñeiro e praga do carballo que está a sufrir a provincia, e reclámanlle ó goberno galego –que ten as competencias nesta materia– a inmediata declaración de praga, así como a adopción de medidas máis eficientes de prevención, control e información. A secretaría provincial de medio ambiente destaca que a “falla de reacción e a absoluta incapacidade do PP para facer fronte á incontrolada expansión destas especies, está asolando os campos e xa está a producir importantes danos a sectores primarios, debilitando aínda máis o sustento económico das nosas zonas rurais”.

Os socialistas critican que o Goberno galego non se está a tomar as medidas científicas, sociais e económicas necesarias, deixando boa parte da problemática en mans dos concellos, moitos xa desbordados. Por iso solicitan crear e aumentar as partidas económicas e liñas de axuda. Así mesmo reclaman a creación dun centro de investigación fitopatolóxica na provincia, en colaboración coa universidade, para que realice traballos de prevención e loita destas pragas. Tamén demandan máis persoal; a posta en marcha plans de información, formación e prevención sobre a invasión destas especies; e a mellora dos contratos e as metodoloxías dos traballos que realizan as empresas que están a loitar contra estas pragas. Así mesmo recordan que hai meses que se aprobaron iniciativas no Concello e na Deputación de Ourense nas que se instaba a implementar medidas máis efectivas.

“A Xunta, que nin tivo nin ten un protocolo efectivo e de actuación global para evitar a chegada destas pragas, claudicou resignada e parece asumir que estas especies foráneas viñeron para quedar definitivamente”, aseveran desde o PSdeG-PSOE antes de denunciar problemas de persoal. A desorganización dos responsables do PP está a provocar situacións absurdas: moitos niños non poden ser retirados de árbores rodeadas de maleza porque o persoal contratado para retirar niños non pode rozar esa vexetación xa que a Xunta non lles paga ese traballo.

Achegamos un breve resumo facilitado pola secretaría provincial de medio ambiente do PSdeG-PSOE, sobre os efectos destas pragas:

Efectos da vespa asiática

A vespa asiática ten incidencia directa sobre a fauna local, a polinización e os produtos agrícolas. Son moitas as froitas que son roídas, mordidas e comidas (uvas, peras, mazás, figos ou kiwis), particularmente en froiteiras próximos aos niños. Na apicultura constatouse que houbo unha redución do censo de apicultores de ata o 26%; descensos da poboación de abellas ou incluso a morte da totalidade das colonias nalgúns colmenares; falla de pole e mel no outono ou importantes déficits nas reservas de alimentos, problemas que repercuten seriamente na economía deste sector.

Efectos da vespiña do castiñeiro

A vespiña do castiñeiro produce unhas tumoracións nos brotes das diversas especies de castiñeiro. Estas tumoracións causan un enfraquecemento xeral da árbore que o fan máis susceptible a outras pragas e enfermidades, chegando mesmo, en situacións extremas, a ocasionar a morte. O seu principal efecto é a perda de produción, danando un sector esencial na economía da provincia, tanto na súa produción como no sector de secundario transformación e elaboracións de produtos con castaña ( fariñas, bicas e marrón glace. Tras localizarse en Cataluña en 2012, nun lustro xa colonizou a práctica totalidade das rexións castañeiras de España, non tanto polo voo do insecto senón polo transporte de árbores infectadas.

Efectos da praga dos castiñeiros

Os ataques da Altica Quercetorum Foudr. que sofren os carballos provócanlles a desfoliación, un efecto que ocasiona un dano visual e paisaxístico que pode danar o turismo rural. Ademais, os bosques infestados poden sufrir ataques de Mycrosphaera alphitoides (Oidio do carballo), o que ocasiona un gran enfraquecemento das masas que se podería traducir en posibles ataques de insectos xilófagos e, en consecuencia, na morte dos pés afectados.

O PSdeG-PSOE sae en defensa do servizo de pediatría na provincia

Os socialistas ourensáns esixen o fin deste ataque furibundo contra os servizos sanitarios dos nenos e nenas e reclaman ó Sergas as medidas organizativas e as contratacións necesarias para manter pediatras

Desde o PSdeG-PSOE levaranse a cabo as accións necesarias para frear o castigo do PP á provincia e, concretamente, ós concellos do rural, tras esta descarada e continuada supresión de servizos

pediatria

Ourense, 24 de xullo de 2018. O PSdeG-PSOE de Ourense sumouse hoxe á concentración veciñal convocada en Castro Caldelas, para defender o mantemento do servizo de pediatría nos municipios do rural da provincia, ante os reiterados ataques de Alberto Núñez Feijóo á saúde dos nenos e nenas. Centos de menores quedaron sen pediatra polos recortes da Xunta de Galicia nos orzamentos sanitarios, obrigando ós cativos e as súas familias a desprazarse ós complexos hospitalarios universitarios de Ourense e Vigo para recibir atención médica básica, unha situación indigna e vergoñenta pois atenta directamente contra un dereito universal como a saúde.

Á protesta acudiron, entre outros cargos e militantes socialistas, o secretario provincial do PSdeG-PSOE, Rafael Rodríguez Villarino; o secretario de organización, Juan Carlos Francisco Rivera; o vicesecretario de relacións institucionais, Álvaro Vila; o deputado do Parlamento de Galicia, Raúl Fernández; a deputada e viceportavoz na Deputación, Elvira Lama; a alcaldesa de Castro Caldelas, Sara Inés Vega; ou o tenente de alcalde de Parada de Sil, Aquilino Domínguez. No acto evidenciouse o malestar veciñal ante unha nova labazada á atención sanitaria de calidade que está afectando ós concellos onde máis cómpre que se asente poboación moza.

Os socialistas levan meses denunciando o brutal recorte que o PP está a aplicar ós servizos sanitarios pediátricos da provincia de Ourense con peches, recortes e suspensións de todo tipo, nun ataque inaudito contra os dereitos dos nenos e nenas. Esta decisión de suprimir pediatras de atención primaria afonda no deficiente trato sanitario xeral que teñen que padecer os veciños e veciñas de Ourense por parte da Xunta. Un carrusel inaudito de tesoirazos sanitarios e sociais que durante os últimos anos provocou, entre outros, a supresión do servizo de urxencias pediátricas 24 horas no hospital da terceira cidade de Galicia; a paralización de intervencións programadas de cirurxía pediátrica no Complexo Hospitalario Universitario de Ourense (que atende a 400.000 persoas de toda a provincia e tamén do sur de Lugo); ou a eliminación de numerosos médicos pediatras nos centros de atención primaria.

Os socialistas ourensáns esixen o fin deste ataque furibundo contra a provincia e reclaman ó Sergas as medidas organizativas e as contratacións necesarias e inmediatas para dotar do persoal suficiente os centros sanitarios, co fin de restablecer este servizo. Ademais recordan que, durante décadas, o servizo pediátrico ourensá foi un referente para o resto de Galicia, con plena operatividade as 24 horas do día os sete días da semana, a pesar de contar con menos facultativos que outras zonas sanitarias pediátricas de similar poboación. Polo tanto, non se trata de demandar nada que non existira previamente. Desde o PSdeG-PSOE levaranse a cabo as accións necesarias para frear o castigo do Partido Popular á provincia e, concretamente, ós concellos do rural, tras esta descarada e continuada supresión de servizos básicos atacando incluso á infancia.

O PSdeG-PSOE de Ourense apoia as mobilizacións para que se cumpra o Pacto contra a Violencia de Xénero

O PSdeG-PSOE de Ourense apoia e súmase ás mobilizacións previstas neste 16 de maio. Esixiremos nas institucións e na rúa que se cumpra o Pacto contra a Violencia de Xénero.

WhatsApp Image 2018-05-16 at 18.01.26

  • Nestes intres, o principal problema en España é a violencia contra as mulleres.
  • Desde o PSOE esiximos ao goberno de Rajoy que cumpra o acordado no Pacto contra a violencia de xénero e que cumpra coa súa responsabilidade coas mulleres vítimas e cos seus fillos e coas súas fillas.
  • O PSOE liderou o Pacto contra a Violencia de Xénero que o PP, co apoio de Ciudadanos, está incumprindo e no que Unidos Podemos nin sequera está.
  • Case un ano despois de asinarse o Pacto, non hai cartos e non se modificaron  as leis para desenvolver as medidas e políticas contra a violencia machista.
  • Esiximos ao goberno que dote con 200 millóns o Pacto contra a Violencia de Xénero.
  • Pedimos a Unidos Podemos que se sume ao Pacto contra a Violencia de Xénero, abandone a abstención e nos axude a que se cumpra.
  • O PP, co apoio de Ciudadanos, está a saltarse o Pacto. A alianza de Ciudadanos co Partido Popular é nefasta para as mulleres.
  • O PSOE é único partido que está cumprindo o Pacto. Demos unha resposta total e contundente á inacción do goberno presentando dúas reformas lexislativas para dar cumprimento ao Pacto e dotalo economicamente.

As vítimas non agardan e as mulleres obxecto de violencia que corren risco tampouco poden agardar:

  • Se o Pacto Contra Violencia se cumprira, habería campañas de prevención, información e concienciación dirixidas a adolescentes e mozos e mozas.
  • Se o Pacto Contra Violencia se cumprira, os concellos volverían ter competencias para atender de maneira especializada ás mulleres vítimas e aos seus fillos e ás súas fillas.
  • Se o Pacto Contra Violencia se cumprira, as mulleres vítimas contarían cun sistema de acompañamento individualizado para evitar a súa desprotección.
  • Se o Pacto Contra Violencia se cumprira, mellorarían as axudas e recursos sociais para atender as necesidades das mulleres vítimas e dos seus fillos e das súas fillas.
  • Se o Pacto Contra Violencia se cumprira, o concepto violencia de xénero abranguería todos os tipos de violencia contra as mulleres segundo o Convenio de Istambul.
  • Se o Pacto Contra Violencia se cumprira, habería liberdade vixiada sobre o maltratador nos momentos nos que a vítima se atopa máis desprotexida.
  • Se o Pacto Contra Violencia se cumprira, reforzaríase a especialización nos xulgados do penal que atenden o maior número de casos.
  • Se o Pacto Contra Violencia se cumprira, as mulleres vítimas contarían con acompañamento xudicial personalizado previo á denuncia ata a fin do procedemento.

O PSdeG-PSOE de Ourense denuncia que os orzamentos do Estado son un espellismo para Ourense creado por un Partido Popular que se desentende da provincia

O PSdeG-PSOE ven de denunciar que os orzamentos xerais do estado de 2018 son, para Ourense, un espellismo creado por un Partido Popular que se desentende do futuro da provincia.Aa deputada no Congreso, Rocío de Frutos Madrazo, e o secretario provincial, Rafael Rodríguez Villarino, aseguran que “os populares, ano tras ano, cegan a mirada dos ourensáns con cifras fabulosas de inversión na liña do AVE que logo non se executan, mentres propoñen gastos en inversións pírricas e alleas ó desenvolvemento real. Para os dirixentes do PP, o futuro de Ourense non existe”.

Sinalan que “ó longo dos anos de goberno, o PP segue un manual no que se prometen de xeito sistemático grandes inversións, sabendo que nunca se realizarán, porque a finalidade real é tratar de liquidar débeda”. Proba desta estratexia simuladora son os 120.000 millóns que deixaron sen executar desde 2012, dos que uns 2.000 corresponden a Galicia nos catro últimos anos, a maior parte para o tren de alta velocidade en Ourense. De feito, na pasada anualidade só se gastaron 3,4 dos 461 millóns orzamentados para o ferrocarril.

Así, destacan que os investimentos estratéxicos se limitan a dous eclesiásticos e dous museisticos, no mosterio de Melón e en Santa Comba de Bande, así como a cartos insuficientes para o eternamente pechado museo arqueolóxico e o arquivo histórico.  “Unha boa nova sería levar á práctica a inversión prevista para a alta velocidade, a pesares de que non serva para xerar desenvolvementos produtivos rematadas as obras. Trátase dunha intervención que transcorre pola provincia e non dunha inversión finalista para o desenvolvemento de Ourense”.

“Nós non pretendemos realizar ilusionismo político, queremos presupostos executables e axustados ás necesidades de desenvolvemento da nosa terra”, afirman Rodríguez Villarino e de Frutos Madrazo. “Non entendemos a quen se sente a gusto cuns orzamentos ilusorios e pobres ata a exasperación, a nivel de desenvolvemento estratéxico. Ao parecer, eles están a gusto con estes orzamentos inflados, enganosos e desapegados do futuro das nosas fillas e dos nosos fillos, pero nós non”, insisten.

Ante unhas cifras tan vergoñentas, o PSOE presenta emendas estatais con efecto directo en Galicia por valor de 142 millóns de euros, e o PSdeG-PSOE de Ourense propón 56 emendas de adición, que contemplan actuacións estratéxicas provinciais que suman case 78 millóns.

coins-1015125_640

Emendas concretas

No sector agrícola formúlanse cinco intervencións de 37 millóns, destacando os 26 millóns para o regadío na Limia; tres millóns de apoio ás denominacións de orixe vitivinícolas; e 2,5 millóns para o plan da castaña. O apartado medioambiental acumula emendas por valor de 8,7 millóns, entre as que destacan dous millóns para a recuperación do Parque Natural do Xurés, e 1,5 millóns para a recuperación do embalse das Conchas e o río Támega.

No que respecta á liña de AVE, as emendas do socialismo ourensán engaden 4,6 millóns € para a estación intermodal, sen esquecerse dos 10 millóns e os  150.000 € necesarios para un plan de implementación do ferrocarril de cercanías na área da cidade de Ourense. O eido das infraestruturas viarias inclúe tres millóns para a mellora integral da A-52, así como inversións na A-56  no tramo Cambeo-Ourense que, xunto a outras, totalizan case 10 millóns.

A proposta socialista aposta polo termalismo, para o que se solicita unha partida de 7 millóns. Tamén impulsa o patrimonio con perspectivas turísticas, ó reclamar case 10 millóns en total, destacando tres millóns para o museo arqueolóxico (fronte aos 400.000 do PP); dous millóns para o plan director do románico, e a mesma cantidade para o futuro museo do viño de Ribadavia. Por outro lado, entre as emendas estatais específicamente para Galicia destacan o plan integral de emprego (100 millóns); o plan de prevención de incendios e rexeneración forestal (25 millóns); o plan de supresión de pasos a nivel (10 millóns); e o programa do Camiño de Santiago (dous millóns).

 

O PSdeG-PSOE de Ourense lembra a memoria de Secundino Couto, alcalde republicano de Canedo

A agrupación provincial do PSdeG-PSOE de Ourense, por medio da Secretaría de Memoria Histórica, organiza este xoves día 12 de abril, ás 20:00 horas, un acto na lembranza e homenaxe do alcalde republicano-socialista do antigo Concello de Canedo, hoxe coñecido como o barrio da Ponte da terceira cidade de Galicia.

29572229_10211594436561030_5377762980840711824_n

No evento presentarase o libro “Lembranza a Secundino Couto Solla. Alcalde republicano-socialista do Concello de Canedo”, editado pola Agrupación Provincial Socialista e a Fundación Luís Tilve co obxectivo de divulgar e rescatar do esquecemento a figura deste notable político ourensán. No mesmo participarán o secretario provincial do PSdeG-PSOE, Rafael Rodríguez Villarino, e os autores da obra, Francisco Javier Quintas, secretario provincial de Memoria Histórica, e Hilde Couto Serantes, neta do biografado.

Secundino Couto Solla

Natural de Mourente (Pontevedra, 1873), Secundino Couto foi unha das máis importantes figuras do obreirismo ourensán, ocupando diversos cargos de responsabilidade no seo das sociedades obreiras. Presidente do Centro de Sociedades Obreiras de Ourense en 1899 e da Agrupación Socialista de Ourense en 1900, á chegada da Segunda República afiliaríase ó Partido Radical Socialista (PRRS) e a Unión Republicana (UR), chegando a acadar a alcaldía do veciño concello de Canedo, onde máis asentado estaba o seu liderato. Será encausado pola xurisdición de guerra e posto a disposición gobernativa o 27 de agosto de 1936. Sufriu presidio nos mosterios de Celanova e Oseira, regresando finalmente ao seu fogar.

No seu expediente de responsabilidades políticas, a Garda Civil di sempre que é do PSOE, mentres que outras fontes afirman que pertencía ao PRRS ata febreiro de 1936 en que pasou a UR. O propio expedientado recoñece tal militancia, aínda que afirma no ter ingresado de facto en UR. Asemade, foi xulgado polo Tribunal de Represión da Masonería e o Comunismo por ter formado parte da loxa barcelonesa “Democracia”. Sufriu unha importante merma do seu patrimonio por mor das múltiples responsabilidades económicas e incautacións ás que se viu obrigado a facer fronte. Faleceu no seu domicilio en Ponte Canedo en 1960.

Toda a información no blog da secretaría de memoria histórica do PSdeG-PSOE de Ourense.

Manifesto con motivo do día 22 de febreiro, Día Pola Igualdade Salarial

Con motivo do día 22 de Febreiro, Día pola Igualdade Salarial, o PSdeG-PSOE manifesta unha vez máis o seu compromiso político e programático para contribuír a erradicar a brecha salarial existente entre homes e mulleres, marcada pola histórica discriminación que as mulleres han ter e aínda seguen tendo no mundo laboral. A loita pola Igualdade Salarial foi e segue sendo unha das prioridades da nosa axenda política. Desde o PSdeG-PSOE defendemos a implicación dos gobernos en adoptar as medidas necesarias para eliminar a brecha salarial. Porque é obrigación dos gobernos e dos estados defender a igualdade de dereitos das mulleres e cumprir e facer cumprir as leis.

descarga

Porque un goberno non pode eludir a súa responsabilidade, nin un Presidente pode afirmar que “non nos metamos agora en iso” e recoñecer que se incumple a Constitución, o Estatuto dos Traballadores e as resolucións parlamentarias. As mulleres deste país necesitan políticas de igualdade que apoien os seus dereitos e sexan capaces de eliminar as discriminacións de xénero, así como Partidos e Gobernos que implementen con leis e medidas para remover todos os obstáculos que impiden a verdadeira igualdade, tal e como se recolle na nosa Constitución. Por iso, desde o PSdeG-PSOE apostamos porque a recuperación económica tamén sexa social e laboral, en especial para as mulleres. O obxectivo do PSdeG-PSOE neste aspecto é claro e firme.

Levamos 7 anos traballando politicamente nesta liña e por iso, o PSdeG-PSOE no marco do Pacto de Rendas que defendemos os e as socialistas, presentará unha Proposición de Lei para combater a brecha salarial, co fin de erradicar as discriminacións tanto directas como indirectas que provoca as desigualdades salariais. As mulleres deben ter as mesmas posibilidades de acceso ao emprego que os homes e de facer o seu camiño laboral, ademais de ter o mesmo salario por traballo de igual valor, porque corrixir estas desigualdades implica mellorar as pensións e protección social das mulleres.

É unha cuestión de “democracia, xustiza e igualdade” porque non podemos seguir falando de mellorar a democracia si non melloramos as condicións de vida das mulleres como cidadás e como traballadoras. A evidencia dos datos de emprego das mulleres e da brecha salarial esíxenos unha resposta política e institucional integral. Cambiar a realidade da discriminación salarial que viven as mulleres é urxente e prioritaria. As mulleres presentan unha taxa de actividade inferior á dos homes en case 12 puntos, xunto á maior taxa de paro (18,35%) fronte á dos homes (14,97%), á súa vez realizan cerca do 67% do emprego temporal a tempo parcial, sendo o 42% das mulleres as que teñen contrato indefinido a tempo completo fronte ao 58% dos homes.

O salario medio anual das mulleres no ano 2015 foi do 77%, representando un 23% inferior ao dos homes. En definitiva, a situación do emprego das mulleres caracterízase pola maior precarización do emprego, menor taxa de actividade, menor taxa de ocupación, maior taxa de paro, maior temporalidade, que está provocando “feminización da pobreza con contratos lixos” e por todo iso, unha contía menor nas pensións das mulleres. Para rematar, apuntar a importancia da interlocución social e a necesidade da participación das mulleres nos procesos de negociación colectiva, nas mesas de negociación das empresas, así como a presenza das mulleres nos órganos de decisión tanto nas empresas como nas organizacións sindicais e empresariais.

Xuventudes Socialistas e PSdeG-PSOE de Ourense inician as pescudas para recuperar a memoria das vítimas do franquismo na provincia

Os traballos pretenden dignificar e enxalzar a memoria de todas aquelas persoas que sufriron morte ou persecución na nosa provincia por mor da súa militancia política

“Despois de corenta anos de democracia non é permisible que unhas 140.000 vítimas da Guerra Civil permanezan en paradoiro descoñecido”, aseguran desde a secretaría de Memoria Histórica

MEMORIA

 

Ourense, 20 de febreiro de 2018. As Xuventudes Socialistas, en coordinación coa secretaría de Memoria Histórica do PSdeG-PSOE de Ourense, iniciaron hai uns días as pescudas para localizar ás vítimas e represaliados do franquismo e ás súas familias na provincia, co obxectivo de “dignificar e enxalzar a memoria de todas aquelas persoas que sufriron morte ou persecución na nosa provincia por mor da súa militancia política en partidos republicanos e sociedades obreiras de distintos signos”.

“Despois de corenta anos de democracia non é permisible que, en España, unhas 140.000 vítimas da Guerra Civil permanezan en paradoiro descoñecido, como tampouco o pode ser que permanezan ocultos ao gran público os atropelos cometidos polo réxime franquista contra os demócratas superviventes en forma de penas de cadea perpetua, traballos forzados, detencións e arrestos, expedientes de incautación de bens ou prohibición expresa para o exercicio da función ou cargo público”, explican desde a secretaría de Memoria Histórica, encabezada por Francisco Javier Quintas.

A práctica anulación de partidas orzamentarias por parte do goberno do PP á Lei de Memoria Histórica impulsada polo PSOE durante o goberno de Rodríguez Zapatero, impiden que o Estado cumpra coas débedas pendentes en materia de dereitos humanos e memoria histórica, tal e como o demandan Rights International Spain, o Tribunal Europeo de Dereitos Humanos ou a ONU.

É, por iso, o Partido Socialista está a impulsar diferentes iniciativas neste senso encamiñadas a “reparar, protexer, recoñecer e facer xustiza á memoria das vítimas e represaliados, así como a denunciar a sistemática vulneración dos preceptos da vixente Lei de Memoria Histórica por parte dos gobernos do PP”.

 

PSdeG-PSOE de Ourense e UGT celebran o primeiro encontro previo ó Foro polo cambio social e coinciden na necesidade de realizar cambios urxentes na provincia

Rafael Rodríguez Villarino, Mario Franco e Óscar Vázquez intercambiaron os seus pareceres e conclusións nun clima de cordialidade durante máis de dúas horas

Os dirixentes sindicais subliñaron que a UGT desenvolve un amplo labor reivindicativo a través das súas federacións, que conta con persoal especializado

WhatsApp Image 2018-02-16 at 10.45.55

 

Ourense, 16 de febreiro de 2018. O PSdeG-PSOE de Ourense e UGT celebraron o primeiro encontro previo ó ‘Foro polo cambio social’, unha importante iniciativa política coa que os socialistas queren crear sen demora, unha fronte común para acabar co secuestro caciquil da provincia. Na reunión, o secretario provincial dos socialistas, Rafael Rodríguez Villarino; o secretario provincial de UGT, Mario Franco; e o secretario de organización de administración de UGT, Óscar Vázquez, intercambiaron análises e coincidiron na necesidade de realizar cambios urxentes na provincia.

A reunión estivo precedida dunha solicitude de entrevista realizada dende o Partido Socialista, e estendeuse nun clima de cordialidade durante máis de dúas horas. Ambas organizacións analizaron a preocupante situación provincial e coincidiron na necesidade de realizar cambios con urxencia. Neste senso, apuntáronse os problemas e as potenciais solucións do agro, da industria, dos servizos, do termalismo, do transporte metropolitano, da prevención e extinción de lumes, dos maiores, da demografía ou das oportunidades de futuro para a mocidade, entre outros.

Os dirixentes sindicais subliñaron que a UGT desenvolve un amplo labor reivindicativo a través das súas federacións, que conta con persoal especializado na capitalidade autonómica e que está disposta a formular propostas concretas que axuden a mudar as escuras perspectivas de futuro de Ourense. Sumar, formular solucións alternativas e actuar en positivo foron expresións que se repetiron ao longo das exposicións de Franco e Vázquez. A xuntanza rematou co agradecemento do secretario provincial do PSdeG pola aceptación da visita, polo frutuoso intercambio de ideas e pola disposición a abrir unha canle de colaboración co partido socialista e con outros axentes sociais que consolide un foro permanente orientado ó cambio social na provincia de Ourense.

O Foro polo cambio social organizado polo PSdeG-PSOE pretende unificar forzas con outras formacións políticas progresistas, entidades sociais, empresariais e culturais, co fin de solicitar fondos públicos para fomentar o desenvolvemento da provincia, antes de que Ourense se converta definitivamente nun buraco negro sen futuro.

 

Manifesto con motivo do Día Internacional de Tolerancia Cero coa Mutilación Xenital Feminina

A Secretaría de Igualdade da Comisión Executiva Provincial do PSdeG-PSOE de Ourense manifesta o seu rotundo rexeitamento a todo tipo de prácticas encamiñadas a agredir o corpo das mulleres e das nenas

Ourense, 6 de febreiro de 2018. Con motivo do Día Internacional de Tolerancia Cero coa Mutilación Xenital Feminina, o 6 de Febreiro, desde o PSOE queremos manifestar un ano máis, o noso máis rotundo rexeitamento a este tipo de prácticas e agresións ao corpo das mulleres e das nenas, que non ten ningunha xustificación e que significa claramente unha auténtica aberración e violación dos dereitos humanos fundamentais e unha forma máis  de  violencia  exercida   sobre   as   mulleres,   adolescentes   e   nenas. A OMS véno reiterando, e Nacións Unidas insta aos Estados a velar porque a protección e a prestación de apoio ás mulleres e nenas sometidas ou en risco de ser sometidas á mutilación xenital feminina sexan unha parte esencial das políticas e os programas que combaten esta práctica e a proporcionar ás mulleres e as nenas mecanismos de prevención e resposta multisectoriais coordinados.

Así mesmo, o Parlamento Europeo na súa Resolución do ano 2014 sinala que as institucións internacionais, europeas e os Estados membros desempeñan un papel de primeira orde na prevención da mutilación xenital feminina, a protección das mulleres e nenas e a identificación das vítimas.

No noso país a práctica da MXF está prohibida e convén recordar que durante o mandato do Goberno socialista de Rodríguez Zapatero en xullo do ano 2005, aprobouse a Lei Orgánica 3/2005 de modificación da Lei Orgánica 6/1985 do Poder Xudicial, para perseguir extraterritorialmente a práctica da mutilación xenital feminina, cando a comisión do delito realizásese no estranxeiro, como sucede na maior parte dos casos, aproveitando viaxes ou estancias nos países de orixe de quen se atopan no noso país.

A posición do PSOE é clara e contundente, e a través do Grupo Parlamentario Socialista presentamos diferentes iniciativas parlamentarias co obxectivo de seguir esixindo e  reforzando  as  medidas  e  recursos  necesarios  para  eliminar radicalmente ditas prácticas. Por iso, no ano  2012  presentouse  unha Proposición Non de Lei relativa ao respaldo á  ONU  na  loita  contra  a  mutilación  xenital  feminina, e en febreiro do ano 2016, presentouse unha Proposición Non de Lei relativa ao Protocolo de actuación integral nesta materia co obxectivo de instar ao Goberno a desenvolver actuacións de sensibilización para avanzar na detección e prevención, así como o desenvolvemento dun protocolo de actuación integral para garantir unha maior protección cara ás mulleres e nenas.

As cifras da práctica da MXF son relevantes e preocupantes:

Segundo as diferentes organizacións que traballan neste ámbito, UNICEF sinala que máis de 200 millóns de nenas e mulleres no mundo sufriron a mutilación xenital feminina, e segundo ACNUR existen 3 millóns de nenas sometidas á ablación do clítoris cada ano, as menores de 15 anos son as principais vítimas da mutilación xenital e 20.000 delas piden asilo cada ano na Unión Europea para escapar desta.

Pola súa banda a OMS indica 30 países de África, Oriente Medio e Asia onde se concentra esta práctica, sendo na maioría dos casos practicada na infancia, entre a lactancia e os 15 anos e segundo os seus propios datos indican que 91,5 millóns de mulleres e nenas maiores de 9 anos en África padecen actualmente as consecuencias da mutilación xenital feminina. En África estímase que 3 millóns de nenas corren o risco de ser sometidas a estas prácticas cada ano.

En España segundo os datos da Fundación Wassu UAB a través do Mapa da MXF correspondente a 2016, hai 69.086 mulleres que proveñen de países onde se realizan estas prácticas, un 5,2% máis que en 2012. Delas, 18.396 son nenas entre 0 e 14 anos, representando o 16%.

Para rematar, o PSOE mantén o seu compromiso activo contra a práctica da MXF no noso país e no mundo,  sumándose  ás  diferentes  Resolucións  dos Organismos e Institucións Europeas e Internacionais, e esixindo ao Goberno da Nación que adopte as medidas e recursos necesarios fundamentalmente en materia de prevención, información, concienciación e sensibilización, xunto a accións de intervención cos profesionais e as familias das comunidades procedentes dos países que seguen realizando estas prácticas, co obxectivo de eliminar radicalmente a práctica da MXF da vida das mulleres, adolescentes e nenas.

Secretaría de Igualdade da Comisión Executiva Provincial do PSde-PSOE de Ourense

A executiva provincial do PSdeG-PSOE destaca o importante consenso acadado na elaboración da nova comisión executiva local da cidade de Ourense

Este acordo integrador de todas as sensibilidades políticas, sen dúbida, foi posible grazas ó favorecemento do consenso e ó fortalecemento interno que impulsa a nova directiva provincial

Unha reunión interparlamentaria con representantes do Congreso, Senado, Parlamento Galego e Deputación Provincial permitirá traballar de forma conxunta e unificada para mellorar Ourense

WhatsApp Image 2018-02-02 at 18.37.34

 

Ourense, 2 de febreiro de 2018. A executiva provincial do PSdeG-PSOE destaca o importante consenso acadado na formación da nova comisión executiva local da cidade de Ourense. Despois dun intenso proceso de diálogo e debate, as diferentes sensibilidades políticas que xa confluíran no III congreso provincial, foron quen de lograr un acordo que beneficiará ós socialistas e ós ourensáns. Este acordo, sen dúbida, foi posible grazas ó favorecemento do consenso e ó fortalecemento interno que impulsa a nova executiva socialista. Desde a directiva provincial recordan que no congreso sentáronse as bases dun novo tempo no socialismo na provincia –agora tamén reflectido na directiva local na terceira cidade de Galicia–, que se caracteriza polo acordo, a integración e o respecto. Desta forma, o PSdeG-PSOE de Ourense fortalécese e poderá retomar o seu papel como elemento clave na dinamización política, económica e social dunha provincia secuestrada polo clientelismo político do PP.

Neste mesmo senso de unificación e traballo conxunto, os socialistas mantiveron a primeira reunión interparlamentaria. Participaron o secretario xeral do PSdeG-PSOE, Rafael Rodríguez Villarino; a deputada no Congreso, Rocío de Frutos Madrazo; o senador no Senado, Luís García Mañá; a deputada no Parlamento de Galicia, Noela Blanco Rodríguez; o deputado na Deputación Provincial, Francisco Fraga Civeira, e outros membros da comisión executiva provincial.

A interparlamentaria permitiu fortalecer a cohesión e o coñecemento interno dos distintos cargos públicos; a posta en común dos perentorios problemas que afectan a Ourense; e establecer unha “folla de ruta” para coordinar accións conxuntas nas diferentes institucións parlamentarias nas que os socialistas teñen presenza. Estas reunións terá continuidade con encontros regulares nos vindeiros meses, para consolidar así unha liña de actuación neste novo tempo socialista, co fin de sacar a Ourense do buraco no que o PP o meteu desde hai tres décadas.