Posts Tagged ‘ orzamentos ’

O PSdeG-PSOE de Ourense denuncia que os orzamentos do Estado son un espellismo para Ourense creado por un Partido Popular que se desentende da provincia

O PSdeG-PSOE ven de denunciar que os orzamentos xerais do estado de 2018 son, para Ourense, un espellismo creado por un Partido Popular que se desentende do futuro da provincia.Aa deputada no Congreso, Rocío de Frutos Madrazo, e o secretario provincial, Rafael Rodríguez Villarino, aseguran que “os populares, ano tras ano, cegan a mirada dos ourensáns con cifras fabulosas de inversión na liña do AVE que logo non se executan, mentres propoñen gastos en inversións pírricas e alleas ó desenvolvemento real. Para os dirixentes do PP, o futuro de Ourense non existe”.

Sinalan que “ó longo dos anos de goberno, o PP segue un manual no que se prometen de xeito sistemático grandes inversións, sabendo que nunca se realizarán, porque a finalidade real é tratar de liquidar débeda”. Proba desta estratexia simuladora son os 120.000 millóns que deixaron sen executar desde 2012, dos que uns 2.000 corresponden a Galicia nos catro últimos anos, a maior parte para o tren de alta velocidade en Ourense. De feito, na pasada anualidade só se gastaron 3,4 dos 461 millóns orzamentados para o ferrocarril.

Así, destacan que os investimentos estratéxicos se limitan a dous eclesiásticos e dous museisticos, no mosterio de Melón e en Santa Comba de Bande, así como a cartos insuficientes para o eternamente pechado museo arqueolóxico e o arquivo histórico.  “Unha boa nova sería levar á práctica a inversión prevista para a alta velocidade, a pesares de que non serva para xerar desenvolvementos produtivos rematadas as obras. Trátase dunha intervención que transcorre pola provincia e non dunha inversión finalista para o desenvolvemento de Ourense”.

“Nós non pretendemos realizar ilusionismo político, queremos presupostos executables e axustados ás necesidades de desenvolvemento da nosa terra”, afirman Rodríguez Villarino e de Frutos Madrazo. “Non entendemos a quen se sente a gusto cuns orzamentos ilusorios e pobres ata a exasperación, a nivel de desenvolvemento estratéxico. Ao parecer, eles están a gusto con estes orzamentos inflados, enganosos e desapegados do futuro das nosas fillas e dos nosos fillos, pero nós non”, insisten.

Ante unhas cifras tan vergoñentas, o PSOE presenta emendas estatais con efecto directo en Galicia por valor de 142 millóns de euros, e o PSdeG-PSOE de Ourense propón 56 emendas de adición, que contemplan actuacións estratéxicas provinciais que suman case 78 millóns.

coins-1015125_640

Emendas concretas

No sector agrícola formúlanse cinco intervencións de 37 millóns, destacando os 26 millóns para o regadío na Limia; tres millóns de apoio ás denominacións de orixe vitivinícolas; e 2,5 millóns para o plan da castaña. O apartado medioambiental acumula emendas por valor de 8,7 millóns, entre as que destacan dous millóns para a recuperación do Parque Natural do Xurés, e 1,5 millóns para a recuperación do embalse das Conchas e o río Támega.

No que respecta á liña de AVE, as emendas do socialismo ourensán engaden 4,6 millóns € para a estación intermodal, sen esquecerse dos 10 millóns e os  150.000 € necesarios para un plan de implementación do ferrocarril de cercanías na área da cidade de Ourense. O eido das infraestruturas viarias inclúe tres millóns para a mellora integral da A-52, así como inversións na A-56  no tramo Cambeo-Ourense que, xunto a outras, totalizan case 10 millóns.

A proposta socialista aposta polo termalismo, para o que se solicita unha partida de 7 millóns. Tamén impulsa o patrimonio con perspectivas turísticas, ó reclamar case 10 millóns en total, destacando tres millóns para o museo arqueolóxico (fronte aos 400.000 do PP); dous millóns para o plan director do románico, e a mesma cantidade para o futuro museo do viño de Ribadavia. Por outro lado, entre as emendas estatais específicamente para Galicia destacan o plan integral de emprego (100 millóns); o plan de prevención de incendios e rexeneración forestal (25 millóns); o plan de supresión de pasos a nivel (10 millóns); e o programa do Camiño de Santiago (dous millóns).

 

Baltar leva o seu nepotismo á extinción de lumes, priorizando as zonas cercanas ás propiedades dos responsables da Deputación

Na comparecencia de Baltar Blanco hoxe no Parlamento galego para presenta-los orzamentos da Deputación, a nosa deputada Noela Blanco acusouno de leva-lo nepotismo ata a extinción da vaga de lumes, cando “o primeiro que fixeron foi enfria-las zonas cercanas ás propiedades dos responsables da Deputación”.

A deputada criticou que teñan destinado 1,4 millóns de euros para manter un servizo “privado” de extinción, que utilizaron para atender ás súas propiedades “mentres outros concellos, asolados polas lapas e mesmo evacuados, tiñan que facer fronte ao lume con alcaldes á fronte desta crise e veciños utilizando os seus propios medios”; e todo elo mentres o presidente da Deputación estaba “desaparecido en combate” e demostrando unha “falla de respecto” que leva a que, dezanove días despois, aínda “non chamou ao alcalde de Carballeda de Avia, onde faleceu unha persoa, para ver se precisaba de algo”, o que deu pé á compañeira para decirlle “vostede non ten nin corazón nin vergoña”.

A nosa deputada reprochoulle tamén que “por moito que se presente aquí como moderno e vangardista, a súa xestión decimonónica e arcaica do ente provincial delátao, e fai necesario que para sacar a Ourense da marxinalidade económica, política e social na que se atopa, o primeiro paso sexa que abandone xa o pazo provincial”, e acusouno de facer do “nepotismo e a compra de vontades” unha forma de goberno que “está a ser cercada pola xustiza”, lembrando convocatoria masiva de postos de promoción interna a catro días das eleccións

A compañeira tamén lle criticou o aumente a partida orzamentaria da Deputación destinada a persoal nun 2% (o dobre do que gastan o resto das deputacións), e “máis do 39% o orzamento adicado a pagar favores”, o que se enmarca nunha xestión “especialmente escandalosa se temos en conta que segue racaneando atencións de carácter benéfico-asistencial a mozos, maiores ou persoas con discapacidade”, pois a política social tan só recibe un 5% do orzamento, fronte ao 18% de Lugo, o 17 d’A Coruña ou o 14 de Pontevedra, nunha provincia que ten 20 305 desempregados, e 433 cotizantes menos que no pasado mes.

A deputada censurou tamén a Baltar Blanco o “reparto de fondos aos concellos baixo criterios de sectarismo político”, e reclamou un Plan Único que permita “un reparto de investimentos con criterios de equidade, obxectividade e transparencia”, apuntando que, mentres na nosa provincia tan só destina o 6% do orzamento provincial a este propósito, Lugo inclúe o 25% dos orzamentos para obras no seu Plan Único, Pontevedra o 27% e A Coruña o 43.

O PSdeG-PSOE d´O Bolo denuncia a desidia do alcalde do PP á hora de manter en óptimas condicións as vivendas de alugueiro social propiedade do concello

07/04/2017
By

O goberno do PP négase a manter as vivendas nunhas condicións dignas pese a contar con 23.000 euros nos orzamentos anuais para este propósito

 Os socialistas fanse eco das constantes queixas veciñais e van demandar información actualizada sobre a situación dos pisos no vindeiro pleno municipal

 

Ourense, 5 de abril de 2017. O Grupo Municipal Socialista no concello de O Bolo quere denunciar unha nova deixadez de funcións do goberno presidido polo popular Manuel Corzo. Nesta ocasión, os socialistas, fanse eco das queixas veciñais a respecto das vivendas de alugueiro social de titularidade municipal e, polo tanto, responsabilidade do concello. Os veciños e veciñas destas catro vivendas teñen que padecer a falta absoluta de mantemento e remodelación dos seus pisos mentres observan como os cartos destinados a patrimonio municipal nunca se emprega para mellorar as súas condicións. Juan Ferreira, portavoz socialista no Bolo, así o afirma: “Cada ano, o concello, destina uns 23.000 euros nos orzamentos municipais ao mantemento das propiedades de titularidade municipal (entre elas o castelo e varias vivendas) e levamos tempo observando que nunca se usan para mellorar, remodelar e manter estas vivendas de alugueiro social. Os veciños están abandonados á súa sorte”.

O deplorable estado destes pisos é doado de comprobar, denuncian dende o PSOE, sendo habituais os desconchóns en portas e paredes, a falta dunha man de pintura, as tubaxes á vista e sen rematar e instalacións obsoletas. A situación fai que vivir nestas vivendas sexa unha tarefa ardua, á que hai que sumar os numerosos meses que tiveron que agardar a que se baleirase o faiado e se procedera á súa limpeza. Para os veciños e veciñas non cabe dúbida que é, unicamente, responsabilidade do concello do Bolo e do seu alcalde termar destas vivendas e manter unhas mínimas condicións de habitabilidade que, hoxe por hoxe, non existen.

Fartos de agardar por un mantemento que nunca chega, tanto no que respecta á pintura como ás propias instalacións eléctricas, varios destes veciños e veciñas puxéronse en contacto con Juan Ferreira para amosar a súa preocupación e pedirlle que puxera o caso en coñecemento da opinión pública co obxectivo de que o alcalde faga caso das súas demandas.

Pola súa banda, o PSOE pretende preguntar no vindeiro pleno pola situación actual destas vivendas que foron postas en marcha, no seu día, para uso de diversos funcionarios e que hoxe serven para darlle unha solución habitacional a persoas con rendas baixas.  O PSOE esíxelle ao goberno do PP que deixe de facer da mala xestión a súa sinal de identidade e atenda ás súas responsabilidades. Para este vindeiro exercicio, recalcan os socialistas, debería consignarse unha partida específica para atender o mantemento destas vivendas ou, alomenos, empregar parte dos 23.000 euros e procurar que a xente teña unhas condicións de vida dignas.

O deputado autonómico por Ourense, Raúl Fernández, cualifica os orzamentos de Infraestruturas de “insolventes, incompetentes e inservibles para as necesidades dos galegos e galegas

12/12/2016
By

OS SOCIALISTAS ACUSAN A FEIJÓO DE “TRAIZÓN” POLO INCUMPRIMENTO DOS SEUS COMPROMISOS CO AVE A GALICIA E A TRANSFERENCIA DA AP-9

OURENSE. 17.01.2015. PSOE, R PRENSA RAUL FERNANDEZ.FOTO: MIGUEL ANGEL

 

Compostela, 09 de decembro de 16. O portavoz de Infraestruturas do Grupo Socialista, Raúl Fernández, acusou a Feijóo de “traizón ás súas propias promesas e a tódolos galegos e galegas” polo incumprimento dos seus compromisos co AVE e a transferencia da AP-9 a Galicia. Así o dixo no debate dos orzamentos da Consellería de Infraestruturas, hoxe na Comisión de Orzamentos do Parlamento.

O responsable socialista acusou ao presidente da Xunta de “demostrar que, en contra do que di a súa publicidade, é un militante do PP e non un militante de Galicia”. “Bastáronlle –dixo- un par de horas reunido co novo ministro de Fomento para capitular e aceptar un AVE adiado e de segunda para Galicia e ningunear o acordo unánime do Parlamento de Galicia ao renunciar á transferencia da xestión da AP-9”.

Fernández dirixiuse á conselleira de infraestruturas e Vivenda, a quen cualificou de “insolvente, incompetente e inservible para as necesidades dos galegos e das galegas”, que cambia a autocrítica e o recoñecemento dos seus evidentes incumprimentos por unha intervención “compracente, repetitiva e saturada de obviedades”.

Criticou o seu “conformismo” cunhas contas “lastradas en 2016 polos adiamentos de tódalas actuacións relevantes do goberno galego en coherencia coa súa obsesión con cumprir coas esixencias financeiras impostas polo goberno central”. Así sucede coas grandes obras de infraestruturas, paralizadas, adiadas e, no mellor dos casos, con partidas moi por debaixo das plurianualidades previstas polo propio goberno galego.

No apartado de mobilidade, sinalou, “a súa única actuación relevante foi a sentenza do Tribunal Supremo anulando as prórrogas ás concesións de transporte de toda Galicia, levando a incertidume ao sector, poñendo en risco o tecido empresarial, os postos de traballo e un servizo fundamental para a cidadanía”.

Criticou que a súa única actuación neste sentido para o próximo ano sexan “milongas” e a evidencia de que “tódalas grandes estacións intermodais previstas para as principais cidades galegas están desaparecidas dos orzamentos”.

Finalmente, en canto á política de Vivenda, lembrou a caída un 13 por cento no orzamento previsto para o Instituto Galego de Vivenda e Solo, cunha menor venda de solo do previsto, evidenciando “simple e llanamente unha mala planificación orzamentaria”.

Ademais, lembrou a caída no nivel de execución das partidas para rehabilitación de vivenda, apenas un 47,43 por cento, co que aos 117 millóns recortados nestas partidas dende 2009, deixaron outros 150 millóns sen executar.

Advertiu “obxectivos sociais pingües e cifras pouco realistas e enganosas” nun apartado no que “o único que fixeron foron anunciar falsos incrementos de investimento e apoio ás políticas de rehabilitación e fomento do aluguer, cando o que demostran cada ano é a súa incapacidade e nula intención para distribuír as axudas”.

 

Comunicación PSdeG-PSOE

María Quintas, deputada socialista por Ourense, esixe á Xunta que reoriente as súas políticas de emprego para aplicar medidas efectivas, non publicidade e propaganda.

15/03/2016
By

 

a026a3d568e2fa9096d5b26d24d852be

Santiago de Compostela, 15 de marzo de 2016. Os socialistas galegos esixiron hoxe no Parlamento á Xunta que “reoriente as súas políticas de emprego” para aplicar “medidas efectivas e acadar un país digno no que vivir, deixando atrás a publicidade e a propaganda”.

 

Na defensa dunha moción no pleno, rexeitada polo PP, a portavoz de Emprego do PSdeG, María Quintas, lembrou que “a situación é dramática para moitas familias e os mozos teñen que emigrar, aumenta o paro pero caen as partidas orzamentarias para atender aos desempregados”.

 

“A lamentable frase electoral do Partido Popular de Galicia e de Feijóo, dicindo en 2009 que remataría co paro en corenta días, amosa as verdadeiras intencións do PP en campañas electorais, mentir”, afirmou a deputada socialista, que demandou medidas urxentes para “parados de longa duración, mulleres e mozos”.

 

“O paro rexistrado chegou a 235.268 persoas no mes de febreiro, 24.606 persoas máis que no mes de abril de 2009, no que Feijóo chegou ao goberno da Xunta, mentres que o 90% dos contratos son temporais”, dixo Quintas, que lamentou que “o PP sexa obstinado na súa ineficacia e na súa mentira, pero os datos reflicten o panorama real de Galicia, estamos á cabeza no número de traballadores pobres”.

 

“O grupo socialista propuxo nas emendas aos orzamentos una partida de 192 millóns de euros para mellorar o mercado laboral, pero foron propostas desatendidas polo goberno”, manifestou. “Hai 131.000 galegos cun salario de menos de 800 euros mensuais e neste colectivo están maioritariamente as mulleres”, engadiu.

 

Os socialistas propoñen “fortalecer o servizo público de emprego” e critican que “a pretendida recuperación económica, sendo certa en termos macroeconómicos, é máis certo que non repercute na cidadanía, nin nas melloras sociais, nin na recuperación das economías familiares; o PP deteriora a calidade do emprego, devalua os salarios e precariza as relacións laborais”.

 

 

Seara denuncia a “pírrica” execución do Ministerio nos proxectos medioambientais da provincia

Tras recibir unha resposta parlamentaria do Goberno central, a nosa deputada no Congreso, Laura Seara, denuncia que “o nulo grado de execución do Goberno central nas partidas aprobadas nos orzamentos do Estado para proxectos medioambientais na provincia de Ourense é intolerábel”.

Seara preguntou ao Goberno central polo grado de execución de cada un dos proxectos medioambientais con consignación nos orzamentos do Estado para Galicia e que afectan concretamente á provincia de Ourense.

Na súa resposta, o Goberno central confirma que a porcentaxe de execución na práctica totalidade de devanditos proxectos é do 0%. Este é o caso dos seguintes: Adecuación de camiños naturais, Adecuación ambiental, Estacións automáticas de calidade das augas, Conservación e mantemento de canles, Control de calidade de augas superficiais, Sistema automático de información hidráulica, Actuacións en infraestruturas hidráulicas, Xestión de riscos de inundacións, Plan Hidrolóxico de bacía e a Nova Sé Central da Confederación Hidrográfica Miño-Sil.

A deputada socialista resalta así “a falta de compromiso do Goberno coas actuacións medioambientais de Ourense”. Especialmente graves considera as nulas execucións “do proxecto para a nova sé da Confederación Hidrográfica, que tiña dotación orzamentaria aprobada de 50 000 €” e da “elaboración do Plan Hidrolóxico de bacía, dotado con 87 000 €”. En canto ás obras da bacía hidrográfica Miño-Sil, proxecto dotado con 25 000 €, a deputada critica que a execución sexa de tan só o 7,3%.

Reproba Seara que “os mellores datos da resposta do Goberno sinalan un grado de execución que rolda tan só o 20%”. Como exemplo, sinala o proxecto de Defensa contra Avenidas “que tiña orzamentados 45 000 €, dos que o Goberno gastou só 8700, chegando así a execución ao 19,3%”. Do mesmo xeito, o grado de execución de diferentes actuacións de saneamento e depuración en Galicia, incluída a nosa provincia, é do 28,8%. “Estas actuacións tiñan unha dotación orzamentaria de 3,5 millóns de euros, e o Goberno executou só un millón”, protesta a deputada.

O único proxecto que se salva dun inexistente ou ínfimo grado de execución sería, segundo a resposta do Goberno central, o programa “Carisma”, cunha porcentaxe de execución do 161,17%.

“De pouco serve que o Goberno do PP engane aos cidadáns galegos e ourensáns ‘pintando’ nos orzamentos xerais do Estado partidas económicas que logo non executa”, denuncia Seara, quen tamén lembra que “isto é o que vén facendo ano tras ano o Goberno do PP de Rajoy co AVE a Galicia, cuxa porta de entrada é Ourense”; así “dende que goberna, Rajoy sempre inflou os orzamentos para Galicia e para Ourense coas partidas para o AVE, cuxa execución logo non alcanzou o 40%; agora comprobamos que o mesmo fai coas partidas para proxectos medioambientais da provincia”, lamenta.

Ademais, a deputada presentou hoxe unha nova iniciativa parlamentaria coa que esixe ao Goberno central “que explique as cifras” pois considera que “a resposta do Goberno fai unha ‘sopa de números’ cando despois afirma que a porcentaxe de execución de proxectos medioambientais na provincia de Ourense é do 67%”: “é imposíbel que, proxecto a proxecto, a execución sexa do 0% ou do 20%, e logo, no conxunto, a execución acade o 67%; as cifras non cadran”; e apunta á “incapacidade e nulidade dos responsables do Ministerio de Medio Ambiente para executa-las partidas aprobadas para Ourense e para Galicia”.

Onte mesmo, Seara pediu que comparezan no Congreso tanto a ministra de Medio Ambiente como o Secretario de Estado para que ofrezan explicacións sobre a contaminación do embalse das Conchas e o río Limia ( http://socialistasdeourense.org/?p=1112 ).

Seara propón un plan demográfico que evite o despoboamento da provincia co 0,5% dos cartos do rescate de dúas autoestradas privadas de Madrid

 

A nosa deputada no Congreso, Laura Seara, presentou onte en rolda de prensa as nosas emendas aos orzamentos xerais do Estado 2015 para a provincia de Ourense.

Seara sinalou que estes orzamentos retratan a un Goberno central “que minte” e apuntou que, para a nosa provincia, trátase duns orzamentos “maquillados, nos que a práctica totalidade do investimento se vai ao AVE”, a pesares de que, como “xa se demostrou”, é algo que o Goberno do PP logo non executa, chegando a un grao de incumprimento de ata o 40%”. Porén, considerando ao AVE como “unha infraestrutura básica”, a deputada anunciou a presentación de emendas socialistas por 2 millóns de euros para a estación intermodal na cidade, por 3 millóns para a liña de alta velocidade Ourense-Vigo, e por 2 a Ourense-Lugo.

Tamén no eido de infraestruturas, propoñemos destinar 10 millóns de euros para a supresión de pasos a nivel en Galicia, 1 millón para un plan de impulso do transporte de mercadorías por ferrocarril na nosa Comunidade Autónoma, e outras emendas para proxectos de melloras nas estradas N-120, N-525 e N-541 e as autovías A-76 e A-52, ao seu paso pola nosa provincia. No caso desta última, inclúese o seu enlace co parque ambiental de Carballeda de Avia, a pesares de que o PP abandonou a creación deste coa chegada de Feijóo á Xunta, posto que é un proxecto ao que, segundo Seara “non renunciamos”

Como cuestión esencial para a mesma, a compañeira indicou “a necesidade de evitar o despoboamento do territorio, que é o virus que rela incesantemente a Ourense”. Neste senso, apuntou que a nosa é “a terceira provincia máis envellecida da UE, cun 29,6% da poboación que supera os 65 anos”, e que “segundo as proxeccións do INE, no 2023 a provincia terá perdido 52 211 habitantes en vintesete anos”. Por iso os socialistas presentamos unha emenda de 10 millóns de euros para un Plan Demográfico para as provincias de Ourense e Lugo, cantidade que equivalería só ao 0,5% do que o Goberno central “destinará a rescatar dúas autoestradas de Madrid para salvar as empresas que as xestionan”.

Seara tamén reclamou, con outra emenda por 10 millóns de euros, distintas actuacións na Ribeira Sacra, entre outras, o apoio da súa candidatura a Patrimonio da Humanidade, sostendo que a zona “é un dos territorios con maiores recursos naturais, culturais e paisaxísticos, que a fan merecedora desta candidatura, pero ao tempo está afectada por un despoboamento que debe evitarse”.

Tamén no eido cultural e patrimonial, propoñemos destinar 3 millóns de euros á catedral de Ourense e a diferentes castelos, mosteiros e museos da provincia, así como a un Plan específico de apoio ás nosas denominacións de orixe vinícolas. Para o a posta en valor e recoñecemento do Camiño de Santiago de Inverno (por Valdeorras) propoñemos destinar 12 000€.

Verbo do termalismo, Seara presentará outra enmenda aos orzamentos estatais por un montante de 3 millóns de euros, destinada a posta en práctica dun Plan de Termalismo da provincia, outra de 500 000€ para o boulevard da cidade, e unha de 1,3 millóns para os regadíos d’A Limia.

A compañeira tamén presenta emendas de 850 000€ para os colectores e a depuradora de Castrelo do Val, de máis de 2 millóns para melloras diversas de carácter medioambiental e fluvial, e 350 000€ para o Convenio de Recuperación do Parque Natural do Xurés.

Seara tamén se referiu ás propostas socialistas a nivel nacional para estes orzamentos, baseadas no rescate financeiro a familias e autónomos, un Pacto contra a pobreza infantil, a reindustrialización a traverso dun Plan Nacional de Referencia apoiado na Formación Profesional, a suba do Salario Mínimo Interprofesional ata o 60%, unha Lei de Igualdade Salarial entre homes e mulleres, e a necesidade de poñer couto ás escandalosas retribucións de altos executivos. Sobre esta última cuestión, contrastou cos datos de que “en Ourense hai 149 000 persoas inactivas e 26 700 desempregados, dos que 2900 buscan o seu primeiro emprego”, e sinalou a presentación doutra emenda, por valor de 50 millóns de euros, para un Plan de Emprego para Galicia.

Tras incidir en que “estes orzamentos do Goberno do PP consagran o engano como forma de facer política e a desigualdade”, afirmou que “todas estas emendas non son un capricho, e poderían ser executadas perfectamente, se hai vontade”.

Os socialistas ourensáns denuncian que “grazas a Rajoy, nun 15% dos fogares da provincia de Ourense se pasará frío este inverno”

A deputada e o senador socialistas por Ourense nas Cortes Xerais, Laura Seara e Miguel Fidaldo, censuraron en rolda de prensa en Ourense o voto contrario do PP esta semana a unha Proposición de Lei do PSOE para garantir unha tarifa social de luz, gas (butano e propano) como un dereito social básico para os consumidores máis vulnerables.

A iniciativa socialista defendía, ademais, que non se corte en inverno a subministración enerxética para as persoas que se encontren en situación e pobreza enerxética, como poden se-las persoas con pensións mínimas, os fogares sen ingresos e con tódolos seus membros no paro. Os socialistas propoñemos que a diferenza entre a tarifa social e o consumo real se financie a través dos orzamentos xerais do Estado.

Laura Seara reprochou a Rajoy que non dixera “ ‘non’ a que no inverno sexa imposíbel corta-la subministración ás familias máis vulnerables” nin a que estes consumidores “non teñan que adicar máis do 10% dos seus ingresos ao pagamento do consumo de enerxía, cando ao ano se producen entre 2300 e 9300 mortes prematuras debido á pobreza enerxética, e hai xa en España sete millóns de persoas en situación de emerxencia social”.

En Ourense, afirmou, “grazas a Rajoy, nun 15% dos fogares da provincia pasarase frío este inverno” e lembrou que “66 426 fogares ourensáns teñen declarado que chegan con moita dificultade a fin de mes” e que “o 34% dos fogares na provincia ten como único ingreso as prestacións”. A iso hai que sumar, sostivo, que “a suba do 11% da luz, un dos recibos máis caros de Europa, é especialmente prexudicial para a provincia de Ourense, porque ademais de ás persoas, afecta aos cultivos agrarios e regadíos”.

A compañeira tamén sostivo que “Rajoy enganou os cidadáns sostivo porque dixo que a electricidade baixaría e a subiu nada menos que o 11%, e ademais, retiroulle o bono social da luz a 6094 ourensáns e a 37 016 galegos dende o 2011″. O número de familias beneficiadas por este bono social na provincia de Ourense, explicou, pasou de 57 479 no ano 2011 a 51 385 a finais do 2013. “Rajoy abandona a miles de persoas que sofren pobreza enerxética mentres lanza falsas mensaxes sobre a recuperación económica”, criticou.

Segundo expuxo a deputada, en Galicia, o gasto total anual en electricidade, gas e outros combustibles é de 1 361 196 000€, cunha media anual de gasto por fogar de 1282 euros. “Neste contexto, un 7% de familias galegas non poden mante-los seus fogares cunha temperatura axeitada, co que Galicia está por riba da media española de fogares que sofren esta situación; e convén lembrarlle a Rajoy que hai 22 552 fogares nos que hai carencias materiais, que hai 42 127 persoas que cobran unha pensión mínima, e que, xa en Ourense, hai 6272 que cobran unha pensión non contributiva e 16 741 que viven dunha prestación por desemprego”.

Así, a compañeira conclúe que “mentres o PP desvaloriza a calidade de vida dos cidadáns cos seus retallos, os socialistas achegamos propostas socialmente xustas e economicamente viables para recupera-la dignidade perdida de millóns de persoas”, para anunciar que os socialistas ourensáns presentarán mocións en tódolos concellos da provincia para frear a pobreza enerxética.

Seara reclamou “un grande pacto contra a pobreza enerxética na provincia, co fin de chegar a un punto de acordo que free este drama con consecuencias desoladoras”. “Pero non unha mesa de braseiro de burócratas senón un auténtico pacto social de institucións pero tamén de expertos, afectados e asociacións veciñais”.

Pola súa banda, Miguel Fidalgo repasou as partidas dos orzamentos xerais do Estado do 2015 para Ourense e afirmou que “son uns orzamentos sen alma”, e fixo fincapé en que “de nada serve que o Goberno central poña presuposto sobre o papel e infle os orzamentos estatais para Ourense coas partidas da AVE, porque son partidas que logo o Goberno non executa”.

Tras lembrar que as contas do Estado para Ourense non inclúen orzamento para proxectos fundamentais, como para a A-76, resumiu que “a realidade é que estes orzamentos son un castigo para Ourense”.

Por outro lado, o senador anunciou que a vindeira semana se debaterán na Cámara Alta diversas iniciativas sobre cuestións fundamentais para Ourense, como regadíos e infraestruturas, e outras sobre asuntos de importante interese social como o Alzheimer.

Seara denuncia que 1135 coidadores familiares de persoas dependentes perderon as súas cotizacións á Seguridade Social en Ourense polos recortes de Rajoy

 

O número de número de altas de coidadores non profesionais de persoas dependentes na Seguridade Social na provincia de Ourense descendeu en 1135 persoas dende que goberna Rajoy, segundo unha resposta parlamentaria do Goberno central ao Grupo Parlamentario Socialista. Segundo os datos nela contidos, a afiliación destes coidadores pasou de 172 363 no 2011 a 14 594 en xullo do 2014, o que constitúe para os socialistas un desmantelamento da Lei de Dependencia ante o que resulta necesario salva-la Lei e garanti-los dereitos dos dependentes.

O retroceso sostido que sofre a Dependencia dende que goberna o PP faise tamén evidente nos orzamentos e no número de beneficiarios: hai 2265 millóns menos para o sistema de Dependencia; o número de beneficiarios ten descendido de 738 587 en decembro do 2011 a 721 512 en agosto do 2014 (17 075 menos); 177 000 dependentes con dereito recoñecido están desatendidos, aos que hai que engadi-las 314 000 persoas de Grao I, cuxo dereito a atención aínda non é efectivo polo atraso no calendario de aplicación da Lei.

Laura Seara denuncia o “desmantelamento da Lei de Dependencia” e a “grave deterioración do Estado do benestar”, sinalando que, “coa escusa da crise, estamos a asistir a un perigoso cambio de modelo, que demostra que o Goberno de Mariano Rajoy despreza aos máis vulnerables: desentendeuse das persoas dependentes reducindo drasticamente a achega do Goberno para financia-la Dependencia, poñendo en risco a súa sostibilidade, retallando dereitos e desmantelando a Lei”.

Antes esto, a deputada considera “necesario garantir, de xeito efectivo, o dereito das persoas en situación de dependencia”, e analizar que medidas son necesarias para manter e garanti-la sostibilidade do Sistema. Un sistema que, subliñou, “xera emprego, ten un importante retorno na creación de postos de traballo, sobre todo para as mulleres”.

Lembramos que, entre outras medidas, o PP paralizou o calendario de aplicación da Lei, impedindo ás persoas con dependencia moderada acceder a unha prestación ou servizo; eliminou dos orzamentos xerais do Estado a partida para o nivel acordado, que ascendía a 283 millóns; supriu os dous niveis en que se dividía cada grao; reduciu nun 13% a achega do Estado para o financiamento do nivel mínimo; rebaixou nun 15% a prestación económica por coidados no ámbito familiar; eliminou a cotización dos coidadores non profesionais, e introduciu a incompatibilidade das prestacións.

Ademais, produciuse un grande retroceso no financiamento estatal do sistema, xa que, de soporta-lo 40% do seu custo no 2009, a Administración Xeral do Estado pasou a facerse cargo do 19% no 2013, mentres que a achega das Comunidades Autónomas creceu do 50,8 ao 62%, e o copagamento dos usuarios case se duplicou.

En definitiva, o Goberno central “reduciu o contido esencial do dereito, e “realizou importantes retallos orzamentarios, co dramático resultado de que os beneficiarios están a recibir servizos e prestacións claramente insuficientes, ao tempo que se encontran sen atender centos de miles de persoas en situación de dependencia”.

Seara pide a Pastor “que se deixe de visitas electoralistas ás obras do AVE e execute as partidas orzamentarias”, e reprocha a Feijóo que “só aplauda”

Perante a visita da ministra de Fomento Ana Pastor, a obras do AVE hoxe n’A Gudiña, a deputada socialista pola nosa provincia, Laura Seara, pídelle “que se deixe de visitas electoralistas e execute as partidas orzamentarias que pinta artificiosamente nos orzamentos xerais do Estado para o AVE a Galicia”.

Seara denuncia que, “a pesar de múltiples iniciativas parlamentarias dos socialistas, o Ministerio négase sistematicamente a ofrecer resposta sobre o grao real de execución orzamentaria das partidas do AVE a Galicia”, e advirte de que esta “opacidade e escurantismo non só é unha falta de respecto democrático e parlamentario, senón que, ademais, demostra que o Goberno central infla os orzamentos xerais do Estado para Ourense e para Galicia con partidas millonarias para o AVE que logo nunca executa”.

Unha mostra máis da falta de execución orzamentaria por parte do Goberno do PP, segundo sinala a deputada, é a ralentización que, durante todo o 2014, viñeron sufrindo as distintas obras do AVE na nosa provincia. Este punto foi denunciado tamén no Congreso dos Deputados o pasado mes de marzo pola propia Seara, con outra batería de iniciativas parlamentarias.

A teor das opacas respostas parlamentarias que ela mesma recibe sobre este asunto, Seara sinala que “todo fai temer que as cifras de execución das partidas orzamentarias non só non son as desexadas, senón que, ademais, están moi por baixo do que inicialmente pensabamos os socialistas”.

Neste senso, apunta que, respecto aos investimentos nas entidades do sector público empresarial (entre as que se encontra ADIF), o Goberno recoñece nos orzamentos xerais do Estado para o 2015, que só gastará 834 millóns de euros dos 1.127 millóns que orzamentou para o 2014, de xeito que, “do que presupostou o Goberno do PP para o 2014, recoñecen que non van a executar un 25%”, teméndonos os socialistas que esta falta execución sobre o presupostado poda alcanzar “mesmo o 40%”. Por iso, a deputada pediu a comparecencia de Pastor no Congreso dos Deputados para que explique con detalle o grao de execución das partidas orzamentarias do AVE a Galicia do último exercicio económico.

Para Seara, “de nada serve que a ministra visitase hoxe as obras do AVE n’A Gudiña, escenificando unha ‘feira de millóns presupostados’ ”, se logo non executa as partidas orzamentarias”, e pídelle que “resposte con claridade se construirá un AVE como Galicia merece, con dobre vía en tódolos tramos, e que explique con detalle a modificación de trazado que o Ministerio prevé no tramo Taboadela-Ourense”.

“Mentres tanto, en Galicia hai un Presidente, o Sr. Feijóo, que só sabe aplaudir”, remata a deputada.