Miguel Fidalgo reclama ao Goberno central que se comprometa coa apertura do Centro de Interpretación dos Parques Naturais de Galicia, e denuncia a “enorme incompetencia” da Xunta

O noso senador por Ourense e Secretario Nacional de Formación, Miguel Fidalgo, reclamou esta tarde ao Goberno que se comprometa e fixe unha data para a apertura do Centro de Interpretación dos Parques Naturais de Galicia, e denunciou a “enorme incompetencia” da Xunta na xestión deste proxecto.

Fidalgo interveu na Comisión de Medio Ambiente e Cambio Climático da Cámara Alta, e lamentou que o Secretario de Estado de Medio Ambiente, Federico Ramos, non respostase e se limitase a repeti-lo argumentado hai oito meses nesa mesma Cámara en resposta a unha pregunta do propio senador galego; isto é: que “todo queda pendente da súa finalización á espera dun novo convenio que depende da dispoñibilidade orzamentaria”.

Ante esto, Fidalgo lembrou que no 2008, a Xunta e o Goberno central asinaron un convenio para poñer en marcha este centro co obxectivo a difundi-la biodiversidade de Galicia. O devandito convenio prometía unha achega do Ministerio de sete millóns de euros (financiado con fondos europeos) mentres que a montaxe museística posterior sería levada a cabo a Xunta. Porén, segundo lembrou o senador, a finais de 2011 a Xunta non cumprira un trámite técnico na sinatura da prórroga da finalización do convenio, e o edificio ficou a medio construir, impedindo ao Goberno gasta-los catro millóns pendentes.

En vésperas das eleccións autonómicas do 2012, a Xunta anunciou que se ía a asinar e prolonga-lo convenio en dous anos, para termina-la actuación no 2015; pero o certo é que non houbo ningún resultado posterior.

Miguel Fidalgo subliñou que “dende entón, é un monumento ao escándalo da xestión da Administración, o esqueleto dunha estrutura no conxunto do área termal de Ourense”, e amosouse convencido de que, neste tema, o Goberno central foi “ineficaz”, mentres que a Xunta “actuou de xeito sectario e en clave de castigo político”, mostrando a súa “enorme competencia”.

Os socialistas de Ourense apelamos á unidade de toda a sociedade ourensá para que o Goberno central garanta o AVE a Ourense con plenas características de alta velocidade

O noso Secretario Provincial e voceiro socialista de Infraestruturas no Parlamento galego, Raúl Fernández, e a nosa deputada no Congreso, Laura Seara, reuníronse esta mañá coa Confederación Empresarial de Ourense, co fin de presentarlle aos empresarios a Proposición non de Lei que os socialistas presentamos no Congreso sobre a integración da Alta Velocidade en Ourense.

Nestes intres, en verbas dos nosos deputados “o Goberno do PP está poñendo en risco a Alta velocidade a Ourense e, xa que logo, a Galicia”, polo que consideramos que “é esencial a unidade das forzas políticas e axentes económicos e sociais da provincia para que o Goberno manteña, para a integración do AVE na cidade, un proxecto con plenas características de alta velocidade”.

A Proposición non de Lei socialista insta así ao Goberno a garantir que a integración urbana do AVE na cidade de Ourense se realizará de acordo ao proxecto vixente actualmente, e con características de alta velocidade, así como a que o Goberno licite o máis axiña posible as obras de construción dos dous tramos nos que se subdividiu a integración urbana na capital provincial: Taboadela-Seixalbo e Seixalbo-Estación de Ourense Empalme, derradeiros tramos pendentes da Liña de Alta Velocidade entre Galicia e Madrid.

Os socialistas ourensáns advertimos de que “se Fomento cancela o proxecto vixente e usa o actual trazado, -o ‘trazado da vergoña’, estará mantendo unha vía do século XIX, non apta para o AVE, nunha liña de alta velocidade do século XXI, condenando así ao AVE a Galicia a se-lo único do Estado que non terá realmente características de alta velocidade”.

Deste xeito, instan ao Goberno a que garanta a execución dos tramos Taboadela-Seixalbo e Seixalbo-Estación de Ourense Empalme, de acordo á declaración de impacto ambiental aprobada no 2011 polo Goberno socialista e que supón a construción da variante exterior.

Para nós, “a falta de respecto do Goberno aos ourensáns e aos galegos é intolerábel: levan máis dun ano dicindo que están estudando se facer ou non o soterramento que sempre defenderon, e agora sementan dúbidas sobre se realizarán o proxecto aprobado, que si era alta velocidade, ou ben aproveitarán un trazado que non permite a alta velocidade”. Neste senso lembramos que o soterramento, que encarecería a integración do AVE na cidade en máis de 400 millóns de euros, foi unha continua esixencia do PP cando estaba na oposición, e que o Goberno socialista xa o descartara por inadecuado.

E é que “coa chegada do PP ao Goberno en Madrid, as contradicións e as mentiras sobre a Alta Velocidade a Ourense e a Galicia foron constantes”, segundo os nosos deputados; que defenden que “os ourensáns e os galegos merecemos saber cal é o proxecto de Alta Velocidade do PP; e esperamos que o Goberno escoite agora o clamor de toda a sociedade ourensá por un AVE que sexa realmente de alta velocidade; un clamor ao que xa se suman incluso algúns membros do propio PP”.

Os compañeiros deputados anunciaron tamén que o PSdeG presentará iniciativas similares no Parlamento galego.

Miguel Fidalgo asegura que o PP terá que “render contas aos cidadáns” tras rexeitar no Senado que se manteña a liña ferroviaria que une Ourense con Puebla de Sanabria

O senador socialista pola nosa provincia e Secretario Nacional de Formación, Miguel Fidalgo, asegurou esta tarde que “o PP terá que render contas aos cidadáns” despois de que rexeitase na Cámara Alta unha moción presentada polo PSOE pola que se reclamaba o mantemento do servizo de transporte de viaxeiros por ferrocarril na a liña Ourense – Puebla de Sanabria. A proposta, defendida polo propio Fidalgo e o senador por Zamora José Fernández Blanco, foi desestimada debido ao voto en contra do PP, que conta con maioría absoluta. Trala votación, o compañeiro afirmou que, con esta decisión, o Goberno e o Grupo do PP no Senado “traizoan ao PP de Ourense, aos alcaldes e ás Deputacións” afectados.

A moción reclamaba do Goberno mante-lo servizo de transporte de viaxeiros por ferrocarril actualmente existente na devandita liña, e a colaboración das Comunidades Autónomas de Galicia e Castilla y León, Deputacións de Ourense e Zamora e outras administracións, para manter unha boa oferta de transporte público de viaxeiros, con horarios e tarifas adecuadas.

Na súa intervención, Fidalgo subliñou a necesidade de manter este servizo ferroviario baseándose na articulación territorial de España, en contra do Plan de Racionalización de Transporte Ferroviario, aprobado polo Goberno central o pasado 28 de decembro, “curiosamente o día dos Santos Inocentes”. Neste punto, puntualizou que cando o PP fala de “racionalización”, sempre acaba referíndose á supresión de servizos públicos.

Tamén ironizou sobre o manido argumento da “herdanza recibida”, tan utilizado polos dirixentes do PP e afirmou que, con esta medida, se “deshereda aos ourensáns e zamoranos” privándoos dun servizo público de gran relevancia; e lembrou que o Goberno socialista mantivo o mesmo malia que a Xunta decidise suprimi-las subvencións que aportaba.

O noso senador lembrou que o PP de Ourense asegurara no seu día que se ía a negociar co Goberno central unha solución a esta cuestión, pois a opción agora manifestada polo Goberno do PP ten o rexeitamento das provincias de Ourense e Zamora, ata o punto de que -di Fidalgo- “a Ministra de Fomento logrou algo histórico, algo tan difícil como que PSOE, BNG, PP, sindicatos, Concellos, a Deputación que preside o Presidente provincial do PP, e os usuarios, se manifestaran rotundamente en contra da supresión deste servizo”, que o senador considera imprescindíbel para dúas provincias que van perdendo paulatinamente poboación e actividade económica, xa que comunica ambas e cinco comarcas, sendo utilizado por moitos cidadáns, estudantes e traballadores. Porén, non hai, segundo lembra o compañeiro, ningunha alternativa de transporte público (nin por terra nin por aire)

Fidalgo, tras insistir en que é necesario lograr unha mellor oferta comercial e conseguir máis viaxeiros para o tren, destacou que o PP terá agora que render contas aos cidadáns, xa que os ourensáns “non imos permitir que se xogue e se engane á opinión pública, nin que se sigan facendo fotos sen contido”, e lamentou que o Goberno só traia atrasos e recortes.

Os socialistas responsabilizamos ao PP de traer máis paro, corrupción e sufrimento a Galicia

A voceira socialista de Traballo no Parlamento de Galicia e Secretaria de Organización da Executiva Provincial, María Quintas, afirmou que dende que o PP irrompeu de novo en Galicia e no Estado “só trouxeron mentiras, máis paro, corrupción e sufrimento”.

Ao longo da exposición dunha interpelación á Conselleira de Traballo, Beatriz Mato, a parlamentaria ourensá reprochou ao goberno da Xunta que Galicia se convertera na comunidade autónoma na que máis cae a afiliación á Seguridade Social, mentres o Executivo de Feijóo reduce o orzamento en políticas de emprego e “nin sequera o executa”.

Quintas recriminou á Conselleira de Traballo que o paro xuvenil supere o 48% en Galicia, cunha taxa de crecemento do 34%, “das máis elevadas do Estado”; e iso sen contarmos coa fuxida de mozos que, lembrou “a ministra alemá está encantada de recibir” pola súa cualificación, mentres que “o PP está encantado de que setentsa xóvenes se marchen a diario de Galicia”.

Lembrou Quintas que dende a reforma laboral de Rajoy hai 37 000 galegos máis no paro, subiu a taxa de desemprego xuvenil dez puntos, hai 37 600 xóvenes menores de vintecinco anos en paro (5400 máis ca hai un ano), 92 000 fogares teñen a tódolos seus membros no paro, e 129 000 non perciben ningunha axuda. Para a compañeira, a política do PP en materia de emprego lévanos a unha Galicia “insolvente e sen futuro”.

A nosa deputada criticou a constante referencia ao Goberno socialista da conselleira, lembrándolle que en Galicia só houbo cinco anos de Gobernos socialistas en máis de trinta de autonomía. “Señora Mato: vostede hérdase a si mesma”, replicoulle, para cominala a continuación a facer algo en materia de emprego, en lugar de “precarizar, privatizar e desprezar á cidadanía, arrasando cos dereitos e a dignidade das persoas”.

Quintas reduciu a política de emprego da Xunta “ao que fixo sempre a dereita: submisión ou emigración”, e citou o caso da nosa provincia, “onde a política de emprego chámase Baltar”, estilo co que colaborou a propia Consellería “mandándolle uns cartiños” ao presidente da Deputación, para “colocar aos que están nun ERE noutros concellos”.

Tamén mencionou o caso dunha prima do Presidente da Xunta que foi nomeada para ocupa-la dirección da Casa da Xuventude, e á que “se lle crea unha praciña de educadora” ante a previsíbel imposibilidade de optar por méritos ao vindeiro concurso de traslados.

Respecto aos Orzamentos da Xunta, Quintas cualificounos de “decepcionantes e tramposos”, xa que abren a porta á privatización sistemática do sector público, acollen un descenso do 40% nas políticas activas de emprego e o recorte de 464 millóns de euros só nos capítulos de desenvolvemento empresarial, promoción de emprego, I+D+i, Sanidade, Educación e accións social. “Os orzamentos agochan un discurso reaccionario”, resumiu.

A voceira socialista tamén lembrou as perdas de poder adquisitivo dos traballadores nestes últimos anos de gobernos do PP en Galicia e no Estado, nomeadamente a dos pensionistas, os empregados públicos e os traballadores vía depreciación salarial xeral e do Salario Mínimo Interprofesional, reducións de xornada con baixa e salario, e convenios colectivos por baixo do IPC.

En resumen, segundo deputada, o balance da Xunta do PP reflicte que “nos fogares galegos irrompe a pobreza, a desigualdade e o risco de exclusión social en familias que hai pouco formaban parte da clase media”, lembrando que en Galicia 662 000 persoas viven no limiar da pobreza e en risco de exclusión social, e 100 000 en pobreza extrema, e que o 20% dos nenos viven en fogares pobres.