Monthly Archives: August 2018

O Mosteiro de Oseira, asediado polo lixo por culpa do desleixo do PP

OS SOCIALISTAS DE CEA DENUNCIAN QUE O DESLEIXO DA DEPUTACIÓN DE OURENSE CO SERVIZO DE RECOLLIDA DE RESIDUOS TEN O MOSTEIRO DE OSEIRA ASEDIADO POLO LIXO

O PSdeG-PSOE reclama a inmediata mellora da frecuencia do servizo de recollida; a contratación de persoal suficiente; o remozado de contedores; e a revisión da taxa cobrada á veciñanza

O portavoz, Guillermo Fernández Dopazo, asegura que “o servizo é pésimo en todo o municipio” e salienta que “a demora do baleirado é inaceptable en plena tempada estival con temperaturas tal elevadas”

Ourense, 29 de agosto de 2018. Os socialistas de Cea denuncian que o desleixo da Deputación de Ourense co servizo de recollida de residuos, ten un dos edificios históricos máis importantes de Galicia, o mosteiro de Oseira, asediado polo lixo semana tras semana. E que por culpa da vergoñenta mala xestión e a calculada inacción do Partido Popular, os residuos acumúlanse nos contedores e nos muros históricos do recinto á espera de que alguén os recolla con eficiencia, contaminando un entorno de gran monumentalidade e dispersando un fedorento cheiro que recibe ós visitantes, peregrinos do Camiño de Santiago e á veciñanza en plena tempada alta turística.

Basura en Oseira

O Grupo Municipal Socialista reclama a inmediata mellora da frecuencia do servizo de recollida; a contratación de persoal suficiente durante o verán para atender á demanda, notablemente incrementada polos residentes ocasionais estivais; a limpeza, substitución ou reparación de contedores en mal estado; así como a revisión da taxa cobrada ós veciños e veciñas, que actualmente non é acorde coa calidade do servizo prestado.
O portavoz municipal, Guillermo Fernández Dopazo, asegura que “o servizo é pésimo en todo o municipio, pero é especialmente grave que no principal punto turístico de Cea, o mosteiro cisterciense de Santa María de Oseira, a situación de desleixo e suciedade sexa unha constante semana tras semana, por culpa da absoluta inacción do goberno local e da Deputación de Ourense, responsable última”. “A pesar de que a recollida do lixo empeorou manifestamente co paso dos anos, incriblemente aumentaron notablemente as taxas que cobran á veciñanza polo servizo”, denuncia antes de salientar que “a demora do baleirado dos contedores é inaceptable en plena tempada estival con temperaturas tal elevadas”.

O PSdeG-PSOE de Cea solicita, unha vez mais de forma urxente, a mellora na frecuencia da recollida, actualmente reducida a un insignificante e único día á semana na maioría das localidades a pesar dos problemas que crea a acumulación de lixo do verán, e a substitución ou reparación daqueles contedores que se encontran en mal estado. Os socialistas de Ourense recordan que xa denunciaron en numerosas ocasións, na Deputación e en numerosos concellos da provincia, o “pelotazo” que Manuel Baltar executou coa progresiva privatización dun servizo básico como este, que os pequenos concellos non poden prestar, polo que se ven obrigados a recurrir a “pasar polo aro” da institución provincial.

O PSdeG-PSOE de Ourense acorda colaborar en políticas migratorias co goberno de Baixa Saxonia

O secretario provincial de emigración, Luis Gulín, reuniuse no Parlamento co presidente do goberno, co ministro do interior, coa delegada especial para políticas migratorias e cun diputado do SPD

Doris Schröder-Köpf interesouse pola situación actual da inmigración en España e Galicia, solicitando estreita colaboración informativa e de intercambio de experiencias co seu departamento no futuro

Reunion_goberno_baja_sajonia
Stephan Weil, Luis Gulín, Doris Schöder-Köpf e Boris Pistorius

Ourense, 24 de agosto de 2018. O Goberno de Niedersachsen (Baixa Saxonia), un dos dezaseis estados federados de Alemaña, recibiu ó secretario provincial de emigración dos socialistas de Ourense, Luis Gulín, nun encontro no que chegou a acordos coa delegada especial de políticas migratorias e integración, para intensificar a colaboración informativa e de intercambio de experiencias entre o PSdG-PSOE e o seu departamento.

Gulín foi recibido no Parlamento de Niedersachsen, onde o presidente do Goberno deste estado federado, Stephan Weil (Partido Socialdemócrata de Alemania, SPD), agradeceu a visita dun fillo de emigrantes nado en Hannover e a súa implicación no ámbito das políticas migratorias “no partido irmán socialista”. A reunión principal tivo lugar coa delegada especial do goberno para políticas migratorias e integración, Doris Schröder-Köpf, que se manifestou coñecedora de Galicia e do camiño de Santiago, xa que unha das súas mellores amigas é de orixe galega.

Schröder-Köpf interesouse polo miúdo da situación actual da inmigración en España e Galicia, solicitando estreita colaboración informativa e de intercambio de experiencias entre o PSdG-PSOE e o seu departamento no futuro. A delegada especial, que non recibe ningún tipo de remuneración para ese cargo, informou ó secretario de emigración do intenso funcionamento do seu departamento e das actividades de prevención, información a integración realizadas nos últimos anos no seu estado.

O ministro do Interior, Boris Pistorius (SPD), que tamén estivo no encontro, lembrou que o secretario de emigración dos socialistas ourensáns foi en 1984, o primeiro estudante de bacharelato de orixe estranxeira de Niedersachsen que realizou prácticas profesionais de 15 días na policía alemá. Esta iniciativa foi pioneira para a posterior modificación, durante os anos noventa, do acceso ós corpos policiais, onde a nacionalidade alemá non é requisito excluínte.

Posteriormente o secretario de emigración tamén mantivo un breve encontro co deputado rexional do SPD de orixe turca, Alptekin Kirci, que informou a Gulín da súa actividade parlamentaria no seu distrito electoral coas comunidades estranxeiras.

Os socialistas de Leiro denuncian que o alcalde do PP oculta información sobre o vertedoiro xunto ó río Avia

“Se o alcalde unicamente ofrece a calada por resposta, é que algo ten que ocultar en todo este turbio asunto”, asegura Manuel Rodríguez, o portavoz municipal do PSdeG-PSOE

Ante esta falta de explicacións dos conservadores, os socialistas rexistraron un segundo escrito no que demandan copia das licenzas de actividade do solar e copia dos permisos de actividade

Ourense, 24 de agosto de 2018. O PSdeG-PSOE de Leiro denuncia que o alcalde do PP deste municipio ourensán, Francisco José Fernández, está a ocultar todo tipo de información sobre o vertedoiro de lixo e refugallo ubicado na entrada das zonas de ocio e lecer do río Avia, logo de non contestar absolutamente nada á solicitude de información rexistrada polos socialistas a comezos de agosto. “Se o alcalde unicamente ofrece a calada por resposta, é que algo ten que ocultar en todo este turbio asunto”, asegura o portavoz municipal, Manuel Rodríguez, antes de recordar que os gobernos locais, segundo a Lei de bases do Réxime Local vixente, están obrigados a facilitar información ás formacións políticas da corporación.

“Fernández presidente un goberno vergoñentamente preguiceiro que non cumpre debidamente coas súas funcións e que, para colmo, presume dun escurantismo propio doutras épocas pasadas”, denuncia o portavoz. Ante esta ausencia de explicacións claras e concisas por parte dos conservadores de Leiro, os socialistas rexistraron un segundo escrito no que demandan copia das licenzas de actividade do solar e copia dos permisos ambientais pertinentes e necesarios para as actividades que alí se realizan, aparentemente un almacén de carácter industrial. Tamén solicitan que, no caso de inexistencia de licenza e permisos, o alcalde execute os procedementos regulamentarios que son de aplicación nestas situacións de presunta ilegalidade.

O PSdeG-PSOE de Leiro recorda que están a recoller, desde hai moito tempo, críticas e protestas dun gran número de veciños e veciñas, ante a acumulación indiscriminada de lixo e refugallos de ferros e pedras ou depósitos de gran tamaño, xerando un negativo impacto paisaxístico, visual e medioambiental nun espazo que, pola súa excelente ubicación na mesma entrada das zonas de ocio e lecer do río Avia, debería estar limpo e coidado. Rodríguez denuncia que “o vergoñento abandono por parte do concello deste espazo cada vez máis degradado, está a prexudicar seriamente a imaxe do municipio e a vida diaria da veciñanza da zona” por culpa dun goberno local “sumido nunha manifesta deixadez de funcións das súas obrigas coa protección e impulso do medio ambiente e do turismo”.

Os socialistas tamén lle recordan ó rexedor conservador que, aínda que todo ese lixo e refugallo se atopen nunha finca de titularidade privada, é deber obrigado do goberno local vixiar e facer cumprir a lexislación vixente en materia urbanística, de saúde pública e protección do medio ambiente en todo o municipio, tamén nos espazos privados.

Os socialistas de Ourense súmanse ás demandas dos emigrantes en Hannover para a restitución de servizos consulares suprimidos polo PP

O colectivo emigrante presentou ó secretario provincial de emigración, Luis Gulín, as súas protestas pola eliminación de atención consular para a rexión, unha das máis poboadas do país

Emigrantes consideran “absolutamente insuficiente e decepcionante” o servizo mensual decretado polo PP mentres organizacións sen ánimo de lucro están a ofrecer a atención suprimida desde 2011

Ourense, 23 de agosto de 2018. Os socialistas de Ourense súmanse ás demandas dos emigrantes españois en Hannover e o land Niedersachsen (Baixa Sajonia), co fin de acadar a restitución dun servizo sociolaboral consular eficiente e regular, suprimido hai meses polo PP. O colectivo emigrante presentou ó secretario provincial de emigración, Luis Gulín, as súas protestas pola eliminación desta atención consular para esta rexión –unha das máis poboadas do país–, decretado o pasado 30 de xuño pola ministra do PP, Fátima Báñez, logo do carrusel de recortes en todo tipo de servizos e dereitos á poboación española no exterior iniciado polos conservadores en 2011.

Os emigrantes manteñen o seu descontento polo peche do consulado que existía en Hannover ata hai sete anos. Ó pecharse tamén o de Bremen, o consulado de Hamburgo tivo que asumir as súas funcións e agregar á poboación española destas circunscricións. Unha situación de precariedade agravada co peche da atención sociolaboral decidida pola exministra de Traballo conservadora, xa que este ministerio ten estas competencias no exterior. O PP optou por ofrecer un único servizo mensual o primeiro venres do mes de 10 a 17 horas. O colectivo de emigrantes considera “absolutamente insuficiente e decepcionante” esta opción, obrigándolles a desprazarse a Hamburgo cun gasto medio de 80 euros só pola viaxe.

Iván Álvarez, membro de CISNE –unha organización sen ánimo de lucro que axuda a persoas recentemente chegadas a Hannover– denuncia que a falla destes servizos está a supor un problema de calado, debido ó recente aumento da poboación española nesta rexión por mor da crise en España. Tanto Álvarez como un gran equipo de voluntarios están a traballar arreo no seu tempo libre para ofrecer, desde esta organización, a información e os servizos que o PP tombou, prestando “unha axuda moi necesaria a mozos e mozas en situación de vulnerabilidade e desprotección ante a administración alemá”. Por iso denuncian a “ausencia de respaldo institucional e xurídico do servizo consular”. Pola súa banda, a Misión Católica Española de Cáritas en Hannover confirmou ó secretario provincial de emigración por medio do párroco, Salvador Tarrazas, e do traballador social da entidade, que actualmente só poden atender ó colectivo de emigrantes españois en asuntos relacionados coas autoridades xermanas no ámbito dos servizos sociais.

Luis Gulín tamén mantivo un interesante encontro coas persoas que se achegan ó centro de día dos maiores españois de Hannover, e tamén con parte do colectivo do Centro Galego de Hannover, que agradeceron o traballo realizado polo PSdeG-PSOE provincial á hora de informar ós retornados sobre a obrigación de ter que contribuír co cinco por cento da súa pensión alemá, unha circunstancia que descoñecían e da que se decataron grazas á divulgación na prensa de Galicia. Unha situación que, como resaltou o monitor do centro de día, José Antonio Martín, xa é “motivo dabondo” para recuperar o servizo de atención consular en Hannover, polo menos, unha vez á semana.

Os socialistas do Ribeiro denuncian a pésima xestión da mancomunidade

O concelleiros resaltan os problemas que presenta un camión de lixo que realiza o servizo verquendo un abundamente líquido fedorento mentres hai un novo mercado hai pouco tempo desaparecido

Os portavoces tamén denuncian publicamente que un voluntario e encargado do servizo de Protección Civil está a empregar unha furgoneta da agrupación para uso particular

camion_lixo_mancomunidade_ribeiro_verquido

Ourense, 17 de agosto de 2018. Os portavoces do PSdeG-PSOE dos municipios de Cenlle, Leiro, Arnoia, Beade e Cortegada –todos pertencentes á comarca ourensá do Ribeiro– denuncian o pésimo estado e o mal uso dos recursos deste ente público, entre eles, os medios do servizo de recollida do lixo ou do vehículo de Protección Civil. Destacan os problemas do camión de recollida do lixo, que realiza o servizo verquendo un líquido cun cheiro insoportable durante todo o seu percorrido. Así, non entenden que se esté a empregar este vehículo defectuoso e fedorento, cando a mancomunidade ten outro novo que custou 145.000 euros, dos que 50.000 foron sufragados pola Deputación Provincial e o resto foi a cargo dos cartos de toda a veciñanza dos concellos adheridos á mancomunidade. Premendo aquí podedes acceder a un vídeo co problema do camión.

Os socialistas recordan que o presidente da mancomunidade e alcalde de Leiro, Francisco José Fernández, “destacaba e agradecía a colaboración da Deputación de Ourense nesta iniciativa ambiental que supoñía investir nun novo equipamento da recollida de residuos sólidos urbanos”. Os portavoces ficaron “negativamente sorprendidos” ó comprobar os abundantes verquidos prexudicias do vehículo vello e salientan que “non se pode mellorar nin o medio ambiente nin a calidade do servizo de recollida con camións terceiromundistas que están a desfacerse en anacos”. “Que está a pasar co novo vehículo? Onde se gastou a pasta?” pregúntanse.

Os concelleiros do PSdeG-PSOE do Ribeiro destacan que “se está a sangrar ós veciños e veciñas dos municipios aínda pertencentes á mancomunidade con servizos máis caros pero de evidente peor calidade e, por este motivo e moitos máis, incluso concellos gobernados polo Partido Popular como Avión ou Melón marcharon do ente público ante a nefasta xestión, a nula atención ás demandas veciñais reiais e o manifesto encarecemento dos servizos públicos levada acabo polo seu presidente”.

Vehículo empregado para usos particulares

Os portavoces tamén denuncian publicamente que un voluntario e encargado do servizo de Protección Civil está a empregar unha furgoneta da agrupación para uso particular, malgastando diñeiro e facendo un uso indebido dun recurso público que debería estar ó servizo de todos e todas. Os socialistas aseguran que “leva meses facendo isto co pleno consentimento da mancomunidade, polo que imos pedir explicacións polo miúdo ó presidente, posto que non obtivemos explicación algunha por parte desta persoa que está a usar un vehículo público como se fose de seu”. “Tamén imos pedir a dimisión do presidente da mancomunidade pola pésima xestión dos recursos públicos do ente e por consentir este tipo de accións con diñeiro de todos e todas xa que, se esta persoa non ten coche en propiedade, debería comprar ou alugar un no lugar de empregar un ben de interese xeral para uso propio”, conclúen.

Denunciamos que o PP fixo do Concello de Xinzo un “bazar de negocios” tras “vampirizar a administración”

Elvira Lama denunciou que o PP converteu Xinzo “nun bazar de negocios no que todo se vende e se compra” e salientou que “Manuel López fuxe porque a sombra de Antonio Pérez é longa e tiránica”

O secretario provincial relatou que nos atopamos ante os “restos do Concello de Xinzo” e denunciou que “o PP vampiriza todos os recursos” prexudicando gravemente á vida pública

38872882_2012657265425354_6619977000499019776_o

Ourense, 9 de agosto de 2018. O PSdeG-PSOE de Ourense ven de denunciar que o PP fixo do Concello de Xinzo un “bazar de negocios” tras “vampirizar a administración pública para intereses partidarios”, e reclama a “honradez e decencia” que merece a veciñanza. Nunha rolda de empresa ofrecida hoxe polo secretario provincial, Rafael Rodríguez Villarino, e pola deputada e portavoz municipal, Elvira Lama, na que tamén estiveron presentes algúns dos concelleiros e concelleiras socialistas desta vila, denunciaron a situación de deriva e inestabilidade na que se atopa a capital da Limia logo do carrusel de dimisións que acumula o goberno local.

O secretario provincial relatou que nos atopamos ante os “restos do concello” e denunciou que “o PP vampiriza todos os recursos”, prexudicando gravemente á vida pública. Rodríguez Villarino salientou que este concello “é unha administración pública desorientada e desnortada por culpa dun PP que xa se reduce a unha agrupación de intereses”. E, por iso, quixo expresar un “berro de esperanza” ós veciños e veciñas ó recordarlles que os socialistas están dispostos a darlle o goberno local decente e honrado que merecen.

Elvira Lama denunciou que o PP converteu Xinzo “nun bazar de negocios no que todo se vende e se compra”, deixando o municipio nunha situación vergoñenta e irresponsable. “O novo alcalde foi do PSOE pero logo de serlle retirada a confianza polo partido, apoiou a investidura do exalcalde condenado por corrupto coa súa abstención, e agora páganlle aquel favor coa alcaldía”, relatou. “Dun corrupto pasamos a unha persoa honrada que querían usar como marioneta e agora rematamos a xogada cun tránsfuga”, dixo Lama antes de detallar que “Manuel López marcha fuxindo e abandona este PP podre de intereses porque a sombra de Antonio Pérez é longa e tiránica”.

A concelleira manifestou que “Xinzo debe estar preparado para pasar a peor páxina da súa historia” e salientou que “desde o PSdeG-PSOE queremos que remate xa este xogo de tronos no que o PP está a converter ó concello”. “Precisamos un goberno municipal responsable, honrado, decente e de marcado carácter público”, dixo.

A preguntas dos xornalistas, Lama tamén recordou que o candidato popular que debe substituír ó dimitido rexedor –Luis Veloso Rodríguez– firmou, o pasado mes de febreiro, un contrato de servizos de comunicación co Concello de Xinzo adxudicado directamente a dedo polo importe máximo que, naquelas datas, permitía a lexislación de contratos no sector público, polo que agora deberá ou renunciar a acta de concelleiro ou o contrato de 21.000 euros anuales, xa que a lei impón a incompatibilidade.

O PSdeG-PSOE de Leiro denuncia a pasividade do alcalde ante un vertedoiro en plena zona turística do Avia

Moreas de lixo, refugallos de ferros e pedras, ou depósitos de gran volumen, acumúlanse xerando un gran e negativo impacto paisaxístico, visual e medioambiental

O portavoz do PSdeG-PSOE en Leiro, Manuel Rodríguez, destaca que “o goberno local, coa súa pasividade e permitindo toda esta desfeita, é consentidor e culpable dunha situación lamentable”

Lixo en Leiro

Ourense, 9 de agosto de 2018. O PSdeG-PSOE de Leiro denuncia a pasividade do alcalde do PP cun vertedoiro de lixo e refugallo ubicado na entrada das zonas de ocio e lecer do río Avia. E que o acceso á área de esparexemento onde está a praia e o paseo fluvial, a pasarela colgante, o parque do Salgueiral, o campo de fútbol, as antigas instalacións do cámping ou a residencia de maiores, estase a converter nun gran solar abandonado no que se acumulan moreas de lixo, refugallos de ferros e pedras, ou depósitos de gran volumen, xerando un gran e negativo impacto paisaxístico, visual e medioambiental.

O portavoz dos socialistas de Leiro, Manuel Rodríguez, destaca que o “vergoñento abandono por parte do Concello deste lugar ó lado mesmo de espazos cun destacado valor turístico e medioambiental da ribeira do río, está a prexudicar seriamente a imaxe do municipio de cara ós turistas e visitantes, pero tamén está a causar malestar entre os veciños e veciñas que desfrutan destes lugares no seu día a día”. “A incompetencia do PP é absoluta porque, mentres gastan centos de miles de euros de diñeiro público nun SPA do viño para facer de Leiro un destino turístico destacado, non teñen o máis mínimo control dunha das zonas de maior interese turístico do municipio ó deixar que se acumule tal cantidade de lixo nunha espazo polo que deben pasar os turistas que vaian ó SPA”, aseveran desde a agrupación municipal.

Rodríguez insiste en que “o goberno local, coa súa pasividade e permitindo toda esta desfeita, é consentidor e culpable dunha situación lamentable, xa que o seu deber é vixiar as zonas de interese turístico e poñer en coñecemento das autoridades medioambientais as irregularidades que se cometan no seu territorio algo que, evidentemente, non está a facer”.

Os socialistas destacan que o goberno conservador de Leiro está “sumido nunha total deixadez de funcións en todo o relacionado co control destes refugallos e coa defensa, protección e impulso dos espazos medioambientais máis importantes do municipio”. Ante esta vergoñenta preguiza dos populares, reclaman ó alcalde que, dunha vez por todas, se poña a traballar e busque “solucións inmediatas”. O PSdeG-PSOE recorda que existe unha planta de reciclaxe na estrada de Vieite (na que se atopa a zona industrial), e debería ser alí onde se acumulen e reciclen este tipo de restos.

Denunciamos o desleixo da Xunta ante as pragas que asolan Ourense


Solicitan crear e aumentar partidas económicas e liñas de axuda e a creación dun centro de investigación fitopatolóxica en colaboración coa universidade, para que realice traballos de prevención e loita

Denuncian que a Xunta claudicou resignada e nin tivo nin ten un protocolo efectivo de actuación global para evitar estas pragas, así como problemas de persoal e material

bee-close-up-fictional-37144

Ourense, 6 de agosto de 2018. O PSdeG-PSOE de Ourense denuncia o desleixo da Xunta de Galicia ante as invasións de vespa asiática, vespa do castiñeiro e praga do carballo que está a sufrir a provincia, e reclámanlle ó goberno galego –que ten as competencias nesta materia– a inmediata declaración de praga, así como a adopción de medidas máis eficientes de prevención, control e información. A secretaría provincial de medio ambiente destaca que a “falla de reacción e a absoluta incapacidade do PP para facer fronte á incontrolada expansión destas especies, está asolando os campos e xa está a producir importantes danos a sectores primarios, debilitando aínda máis o sustento económico das nosas zonas rurais”.

Os socialistas critican que o Goberno galego non se está a tomar as medidas científicas, sociais e económicas necesarias, deixando boa parte da problemática en mans dos concellos, moitos xa desbordados. Por iso solicitan crear e aumentar as partidas económicas e liñas de axuda. Así mesmo reclaman a creación dun centro de investigación fitopatolóxica na provincia, en colaboración coa universidade, para que realice traballos de prevención e loita destas pragas. Tamén demandan máis persoal; a posta en marcha plans de información, formación e prevención sobre a invasión destas especies; e a mellora dos contratos e as metodoloxías dos traballos que realizan as empresas que están a loitar contra estas pragas. Así mesmo recordan que hai meses que se aprobaron iniciativas no Concello e na Deputación de Ourense nas que se instaba a implementar medidas máis efectivas.

“A Xunta, que nin tivo nin ten un protocolo efectivo e de actuación global para evitar a chegada destas pragas, claudicou resignada e parece asumir que estas especies foráneas viñeron para quedar definitivamente”, aseveran desde o PSdeG-PSOE antes de denunciar problemas de persoal. A desorganización dos responsables do PP está a provocar situacións absurdas: moitos niños non poden ser retirados de árbores rodeadas de maleza porque o persoal contratado para retirar niños non pode rozar esa vexetación xa que a Xunta non lles paga ese traballo.

Achegamos un breve resumo facilitado pola secretaría provincial de medio ambiente do PSdeG-PSOE, sobre os efectos destas pragas:

Efectos da vespa asiática

A vespa asiática ten incidencia directa sobre a fauna local, a polinización e os produtos agrícolas. Son moitas as froitas que son roídas, mordidas e comidas (uvas, peras, mazás, figos ou kiwis), particularmente en froiteiras próximos aos niños. Na apicultura constatouse que houbo unha redución do censo de apicultores de ata o 26%; descensos da poboación de abellas ou incluso a morte da totalidade das colonias nalgúns colmenares; falla de pole e mel no outono ou importantes déficits nas reservas de alimentos, problemas que repercuten seriamente na economía deste sector.

Efectos da vespiña do castiñeiro

A vespiña do castiñeiro produce unhas tumoracións nos brotes das diversas especies de castiñeiro. Estas tumoracións causan un enfraquecemento xeral da árbore que o fan máis susceptible a outras pragas e enfermidades, chegando mesmo, en situacións extremas, a ocasionar a morte. O seu principal efecto é a perda de produción, danando un sector esencial na economía da provincia, tanto na súa produción como no sector de secundario transformación e elaboracións de produtos con castaña ( fariñas, bicas e marrón glace. Tras localizarse en Cataluña en 2012, nun lustro xa colonizou a práctica totalidade das rexións castañeiras de España, non tanto polo voo do insecto senón polo transporte de árbores infectadas.

Efectos da praga dos castiñeiros

Os ataques da Altica Quercetorum Foudr. que sofren os carballos provócanlles a desfoliación, un efecto que ocasiona un dano visual e paisaxístico que pode danar o turismo rural. Ademais, os bosques infestados poden sufrir ataques de Mycrosphaera alphitoides (Oidio do carballo), o que ocasiona un gran enfraquecemento das masas que se podería traducir en posibles ataques de insectos xilófagos e, en consecuencia, na morte dos pés afectados.

O PSdeG-PSOE sae en defensa do servizo de pediatría na provincia

Os socialistas ourensáns esixen o fin deste ataque furibundo contra os servizos sanitarios dos nenos e nenas e reclaman ó Sergas as medidas organizativas e as contratacións necesarias para manter pediatras

Desde o PSdeG-PSOE levaranse a cabo as accións necesarias para frear o castigo do PP á provincia e, concretamente, ós concellos do rural, tras esta descarada e continuada supresión de servizos

pediatria

Ourense, 24 de xullo de 2018. O PSdeG-PSOE de Ourense sumouse hoxe á concentración veciñal convocada en Castro Caldelas, para defender o mantemento do servizo de pediatría nos municipios do rural da provincia, ante os reiterados ataques de Alberto Núñez Feijóo á saúde dos nenos e nenas. Centos de menores quedaron sen pediatra polos recortes da Xunta de Galicia nos orzamentos sanitarios, obrigando ós cativos e as súas familias a desprazarse ós complexos hospitalarios universitarios de Ourense e Vigo para recibir atención médica básica, unha situación indigna e vergoñenta pois atenta directamente contra un dereito universal como a saúde.

Á protesta acudiron, entre outros cargos e militantes socialistas, o secretario provincial do PSdeG-PSOE, Rafael Rodríguez Villarino; o secretario de organización, Juan Carlos Francisco Rivera; o vicesecretario de relacións institucionais, Álvaro Vila; o deputado do Parlamento de Galicia, Raúl Fernández; a deputada e viceportavoz na Deputación, Elvira Lama; a alcaldesa de Castro Caldelas, Sara Inés Vega; ou o tenente de alcalde de Parada de Sil, Aquilino Domínguez. No acto evidenciouse o malestar veciñal ante unha nova labazada á atención sanitaria de calidade que está afectando ós concellos onde máis cómpre que se asente poboación moza.

Os socialistas levan meses denunciando o brutal recorte que o PP está a aplicar ós servizos sanitarios pediátricos da provincia de Ourense con peches, recortes e suspensións de todo tipo, nun ataque inaudito contra os dereitos dos nenos e nenas. Esta decisión de suprimir pediatras de atención primaria afonda no deficiente trato sanitario xeral que teñen que padecer os veciños e veciñas de Ourense por parte da Xunta. Un carrusel inaudito de tesoirazos sanitarios e sociais que durante os últimos anos provocou, entre outros, a supresión do servizo de urxencias pediátricas 24 horas no hospital da terceira cidade de Galicia; a paralización de intervencións programadas de cirurxía pediátrica no Complexo Hospitalario Universitario de Ourense (que atende a 400.000 persoas de toda a provincia e tamén do sur de Lugo); ou a eliminación de numerosos médicos pediatras nos centros de atención primaria.

Os socialistas ourensáns esixen o fin deste ataque furibundo contra a provincia e reclaman ó Sergas as medidas organizativas e as contratacións necesarias e inmediatas para dotar do persoal suficiente os centros sanitarios, co fin de restablecer este servizo. Ademais recordan que, durante décadas, o servizo pediátrico ourensá foi un referente para o resto de Galicia, con plena operatividade as 24 horas do día os sete días da semana, a pesar de contar con menos facultativos que outras zonas sanitarias pediátricas de similar poboación. Polo tanto, non se trata de demandar nada que non existira previamente. Desde o PSdeG-PSOE levaranse a cabo as accións necesarias para frear o castigo do Partido Popular á provincia e, concretamente, ós concellos do rural, tras esta descarada e continuada supresión de servizos básicos atacando incluso á infancia.