Monthly Archives: March 2015

Os socialistas de Leiro advirten de que o vindeiro mes de abril empezarán as “rebaixas” coa “campaña de obras” por parte do goberno municipal

31/03/2015
By

Os socialistas de Leiro denuncian que o goberno municipal segue a enganar aos veciños, utilizando tódalas canfurnadas habidas e por haber para sacar rédito político cara ás próximas eleccións municipais, ao usaren obras que xa deberían estar iniciadas e/ou rematadas antes deste ano electoral, moitas delas propostas polos socialistas no pleno do Concello; e mostran a súa total indignación pola “tomadura de pelo” que supón a utilización desa “campaña de obras” a menos de dous meses das eleccións.

Pola contra, os compañeiros de Leiro lembran que eles chegan cos “deberes feitos”, ao non deixaren para o final do mandato municipal o seu traballo como oposición, materializado en todo tipo de iniciativas destinadas a cumprir coas súas obrigas de defende-los intereses e dereitos dos veciños, que consideran conculcados polo goberno municipal, así como en fiscalizaren a este último.

En contraposición a esta vocación de traballo polos veciños, os socialistas sitúan a “inacción, inaptitude, pasotismo e ineficacia” do grupo de goberno, que trata de que o alcalde siga na cadeira “custe o que custe” e de disimular que neste mandato municipal se sucedeu “incumprimento tras incumprimento”, co “engano” da devandita “campaña de obras”, feita ás carreiras.

Seara reclama ao Goberno central que impulse “a estación intermodal de Ourense, e non a converta nun apeadoiro”

26/03/2015
By

A deputada socialista no Congreso pola nosa provincia, Laura Seara, rexistrou unha nova iniciativa parlamentaria na Cámara baixa coa que reclama ao Goberno central, unha vez máis, a realización da estación intermodal da cidade.

Seara considera que “é inadmisíbel que, a estas alturas, o Goberno do PP non teña nin sequera proxectado o modelo para a estación intermodal”, e sinala que “a realización da estación intermodal de Ourense é absolutamente necesaria para o proxecto de Alta Velocidade” de Galicia á meseta, “xa que Ourense é a súa porta de entrada”.

A deputada sinalou que o Goberno do PP xa “se cargou” o proxecto “previsto por doce millóns de euros para a estación de Alta Velocidade de Medina del Campo (Valladolid) que pertence á liña do AVE Madrid-Galicia, e agora vaise a construír cun investimento de tan só 6,2 millóns de euros”; e lle pide ao Goberno “que non lle de a o mesmo tallo á estación intermodal de Ourense”, advertindo de que “se o Goberno segue por ese camiño, a estación intermodal de Ourense, chamada a ser estación central de Galicia, pode quedar nun apeadoiro”.

Seara leva dous anos denunciando “a paralización e o silencio do Goberno do PP respecto da estación intermodal” da cidade. En maio do 2014 xa indicou, nunha comparecencia no Congreso dos Deputados do Secretario de Estado de Infraestruturas, que “o Goberno do PP enterrou a estación de Norman Foster, e ademais engana co custo do proxecto”. A deputada tamén leva meses denunciando a paralización das obras do AVE a Galicia na nosa provincia, así como a rebaixa, por parte do Goberno central, das “verdadeiras” características da Alta Velocidade, a Galicia.

Xa que logo, Seara considera que “esta situación á que o Goberno do PP somete á estación do AVE en Ourense, é incompresíbel, tendo en conta que o proxecto está adxudicado dende o 2011 grazas ao Goberno Socialista”, e lamenta a falta de resposta por parte do Ministerio de Fomento ás preguntas parlamentarias do Grupo Socialista sobre o grao de execución dos diferentes tramos do AVE á meseta.

A deputada denuncia que o Goberno central “confunde austeridade con temeridade, e minte deliberadamente sobre a chegada do AVE” da meseta, sobre o que está convencida de que “saben que non estará, nin de broma, no 2018”, porque, ao ritmo da execución que leva o PP, “é imposíbel”.

Leva ao PP a usar mentiras disparatadas para tentar explica-lo rexeitamento a unha iniciativa para impulsa-las obras do Arquivo e a Biblioteca de San Francisco

25/03/2015
By

Esta tarde, na Comisión de Cultura da Cámara Baixa, unha iniciativa transaccionada por PSOE e BNG para impulsa-las obras do Arquivo e a Biblioteca de San Francisco, foi rexeitada polo PP. Mediante unha enmenda do PSOE, a nosa deputada no Congreso, Laura Seara, incluíra nunha iniciativa do BNG unha petición ao Goberno central de “defini-lo uso do coñecido como antigo solar da igrexa, que forma parte do conxunto patrimonial das antigas instalacións do Convento de San Francisco”.

Porén, o PP rexeitou dita proposta transaccional, dun xeito que a nosa deputada cualificou de “absoluta desfachatez”. E é que a ex-alcaldesa de Bande, convertida en voceira do PP neste tema, chegou a afirmar que os logros de Arquivo e Biblioteca se terían debido ao actual candidato desde partido á alcaldía da cidade. Seara aclara que ditas afirmacións “son un tremendo disparate, ademais dunha gran falsidade e unha incrible cara dura”, lembrando que o actual Presidente do Goberno, en 1999, sendo ministro de Cultura, prometera -non moito antes dunhas eleccións xerais- “un complexo cultural de 18 000 metros cadrados para restaura-lo convento co fin de convertelo en Arquivo Histórico Provincial e construír unha biblioteca”, e que, “dende entón, esta infraestrutura sufriu todo un rosario que só se encauzou no 2004 cando, xa co Goberno central socialista, o Ministerio requiriu á empresa adxudicataria polos incumprimentos de prazo”. No entanto, no 2005, a empresa solicitara paraliza-las obras e reclamou 2,5 millóns de euros por certificacións, quedando a obra paralizada, ata que en febreiro do 2010 o Xulgado levanta a suspensión cautelar. “Entón, o Goberno Socialista finalizou e adxudicou o proxecto, pero cando estaba en proceso de adxudicación, en novembro do 2011, foi esixida a súa paralización no traspaso de poderes do Goberno central Socialista ao Goberno do PP”.

Por se fosen pouco ilustrativos estes datos, Seara engadiu que “en ningún exercicio orzamentario”, incluso “en plena paralización xudicial, o anterior goberno, o Goberno Socialista, deixou de orzamenta-los investimentos”; e sostivo que “agora que parece desbloqueada esta actuación tan importante e tan esperada pola cidade, o Goberno debe impulsa-las obras e cumpri-los seus compromisos, así como estuda-los posibles usos do solar no que estaba a antiga igrexa”.

Xa que logo, Seara lamentou “o rexeitamento do PP a esta iniciativa”, que “é unha auténtico xerra de auga fría para os ourensáns”, e remarcou que “só o PP votou en contra”.

Instamos ao Goberno central a formalizar urxentemente o protocolo para transferir ao Concello da cidade os tramos da N-120 do bulevar termal

21/03/2015
By

A deputada socialista no Congreso, Laura Seara, rexistrou na Cámara baixa unha Proposición Non de Lei coa que insta ao Goberno central a “que formalice inmediatamente o Convenio co Concello de Ourense, en base ao protocolo asinado no 2011, para transferir ao Concello os tramos da N-120 que dan acceso á zona termal, coñecida como ‘bulevar termal ‘ ”.

Con esta Proposición Non de Lei, os socialistas ourensáns pedimos ao Goberno central “que transfira dunha vez ao Concello de Ourense os tramos da N-120 que dan acceso á zona termal”, petición que levamos anos reclamando ao Goberno central, despois de que, no 2011, o Goberno socialista asinase co concello da cidade un protocolo para tal fin.

O candidato socialista á alcaldía de Ourense, José Ángel Vázquez Barquero, sostén que “a cesión ao Concello de Ourense do tramo da N -120 que dá acceso á zona termal da cidade é un cuestión estratéxica para os socialistas”. Neste senso, apunta que “Ourense é a capital termal de Galicia, e a segunda cidade de Europa, logo de Budapest, con maior volume de augas minero-medicinais”, e sinala que “a maioría das nosas surxencias termais se sitúan, ben na canle, ben nas ribeiras, do río Miño, e necesitan mellora-a súa accesibilidade para que unha explotación racional deste recurso permita un desenvolvemento turístico da cidade”.

Seara solicita unha vez máis no Congreso a transferencia destes tramos da N-120 ao Concello, tras recibir unha resposta na que o Goberno central indica que non os transferirá ata que non execute o primeiro proxecto da variante Norte da cidade. Para a deputada, a resposta do Goberno “é inadmisíbel”, xa que “existe un protocolo asinado dende o 2011, e pasou xa tempo máis que dabondo, catro anos, para que o Goberno formalice dito protocolo cun convenio”. Tamén mostra a deputada a súa preocupación por esta resposta dende o punto de vista de que “o Goberno do PP nunca inclúe suficiente dotación orzamentaria para o proxecto da variante Norte, polo que, se hai que esperar a que este se execute, o bulevar termal seguirá anos sen ve-la luz”

A deputada lembra: “a Secretaria de Estado de Turismo xa me respostou, nunha interpelación no Congreso, que o proxecto do bulevar termal de Ourense non é prioritario para o Goberno, e non ten dotación orzamentaria”. Anteriores respostas parlamentarias escritas do Goberno do PP a Seara tamén sostiñan que non había dotación económica para transferi-los tramos da N-120 ao Concello da cidade. Porén, Seara coida que “o proxecto do bulevar termal é de grande importancia para Ourense, tanto desde un punto de vista turístico como económico, e pídelle ao Goberno de Rajoy “que deixe de dar longas a este proxecto”.

Vázquez Barquero lembra que o anterior ministro de Fomento, José Blanco, asumiu o compromiso, e asinou, co alcalde da cidade “un protocolo que posibilitaba a reconversión dun tramo importante da N-120, ao seu paso por Ourense, nun bulevar que solucionase a limitada accesibilidade á nosa principal área termal”. Porén, destaca que “a actual ministra, Ana Pastor, enviou o protocolo asinado ao baúl dos recordos, e relegou novamente á nosa cidade, do mesmo xeito que fixo coa chegada do AVE e coa construción da nova estación intermodal”.

Seara denuncia que Ourense sufriu máis de mil setecentas subtraccións en explotacións agrícolas e gandeiras nos últimos tres anos, e só se esclarecen un 10%

19/03/2015
By

Tras recibir unha resposta parlamentaria do Goberno central, a deputada socialista no Congreso pola nosa provincia, Laura Seara, denuncia que “Ourense é a provincia galega con maior número de roubos no campo, e só se resolve o 10% dos mesmos”.

Dita resposta do Goberno central sinala que, na nosa provincia, se produce unha media de 570 subtraccións por ano en explotacións agrícolas e gandeiras, cun total de 1736 nos últimos tres (628 no 2012, 621 no 2013 e 487 no 2014).

Seara critica que “malia este elevado índice de delitos no campo ourensán, no 2012 só se esclareceu o 10,3% deles, no 2013 un 12,8%, e no 2014 un 10,4%. Xa que logo, a deputada opina que “non só é preocupante o altísimo volume de delitos que se producen no rural ourensán, senón que, ademais, as cifras reflicten que “cada ano fica sen resolver un número máis alto dos mesmos”, polo que considera que estes datos son “contrarios ao que cabería esperar trala creación na provincia, hai pouco máis dun ano, dos equipos especializados en roubos no campo, ‘ROCA’ ”. A deputada, apunta que “aínda que, dende creación, en decembro do 2013, dos equipos ‘ROCA’, o número destes delitos no campo ourensán diminuíu, aumentou, con todo, do 2013 ao 2014 o número deles nos que non se acha aos culpables”. De feito, segundo a resposta do Goberno central, a porcentaxe de delitos no campo esclarecidos na nosa provincia ten tendencia á baixa dende o 2010, cando se resolveron un 13,9% dos mesmos.

A deputada ourensá compara e reflicte que “no resto de provincias galegas, a porcentaxe de delitos no campo resoltos non é moito mellor, pero si é moito menor o número de roubos que se producen”. Así, no 2014, fronte aos 487 en Ourense, en Lugo, houbo 46. E incluso nas provincias atlánticas, a comparación resulta rechamante, con 71 casos n’A Coruña e 96 en Pontevedra.

Seara reproba que o Goberno central recoñecese na súa resposta que “o número de equipos ‘ROCA’ e a súa composición non é fixo”, que “partindo dun mínimo de dous efectivos e, dependendo das necesidades operativas de cada momento e da evolución desta tipoloxía delituosa, fórmanse os equipos cos axentes necesarios para cumprir eficazmente a súa misión”, e que “a súa distribución territorial dentro de cada provincia tamén é obxecto de actualización en virtude da evolución e do desprazamento xeográfico da actividade criminal”. Para a deputada, iso “non é suficiente, pois estamos ante o maior incremento da Historia en infraccións penais nas explotacións agrícolas e gandeiras”, engadindo que “aínda que no 2014 diminuíu algo o número de delitos, a cifra segue sendo desmesurada e intolerábel”.

Por iso, lle pide ao Goberno central “que estude qué está a fallar” e “que realice mellor planificación, para que diminúa o número de delitos no campo ourensán e aumenten os que se resolven”.

Seara pide actuacións para dar solución aos problemas de enchentes e mala calidade das augas do río Arnoia ao seu paso por Vilar de Barrio

17/03/2015
By

A deputada socialista no Congreso por Ourense, Laura Seara, rexistrou na Cámara baixa unha iniciativa parlamentaria coa que lle pide ao Goberno central a realización de actuacións para dar solución aos danos causados pola enchente do río Arnoia ao seu paso por Rebordechao (Vilar de Barrio), así como á situación alertada polos veciños da localidade de Arnuide, no mesmo concello, respecto de a dubidosa potabilidade do auga e ata a falta de fornezo a consecuencia das enchentes do río.

Na súa iniciativa, a deputada sostén que os veciños da zona nos trasladaron “a situación de alerta existente pola mala calidade das augas do río Arnoia ao seu paso polo concello de Vilar de Barrio, sobre todo durante os meses de verán do 2014”, ao que “se engade que o desxeo do río nos meses de xaneiro e febreiro deste ano xerou numerosas perdas no concello, especialmente na parroquia de Rebordechao, despois de que a subida do nivel do auga provocase estragos na estrada de acceso ao pobo, e esnaquizase leiras de cultivo e pastoreo”.

A deputada apunta que en Arnuide, “existe unha seria preocupación respecto de a potabilidade da auga, e ata os veciños se quedan sen fornezo de auga” da traída “cando hai enchentes do río”.

Respecto de a localidade de Rebordechao, Seara indica que “a rotura da presa provocou a inundación dos cultivos e impide o paso a numerosas leiras, o que botou por terra o traballo dos labregos”.

A deputada destaca que estas denuncias dos veciños contradinse cunha resposta do Goberno central á propia Seara, do pasado mes de setembro, na que o Executivo afirmaba que “o río Arnoia conta con tres masas de auga que se atopan en bo estado”, e que o Ministerio, a través da Confederación Hidrográfica Miño-Sil, “levaría a cabo actuacións encamiñadas á conservación e mantemento do dominio público hidráulico das marxes do río Arnoia, segundo as necesidades que se fosen detectando”

Seara reprocha que “as denuncias dos veciños poñen de manifesto que se detectaron ditas necesidades e, con todo, nin o Concello nin a Xunta, aos que aqueles se dirixiron sen éxito, nin o Goberno central, están tomando ningunha medida”.

O PP teima en pinchar en óso co alcalde de Piñor

12/03/2015
By

Velaquí a resposta de Francisco Fraga, alcalde de Piñor, ás últimas insidias do PP de Ourense sobre a xestión dese Concello:


Resposta ás mentiras do voceiro do PP de Piñor.

Unha vez máis o voceiro do PP en Piñor volve coa súa teima habitual de atribuirme todos os males que acontecen no Concello de Piñor, sexan reais ou imaxinarios. A poucos engana, porque en Piñor coñecémonos todos, pero para evitar que queden dúbidas na xente que descoñeza a situación de Piñor convén facer as seguintes aclaracións:

- Periodicidade dos plenos: En xaneiro tocaría pleno ordinario e non o houbo por non haber asuntos a tratar. Convocar un pleno para aprobar únicamente a acta anterior e facer rogos e preguntas semella pouco serio e un despilfarro nas circunstancias actuais. Ademais sabe ben que non se ve impedida a súa función de control ó goberno posto que se lle dá carácter ordinario ós plenos, é dicir admítense mocións e rogos e peguntas. Por certo, revisadas as actas dos plenos deste mandato o PP só presentou tres mocións para o debate en pleno, unha relativa á violencia terrorista, outra a liortas nas manifestacións de Madrid e a terceira á modificación da planta xudicial. Que cadaquén saque as súas propias conclusións. Pero é que hai máis, no último pleno non foron quen de votar a favor dunha refinanciación dos préstamos do plan de pago a proveedores, o cal lle vai supor un aforro importante ó concello. Sobre a periodicidade dos plenos tamén acudiu ó Valedor do Pobo a través dunha queixa que máis ben era unha causa política xeral contra min. A queixa foi arquivada.

- Gastos en persoal: abonda cunha cifra para ver que minte; na liquidación do orzamento do 2014 a porcentaxe dos gastos do capítulo de persoal foi do 27,94 % sobre o total do orzamento liquidado. Moi lonxe da metade como afirma o voceiro do PP, a non ser que para el a metade sexa outra cousa.

-Aprobación da conta xeral: cunha breve consulta á lexislación daríase conta de que hai de prazo ata o 1 de outubro para ser aprobada polo pleno.

- Aprobación dos orzamentos: é certo que imos con retraso na súa presentación, coma a maior parte dos exercicios pasados e coma moitos concellos máis grandes ca Piñor e con moito máis persoal que non os presentaron aínda, ata hai algún de ben cerca de Piñor e gobernado polo PP que leva anos sen presentalos.

- Atención ós veciños por parte do persoal do Concello: é algo radicalmente falso e malintencionado. Pese a escaseza de persoal do concello, os expedientes resólvense dentro dos prazos establecidos e aténdese a toda aquela persoa que se acerca á casa do concello. Nestes anos o concello mudou, e moito. Son moitos os servizos que agora se lle prestan ós veciños dende o concello: servizos sociais, axuda no fogar, programa de educación familiar, programa de actividades para a infancia, a xuventude e os maiores, programa de atención psicolóxica, punto de información catastral, servizo de abatecemento municipal, servizo de velorio municipal, brigada de obras municipais, programa de compostaxe doméstica, brigada de desbroce e limpeza de camiños, servizo de tractor-desbrozadora municipal, asesoramento urbanístico, cursos de formación para desempregados, tramitación de permisos para outras administración que se fan dende o concello para evitarlle desprazamentos á veciñanza e múltiples programas de actividades que se levan a cabo ó longo do ano, e un longo etcétera que estendería en exceso este escrito. Imposible comparar con anos atrás cando no concello funcionaba o rexistro civil e pouco máis. Na comparación efectuada polo voceiro do PP omite todo isto intencionadamente, pensa que canto peor lle vaia ó concello mellor lle vaia ir a el políticamente. A súa labor de obstrucción a todo o que se fai no concello é constante, intentando que a este concello non lle dean o que lle corresponde, poñendo continuas trabas nas administración estatal e autonómica, gobernadas ambas polo PP.

- Acceso á información e o resto de lamentos que relata: nisto non vou perder moito tempo porque xa lle respondeu o Valedor do Pobo no seu momento arquivando a queixa que presentou.

E así podería seguir, desmentindo o que non son máis ca mentiras insidiosas e interesadas destinadas a ver se engana a alguén para que lle vote. De aquí ó 24 de maio quedan unas cantas máis por ver, se hai catro anos ofertou postos de traballo inminentes nunha fábrica de coches eléctricos que se ía instalar nun polígono que a día de hoxe aínda non existe, agora calquera cousa pode ser posible. Pola miña parte pouco tempo máis lle vou adicar, o meu esforzo e as miñas preocupacións son outras: seguir mellorando a calidade de vida e as oportunidades dos habitantes de Piñor e defendendo os seus intereses dende o concello. Os xogos políticos e as mentiras déixollas todas para el.

Seara pregunta ao Goberno “qué fará” se a Audiencia Nacional o obriga a revoga-la orde que permite converte-lo castelo de Monterrei nun Parador

12/03/2015
By

A deputada socialista pola nosa provincia, Laura Seara, rexistrou hoxe no Congreso dos Deputados unha iniciativa parlamentaria coa que pide ao Goberno central que dea “marcha atrás e revogue o acordo polo que se ampliaron os usos do castelo de Monterrei”.

Seara sinala que a Audiencia Nacional dictou un auto no que desestima as alegacións presentadas pola Avogacía do Estado á denuncia que no seu día interpuxera a Plataforma en Defensa do castelo de Monterrei. Porén, dito auto sinala que a defensa do patrimonio cultural si lexitima aos veciños neste proceso xudicial.

Por iso, a deputada advirte ao Goberno central que “a Audiencia Nacional podería dictar sentenza favorable á denuncia interposta pola Plataforma en Defensa do castelo de Monterrei, e obrigar ao Goberno a revoga-la orde de cambio de usos do castelo”. Xa que logo, Seara pídelle ao Goberno central que resposte acerca de “qué actuacións tería que levar a cabo o Goberno se esto ocorre”.

Seara xa denunciara no Congreso, en setembro do 2014, cunha Proposición Non de Lei, as nefastas consecuencias que estaban tendo para o castelo de Monterrei as obras realizadas para convertelo nun hotel de luxo. Xa entón, a deputada instou ao Goberno central a revoga-la Resolución de 1 de xullo do 2014, na que a Dirección Xeral de Patrimonio do Estado acordara amplia-lo destino previsto na cesión á Xunta do castelo e o seu recinto amurallado. Do mesmo xeito, Seara solicitou que o Goberno central se dirixise á Xunta para paralizar inmediatamente as obras.

A deputada reproba que “aquela Resolución do Goberno do PP foi para satisface-lo capricho de Feijóo, que non é outro que o de construír un hotel de luxo no castelo, coa previsión de cedelo despois á Administración turística do Estado para a súa explotación a través da Axencia de Turismo de Galicia”. Para Seara “o investimento para converter o castelo nun hotel de luxo, é un absurdo desperdicio económico, cando xa existe un Parador a escasos metros da fortaleza de Monterrei, que ten que pechar catro meses ao ano por falla de demanda hoteleira”.

Ademais, Seara sinala que “a día de hoxe, as obras seguen o seu curso, o que pode supoñer un completo malgasto de cartos públicos, se finalmente a sentenza da Audiencia Nacional é favorábel á petición dos veciños”, polo que empraza ao Goberno central a “rectificar canto antes; non só en interese do monumento nacional e dos veciños de Monterrei, senón tamén por decencia, antes de que poida suceder que unha sentenza da Audiencia Nacional lle poda poñe-la cara colorada”.

Seara reprocha ao Goberno central que non conteste no Congreso dos Deputados, pero vaia ao encoro d’As Conchas a “vender” actuacións “de atrezzo” que non solucionan o problema da súa contaminación

11/03/2015
By

A deputada socialista pola nosa provincia, Laura Seara, critica que “o PP case en pleno -delegado e subdelegado do Goberno, presidente da Deputación, delegado da Xunta, presidente da CHMS e alcaldes de Bande e Muíños- foi ao encoro d’As Conchas a facerse a foto e a ‘vender’ actuacións de atrezzo que non solucionan o problema de contaminación que sofre o encoro e o río Limia”.

Seara considera que “esta visita en masa de membros do PP ao encoro prodúcese trala denuncia que os socialistas fixemos no Congreso dos Deputados, hai apenas dúas semanas, sobre o problema de contaminación existente no val do Limia e a preocupación social por este asunto”, e critica que “vaian respondernos ao encoro d’As Conchas con atrezo, en lugar de facelo no Congreso” e que “as actuacións que o PP foi a ‘vender’ á zona -vestiarios, piscinas municipais e aparcadoiro- poden ser positivas como medidas turísticas e de ocio alternativas para o baño ante a contaminación no encoro, pero non solucionan o problema; e o verdadeiro problema é a contaminación difusa existente na bacía do Limia; unha contaminación que o propio Goberno recoñeceu en respostas parlamentarias pero á que non ofrece ningunha solución”.

Fronte a esa atitude, a deputada plantexa que “son necesarias actuacións urxentes de recuperación do sistema fluvial do río Limia, e non é suficiente coa instalación ‘dentro duns meses’ de tres illas vexetais no encoro, nin con dicir que as últimas análises non detectan cianobacterias”, xa que “as temperaturas baixas do inverno favorecen que non se vexan” as mesmas, pero estas “son acumulativas, e as altas temperaturas vindeiras poden provocar unha nova explosión” destes organismos, “como a xa sufrida na zona portuguesa do val no verán do ano pasado”.

Ente as actuacións necesarias, Seara sinala que o Goberno central “debe explicar cómo se resolverán os verquidos agrogandeiros”. Como solución, propón a posta en marcha de actuacións de boas prácticas agroambientais que apoien un equilibrio entre o desenvolvemento agrogandeiro e a sostibilidade ambiental. Así mesmo, a deputada defende que se habiliten subvencións aos produtores agrogandeiros da bisbarra, para que poidan adopta-las súas plantas e instalacións á sostibilidade ambiental.

Respecto da actuación anunciada polo PP sobre as piscinas municipais en Muíños, Seara pregunta ao Goberno central “se se realizarán con cargo ao proxecto de recuperación ambiental ‘Regenera Life’, cuxos fondos deben destinarse a soluciona-la contaminación, e non a ofrecer alternativas de baño”. Neste senso, a deputada engade que “ao PP lle gusta moito ir a anunciar inauguracións e obras, pero non ofrece solucións á contaminación no encoro e no río, e tampouco deixa claro aos veciños que non corren ningún perigo e que as augas están saneadas para uso agrícola, doméstico e de baño”. Seara resúmeo do seguinte xeito: “en ningún caso resolven a ameaza á saúde pública”.

Seara denuncia que en Ourense hai trescentas vintedúas vivendas baleiras propiedade da SAREB

11/03/2015
By

A deputada socialista no Congreso pola nosa provincia, Laura Seara recibiu unha resposta do Goberno central na que este confirma que na nosa provincia existe un stock de trescentas vintedúas vivendas da Sociedade estatal de Xestión de Activos Procedentes da Reestruturación Bancaria (SAREB). A resposta sinala que, do total de 107 446 vivendas que a SAREB ten en stock en España, un 0,3% están na nosa provincia.

Seara critica que “nunha provincia como Ourense, cun alto grado de empobrecemento, un elevado índice de poboación envellecida, cunha das maiores porcentaxes de pensionistas, onde están as pensións máis baixas de toda España e onde xa hai ata desafiuzamentos, é absolutamente inadmisébel que existan vivendas baleiras”, e reproba que “as políticas do Goberno de Rajoy levaron a moitos cidadáns, a pensionistas e á clase traballadora, á asfíxia, con baixadas salariais e de pensións, con despedimentos, con máis impostos, con copagamentos, con menos prestacións sociais e tamén, a moitos, á condena de vivir nunha vivenda sen as mínimas condicións de habitabilidade ou, o que é peor, a vivir na rúa”.

Lembra Seara que os datos do último ano apuntan que na nosa provincia, “grazas ao PP e a Rajoy, 66 426 fogares teñen declarado que chegan con moita dificultade a fin de mes; o 34% dos fogares na provincia ten como único ingreso as prestacións, e o 15 % dos fogares pasa frío no inverno, como consecuencia de que o Goberno do PP lle retirara a 6094 ourensáns o bono social da luz”, e lamenta que, mentres tanto, “a política do Goberno Rajoy foi a de salvar aos bancos a costa de afundir aos cidadáns, ata con operacións nas que se perdeu diñeiro público, como é o caso da venda de NovaGaliciaBanco a Banesco, coa que o Goberno perdeu 8000 millóns de euros procedentes de impostos de todos os cidadáns”.

“É inasumíbel a existencia de trescentas vintedúas vivendas baleiras en Ourense, mentres hai xente que se vai quedando na rúa sen a súa vivenda porque non pode asumir as débedas que a afogan”, subliña a deputada, quen pide ao Goberno central “a urxente adopción de solucións”. Entre elas, reclama as propostas polo PSOE en materia de vivenda; nomeadamente: elimina-las cláusulas-chan da totalidade dos saldos vivos de préstamos hipotecarios, habilitar procedementos que faciliten que as familias que sufriron un proceso de desafiuzamento poidan usa-las vivendas baleiras propiedade das entidades financeiras que recibiron axudas públicas, impedi-la enaxenación en lotes de vivendas de promoción pública a fondos especulativos de investimento, que se garanta o uso social deste tipo de vivendas, construídas e financiadas para o devandito fin con fondos públicos, e restablece-lo dereito a percibi-la subsidiación de préstamos á vivenda.