Monthly Archives: March 2013

Xuventudes Socialistas de Ourense tildan de ‘escarnio’ o incremento nas tarifas dos equipamentos xuvenís da Xunta

31/03/2013
By

 

A Consellería de Traballo e Benestar da Xunta de Galicia vén de aprobar, o pasado 18 de marzo, a orde que establece os prezos para o ano 2013 dos servizos, actividades e equipamentos xestionados pola Dirección Xeral de Xuventude, incluidos os Campamentos de Verán, os albergues ou as residencias de estudantes, como pode ser a “Residencia Florentino López Cuevillas”, no centro da capital provincial.

Trala súa publicación no D.O.G. do pasado do pasado luns 25 de Marzo, a Agrupación de Xuventudes Socialistas da cidade denuncia que este é o segundo ano consecutivo no que as tarifas son incrementadas, chegando a se-los prezos dalgúns servizos ata un 27% máis caros que no 2011.  Destacan o incremento nas tarifas dos Campamentos de Verán, cuxo prezo aumentou nestes dous anos, para as estadías quincenais, nun 22,8%, e para as diarias, nun 27,3%. Outro exemplo sería o caso dos Campos de Traballo Nacionais e Internacionais, cun incremento entre 2012 e o 2013, dun 25%.

O caso máis preocupante é, para os mozos socialistas ourensáns, o incremento na tarifa das Residencias de Estudantes, orientadas a mozos e mozas con menos recursos (pois o criterio de admisión atende, esencialmente, a circunstancias socioeconómicas dos solicitantes), e que presenta un incremento, entre 2011 e o 2013. dun 23,2%.

Para o Secretario Xeral de XX.SS., Jonathan Da Silva, este tipo de decisións, “que supoñen un aforro ínfimo para a Xunta de Galicia, denotan unha absoluta falta de sensibilidade da Dirección Xeral de Xuventude”. Da Silva recoñece que “non somos tan ilusos como para esperar da súa parte, a estas alturas, algún tipo de iniciativa novidosa e creativa para tentar atenuar un paro xuvenil que chega ao 50%, pero non é moito pedir que non fagan escarnio dos xóvenes galegos”.

O PSOE denuncia no Congreso dos Deputados e no Concello de Vilar de Barrio o atropelo medioambietal e ao patrimonio agrícola que están a provoca-las modificacións nas obras do AVE

27/03/2013
By

O PSOE denuncia ante a mesa do Congreso dos Deputados e ante o Concello de Vilar de Barrio, a través de senllas mocións, que as modificacións do proxecto inicial das obras da liña de Alta Velocidade ferroviaria ao seu paso por ese concello, supoñen un ataque medioambiental e contra o sector produtivo agropecuario de Vilar de Barrio.

A nosa deputada no Congreso, Laura Seara, xunto coa voceira do PSdeG en Vilar de Barrio, Soraya Briz e a secretaria de Medio Rural da Executiva Provincial, Antonia Álvarez,  visitaron hoxe a zona de Porto-Alemparte-Maus, onde denunciaron que ditas modificacións suporán a paralización da concentración parcelaria nesta zona, co fin de crear un área de acopio de material e, presumíbelmente, unha planta de xabre de granito procedente da escavación do túnel de Prado.

“No proxecto inicial respectábase esta zona en fase de proxecto de concentración parcelaria, na que, ademais, existen árbores dun grande valor ecolóxico”, lembrou Seara, que lle esixiu ao Goberno central, xa que logo, que “explique alto e claro o por qué destas modificacións e se a empresa adxudicataria ten as licencias preceptivas para a realización destas novas obras”, tanto “as que se refiren a normativa  medioambiental” como as tocantes “á Lei de Augas”.

Así mesmo, a compañeira denunciou tamén que “na poboación de Borrán, e ao marxe do que estaba proxectado, preténdese acabar con terreos agrícolas coa mesma finalidade que en Prado”, e incidiu en que “existen alternativas propostas polos veciños para que a empresa continúe cos traballos sen perxudicar nin aos propietarios das fincas, nin ás obras” do AVE.

Pola súa banda, a voceira municipal socialista en Vilar de Barrio, Soraya Briz, denunciou que “este atropelo medioambiental e ao sector agropecuario por parte da empresa adxudicataria estase a producir co beneplácito de ADIF e do propio Concello”, e insta ao grupo de goberno municipal a que “defenda os intereses dos seus veciños e realice tódalas xestións necesarias para que a empresa adxudicataria acepte as alternativas formuladas”.

As socialistas sinalaron que “o desenvolvemento de infraestruturas como a liña de Alta Velocidade é fundamental para a cohesión territorial, o crecemento económico, a competitividade e mesmo o emprego, pero, ao mesmo tempo, debe ser sensíbel co modelo agrogandeiro e medioambiental deste concello, o que é perfectamente posíbel”.

Os socialistas denunciamos máis manipulación política na TVG para agocha-la presunta corrupción no PP de Galicia

23/03/2013
By

A voceira do Grupo Socialista na Comisión da CTVG do Parlamento galego, María Quintas, denunciou unha “burda manipulación” da dirección da Compañía para agocha-la presunta corrupción no PP de Galicia. A deputada e Secretaria Provincial de Organización presentou unha pregunta oral sobre a denuncia do Comité de Empresa diante as presións exercidas sobre o equipo de informativos no tratamento dos casos que afectan ao PP galego.

A compañeira denunciou a “manipulación absoluta” por parte da dirección no tratamento do “Caso Bárcenas”, a presunta conexión do PP de Galicia co financiamento ilegal do PP estatal, a vinculación deste partido e o seu exsecretario de Organización, Pablo Crespo coa trama “Gürtel” e o “caso Bárcenas”, así como as imputacións dos seus dirixentes na “Operación Pokémon”. Quintas detallou a “burda manipulación” destes casos nos informativos da TVG, nos que foron “postos en lugares secundarios cando non directamente obviados” para agocha-la relación do PP galego cos mesmos, e criticou que esta cadea traballa “como gabinete de prensa do PPdeG”, exercendo como “correa de transmisión” deste partido.

A parlamentaria socialista sinala que a televisión autonómica ampara unha “manipulación visébel e cuantificable” a través de “presións e intervencións” sobre o traballo dos profesionais. Segundo Quintas, a realidade é que se “minimizan e censuran os conflitos para non dar información sobre os problemas reais e non contrarresta-la imaxe de tranquilidade que quere ‘vender’ o PP”. Acusou ao Director Xeral do Ente de “devolver á TVG aos peores tempos de manipulación informativa”, agochando mesmo a publicación dos papeis do extesoureiro do PP nas revistas de prensa dos espazos informativos.

María Quintas secundou a solicitude do Comité de Empresa da CRTVG para poñer en marcha “un mecanismo que evite as presións”, para garantir “a liberdade e independencia” no traballo diario dos profesionais.

A compañeira considera “urxente” a creación do estatuto profesional e do Consello de Informativos no que participen os profesionais do Ente, contemplados pola Lei de Medios de Comunicación Públicos de Galicia, e que a día de hoxe non se desenvolveron.

Miguel Fidalgo esixe a finalización das obras do AVE en Ourense e asegura que “Galicia non ha de permitir unha Alta Velocidade en ‘simulación’ nin un AVE ‘en diferido’ “

20/03/2013
By

O noso senador, Miguel Fidalgo, criticou na sesión de control parlamentario da Cámara Alta a indefinición e a falta de resposta da Ministra de Fomento, Ana Pastor, en relación á data de licitación e contratación das obras de Alta Velocidade no tramo de entrada na capital da provincia e a súa estación d’A Ponte.

Fidalgo preguntouse como é posíbel que no proxecto da Alta Velocidade a Galicia, de 617 quilómetros, estea todo o traxecto licitado fóra deses 17 quilómetros, e que se investan 13 000 millóns de euros (9 500 entre Olmedo e A Coruña) e non se poida remata-lo proxecto, faltando tan só un investimento final de 300 millóns de euros. Tras lembrar que “o AVE págano os impostos de todos os españois”, subliñou que “o atraso desta infraestructura ata o 2015 é responsabilidade súa e do PP; Galicia non ha de permitir unha Alta Velocidade en ‘simulación’ nin un AVE ‘en diferido’: queremos o que Galicia necesita para comunicarnos en condicións de igualdade co resto do territorio nacional”, apostilou o compañeiro.

Miguel Fidalgo tamén lembrou á titular do Ministerio de Fomento que o Rajoy a nomeou Ministra para xestionar infraestructuras como esta, de grande importancia para Galicia, e que o anterior Goberno fixo un enorme esforzo para sacala adiante, puntualizando que a Alta Velocidade a Galicia consta de 617 quilómetros e que a metade deste proxecto está funcionando entre Madrid e Olmedo e Ourense e A Coruña, lamentando que “a outra metade, ou está en obras ou acabada: o tramo entre Olmedo e Zamora está prácticamente rematado, o de Zamora a Puebla de Sanabria deberíase remata-lo vindeiro ano, e o de Puebla de Sanabria a Ourense está en obras, contratado ou licitado, e só fican eses derradeiros dezasete quilómetros da entrada á cidade”.

O noso senador concluíu manifestando a súa preocupación e a da provincia de Ourense polo “atraso inxustificado da licitación” deste tramo de 17 km, o único que queda para completar a rede.

Seara acusa ao Goberno central de facer “unha sopa de números” cos datos de execución do AVE na nosa provincia durante o ano pasado

14/03/2013
By

A nosa deputada no Congreso, Laura Seara, ven de recibir unha resposta parlamentaria do Goberno central na que este fai unha “sopa de números” cos datos de execución do AVE na nosa provincia durante o 2012. O obxectivo do Goberno con esa lea sería, segundo a compañeira, provocar confusión de datas e demorar aínda máis a chegada do AVE a Galicia. Por a deputada anuncia que presentará unha batería de iniciativas parlamentarias coas que pedirá ao Goberno que detalle a execución en cada un dos tramos do AVE na nosa provincia.

O Goberno sostén na súa resposta que o executado por ADIF na provincia de Ourense con cargo á partida da LAV Olmedo Lubian-Ourense no ano 2012 ascendeu a 531 905 000 €. Pero Seara lembra que, segundo datos aportados polo propio Ministerio de Fomento, a execución do AVE na provincia de Ourense no primeiro semestre de 2012 foi de 59,6 millóns de euros, tan só un 8,43% do orzamentado. Posteriormente, en outubro de 2012 Fomento sostivo que en setembro a execución ascendía a 133 millóns de euros, un 16,6% do que se presupostara. “E agora o Goberno di que a execución do 2012, aínda sen pechar o exercicio foi de 531,9 millóns, o que suporía algo máis dun 75% do orzamento”, di a compañeira, do que infire que “os datos que ofrece o Goberno son contradictorios”. Por iso lle pedirá, con novas iniciativas parlamentarias, “que aclare estes confusos datos e explique se realmente a execución do AVE na provincia pasou en menos de tres meses do 16% ao 75%”

Seara sinala que, en todo caso, “os datos non encaixan; son confusos e caóticos; e o Goberno debe explicar este desaguisado”, xa que “Ourense necesita certezas e non confusións”, e que, “tal e como advertimos os socialistas galegos no seu día, o Goberno non executou a totalidade do orzamento de 2012 para a liña de alta velocidade Olmedo-Lubian-Ourense: ao parecer, a tenor da resposta, dos 701,4 millóns de euros, deixaron sen executar 170 millóns”.

Ante a devandita resposta do Goberno central, a compañeira considera “rechamante que Rajoy se reunira con Feijóo para prometer que o AVE chegará a Galicia no 2018 e asegurar que cumprirá os prazos grazas aos investimentos que está realizando e aos que ten previsto realizar”, pois “se o Goberno de Rajoy non está realizando na súa totalidade os investimentos que se están a executar, tal e como demostra a resposta parlamentaria, e os investimentos dos anos vindeiros están por ver, a credibilidade de Rajoy nestes intres respecto da data da chegada do AVE a Galicia, é máis que cuestionábel”, conclúe. Por iso, Seara insta a Feijoo a “que revise os datos que lle deu Rajoy sobre o AVE a Galicia na reunión que mantiveron, porque as contas de Rajoy son contradictorias”.

“Á confusión que de novo xera o Goberno con esta resposta, engádense os ataques de sinceiridade” da Ministra Pastor cando recoñeceu, en respostas parlamentarias, que o AVE a Galicia se prevé estea rematado para 2018 “en principio”, suxeito ao “cumprimento da programación establecida en estudos e proxectos”. Este novo prazo confirma, para Seara “un atraso de tres anos na chegada do AVE a Galicia”, de xeito que, compracéndose delo, “Feijóo sentenza e enterra o Pacto do Obradoiro”, que fixaba como data límite o 2015, e que “el mesmo asinou”. É máis: con este “mareo de cifras ao que xoga o Goberno”, Seara teme que o atraso “sexa aínda maior”.

Así mesmo, a deputada remarca “as dúbidas sementadas por Pastor e polo Goberno do PP sobre se respectarán o proxecto de integración do AVE” na capital con “plenas características de Alta Velocidade” ou se, ao contrario, aproveitan “o trazado da vergoña”, condenando ao AVE a Galicia ao paradoxo de se-lo único do Estado que non será de alta velocidade. Seara lembra que ela mesma rexistrou no Congreso, en representación dos socialistas ourensáns e galegos, unha Proposición non de Lei para que o Goberno garanta a execución dos tramos Taboadela-Seixalbo e Seixalbo-Estación de Ourense, conforme á declaración de impacto ambiental aprobada no 2011 polo Goberno socialista, e que supón a construción da variante exterior.

Neste senso, a compañeira considera que “tampouco é fiábel que cumpran coa programación establecida, como no caso do proxecto da estación intermodal” da capital, que o Goberno socialista adxudico no 2011, e que o do PP paralizou ao compás da ambigüidade de “soterramento agora si, soterramento agora non, soterramento agora quizáis”.

Xornada de asesoramento técnico para concelleiras e concelleiros

14/03/2013
By

portadaRegimenLocalO vindeiro sábado, 16 de marzo, terá lugar a terceira das sesións de asesoramento sobre temas de xestión municipal, dirixidas a concelleiras e concelleiros do Partido, membros das executivas locais e, en xeral, a calquera militante interesado da provincia de Ourense. Trátase dunha xornada de resolución de dúbidas, a cargo dun equipo técnico, así como membros do Partido con experiencia en cargos municipais. É importante destacar que non se trata dunha xornada sobre Política Municipal, senon sobre ferramentas, lexislación, trámites, etc, necesarios para o traballo das concelleiras e concelleiros.

Será ás 17:00 no Concello de Castrelo do Val, e está principalmente dirixida ás concelleiras e concelleiros das comarcas da Limia e Verín, ainda que como dixemos anteriormente, pode asistir calquera militante.

Organiza: Secretaría Provincial de Formación

Xornada formativa sobre Redes Sociais e Comunicación Política

05/03/2013
By

A importancia das Novas Tecnoloxías no noso quefacer político cotián, ven sendo subliñada xa durante anos. Pero estamos chegando a un punto no que a presenza en Internet, en especial nas Redes Sociais, está a mudar incluso o concepto de campaña electoral.
Xa que logo, é obxectivo da Executiva Provincial do PSdeG en Ourense contribuír a mellora-las súas aptitudes neste eido a tódolos seus militantes e simpatizantes que o desexen, tanto usuarios habituais de Redes Sociais, como principiantes.
Para elo celebraremos unha xornada formativa este sábado, día 9 de marzo, na nosa sede provincial, a partires das 11:00h. e durante o resto da mañá, baixo o título “As Redes Sociais na Comunicación Política”, e co seguinte programa:

- “Redes sociais e Institucións. Ferramentas de ciberactivismo político” (a cargo de José Rúas Araújo, Profesor de Comunicación Audiovisual e Publicidade na Universidade de Vigo).
- “A experiencia do Movemento de Acción en Redes” (a cargo de Jorge Expósito Alcocer, Secretario Nacional de Redes e Innovación)
- Coloquio / respostas a dúbidas que se plantexen.

Os interesados poderán inscribirse enviando os seus datos persoais básicos, incluído o da súa Agrupación Municipal, á conta de correo cp-ourense@psdeg-psoe.org , antes das 19:00h. do día 8 de marzo.

Miguel Fidalgo reclama ao Goberno central que se comprometa coa apertura do Centro de Interpretación dos Parques Naturais de Galicia, e denuncia a “enorme incompetencia” da Xunta

05/03/2013
By

O noso senador por Ourense e Secretario Nacional de Formación, Miguel Fidalgo, reclamou esta tarde ao Goberno que se comprometa e fixe unha data para a apertura do Centro de Interpretación dos Parques Naturais de Galicia, e denunciou a “enorme incompetencia” da Xunta na xestión deste proxecto.

Fidalgo interveu na Comisión de Medio Ambiente e Cambio Climático da Cámara Alta, e lamentou que o Secretario de Estado de Medio Ambiente, Federico Ramos, non respostase e se limitase a repeti-lo argumentado hai oito meses nesa mesma Cámara en resposta a unha pregunta do propio senador galego; isto é: que “todo queda pendente da súa finalización á espera dun novo convenio que depende da dispoñibilidade orzamentaria”.

Ante esto, Fidalgo lembrou que no 2008, a Xunta e o Goberno central asinaron un convenio para poñer en marcha este centro co obxectivo a difundi-la biodiversidade de Galicia. O devandito convenio prometía unha achega do Ministerio de sete millóns de euros (financiado con fondos europeos) mentres que a montaxe museística posterior sería levada a cabo a Xunta. Porén, segundo lembrou o senador, a finais de 2011 a Xunta non cumprira un trámite técnico na sinatura da prórroga da finalización do convenio, e o edificio ficou a medio construir, impedindo ao Goberno gasta-los catro millóns pendentes.

En vésperas das eleccións autonómicas do 2012, a Xunta anunciou que se ía a asinar e prolonga-lo convenio en dous anos, para termina-la actuación no 2015; pero o certo é que non houbo ningún resultado posterior.

Miguel Fidalgo subliñou que “dende entón, é un monumento ao escándalo da xestión da Administración, o esqueleto dunha estrutura no conxunto do área termal de Ourense”, e amosouse convencido de que, neste tema, o Goberno central foi “ineficaz”, mentres que a Xunta “actuou de xeito sectario e en clave de castigo político”, mostrando a súa “enorme competencia”.

Os socialistas de Ourense apelamos á unidade de toda a sociedade ourensá para que o Goberno central garanta o AVE a Ourense con plenas características de alta velocidade

04/03/2013
By

O noso Secretario Provincial e voceiro socialista de Infraestruturas no Parlamento galego, Raúl Fernández, e a nosa deputada no Congreso, Laura Seara, reuníronse esta mañá coa Confederación Empresarial de Ourense, co fin de presentarlle aos empresarios a Proposición non de Lei que os socialistas presentamos no Congreso sobre a integración da Alta Velocidade en Ourense.

Nestes intres, en verbas dos nosos deputados “o Goberno do PP está poñendo en risco a Alta velocidade a Ourense e, xa que logo, a Galicia”, polo que consideramos que “é esencial a unidade das forzas políticas e axentes económicos e sociais da provincia para que o Goberno manteña, para a integración do AVE na cidade, un proxecto con plenas características de alta velocidade”.

A Proposición non de Lei socialista insta así ao Goberno a garantir que a integración urbana do AVE na cidade de Ourense se realizará de acordo ao proxecto vixente actualmente, e con características de alta velocidade, así como a que o Goberno licite o máis axiña posible as obras de construción dos dous tramos nos que se subdividiu a integración urbana na capital provincial: Taboadela-Seixalbo e Seixalbo-Estación de Ourense Empalme, derradeiros tramos pendentes da Liña de Alta Velocidade entre Galicia e Madrid.

Os socialistas ourensáns advertimos de que “se Fomento cancela o proxecto vixente e usa o actual trazado, -o ‘trazado da vergoña’, estará mantendo unha vía do século XIX, non apta para o AVE, nunha liña de alta velocidade do século XXI, condenando así ao AVE a Galicia a se-lo único do Estado que non terá realmente características de alta velocidade”.

Deste xeito, instan ao Goberno a que garanta a execución dos tramos Taboadela-Seixalbo e Seixalbo-Estación de Ourense Empalme, de acordo á declaración de impacto ambiental aprobada no 2011 polo Goberno socialista e que supón a construción da variante exterior.

Para nós, “a falta de respecto do Goberno aos ourensáns e aos galegos é intolerábel: levan máis dun ano dicindo que están estudando se facer ou non o soterramento que sempre defenderon, e agora sementan dúbidas sobre se realizarán o proxecto aprobado, que si era alta velocidade, ou ben aproveitarán un trazado que non permite a alta velocidade”. Neste senso lembramos que o soterramento, que encarecería a integración do AVE na cidade en máis de 400 millóns de euros, foi unha continua esixencia do PP cando estaba na oposición, e que o Goberno socialista xa o descartara por inadecuado.

E é que “coa chegada do PP ao Goberno en Madrid, as contradicións e as mentiras sobre a Alta Velocidade a Ourense e a Galicia foron constantes”, segundo os nosos deputados; que defenden que “os ourensáns e os galegos merecemos saber cal é o proxecto de Alta Velocidade do PP; e esperamos que o Goberno escoite agora o clamor de toda a sociedade ourensá por un AVE que sexa realmente de alta velocidade; un clamor ao que xa se suman incluso algúns membros do propio PP”.

Os compañeiros deputados anunciaron tamén que o PSdeG presentará iniciativas similares no Parlamento galego.