Sanidade

Pachi Vázquez censura que o PP non empregue o diñeiro público para construir hospitais por unha cuestión ideolóxica

15/06/2013
By

O noso Secretario Xeral nacional, Pachi Vázquez, encabezou a nutrida representación de cargos orgánicos e representantes institucionais dos socialistas sa nosa provincia que, coa súa presenza, manifestaron o seu apoio á convocatoria de concentración da Plataforma pola defensa da Sanidade Pública contra a paralización das obras do CHUO e en protesta polas consecuencias dos recortes en materia de Sanidade.

Vázquez afirmou que “hai diñeiro público para facer Sanidade Pública”, denunciando que non hai un problema económico, senón que se trata “dunha cuestión ideolóxica” do Presidente Feijóo e do PP.

Lembrou que a Xunta deixou douscentos millóns de euros sen executar porque prefire que os hospitais se fagan con cartos privados, xa que “prefiren facilitarlle o negocio e volume de traballo a empresas que nin son galegas”, e que “están privatizando a sociedade”.

O compañeiro advertiu do risco severo de quedarmos sen financiamento europeo para ampliación do CHUO, que vai ligada ós proxectos de innovación tecnolóxica do “Hospital 2050” e “Innova Saúde”: “o modelo de financiamento ao que abocou Feijóo aos servizos sanitarios é un fracaso; a paralización é inevitábel”, recriminou Vázquez ao Presidente e aos responsables de Sanidade do Goberno galego. “En Ourense estamos a piques de perde-lo investimento para modernizar este Plan Director”, afirmou ao mesmo tempo que criticou o procedemento negociado polo que optará a Xunta para o edificio de hospitalización, ao quedar deserta a segunda licitación pola falta de interese que ten para as empresas o feito de que se condicione a xestión integral á obra.

O líder dos socialistas galegos remitiuse ao exemplo de Vigo, onde a parálise das obras está a xerar, como denunciaron máis de trescentos cincuenta profesionais da Sanidade, un aumento das listas de espera, que non suman os 6 000 pacientes que asegurara a Xunta, senón de 22 000. Vázquez convidou aos ourensáns a “face-lo mesmo que fixo a cidadanía de Lugo e de Vigo” e saian á rúa a “defende-lo modelo sanitario público”. Comprometeu a presenza dos socialistas a carón deles, e anunciou unha batería de iniciativas parlamentarias para denuncia-lo “risco real de perde-lo financiamento europeo para o hospital de Ourense”, iniciativas para que “con diñeiro público se fagan obras e instalacións sanitarias públicas”.

O Goberno central confirma a Laura Seara que Ourense perderá os 36 millóns de euros de fondos europeos para o “Hospital 2050” se a Xunta non constrúe o edificio

15/06/2013
By

A preguntas da nosa deputada, Laura Seara, sobre a posibilidade de que Ourense perda os 36 millóns de euros comprometidos de fondos europeos FEDER para o proxecto “Hospital 2050” se non se constrúe o novo edificio do hospital, así como sobre a posibilidade de que devanditos fondos puidesen destinarse a outros hospitais de Galicia, a Secretaria de Estado de I+D+i, Carmen Vea, respostoulle, na Comisión de Orzamentos do Congreso dos Deputados, que “a responsabilidade desta Secretaría de Estado e do Ministerio, respecto dos proxectos do ‘Hospital 2050’ en Ourense e Innova Saude non vai máis aló dos convenios asinados” , que “non é responsabilidade do Ministerio se a Xunta executa o proxecto do ‘Hospital 2050’ de forma distinta”, e que “se o hospital non se fai, dificilmente se podera face-la parte tecnolóxica para a que están destinados os fondos FEDER”.

Seara asegura que “malia que a Sra. Vela xogou ao escapismo, na súa resposta, deixou claro que os trinta e seis millóns de euros comprometidos de Fondos FEDER están ligados ao proxecto ‘Hospital 2050’, pero non á cidade de Ourense e, xa que logo, Ourense podería perdelos”. Do mesmo xeito, a compañeira lamenta que “a Secretaria de Estado deixou patente que o Ministerio lavará as mans se a Xunta decide non executa-lo proxecto en Ourense”, e que “a Sra. Vela foi clara ao afirmar que o custo do hospital, catrocentos millóns de euros, excede dos treinta e seis millóns europeos comprometidos e, xa que logo, que se o hospital non se fai, non se poderán investi-los fondos europeos destinados ao proxecto tecnolóxico”.

A deputada socialista ourensá lembrou que, en novembro do 2011, a Ministra Garmendia asinou convenios coa Xunta para os proxectos “Innova Saúde” e “Hospital 2050” e sinalou que “a Xunta veu afirmando que o proxecto ‘Hospital 2050’ se faría no hospital de Ourense”. Con todo, Seara subliñou que “os fondos europeos están ligados ao proxecto Hospital 2050 pero non están ligados concretamente a Ourense”, e lamentou que “hoxe a Secretaria de Estado confirmou o que temiamos, e que incluso a Xunta pode decidir que fondos, se non se perden, non se destinen ao proxecto en Ourense”

Feijóo, sinalou Seara “veu mareando a perdiz sobre o futuro do Plan Director para o Hospital de Ourense e enganou aos cidadáns pensando que “tirando” dos fondos europeos podería reducir custes na construción do edificio. Neste senso, explicou que “Feijóo, primeiro sacou un concurso que ficou deserto porque impuxo a condición de que a empresa adxudicataria puxese catorce millóns de euros para a construción do edificio, despois sacou outro concurso que condicionaba ao primeiro, e agora a realidade é que Feijoo se atopa con que non ten o cartos para construi-la infraestructura“.

Ademais, a deputada incidiu en que “o prego de licitación de construción especifica que, se os contratos (de xestión) previstos non se chegan a adxudicar e formalizar, a Xunta se reserva a facultade de non adxudica-las obras; é dicir, de lava-las mans”. E “a Secretaria de Estado confirmou os nosos peores temores respecto da perda dos fondos FEDER para o proxecto ‘Hospital 2050’ en Ourense e, o que é peor, advertiu que o Ministerio tamén lavará as mans”.

Carmen Acuña esixe que se manteña a segunda praza de médico en Rairiz de Veiga

03/05/2013
By

A deputada por Ourense no Parlamento galego Carmen Acuña, ven de defender en comisión unha proposición non de lei para que se manteñan as dúas prazas de mediciña xeral no Centro de Saúde de Rairiz de Veiga.

Este concello, de 1.720 habitantes, contaba ata o de agora con dous profesionais médicos para atender aos doentes do Centro de Saúde.

A Consellería de Sanidade ven de anunciar que se suprimirá unha destas prazas, argumentando que as novas tecnoloxías poden suplir esta asistencia. Sen embargo, os socialistas denunciamos que, precisamente, o rural galego non dispón destes avances tecnolóxicos. Tampouco, lembrou Acuña, se cumpre a ratio de tarxetas individuais sanitarias para desfacerse da praza (1 200), pois Rairiz supera esta cantidade.

A deputada socialista advirte que a redución da presenza a un só facultativo nos centros de saúde do rural retrotrae Galicia á situación de hai medio século, e xera inquedanza pola atención no caso de que xurda unha urxencia e non estea o médico dispoñible por estar con outra persoa.

A Atención Primaria é o servizo encargado de levar a cabo programas de saúde como a atención ao enfermo crónico ou a domiciliaria, que esixen moito tempo, polo que resulta imprescindíbel contar cos recursos humanos necesarios para poder levala a cabo con garantías, o cal “non vai ocorrer en Rairiz se só fica un médico no Centro de Saúde”, segundo Acuña.

A deputada condenou a “complicidade necesaria do alcalde” de Rairiz de Veiga para que esta ameaza se consolide. O rexedor pasou das filas nacionalistas ás populares “non sabemos por qué prezo” preguntouse Acuña, que indicou precedentes da súa participación “na desfeita”que supuxeron os peches da oficina bancaria, da escola infantil e da residencia da terceira idade, existentes no seu concello. Aínda que, como lembra Acuña, a supresión da praza de médico foi decisión da Consellería de Sanidade.

Acuña denuncia que o PP pretende rematar co rural, ou a venta “por catro pesos” de centros da terceira idade e escolas infantís, nun modelo que se está a implantar coa “complicidade dos alcaldes” dese Partido. “Vostedes están pechando o rural”, acusou aos populares, “e non se dan conta de que se pechan o rural, pechan a metade de Galicia”, díxolles Acuña, quen lles lembrou tamén que “non son números, son persoas”.

Pachi Vázquez pide a dimisión de Feijóo polas mentiras sobre a súa relación co narco Marcial Dorado

10/04/2013
By

O Sª Xeral Nacional, Pachi Vázquez, reclamou hoxe a dimisión de Feijóo como presidente da Xunta polas mentiras sobre a súa relación co narco Marcial Dorado. Durante a comparecencia do presidente da Xunta, o líder dos socialistas galegos dixo que “para ser presidente da Xunta e representar aos galegos e galegas hai que demostrar un comportamento ético intachábel antes e durante a ocupación do cargo”.

Vázquez desacreditou os “argumentos completamente inverosímiles” sobre a súa relación de dez anos co coñecido narcotraficante. Advertiulle ao presidente da Xunta que “estes feitos que vostede intenta ocultar e que formaban parte do seu pasado estarán presentes no seu futuro e aféctanlle gravemente como presidente da Xunta de Galicia”.

O compañeiro criticou as “catro grandes mentiras” de Feijóo con relación a este caso, como é que non soubese quén era Marcial Dorado no ano 95, que cortase toda a relación en canto o soubo, que “só son fotos” e que “acabou a infamia”. O líder socialista lembroulle que Dorado fora detido por contrabando en 1983, foi investigado por blanqueo de diñeiro en 1989 ou foi detido na Operación Nécora en 1990.

Sinalou que mentres o actual presidente da Xunta ocupaba altos cargos na Consellería e no Ministerio de Sanidade, entre 1991 e o 2000, Marcial Dorado era sinalado por toda a prensa da época como un dos capos do contrabando en Galicia. Puntualizou que ademais de mentir sobre o seu coñecemento acerca do narcotraficante “seguramente é vostede quen mais sabe del pola súa longa e intensa relación”.

Pachi Vázquez apuntou ademais que as intervencións telefónicas dos anos 2001 e 2003 acreditan que Feijóo non cortou toda relación no ano 1997, en contra do que asegurou publicamente. Ademais, desbotou a afirmación de Feijóo de que “só son fotos”, xa que “é a súa vida durante unha década” e evidencian “unha relación intensa á que vostede chega da man de Manuel Cruz”, amigo de Beccaría e testaferro do narcotraficante.

Finalmente, negou que se trate dun caso de “infamia”, tal e como ten criticado o Presidente da Xunta, xa que, lembrou, o propio Feijóo presentoulle ao entón presidente Manuel Fraga a súa dimisión “por esta relación e a existencia das fotos”. Preguntou se “daquela era causa do seu cese e agora son unha infamia?”.

Vázquez espetoulle a Feijóo que “vostede é unha mentira” logo de “levar quince anos con mentiras” nunha traxectoria na que “demostrou que vostede só está preocupado polo seu futuro, non o está pola imaxe de Galicia, o único importante para vostede é si afecta á súa carreira política”.

O líder socialista criticou o concepto de ética esgrimido por Feijóo, que no 2009 decía que “o Goberno non se pode fotografar en malas compañas, e se o fai ten que dimitir”, facendo alusión a unhas fotos tomadas polo entón vicepresidente Anxo Quintana cando nin sequera era candidato do BNG.

Lamentou que a ética de Feijóo lle permitira, sendo alto cargo da Consellería de Sanidade, “pasearse en iate pola ría” ou ir de viaxe e a pasa-la Fin de Ano cun coñecido narcotraficante, mentres toda Galicia percorría as rúas en contra da droga.

Dixo que “non é só mentir, é que todo isto aconteceu nun momento de drama social, con centros de mozos e mozas vítimas da droga, centos de familias destrozadas por esta causa e milleiros de persoas loitando nas rúas contra os autores desta lacra: os narcotraficantes como Marcial Dorado”.

 

ANEXO: primeira intervención de Pachi Vázquez

 

Sra. Presidenta., Sras. e Sres. Deputados., Sr. Feijóo:

Solicitamos a súa comparecencia no Parlamento de Galicia, para explicar algo que vostede ocultou durante moitos anos: a súa relación cun narcotraficante, Marcial Dorado, que hoxe cumpre condena de catorce anos de cárcere por ser detido cun alixo de 6 500 quilogramos de cocaína.

Intentou vostede, e sigue intentando, negar unha serie de evidencias, que non só o descualifican a vostede, senón que fan un dano inmenso á imaxe de Galicia e do seu goberno.

Non estamos no Tribunal Superior de Xustiza de Galicia, estamos no Parlamento para analizar o seu comportamento ético e político.

Cando saiu á luz esta relación, pedímoslle, pola súa gravidade, explicacións, pero vostede cada vez que fala, en vez de dar explicacións, da argumentos completamente inverosímiles que non cre ninguén.

Estes feitos, que vostede intenta ocultar e que formaban parte do seu pasado, non teña dúbida que estarán presentes no seu futuro, e aféctanlle gravemente como Presidente da Xunta de Galicia.

“Non hai caso nin causa”: parece que non opinan o mesmo os xornais europeos e nacionais:
- Le Monde
- Il Corriere de la Sera

Sr. Feijóo:

O dixo vostede no ano 2009: “O Goberno non se pode fotografar en malas compañías, e se o fai ten que dimitir”. Cando o dixo non lle importaba:
•    Nin que as fotos ás que se refería foran de cinco anos atrás.
•    E ¡que sangue frío! ten vostede cando xa sabía que existían as fotos das que estamos falando.

Sr. Feijóo:

Dende que se soubo isto, vostede está intentando ocultar moitas cousas:

Vostede mantivo una relación persoal con Marcial Dorado dende 1995 ata 2003. Unha relación que non foi ocasional, foi intensa, mantida durante case unha década.

Para explicala, o fai con CATRO MENTIRAS:

1ª MENTIRA:
Que non sabía quen era Marcial Dorado no ano 95.  Un home que:
•    No ano 1983: foi detido por contrabando.
•    No ano 1989: foi obxecto dunha investigación internacional por blanqueo de diñeiro.
•    No ano 1990: foi detido na Operación Nécora, a maior acción xudicial e policial contra o narcotráfico en Galicia.
•    No ano 1992: foi incluído nun informe do Goberno Civil de Pontevedra sobre capos galegos, que circulou por toda Galicia.

COMO RESUMO:
Ensínolle as páxinas de catro xornais do ano 1990:
- ABC
- El Mundo
- El País
- La Voz de Galicia

¿QUEN ERA VOSTEDE DAQUELA?:

1991: Secretario Xeral Técnico da Consellería de Sanidade
1996 Secretario Xeral de Asistencia Sanitaria do Ministerio de Sanidade
2000: Presidente de Correos

¿QUE ESTABA SUCENDENDO EN GALICIA NAQUELES ANOS?

•    En 1994, a droga e a Sida eran a primeira causa de norte da mocidade entre 25 e 34 anos.
•    As asociacións contra a droga denunciaban aos responsables, entre eles, Marcial Dorado.
•    En 1993, máis de 15.000 persoas se manifestaron en Vilagarcía contra o narcotráfico, e mentres miles de galegos e galegas recorrían as rúas de Galicia, vostede recorría as rías no iate deste narcotraficante, sendo o número dous da Consellería de Sanidade.

É MENTIRA QUE VOSTEDE NON SOUBESE QUEN ERA MARCIAL DORADO.

SEGURAMENTE É VOSTEDE QUEN MÁIS SABE DE MARCIAL DORADO, POLA SÚA LONGA E INTENSA RELACIÓN.

2ª MENTIRA:

“Cando o souben no ano 97, cortei toda relación”. As intervencións telefónicas mostran que vostede seguiu falando con el nos anos 2001-2003.

¿Seguía sen saber quen era Dorado?

3ª MENTIRA:

“Sólo son fotos”. Non Sr. Feijóo: non son só fotos.

É a súa vida durante unha década: viaxando en iate, comendo na súa mansión, acompañándoo a Portugal, Andorra, Picos de Europa, Ibiza, Cascais, pasando a noite de fin de ano con el, ¿con quen se pasa a noite de fin de ano?

Sendo un alto cargo, ¿Quen pagou esas viaxes e festas? ¿Por qué? ¿Cal era o motivo desa amizade íntima?
¿Cantas viaxes máis hai?

Austeridade: ¿Non era vostede o austero?: iates, hoteis de luxo, viaxes, festas.
Non son só fotos, é una relación intensa á que vostede chega da man de Manuel Cruz, un bo amigo, chofer do señor Romay Becaría e testaferro de Marcial Dorado, que no ano 96-97, en plena relación súa,  compra gasolineiras para venderllas a persoas vinculadas con Marcial Dorado. Di Romay Beccaría que todo está ben, ¡menudo aval!, tería que explicar el que relación tiña co seu chofer.

4ª MENTIRA:

“Acabou a infamia”, ¿que infamia?

Cando vostede lle presenta a súa dimisión ao Sr. Fraga por esta relación e fotos, non era unha infamia?

¿Daquela era causa do seu cese, e agora son una infamia?

Sr. Feijóo:

Vostede é unha mentira.

Leva 15 anos con mentiras.

Vostede só está preocupado polo seu futuro:

•    Non o está pola imaxe de Galicia
•    O importante é se afecta á súa carreira política

Sr. Feijóo:

Vostede ocultou a Galicia o seu pasado cun narcotraficante, e cando se descubriu lle mentiu a Galicia e a España.

Mentiu dicíndolle que non sabía quen era Marcial Dorado; que só eran unhas fotos como outras moitas.

Mentiu dicíndolle que acabara a súa relación en 1998, e agora sabemos que falaba con el entre 2001 e 2003.

Sr. Feijóo:

Vostede sigue ocultando moitas cousas.
Vostede mentiu reiteradamente.
Eu lle pregunto e conteste. É fácil: si ou non.

•    Segue mantendo vostede que un cargo público non debe fotografarse con malas compañías e debe dimitir? ¿Era vostede un cargo público cando andaba de iates con Dorado? ¿Era Dorado unha mala compañía?
•    ¿Segue mantendo vostede aquí, no Parlamento, diante de toda Galicia, que non sabía quen era Marcial Dorado nin a qué se dedicaba?
•    ¿Segue mantendo vostede que cortou toda relación con Dorado no ano 1997? ¿Minte  a Xustiza ao afirmar que hai conversas gravadas entre vostede e Dorado no 2001, 2002 e 2003? ¿Minte a Xustiza ou minte vostede? ¿No 2003 seguía sen saber quén era Dorado? ¿Por qué falaba con el?
•    Di vostede que o amedrentaron cos estas fotos, que é un ataque persoal e que é una infamia. ¿Cre vostede que as galegas e os galegos teñen dereito a saber se o seu presidente está sendo ameazado e quén o ameaza? ¿Quen o ameazou? ¿Ségueno ameazando? ¿Con qué?
•    Aínda non lle escoitamos pedir perdón nin desculparse por este episodio que vostede cualifica de infamia. ¿Vaise desculpar ou cree vostede que debemos pedirlle perdón aos galegos por pedirlle explicacións e transparencia? ¿Temos que desculparnos os galegos por pedirlle que nos diga a verdade?

 

ANEXO: segunda intervención de Pachi Vázquez

 

Sr. Feijóo:

Está vostede inmerso no gran dilema: ser ou non ser.

•    Ser ético ou non selo.
•    Ser transparente ou non selo.
•    Ser responsábel ou non selo.
•    Asumir o seu comportamento ou non asumilo.
•    Actuar como pide vostede que actúen os demáis, ou non facelo.

Mentir é o peor que se pode facer cando está en xogo a credibilidade das institucións, a credibilidade do seu Goberno, e a súa propia credibilidade.

Vostede cre que negando a evidencia pode borrar  o acontecido, pero nada máis lonxe da realidade.

Vostede, señor Feijóo, é una mentira.

Sr. Feijóo:

Descubrimos que leva vostede máis de quince anos vivindo na mentira, ocultando as súas amistades perigrosas, ocultando os motivos polos que tiña unha estreita relación con Marcial Dorado, polos que viaxaba con el, que celebraba o fin de ano con el.

Quince anos ocultando a súa amizade con Manuel Cruz, o chófer de Romay Beccaría, que compraba empresas e as poñía a nome de Marcial Dorado nas mesmas datas nas que vostede compartía iate, hoteis e viaxes (1996, 97 e 98).

Sr. Feijóo:

Por moito que intente ocultalo, a súa relación de máis dunha década con Marcial Dorado e as súas mentiras, inhabilítano para seguir sendo presidente de Galicia.

Vostede, que esixía ao anterior presidente facturas das súas vacacións, non recorda agora quen lle pagaba as viaxes, os hoteis, as festas, os luxos.

Infamia é mentirlle a Galicia para ocultar que vostede, sendo un alto cargo, viviu dez anos relacionándose cun dos maiores narcotraficantes de Galicia.

Sr. Feijóo:

A ética comeza por un mesmo.
Ninguén cun lastre como este pode continuar dirixindo os designios de todos os galegos e galegas.

Para ser Presidente da Xunta e representar a todos os galegos e galegas, hai que demostrar un comportamento ético intachábel antes e durante a ocupación dese cargo.

Vostede, a día de hoxe, non conta con este aval:

•    Xa non é só o significado destas fotografías e de todos os feitos graves que se coñecen.
•    Xa non é só a súa fráxil memoria e a insuficiencia das súas explicacións.
•    Xa non é só mentir.
•    É que todo isto aconteceu nun momento de auténtico drama social, con centos de mozos e mozas vítimas da droga, centos de familias destrozadas por esta causa, e milleiros de persoas loitando nas rúas contra os autores desta lacra, os narcotraficantes como Marcial Dorado.

Señor Feijóo:

Vostede non veu aquí a dar explicacións, senón a autoexculparse.

Vostede non veu aquí a pedir desculpas, senón a facer de vítima.

Vostede non veu aquí a aclara-lo sucedido, senón a insidiar aos demáis.

Vostede, señor Feijóo, quere pasar polo adaíl da democracia, da ética, da transparencia e da austeridade, pero o seu comportamento demostra que é todo o contrario.

Se isto que lle está pasando a vostede lle ocurrise a calquera dos que estamos nesta Cámara, a calquera deputado ou deputada da oposición, vostede non tería tardado un minuto en pedi-la súa dimisión inmediata.

Diría que é intolerábel e amoral que seguise representando á cidadanía no seu cargo.

Aplíquese vostede a mesma regra que lle reclama aos demáis e dimita.

Vostede non pode seguir sendo o Presidente da Xunta.

Non pode seguir gobernando como se non tivese pasado nada.

O que pasou é o máis grave que nunca lle sucedeu a un Presidente da Xunta de Galicia, e isto só pode resarcirse coa súa dimisión.

Seara: “Rajoy volta a ignorar a Galicia”

21/02/2013
By

A Secretaria Nacional de Coordinación Institucional e Participación e deputada pola nosa provincia no Congreso, Laura Seara, considera “indignante” o discurso que o Presidente do Goberno, Mariano Rajoy, realizou no Congreso no Debate do Estado da Nación.

Para Seara “nunca houbo un discurso dun Presidente do Goberno máis afastado da realidade dos cidadáns aos que en teoría representa”. Así, sinala que “mentres os cidadáns sobreviven como poden, afogados por un Goberno do PP que leva un ano castigando sistemáticamente aos que menos teñen, o Presidente do Goberno vén hoxe ao Congreso a presumir de salvar ao país”.

“Rajoy faltou de novo ao respecto aos traballadores, aos desempregados, aos anciáns, ás mulleres, aos mozos, aos enfermos, aos estudantes e, especialmente, a un millón e medio de familias nas que ningún dos seus membros recibe ingreso ningún”, sostivo a compañeira.

A deputada destaca “a desastrosa xestión que Rajoy fixo da crise, sen políticas de crecemento e con brutais e arbitarios recortes, levou a España a ser hoxe un país máis empobrecido, máis inxusto, e cunha maior división social entre os que máis e os que menos teñen, entre os que poderán estudar e os que non, entre os que poderán acceder á Xustiza e os que non e, ata entre os que gozarán dunha adecuada asistencia sanitaria e os que non; unha fractura social que será difícil de superar”. Por iso, considera que “Rajoy terá que render contas no futuro da situación á que levou a España”.

Respecto de Galicia, Seara reprocha que “Rajoy voltou a ignorar a Galicia no Debate do Estado da Nación”, demostrando “unha vez máis que Galicia non está entre as prioridades do seu Goberno”. A compañeira remarca que o Presidente do Goberno do PP se esqueceu “dos parados galegos cando anunciou axudas a desempregados noutras Comunidades Autónomas, malia ser Galicia a segunda na que máis creceu o paro”. Neste senso, Seara constata que “é de esperar que Feijóo ficará calado, agochado, cómplice, como en tantas ocasións”.

Os socialistas denunciamos a voladura controlada dos servizos sociais a través da redución de fondos ao Plan Concertado e a retirada de apoio económico á Teleasistencia

23/01/2013
By

A nosa deputada no Congreso, Laura Seara, ven de dar conta, en rolda de prensa, dunha serie de iniciativas rexistradas no Congreso e no Senado e dunha moción para presentar nos concellos de Galicia, instando ao Goberno de Rajoy a recupera-lo financiamento da Teleasistencia e a incrementa-las partidas destinadas nos orzamentos xerais do Estado de 2013 ao Plan Concertado.

Seara chamou a atención sobre os efectos dos recortes sobre o aumento da exclusión social en Galicia e en Ourense. “O risco de exclusión social é cada día maior, e as cifras de pobreza non deixan de medrar, e neste marco social e económico o Goberno de Rajoy toma unha decisión que será dramática para a provincia de Ourense e para Galicia”, como foi a supresión nos orzamentos do Estado do 2013, da partida destinada á Teleasistencia.

Pero o problema agrávase co Plan Concertado, creado polos socialistas a finais dos 80, coa finalidade de contribuír ao desenvolvemento da prestacións básicas dos servizos sociais. “Ponse en risco a supervivencia do propio Plan Concertado e do propio sistema de prestacións sociais básicas”. Estamos a falar, segundo a deputada socialista, do plan no que se sustentaron os servizos sociais básicos que puxeron en marcha e manteñen os concellos, converténdose nun piar básico da propia economía local.

Seara advirte que, dado que a lei limita o endebedamento municipal “estamos ante o risco que desaparezan os servizos sociais básicos no 95% dos concellos de Galicia, pola imposibilidade de mantelos”.

A deputada socialista subliñou que nos orzamentos do Estado do 2011, se adicaron ao Plan Concertado case oitenta e sete millóns de euros, dos que lle corresponderon a Galicia 7 230 000€. Ademais, “se repartiron con criterios que beneficiaban á nosa Comunidade autónoma e a Ourense”, lembra Laura Seara, pois se tiñan en conta a dispersión da poboación e de número de persoas dependentes.

No 2012, primeiro orzamento que aproba o PP no Goberno, “a partida destinada ao Plan Concertado se reduce case á metade”, denuncia a compañeira, e pasa a corenta e sete millóns de euros, correspondendo a Galicia 3 900000€.

Nos orzamentos do 2013, “parece que lle queren dar o tiro de graza ao Plan Concertado”, xa que os fondos voltan mermar, nun 42% respecto ao ano anterior, e nun 65% respecto ao 2011. Queda pois, segundo as cifras que expoñía a socialista, en vintesete millóns de euros destinados para o conxunto do Estado. A cifra para Galicia se reduce a apenas 2 200 000€, “dez veces menos do que levou Bárcenas a Suíza”, comparou.

Se a este dato se lle suma a desaparición dos orzamentos do Estado da Teleasistencia, o Goberno de España adica oitenta céntimos por galego (a mesma ratio para a provincia de Ourense); e iso “pasa en dous anos e nun momento de crise brutal, que afecta ás persoas máis vulnerables” salienta a deputada, para quen as medidas do PP de eliminar dos Presupostos do Estado a Teleasistencia e reducir á mínima expresión as partidas para o Plan Concertado, supoñen condenar a moitos concellos e comunidades autónomas, e comparables a “pechar hospitais en tempos de epidemia”. Por iso se pregunta a compañeira sobre silencio da Conselleira de Traballo, Beatriz Mato, “que non di nada cando en dous anos rebaixáronlle a Galicia nun 65% os orzamentos destinados ao Plan Concertado e reduciron a cero o destinado a Teleasistencia”.

Seara acusa aos populares de ter deseñado unha“demolición controlada”, usurpando os servizos sociais ás persoas que máis o necesitan e cun dano incalculábel, sobre todo no medio rural, xa que, aínda que os servizos sociais da capital e cabeceiras de comarca teñen uns respaldos técnicos, os numerosos pequenos concellos rurais da provincia, “non poderán manter a prestación de servizos sociais” que viñan ofrecendo a unha poboación moi envellecida, o que preocupa a Seara.

Outra consecuencia directa deste recorte é o paro: xa se está a despedir ao persoal dos concellos galegos pola imposibilidade de mante-las prazas de traballadores sociais. “Ao longo deste ano, estes despedimentos irán a máis”, prognostica a deputada.

O drama esténdese ás ONGs, que están saturadas, porque asumen os servizos que non poden da-los concellos, pero recibindo tamén menos axudas, porque se financian menos programas; “a pescada que morde a cola”, describiu Seara, que se preguntou qué lle fixo ao PP Ourense, porque “tódalas decisións que toman a perxudican: anulan concellos, retiran xulgados, se pecharán oficinas das caixas… a provincia leva camiño de converterse nunha reserva natural”.

Pachi Vázquez acusa a Rajoy e Feijóo de darlle a puntilla á Galicia interior coa reforma da Lei de Bases de Réxime Local e os incumprimentos electorais

22/01/2013
By

 
O Secretario Xeral Nacional, Pachi Vázquez, responsabilizou a Rajoy e a Feijóo de “facer inviábel” economicamente a nosa provincia, e de empregar a Ourense como “experiencia piloto” de cómo a dereita está “aniquilando” todo o modelo de vida da Galicia interior.

Vázquez asistiu hoxe á reunión da Permanente da Executiva provincial cos Grupos Socialistas na Deputación, Parlamento galego, Congreso dos Deputados e Senado. Acusou a Rajoy e Feijóo de pretender “da-la puntilla” ao interior galego e suprimir de facto os concellos de Ourense a través da reforma da Lei de Bases de Réxime Local, a aprobar polo Consello de Ministros na súa vindeira reunión. Todos, agás a capital provincial, teñen menos 20 000 habitantes, e quedarán suxeitos, de aprobarse o Decreto, á tutela da Deputación, que, no caso de Ourense, é o órgano de menor transparencia, e o que máis dilapida, e que está inmerso nunha investigación polas súas contratacións.

Neste senso, o máximo responsable dos socialistas galegos sinalou que, a partires de agora os socialistas “só falaremos de Baltar a través dos xulgados”, para así “centrármonos nas accións políticas para garantir que a xente poida vivir aquí”, e non teña que emigrar.

O Secretario Xeral do PSdeG salientou que o obxectivo final da reforma da Lei de Bases de Réxime Local é favorecer “a privatización da vida municipal, para converter os servizos en pingües beneficios para os de sempre”.

Vázquez defende a xestión de proximidade dos municipio: “aínda que os queren facer quedar como culpables, os concellos son as vítimas”, cando a culpábel é a comunidade autónoma, “que non lles paga, e que lles retira a capacidade para achega-las prestacións sociais aos veciños e as subvencións para mantemento das infraestruturas”, lembrando tamén que soben, ademais, as achegas económicas que os municipios deberán abordar para evitar que concorran a axudas.

“Presentaremos o dereito da Galicia interior a vivir con dignidade”, dixo Vázquez en referencia ás iniciativas que levarán a cabo os socialistas nos distintos foros institucionais, pois “non se pode culpabilizar aos cidadáns por vivir onde viviron toda a vida”.

A Permanente da Executiva provincial, celebrada esta mañá, estudou o informe de situación da provincia e acordou a acción coordinada nas institucións municipais, provincial, no Parlamento de Galicia, Congreso e Senado. Salientou Vázquez que as políticas do PP da provincia, de Feijóo e de Rajoy, fixeron acadar a Ourense cifras récord de paro, con 30 000 homes e mulleres “que non só non atopan emprego senón que non lles quedan máis alternativas nin saídas laborais que a emigración”. Outra marca histórica acadada é o número de EREs solicitados na provincia.

O compañeiro salientou que tódalas advertencias feitas durante a campaña electoral se están a cumprir: “non só hai unha suba de impostos, senón que tamén hai copago, de medicinas, ortopedia e transporte en ambulancia”, lembrando tamén que o Goberno xa empeza a admitir que botaría a médicos e docentes (recoñeceu o despedimento de 1200), como advertimos os socialistas.

O líder dos socialistas galegos denunciou tamén o peche de xulgados nas cabeceiras de comarca, e a existencia dun plan para concentrar os PACs e servizos de Urxencia, reprobou que Feijóo consinta que os concellos queden sen unha oficina dunha entidade bancaria, e lembrou a paralización en dous compromisos importantes para a provincia e a cidade: a estación intermodal na cidade, e a Alta Velocidade en xeral. Se alguén non “pon pé en parede”, vai iniciarse “un percorrido sen retorno”, prognosticou Vázquez.

O 2012 supuxo un monumental engano e un descomunal castigo para os galegos

30/12/2012
By

FIDALGO E SEARA
A nosa deputada no Congreso e senador, Laura Seara e Miguel Fidalgo, respectivamente, cualificaron onte o ano de Goberno de Mariano Rajoy “como unha autentica estafa”. Seara afirmou que o 2012 “foi un monumental engano e un descomunal castigo para os galegos, sobre todo para os da Galicia interior, particularmente para as provincias de Lugo e Ourense”.

Nunha rolda de prensa, a nosa deputada no Congreso asegurou que Rajoy se presentou ás eleccións “ofrecendo lebre, pero serviu gato tóxico que esta envelenando aos cidadáns”, tanto dende o punto de vista social como económico, e que tódalas decisións do seu Goberno “xogaron en contra de Galicia”, nomeadamente na provincia de Ourense.

Seara criticou o feito de que haxa “109.098 pensionistas ourensáns que se verán afectados pola decisión de Rajoy de non revaloriza-las pensións”, o que supón unha perda de 9,6 millóns de euros; unha decisión que lembra “tamén foi un engano”, xa que foi negada taxativamente polo PP nas distintas comparecencias parlamentarias e declaracións dos seus dirixentes. Tamén advertiu de que o PP ten “unha axenda oculta para reforma-lo sistema de pensións”, anunciando que, dende o PSdeG-PSOE, “ímonos a opoñer con total rotundidade a calquera reforma que non teña o respaldo dos sindicatos, dos empresarios e do Pacto de Toledo”, como si sucedeu coas emprendidas polo PSOE; e avisou: “se non hai o mesmo consenso social que o acadado co Partido Socialista, estaremos en contra”.

A compañeira tamén observou que o PP considera a provincia de Ourense “como un territorio colonizado “, xa que só a visitan “de cando en vez, para recoller votos; e mentres, esquécense todo ano dos problemas dos ourensáns”; subliñando tamén que a nosa é unha terra que precisa “políticas de discriminación activa para desenvolve-los seus sectores produtivos”.

No que se refire ás infraestruturas ferroviarias, Seara voltou a advertir de que os ourensáns “non saben qué vai a pasar coa chegada da Alta Velocidade”, que o proxecto sobre o soterramento de vías ao seu paso pola capital “leva agochado un ano” xunto co da estación intermodal na mesma, que os socialistas “temos sospeitas de que este gran proxecto pode ser modificado”, e que dende o PP non se desmentiron esas advertencias realizadas polo Partido Socialista “sobre o futuro desta estación”; e anunciou que o PSdeG-PSOE rexistrará unha batería de iniciativas parlamentarias de periodicidade semanal “ata coñecer cales son as intencións do Goberno de Rajoy sobre a chegada da Alta Velocidade e o proxecto de soterramento” de vías, pois ten a sospeita de que o PP “quera voltar ao trazado antigo, o que suporía unha auténtica cicatriz na cidade”.

A deputada afirmou que, coas cifras na man, o Goberno de Rajoy “ten un balance de 500 000 parados mais en España, 5000 parados mais na nosa provincia, e case que 38 000 parados mais en Galicia”, e comprometeuse a traballar arreo “para facer unha oposición ao Goberno firme, útil e dura”, e a que “ante cada aldraxe a Galicia e Ourense, Rajoy e o PP recibirán non só unha denuncia”, senón “tamén unha proposta alternativa”.

Pola súa banda, o noso senador sostivo que o PP e o Goberno de Rajoy deben “comparecer en cada concello de Galicia para explicarlle aos cidadáns que prometeron unha cousa e fixeron xustamente o contrario”, xa que desa xestión “deben respostar tódolos cargos orgánicos” dese Partido, dende os alcaldes ata o seu presidente provincial, e pediu que “expliquen cómo están a desmonta-la Lei de Dependencia, a tele-asistencia e a Sanidade, e por qué se pechan residencias, ou por qué se vai a favorece-lo ensino relixioso”.

Miguel Fidalgo aludiu tamén ás supresións de trens da provincia, como a liña a Sanabria, e ao peche de Paradores, reclamando explicacións ao Goberno de Rajoy respecto a “por qué se exclúen danos dos incendios na provincia”, xa que “o PP fixo unha lei para indemnizar a partir do 1 de xuño”, o que perxudica gravemente respecto aos grandes incendios que se produciron, antes desa data, na nosa provincia.

O compañeiro afirmou que a “folla de ruta do PP” presenta un “sistema de caridade, e outro de negocio para os mais ricos, para que os mais ricos teñan unha Educación, unha Sanidade unha Dependencia e unha Xustiza de elite”; e alertou do “deterioro da democracia e nas conquista sociais”, concluíndo que “a economía de Rajoy é un puro desastre”.

Denuncian o abandono e os recortes de Feijóo cos enfermos de VIH de Galicia

19/12/2012
By

A portavoz de Sanidade do Grupo Socialista, Carmen Acuña demandou á Conselleira de Sanidade que “mude as súas políticas e empece a defender a sanidade publica galega”. E insistiu “senón fora do PP non xestionaría así a sanidade”.

Acuña interveu hoxe no Pleno da Cámara para reclamar explicacións sobre a retirada do 100 % do orzamento no control do VIH-SIDA da Federación Galega de Asociacións de Axuda á Drogodependente.

Segundo os datos dos que dispón a deputada, que van dende o ano 2004-2010, en Galicia detéctanse ao ano “204 casos novos de Sida”. E advirte que estes datos non reflicten o efecto da crise “un 72% dos contaxios prodúcense por ter relacións sexuais sen protección, e un 23% por compartir xiringas”. Sinala

que por cada paciente diagnosticado precozmente “evitamos o contaxio a tres persoas”, ademais explica que “o 46% dos diagnósticos son tardios, por todo eso garantir o tratamento ao paciente é básico”.

Acuña advirte ademais que dificultar o acceso ao sistema sanitario aos inmigrantes “poñemos en serio perigo a evolución da enfermidade no noso medio”. Por iso denuncia que “o aforro económico non xustifica nin compensa un retroceso na resposta do VIH”, e insistiu “ a prevención é moito mais rendible que o tratamento da enfermidade”.

A maiores denuncia que os orzamentos e por ende a capacidade de actuación das entidades que traballan co Sida en Galicia foron mermadas temerariamente ata un 50% polo Goberno de Feijoo . E insistiu “claro que como son poucos e ademais non votan”.

Aludiu ademais a situación dos comités de Lugo, Santiago, Fase de Encontro e a Casa de acollida de Vigo “que se víron abocadas ao peche, xunto coa a capacidade de actuación das restantes entidades víronse mermadas notoriamente (despedimentos de persoal, peche de servizos, …) e precisamente nun momento onde as prácticas de risco van en aumento”.

Dixo que nos programas de redución de riscos das ONGs a entrega de preservativos e xiringas tanto para a poboación xeral como a poboación de risco “faise a contagotas”, ademais hai enfermos “que so contan cunha pensión non contributiva, e non toman o tratamento por non poder pagalo”.