Sanidade

Reclamamos responsabilidades á Xunta logo de que Hacienda obrigase ao SERGAS a despeza-la xestión do CHUO en tres concursos

08/04/2014
By

A deputada pola nosa provincia no Parlamento galego, e voceira de Sanidade do Grupo Socialista, Carmen Acuña, salientou que o Goberno do Estado “vén de contradicir a Feijóo e de da-la razón ás denuncias socialistas, ao paraliza-la adxudicación integral de espazos no Complexo Hospitalario Universitario de Ourense, e obrigar ao SERGAS ao despece da mesma en tres novos concursos”. “Está claro que algo lles cheiraba mal”, como advertira o PSdeG-PSOE.

Acuña explicou que o Tribunal Administrativo Central de Recursos Contractuais, dependente do Ministerio de Hacienda, ordenou ao SERGAS a paraliza-lo proceso de concesión da xestión integral de espazos para o CHUO, e a desmembrar esta licitación en tres concursos diferenciados para a limpeza, a seguridade e o mantemento.

A deputada lembrou que o seu grupo tiña “posto a lupa” sobre esta contratación que sumaba a privatización, por quince anos e 225 millóns de euros, dos servizos de limpeza, seguridade, mantemento e consumo enerxético nunha mesma empresa que, ao mesmo tempo asumía o pago de 14 millóns de euros para a construción do Plan Director. “Esta modalidade, que agrupa todos os servizos nunha soa licitación, deixaba fora ás empresas galegas, incapaces de asumir unha oferta tan completa”, explicou Acuña.

“En Ourense todos sospeitábamos que Ferrovial sería a adxudicataria”, confesou a compañeira. Unha empresa na que traballa o xerente de CESPA, empresa do Grupo, recentemente imputado na instrución da “Operación Patos” e que fora xerente do CHUO na época de Fraga e impulsor do Plan Director.

Un plan director que, por outra banda, resulta imprescindíbel realizar para poder acometer, a continuación, a modernización tecnolóxica dos Plans “Innova Saúde” e “Hospital 2050”, que estaba previsto cubrir con fondos europeos. Neste senso, Acuña advirte de que o prazo deses fondos xa venceu en 2013 e só cabe acollerse a unha prórroga de dous anos, ata 2015, vinculada ao remate das obras “cuxos constantes atrasos poñen en cuestión”, advertiu.

O Plan Director leva aprobado dende abril do 2009. Coa chegada do PP á Xunta paralizouse. “Logo viñeron os anuncios en Expourense, os fondos europeos para o Hospital 2050 e finalmente as privatizacións, que lles quedaron desertas”, lembrou. Tampouco funcionou o procedemento negociado, polo que se optou por “dulcificar con prazos a entrega dos catorce millóns que se requirían para o Plan Director, e apareceu Ferrovial”. Logo de todo isto, “non dimite, nin cesa, ninguén”, protesta a deputada, que se pregunta cómo vai acadar a empresa adxudicataria os catorce millóns de euros, “se non é a través do encarecemento dos servizos”, e cómo pode saír máis barato o servizo de mantemento ou o subministro privatizado, xa que a empresa terá que gañar algo e recupera-los 14 millóns con intereses, aínda que admitiu con retranca que “estamos acostumados á ‘creatividade’ do PP para os contratos, como se viu na Gürtell”.

A parlamentaria manifestou a fonda preocupación dos socialistas pola situación da Sanidade Pública, na que se chegou ao punto de que a “nin dimitida nin cesada” conselleira pode “visita-los centros sanitarios, inmobles onde os profesionais e usuarios lle trasladan o seu enfado”, e esixiu a Feijóo “honradez, transparencia, senso común e que deixe de lado inventos estraños que só serven para o saqueo da Sanidade Pública”, recriminándolle que teña que “se-lo ministro de Hacienda quen veña defender o tecido empresarial galego”, sorprendendolle o feito de que “mesmo Montoro amose máis sentido común que Feijóo, e lle paralice e obrigue a cambia-lo sistema de contratación”, que previamente xa puxeran en cuestión profesionais, usuarios e o propio PSdeG.

Seara esixe ao Goberno central que aclare urxentemente se Ourense perderá os fondos europeos para o “Hospital 2050”

06/03/2014
By

A nosa deputada no Congreso, Laura Seara, presentou unha batería de preguntas parlamentarias coas que esixe ao Goberno central “que aclare se mantén a execución dos proxectos “Hospital 2050” e “Innova Saude” en Ourense, e que “explique se o Goberno garante o mantemento dos fondos europeos destinados á modernización” do CHUO.

Seara advirte do risco de perda de devanditos fondos, dado que o Tribunal Administrativo Central de Recursos Contractuais paralizou o proceso de concesión da xestión integral de espazos para o CHUO, e tendo en conta que o SerGaS vinculou dita concesión á realización das obras do plan director do hospital. Por iso tamén lle pide ao Goberno resposta sobre cales foron as razóns técnicas da paralización do devandito proceso, e acerca de en que situación se atopan nestes intres os proxectos “Hospital 2050” e “Innova Saúde”.

Para a deputada, “as artimañas de Feijóo puxeron en risco estes proxectos para a posta en marcha dun novo hospital intelixente no CHUO, e de diversos proxectos tecnolóxicos para moderniza-la sanidade galega”. O “Hospital 2050” e o “Innova Saude”, son, segundo explica “dous plans por un valor conxunto de noventa millóns de euros, que pretenden ser pioneiros en Europa, e que por iso teñen financiamento europeo con cargo a fondos FEDER.

Así, Seara lémbralle a Feijóo que “estes fondos non están destinados ao ‘ladrillo’ ”, malia que a propia Xunta apuntou que estaba garantido o financiamento suficiente para construí-lo novo edificio de hospitalización. “Feijoo pensou que con estes fondos podería reducir custos na infraestructura e por iso, cunha manobra rocambolesca, vinculou a concesión dos servizos do CHUO coa realización das obras do plan director do hospital”. “Fraco favor fixo o Presidente da Xunta á sanidade ourensá e galega” criticou a compañeira.

En xuño do 2013, a nosa deputada xa denunciara que Ourense perdería os fondos europeos para o Hospital 2050 se a Xunta non construía o edificio, despois de que así llo confirmara a Seara a Secretaria de Estado de I+D+i nunha comparecencia no Congreso. Naquel intre, a Secretaria de Estado confirmou, ademais, que o orzamento está vinculado ao proxecto “Hospital 2050”, pero non necesariamente á cidade de Ourense, de xeito que se a Xunta decide executar o devandito proxecto noutro lugar, non sería responsabilidade do Ministerio. Xa entón, Seara acusou a Feijóo de enganar aos cidadáns, e lamentou a falta de interese do Goberno central.

Agora, Seara pídelle ao Goberno “que, desta vez, non lave as mans”.

O Ministerio de Hacienda paraliza a privatización dos servizos do CHUO

06/03/2014
By

A voceira de Sanidade do Grupo Socialista no Parlamento de Galicia, Carmen Acuña, denuncia que o Goberno central “vén de contradicir a Feijóo” e paraliza-la adxudicación integral de espazos no Complexo Hospitalario Universitario de Ourense porque disque “algo cheira mal”. A parlamentaria do PSdeG presentou en rolda de prensa a pregunta que sobre esta cuestión trasladará á Xunta no vindeiro Pleno da Cámara.

Acuña explicou que o Tribunal Administrativo Central de Recursos Contractuais, dependente do Ministerio de Hacienda, paralizou o proceso de concesión da xestión integral de espazos para o CHUO, que o Sergas vinculaba á realización das obras do seu “Plan Director”.

A deputada esixiu a Feijóo “honradez, transparencia e senso común”, e que “deixe de lado inventos estranos que só serven para o saqueo da Sanidade Pública”.

Sorpréndenos aos socialistas, en verbas da compañeira, que o “mesmo Montoro amose máis senso común que Feijóo, e lle paralice o sistema de contratación”, que previamente xa puxeran en cuestión profesionais, usuarios e o propio PSdeG.

Os socialistas temos “posto a lupa” sobre esta contratación, que sumaba a privatización, por 15 anos e 225 millóns de euros, dos servizos de limpeza, seguridade, mantemento e consumo enerxético nunha mesma empresa que, ao mesmo tempo, asumía o pago de 14 millóns de euros para a construción do “Plan Director”. O interese reside en que esta modalidade, que agrupa tódolos servizos nunha soa licitación, deixaba fora ás empresas galegas, incapaces de asumir unha oferta tan completa.

Pregúntase Acuña cómo vai consegui-la empresa adxudicataria os catorce millóns de euros, “se non é a través do encarecemento dos servizos”; e cómo pode saír máis barato o servizo de mantemento ou o subministro privatizado, porque a empresa terá gañar algo e recupera-los 14 millóns con intereses; ironizando que “estamos acostumados á creatividade do PP para os contratos, como se viu na Gürtell”.

A deputada socialista tamén salientou que, “en Ourense todos sospeitabamos que Ferrovial sería a adxudicataria”. Nesta empresa traballa o xerente de CESPA, do mesmo grupo, que foi recentemente detido pola súa imputación na instrución da “Operación Patos” e que fora xerente do CHOu con Fraga Iribarne e impulsor do “Plan Director”.

Un plan director que, por outra banda, resulta imprescindíble realizar para poder acometer, a continuación, a modernización tecnolóxica prevista nos plans “Innova Saúde” e “Hospital 2050”, que estaba previsto cubrir con fondos europeos. Neste senso, a compañeira lembra que o prazo deses fondos xa venceu no 2013, e só cabe acollerse a unha prórroga de dous anos, ata o 2015, vinculada ao remate das obras “cuxos constantes atrasos poñen en cuestión”.

Tamén fixo memoria a deputada para lembrar que o Plan Director leva aprobado dende abril do 2009, e se paralizou coa regreso do PP á Xunta. “Logo viñeron os anuncios en Expourense de fondos europeos para o Hospital 2050, e finalmente, as privatizacións, que lles quedaron desertas”, e que tampouco funcionou o procedemento negociado, polo que se optou por “dulcificar con prazos a entrega dos catorce millóns que se requirían para o Plan Director, e apareceu Ferrovial”. Sorpréndese Acuña de que, logo de todo isto, “non dimite, nin cesa ninguén”.

A deputada manifestou a fonda preocupación dos socialistas pola situación da Sanidade Pública, na que se chegou ao punto de que “a nin dimitida nin cesada conselleira” pode percibi-lo enfado dos profesionais e usuarios só con visitar os centros sanitarios.

Censuramos que Núñez Feijóo tentase tapar o ineficaz e neglixente traslado das cirurxías pediátricas do CHUO a Vigo poñendo en dúbida a profesionalidade dun facultativo

01/12/2013
By

A voceira de Sanidade do Grupo Socialista no Parlamento galego, e deputada ourensá, Carmen Acuña vén de cualificar de “desfortunadas e preocupantes” as declaracións feitas onte polo presidente da Xunta sobre o caso recentemente publicado dun menor atendido en urxencias en Ourense e trasladado con posterioridade ao Hospital de Vigo.

Feijóo anunciou que se investigarían as responsabilidades do urólogo que atendeu en primeira instancia ao neno (a quen se diagnosticou unha torsión testicular), e a deputada considera desafortunada tal posta en dúbida da actuación dos facultativos, e acusa ao xefe do Executivo galego de ameazar a un profesional cunha investigación para tapa-la “supresión descontrolada” do servizo de cirurxía pediátrica na nosa provincia.

A realidade do sucedido, insiste Acuña, é que houbo unha mala xestión da Xunta, que foi incapaz de dar solucións á falta de facultativos especializados e, actuando de xeito “neglixente e ineficaz”, deixou esmorecer este problema e crear outro, “levando as gardas pediátricas para Vigo”.

Acuña considera preocupantes as declaracións de Feijóo porque “optou pola cerimonia da confusión e a ameaza ante a primeira mostra dos problemas que os socialistas e os colectivos de profesionais da sanidade lle tiñan adiantado que ían suceder”.

A deputada lembrou que, tal e como manifestaron os profesionais da sanidade pública, “mentres funcionou o servizo Cirurxía Pediátrica do CHUO, mantiña uns ratios de eficacia e eficiencia contrastados” e moito mellores que outros de Galicia, en tempos de espera, resolución de problemas, altas pos-cirúrxicas, etc.

Por todo elo, os socialistas esiximos a Feijóo que explique aos cidadáns as razóns polas que agora hai que trasladar aos nosos nenos necesitados de atención urxente a un Hospital que ten listas de espera, e exhortámolo a reflexionar sobre a decisión tomada, para que, antes de que se produzan meirandes complicacións, volten a dotar á plantilla do CHUO do suficiente número de facultativos para dar cobertura á cirurxía e ás urxencias pediátricas dende Ourense.

Denunciamos que a xerente do CHUO quitou camas da área médica para crear unha zona onde as urxencias poden esperar varios días o seu ingreso

29/11/2013
By

A voceira de Sanidade do Grupo Socialista no Parlamento galego de deputada pola nosa provincia, Carmen Acuña, vén de denunciar que o CHUO procedeu a adicar 21 das camas das que dispón a área médica para uso do servizo de Urxencias.

Detrás desta decisión, indica a compañeira, agóchase o afán da xerencia do Complexo Hospitalario da cidade por cadra-los números e rebaixa-la porcentaxe de ingresos hospitalarios, xa que este “hospitaliño” dentro da área médica, permite manter varios días en observación aos doentes de urxencias.

A deputada fíxose eco do malestar dos facultativos de Medicina Interna, xa que, precisamente no inverno precísanse máis camas para o ingreso de doentes crónicos, nomeadamente os que padecen complicacións respiratorias e se desestabilizan polos rigores desta época do ano.

Tampouco están adaptadas estas habitacións para o tratamento e vixilancia dos enfermos agudos ou subagudos, nin se reforzou o persoal para a atención a estes doentes, que comparten o Servizo de Enfermería cos de planta, mentres que os médicos de urxencia soben a planta ocasionalmente para o seu seguimento.

A parlamentaria do PSdeG reprochou tamén ao Goberno galego razóns de nepotismo para a creación desta Unidade de Atención Precoz, que foi tomada a pesar da oposición dos profesionais e da comisión de centro, e que nace dirixida pola parella da propia xerente do CHUO. “Cadra os números, e contenta o seu marido ,todo perfecto”, ironizou Acuña.

A resposta do Director Xeral de Asistencia Sanitaria, Félix Rubial, negando estes extremos foi á súa vez rebatida pola nosa deputada lendo unha carta do responsábel de Medicina Interna do CHUO aos médicos de familia da provincia. Dita misiva amosaba a súa preocupación polas baixas de facultativos non cubertas, advertía de que afectarían aos doentes clasificados como de prioridade “1” (pasando a súa espera de 4 a 40 días), e contiña o rexeitamento dos facultativos de Medicina Interna á creación da Unidade de Atención Precoz, que podería provocar escaseza de camas en épocas de maiores ingresos.

Acuña insistiu en coñecer do responsábel de Sanidade cómo van solucionar esta falta de camas. Esixiu a Rubial que “deixen de mirar cara outro lado” coas decisións da área sanitaria e da xerencia do CHUO. Consecuencia das mesmas foi a desaparición da Cirurxía Pediátrica, trasladada a Vigo. Lamentablemente –insistiu- “xa apareceu un caso dos que falábamos” que poderían elevar o risco para o paciente, dixo Acuña en referencia ao caso da complicación dunha torsión testicular nun neno difundida na prensa recentemente.

Aproveitou tamén a deputada a súa pregunta parlamentaria para denuncia-la “vergoñenta venda” que Feijóo fixo do Plan Estratéxico para o Hospital de Ourense. Os Orzamentos do 2014 levan para tal fin cinco millóns de euros, en recursos condicionados, polo que os socialistas tememos que, como ocorreu o ano anterior, o Plan quede sen financiamento, ao depender de terceiros que, finalmente, non invisten.

Mentras isto sucede, a calidade das infraestruturas do CHUO é “terceiromundista”, con habitacións para tres pacientes e baños para cada dúas habitacións.

Reiteramos no Parlamento a nosa censura á supresión das gardas de cirurxía pediátrica no CHUO, decidida pola Xunta

02/11/2013
By

A voceira socialista de Sanidade no Parlamento galego, a deputada ourensá Carmen Acuña, ven de censurar que o Goberno galego suprima o servizo de garda de Cirurxía Pediátrica no Complexo Hospitalario da cidade, por non repoñer dúas vacantes (unha pola solicitude dun traslado e outra por unha xubilación forzosa).

A resposta a pregunta parlamentaria, a Conselleira confirmou a supresión deste servizo, que pasa a “compartirse” co Hospital de Vigo, que ten saturado o seu.

Esta situación provoca que nenos e nenas da provincia teñan que seren desprazados a Vigo para ser operados. Unha unha apendicite, por exemplo, provocarán un periplo da familia do centro de saúde de orixe (incluídos de lugares tan afastados de Vigo como O Barco ou A Mezquita) ata a capital provincial, e logo ata Vigo, para un recoñecemento axeitado ou para unha operación, que, no caso dun traumatismo, pode necesitar que sexa inmediata.

“¿Que pasará o día que á familia dun neno con torsión testicular, logo dese percorrido, haxa que comunicarlle que o testículo é inviábel porque chegaron tarde?” cuestionou Acuña á Conselleira.

A deputada salientou que esta medida é rexeitada de forma unánime pola cidadanía ourensá, criticada polos profesionais, e mesmo pola Asociación Española de Cirurxía Pediátrica, condenada polos grupos políticos, e incluso ten servido para “evidenciar de novo o PP bipartito de Ourense, pola discrepancia de Baltar coa decisión da prima de Feijóo”, responsábel do Sergas na provincia.

Ademáis, a decisión priva do servizo de Cirurxía Pediátrica a Ourense e, polo tanto, impide impartir esta especialidade no Hospital, que é Universitario.

Tamén se cuestionou compañeira en que medida abundará na sobrecarga de Vigo a decisión de engadirlle toda a nosa provincia á súa área de Cirurxía Pediátrica, que xa é “líder en listas de espera”.

A apelación á escaseza de operacións por parte da Conselleira, foi rexeitada pola deputada socialista. Acuña lembroulle que, mentres a ratio no Complexo Hospitalario d’A Coruña é de un cirurxián por cada 4100 nenos, cun total de 16, en Ourense quedan 2, cunha ratio dun profesional para cada 15 700, e sen servizo nas urxencias pediátricas.

Acuña esixiu á Conselleira que volten deixar as urxencias pediátricas de Ourense “como estaban”, e que os nenos de 0 a 14 anos se operen na capital provincial, como ata o de agora.

Mobilizámonos para para-lo Decreto de copagamento dos medicamentos de enfermidades crónicas

15/10/2013
By

O PSdeG de Ourense porá en marcha unha mobilización en toda a provincia para intentar para-la aplicación do Decreto do Goberno que impón o copagamento das menciñas en enfermidades crónicas e cancro, entre outras, así como na farmacia hospitalaria.

Nun acto desenvolvido na cidade, coa asistencia de representantes de colectivos sanitarios e sociais, o deputado no Parlamento galego Pachi Vázquez anunciou a presentación dunha moción en tódolos Concellos da provincia, para que as corporacións municipais esixan o rexeitamento desta medida.

O compañeiro tamén anunciou que buscaremos a movilización de tódolos colectivos sanitarios e sociais, co fin de eleva-la intensidade da demanda a Feijóo.

O deputado asegurou que “este Decreto é innecesario, dende o punto de vista económico; inxusto, dende o punto de vista social, e cruel dende o punto de vista humano”.

Pachi Vázquez destacou que resulta incomprensíbel que haxa cartos para a banca, pero non os haxa para o sistema público de saúde. “Mentres ao Banco Gallego se lle inxectaron 35 millóns de euros, e a Novagalicia Banco 11.000 millóns, non hai 5 millóns, que é o máximo que poden costa-las menciñas contempladas neste Decreto”.

O ex-Secretario Xeral Nacional insistiu en que a Sanidade pública non é a cusante da crise, senón una vítima, e que con este novo copagament injustificado, se está a desmontar un ladrillo máis do edificio do sistema sanitario público, que é o obxectivo do PP.

Relacionada: http://socialistasdeourense.org/?p=660

Denunciamos que a falta de cirurxiáns pediátricos provoca que se deriven a Vigo menores para o seu diagnóstico

12/10/2013
By

A deputada no Parlamento galego Carmen Acuña, vén de denuncia-la falta de especialistas en cirurxía pediátrica na área integrada de Ourense, o que está a ocasiona-la derivación en Urxencias dos nenos con doenzas que precisan de diagnóstico desta especialidade, ata o Hospital de Vigo.

A orixe desta deficiencia de facultativos provén da política de recortes da Xunta e da decisión da Consellería de Sanidade de non cubri-las vacantes na especialidade por baixas, xubilación ou outros motivos.

A ausencia dun cirurxián pediátrico en Urxencias provoca, por exemplo, que un neno que precise de diagnóstico por dor abdominal, para descartar unha posíbel apendicite, precise dun traslado ata Vigo.

A parlamentaria socialista abunda no trastorno para as familias deste traslado, tanto maior canto máis alonxado estea de Vigo o domicilio familiar.

Acto informativo sobre Sanidade

08/10/2013
By

O Grupo Sectorial de Sanidade da Agrupación Provincial celebrará este xoves, día 10, un acto aberto á sociedade, para informar da situación actual neste eido.

Na cita intervirán Raúl Fernández (Sº Xeral Provincial), Cándida Pérez (Coordenadora do Grupo), Carmen Acuña e Pachi Vázquez (deputados no Parlamento de Galicia).

O evento terá lugar na sede provincial do Partido, ás 19:00h.

O Grupo de Sanidade reúnese coas asociacións de pacientes

18/06/2013
By

Onte, 17 de xuño, representantes do Grupo Sectorial Provincial de Sanidade da Agrupación Provincial do PSdeG de Ourense, mantiveron unha reunión coas asociacións de pacientes con actividade na nosa provincia, que serviu como toma de contacto con estas entidades.

Os representantes dos pacientes detalláronnos cómo as carencias que a situación actual do sistema sanitario está a provocar en toda a poboación, inciden, cunha intensidade moito maior, no colectivo a cuxos membros respresentan, xa que estes sufren dun xeito cotián os problemas derivados de decisións como a do re-pago das menciñas ou a do pago polo uso de ambulancias, entre outras.

Contacto directo por correo electrónico co devandito Grupo de Sanidade: gtsanidadpsdeou@gmail.com .