Sanidade

Denunciamos o desleixo do goberno municipal de Leiro, exemplificado no atraso no asfaltado da estrada OU-307 e na perda polo Concello dunha subvención para a adquisición de desfibriladores

08/12/2016
By

Na súa calidade de deputado provincial pola comarca d’O Ribeiro, Nacho Gómez levou á Deputación a denuncia dos compañeiros do Grupo Municipal Socialista no Concello de Leiro, verbo a ausencia de asfaltado, dende hai dous anos e medio, en tramos da estrada provincial OU-0307 que une Leiro e Berán.

Os compañeiros de Leiro explicaron que no lugar d’A Agra se procedera, no 2014, á ampliación dunhas curvas na devandita estrada, intervención que consistiu en amplia-lo radio das mesmas e na colocación de sábrego como firme. Pero dende entón, o tramo segue sen ser asfaltado, co conseguinte risco para a circulación e para a integridade dos veciños e de tódolos usuarios da estrada.

Por aquel entón, o Grupo Municipal Socialista en Leiro lle preguntou ao alcalde, en Pleno, cando se ía proceder ao asfaltado destas perigosas curvas, ao que o rexedor respostou que estaba “en negociacións coa Deputación”. Dende entón, nada se sabe destas e a vía segue en condicións de provisionalidade.

Fartos desta situación de desleixo, os socialistas de Leiro deron traslado ao Grupo Provincial Socialista. Nacho Gómez solicitou explicacións sobre o problema na institución provincial, que é competente no tema. A falta destas, Gómez opina: “esta cuestión non é máis que a evidencia do que veño denunciando en numerosas ocasións: a falta dun plan de estradas provincial rigoroso e serio”, abundando que “ano tras ano, fan pequenas obras e reformas nas estradas que, lonxe de solucionar, xeran problemas aínda meirandes”.

Xa que logo, os socialistas de Leiro piden ao alcalde que explique en qué consistiron as súas xestións coa Deputación para solucionar o problema e, a maiores, o Grupo Provincial Socialista demanda que se informe acerca de cándo está prevista solución dun problema que xera un grave risco para os usuarios da estrada.

Por outra banda, e sen saírmos de Leiro, o noso Grupo Municipal neste municipio tamén vén de informar acerca de que o Concello acaba de perde-la oportunidade de recibir unha axuda para adquirir desfibriladores para seren instalados en lugares públicos. Ao contrario que outros concellos da contorna, o alcalde desaproveitou esta oportunidade que brindaba a Deputación, e non solicitou unha axuda que supoña o financiamento de ata 50% do custo dos destes aparellos. Así, ao contrario que Ribadavia, Melón ou Carballiño, Leiro fica sen subvención para adquirir uns dispositivos que resultan de grande axuda á hora de salvar vidas.

O voceiro municipal socialista, Manuel Rodríguez, esíxelle ao alcalde que dea as razóns da perda desta axuda: se foi por por puro desleixo ou porque coida que o Concello estea tan sobrado de cartos que pense adquirilos sen axuda económica.

E no semella que probábel caso de que a causa da omisión sexa, como os propios socialistas de Leiro veñen advertindo dende hai tempo, a falta de persoal, o panorama sería aínda peor, pois Francisco J. Fernández estaría a ignorar completamente ditas advertencias por pura teima persoal: o alcalde estaría a perder vantaxes e servizos para o pobo, antes que recoñecer unha evidencia

Manuel Rodríguez só agarda que a perda desta subvención non leve aparexada, irremediábelmente, a falta de adquisición dos aparellos, a cal xa fora solicitada polo Grupo Municipal Socialista antes incluso de que se convocase a axuda da Deputación, respostando daquela o alcalde que se disporía dos dispositivos “cando houbera dispoñibilidade” orzamentaria.

WhatsApp Image 2016-12-05 at 18.39.33

Demandamos a destitución de Eloína Núñez dadas as súas incompetencia e inacción ante o novo colapso de Urxencias do CHUO

16/11/2016
By

Noela-Blanco-1

A nosa deputada no Parlamento galego Noela Blanco denuncia “o novo colapso” no servizo de urxencias do CHUO, sen que a Xerencia do Complexo teña habilitado ningún plan, e mentres no centro “hai varias unidades pechadas e unha falta de persoal e de recursos alarmante”; polo que pide a destitución da xerente, Eloína Núñez, pola súa “incompetencia e inacción reiteradas”.

Blanco presentará iniciativas no Parlamento sobre a situación sanitaria no CHUO, e reclama “que se utilicen as unidades que se atopan pechadas” e “que se teñan convenientemente preparados e organizados os espazos físicos e os recursos de persoal” cos que se reforcen estas unidades habitualmente pechadas. A deputada denuncia tamén que a ratio de persoal sanitario nas dependencias de Urxencias é moito menor do recomendado polas sociedades científicas, pola OCDE e polo propio Ministerio de Sanidade.

“A xerencia ten optado hai tempo pola inacción e a falta de estratexia de xestión, dirección e organización”, lamenta a deputada, que esixe responsabilidades ante a deficiente calidade da atención recibida polos pacientes nos últimos días, que estiveron amoreados nas dependencias hospitalarias, co consecuente risco para a súa saúde, nun centro que funciona “grazas aos profesionais sanitarios que, a base de profesionalidade, adicación e esforzo, intentan suplir unha importante carencia de medios e de xestión”.

A deputada provincial socialista, Isabel Gil, aproveita a visita de Eloína Núñez ao centro de saúde de Celanova, para esixirlle que adquira o compromiso de ampliación do PAC, pola que levan agardando 15 anos.

08/09/2016
By

A deputada provincial polo partido xudicial de Celanova e portavoz socialista en Ramirás, Isabel Gil, tivo a oportunidade, exercendo a súa profesión como médico de familia no Centro de Saúde de Celanova de reivindicar as carencias ante a Xerente de Xestión Integrada de Ourense, Verín e Valdeorras, Eloína Núñez, na visita que está fixo ao ambulatorio da localidade, onte pola mañá. A curmá de Feijóo e máxima responsable do SERGAS na provincia de Ourense, acudiu ao centro de saúde de Celanova, nunha visita de claro corte electoralista, acompañada polo Alcalde do municipio e mais polo responsable de Recursos Económicos da Xerencia da Xestión Integrada de Ourense, Alberto Pedrera; nesta ocasión para, a escasos días do comezo da campaña electoral das autonómicas, dar os parabéns ás obras do teito que se están a realizar no centro.

Máis aló da clara intención de publicitar o traballo feito polo actual goberno da Xunta, do PP, nunha práctica cando menos sospeitosa pola acercamento da cita electoral; os e as sanitarios/as que desenvolven o seu labor no ambulatorio tiveron a ben achegarse a estes máximos responsables dos servizos de saúde en Ourense para facerlle chegar as súas xustas reclamacións de mellora do servizo que prestan e das instalacións nas que traballan.

Nesta ocasión, Isabel Gil, quen desempeña tarefas de medicina de familia así coma gardas e atención de urxencias, acompañou a varios compañeiros, que se achegaron a Eloína Núñez e lle fixeron saber que levan 15 anos agardando a que se solucione a precaria situación na que se atopa o PAC (Punto de Atención Continuada-urxencias) que atende a, nada menos, que 10 Concellos da contorna.

A doutora e deputada provincial explicoulle á xerente do SERGAS que acometen o seu labor nunhas condicións intolerables, sen salas de consultas habilitadas, tendo que atender aos enfermos que van a urxencias nas salas destinadas a raios X e a fisioterapia, sen que estean debidamente acondicionadas e habilitadas para elo. Os pacientes que acoden ao servizo de urxencias de Celanova teñen que soportar que se lles aplique un tratamento, como pode ser unha nebulización ou un soro, e agardar no corredor namentres os dous médicos e enfermeira do PAC, van atendendo a outros enfermos. Os sanitarios de Celanova din estar fartos desta embarazosa situación na que non se asegura a privacidade e intimidade do paciente ademais de non poder exercer o seu traballo nunhas mínimas condicións.

As consultas que empregan para urxencias non están dotadas nin do máis básico, como pode ser un lavabo ou un espazo de aplicación de tratamentos. Hai xa 15 anos que se reivindicou, por parte do persoal do centro de saúde, a ampliación do PAC e, neste tempo, o goberno galego non foi quen de cumprir con esta necesidade imperiosa. Isabel Gil, como afectada directa, fíxolle chegar esta petición a Eloína Núñez e instouna a que adquirira o compromiso dunha vez por todas. A deputada di que a xente está cansa de promesas baleiras e actos faltos de contido con intereses puramente electoralistas e que, na realidade, o partido que máis tempo leva ostentando o poder en Galicia e Ourense, o Partido Popular, non cumpra coas necesidades da cidadanía. Así mesmo, opina, que esta ampliación do PAC de Celanova, beneficiaría á propia xestión integrada de Ourense posto que, moitas veces, vense obrigados a derivar os casos a Ourense ante a ausencia de espazos habilitados para atender tratamentos e observacións. No caso de existiren estes espazos, dende Celanova, poderíase contribuír a desconxestionar o servizo de urxencias do CHUO, conclúe a deputada socialista.

Aproveitando a presenza do Alcalde e do xestor económico do SERGAS en Ourense, Isabel Gil tamén lles fixo chegar unha reivindicación histórica dos sanitarios que teñen que desempeñar o seu labor no centro de Celanova. Os médicos alí adscritos teñen que facer domicilios na vila e, moitas veces, deixan os aparcamentos libres e ao seu regreso xa están ocupados, obrigándoos a perder tempo procurando aparcamento. Así mesmo, cando van a atender nos fogares dos enfermos, teñen que deixar o vehículo mal aparcado ou en zonas non habilitadas e cargan coas conseguintes multas.

Tal como relata Isabel Gil, se tivesen unhas tarxetas de aparcamento, poderían desenvolver mellor o seu traballo sen preocuparse polo sitio ou as sancións. O labor que desempeñan nas atencións a domicilio é vital para a cidadanía e, polo tanto, as administracións local e autonómica deberían facilitar este traballo cos medios necesarios. O tema do aparcamento non só afecta aos doutores e doutoras senón a resto do persoal sanitario que traballa en Celanova e, nomeadamente, ao persoal das ambulancias. A falta de lugares e as propias características do centro, fan que teñan que aparcar os vehículos enriba da beirarrúa para poder atender, con prestancia, as emerxencias. O mesmo acontece cando acoden pacientes en cadeiras de rodas, tanto en vehículos privados coma nas ambulancias, ou ben os teñen que deixar na propia beirarrúa e ir procurar aparcamento ou teñen que subirse e facer un mal aparcamento.

Non é de recibo, reitera o persoal de Celanova, que se estean dando estas lamentables situacións e que os enfermos padezan as consecuencias, polo que demandan a habilitación inmediata de aparcamentos na zona, polo que reclaman o compromiso ineludible do Alcalde da localidade. Así mesmo, tal como lle trasladou a deputada provincial, é hora de que os servizos económicos do SERGAS teñan en conta as xustas reivindicacións dos médicos que fan domicilios e que precisan ver facilitados os seus desprazamentos.

Demandamos no Parlamento dous plans, de creación de emprego e de cooperación sanitaria, co Norte de Portugal

17/02/2016
By

Os Grupo Socialista no Parlamento galego demandou hoxe na cámara autonómica senllos plans de cooperación transfronteiriza, en materia de creación de emprego e de atención sanitaria, entre Galicia e o norte de Portugal, mediante a presentación de senllas proposicións, que foron rexeitadas polo PP.

A deputada pola nosa provincia Noela Blanco, manifestou, na presentación das dúas proposicións, o seu convencemento de que “as relacións co país luso deberían ser unha parte prioritaria na axenda de acción exterior deste goberno, mais nestes últimos anos é patente a falla de interese e de implicación amosada polo goberno de Feijóo en todo o referente a fortalece-las relacións co país veciño”, denunciando que “a posición do goberno galego en Europa é un paripé que se visualiza na ausencia do presidente da Xunta en Bruxelas, nun momento no que nas institucións europeas se están a tratar temas de especial relevancia para Galicia, como a situación na que se atopan os nosos sectores produtivos”.

Con relación á iniciativa sobre emprego, Blanco lembrou que a zona transfronteiriza, na que destaca o Sur da nosa provincia, “é a que sofre o maior incremento do desemprego en Galicia, máis do 70% dos vinteséis concellos superan a taxa media de paro”. Unha situación que comeza “a reverte-lo novo goberno socialista portugués en poucas semanas, ao que igual que ocorrera en España cando os socialistas cheguemos a presidencia do Goberno”.

Este plan de emprego debería de incidir de maneira urxente “na mocidade, onde se está a reproduci-lo fenómeno da emigración dos anos ‘70, na poboación con máis idade, presa en moitos casos dun desemprego de larga duración, e nas mulleres, xa que o paro feminino segue sendo superior ao masculino”. Xa que logo, para a nosa deputada, e tendo en conta “este marco de tremendas dificultades no mercado laboral, os socialistas consideramos que, de xeito urxente, se debe elaborar e poñer en marcha este plan, que deberá contar con dotación orzamentaria, para favorecer un mercado de traballo inclusivo na zona transfronteiriza, que axude a cohesión social e territorial da mesma”.

Con respecto á Sanidade, a iniciativa demandaba á Xunta “a elaboración, de maneira conxunta co Goberno portugués, e a presentación no Parlamento de Galicia para o seu debate e aprobación no prazo máximo de tres meses, dun plan estratéxico de cooperación transfronteiriza sanitaria, que terá, entre outros, como obxectivos, a eliminación das principais trabas burocráticas: a falta de transparencia e información sobre os procedementos e tratamentos en cada un dos Estados, a incerteza que existe sobre os pagos e reembolsos, e as dificultades no seguimento ou tratamentos posteriores”.

Caso de que tivera sido aprobado, este plan sería “pormenorizado”, contando “cun cronograma e identificación dous recursos financeiros e humanos”, onde se contemplaría a dotación orzamentaria que a Xunta destinaría ao mesmo, así como “as posibles axudas comunitarias”, informou Blanco.

OS SOCIALISTAS PRESENTAN 592 SINATURAS DOS VECIÑOS DE A PEROXA PARA QUE SE RESTITÚA UN MÉDICO NO CENTRO DE SAÚDE

13/05/2015
By

UN SÓ MÉDICO TEN QUE ATENDER A CASE 2000 PERSOAS

Ourense.-13.5.2015

 

O candidato socialista á alcaldía de A Peroxa, Antonio González Fiuza, presentou esta mañá na Delegación de Sanidade de Ourense un escrito con 592 sinaturas de veciños e veciñas deste concello para demandar a restitución dun médico no Centro de Saúde.

 

Neste acto de protesta, o candidato socialista estivo acompañado polas deputadas autonómicas María Quintas e Mari Carmen Acuña, que expresaron a súa solidaridade cos veciños de A Peroxa que contan só cun médico para atender a case 2.000 veciños que ten o concello.

 

Esta situación supón unha auténtica aldraxe para as persoas que teñen que acudir ao Centro de Saúde de A Peroxa, e amosa o grao de desprezo pola cidadanía do PP e do propio alcalde, que no último pleno municipal chegou a dicir que se era reelexido conseguiría a restitución do médico.

 

Para Antonio González isto é unha proba máis da desfachatez deste alcalde, que consentiu que a Xunta deixase o Centro de Saúde cun só médico, e agora promete recuperalo se sae reelexido.

 

20150513_102223_resized

 

A candidatura socialista neste concello apoiou a recollida de sinaturas, que se levou a cabo por unha iniciativa popular, tras a indignación pola perda do médico, e que pon de manifesto a recorte brutal dos dereitos dos veciños que viven no medio rural e que, neste caso, atinxen a un servizo público esencial como é a sanidade.

 

Concentración en repulsa do asesinato de Isabel, victima da violencia de xenero.

09/05/2015
By

Hoxe ás 20.00 horas CONCENTRACIÓN DIANTE DA SUBDELEGACIÓN DO GOBIERNO, en Ourense. En repulsa polo asesinato de Isabel no CHUO, victima da violencia de xenero.

Contará coa presencia da Deputada Autonómica e Secretaría de Organización do PSOE en Ourense,  María Quintas.

mariaquintas

Raúl Fernández e Laura Seara explicaron as nosas propostas no Debate sobre el estado de la Nación para unha recuperación xusta de Ourense

28/02/2015
By

O secretario xeral provincial, Raúl Fernández, e a deputada no Congreso, Laura Seara protagonizaron esta mañá unha rolda de prensa para valora-los resultados do “Debate sobre el estado de la Nación” deste ano.

Fernández, que mostrou a súa confianza en que tivera sido “o último de Rajoy como presidente” lembrou que este prometera acabar co paro e crear tres millóns de postos de traballo, e hoxe hai 548 000 empregos menos e 144 000 empresas pechadas máis; que prometera acabar co endebedamento público, e hoxe este ascende ao 100% do PIB, que prometera non retallar na Sanidade, a Educación nin nas pensións, e o que fixo foi introducir copagamentos, retalla-las bolsas e baixa-lo valor das pensións.

Pola súa banda, Laura Seara acusou ao PP de aplicar de novo o rolo parlamentario. Así, das cento vinte resolucións presentadas por tódolos grupos parlamentarios do Congreso, o PP só aprobou dezanove: as súas quince propias, tres de CiU, e unha de UPN.

Para Seara, “Rajoy ocultou os seus propósitos durante estes anos, e agora quere convencernos de que estas novas promesas si se cumprirán.; pero non se pode enganar a todo o mundo todo o tempo”. Fronte a elo, sostivo que o PSOE “presentou unha axenda para unha recuperación xusta, unha alternativa completa ás políticas económicas, sociais e de rexeneración institucional e democrática do goberno do PP”, manifestando a súa convicción de que “o futuro debe ser unha esperanza, nunca unha ameaza; e fronte á resignación que ofrece a dereita, os socialistas queremos oportunidades que eviten que se cree unha nova xeración perdida de xóvenes que teñan que seguir emigrando en busca dun futuro mellor lonxe do seu país, e oportunidades que eviten que os maiores de corenta e cinco anos que perderon o seu emprego. se convertan nunha xeración esquecida”.

Ambos compañeiros criticaron que o PP votara en contra de propostas socialistas para que se subise o salario mínimo, se derrogase a reforma laboral, se suprimisen os copagamentos sanitarios e se revalorizaran as pensións. Tamén criticaron con dureza que o PP rexeitase un Plan contra a Pobreza e unha Lei de Segunda Oportunidade que free os desafiuzamentos. Así, Seara recriminou ao PP as súas mentiras respecto a esta última Lei, que o Goberno central anunciou, xa que “na proposta do Goberno non hai nin segunda oportunidade, nin dación en pago nin se quitan as cláusulas-chan, porque primeiro che quitan todo e despois fan unha exoneración temporal da débeda , pero cando xa perdiches todo”, explicou.

Entre outras resolucións presentadas polo PSOE e que o PP rexeitou, estaban: elaborar unha lei de igualdade salarial entre homes e mulleres, que non se modificase a lei do aborto, a prohibición de indultos por corrupción política, potencia-la universidade pública, derroga-la LOMCE e frea-las carreiras de tres anos, e a que pedía que se remitise ao Congreso dos Deputados un proxecto de Lei de Tarifas Eléctricas de Regadíos que regulase, entre outras cuestións, un IVE reducido para as Comunidades de Regantes, e o establecemento de contratos de tempada.
,

Seara denuncia que 1135 coidadores familiares de persoas dependentes perderon as súas cotizacións á Seguridade Social en Ourense polos recortes de Rajoy

15/10/2014
By

 

O número de número de altas de coidadores non profesionais de persoas dependentes na Seguridade Social na provincia de Ourense descendeu en 1135 persoas dende que goberna Rajoy, segundo unha resposta parlamentaria do Goberno central ao Grupo Parlamentario Socialista. Segundo os datos nela contidos, a afiliación destes coidadores pasou de 172 363 no 2011 a 14 594 en xullo do 2014, o que constitúe para os socialistas un desmantelamento da Lei de Dependencia ante o que resulta necesario salva-la Lei e garanti-los dereitos dos dependentes.

O retroceso sostido que sofre a Dependencia dende que goberna o PP faise tamén evidente nos orzamentos e no número de beneficiarios: hai 2265 millóns menos para o sistema de Dependencia; o número de beneficiarios ten descendido de 738 587 en decembro do 2011 a 721 512 en agosto do 2014 (17 075 menos); 177 000 dependentes con dereito recoñecido están desatendidos, aos que hai que engadi-las 314 000 persoas de Grao I, cuxo dereito a atención aínda non é efectivo polo atraso no calendario de aplicación da Lei.

Laura Seara denuncia o “desmantelamento da Lei de Dependencia” e a “grave deterioración do Estado do benestar”, sinalando que, “coa escusa da crise, estamos a asistir a un perigoso cambio de modelo, que demostra que o Goberno de Mariano Rajoy despreza aos máis vulnerables: desentendeuse das persoas dependentes reducindo drasticamente a achega do Goberno para financia-la Dependencia, poñendo en risco a súa sostibilidade, retallando dereitos e desmantelando a Lei”.

Antes esto, a deputada considera “necesario garantir, de xeito efectivo, o dereito das persoas en situación de dependencia”, e analizar que medidas son necesarias para manter e garanti-la sostibilidade do Sistema. Un sistema que, subliñou, “xera emprego, ten un importante retorno na creación de postos de traballo, sobre todo para as mulleres”.

Lembramos que, entre outras medidas, o PP paralizou o calendario de aplicación da Lei, impedindo ás persoas con dependencia moderada acceder a unha prestación ou servizo; eliminou dos orzamentos xerais do Estado a partida para o nivel acordado, que ascendía a 283 millóns; supriu os dous niveis en que se dividía cada grao; reduciu nun 13% a achega do Estado para o financiamento do nivel mínimo; rebaixou nun 15% a prestación económica por coidados no ámbito familiar; eliminou a cotización dos coidadores non profesionais, e introduciu a incompatibilidade das prestacións.

Ademais, produciuse un grande retroceso no financiamento estatal do sistema, xa que, de soporta-lo 40% do seu custo no 2009, a Administración Xeral do Estado pasou a facerse cargo do 19% no 2013, mentres que a achega das Comunidades Autónomas creceu do 50,8 ao 62%, e o copagamento dos usuarios case se duplicou.

En definitiva, o Goberno central “reduciu o contido esencial do dereito, e “realizou importantes retallos orzamentarios, co dramático resultado de que os beneficiarios están a recibir servizos e prestacións claramente insuficientes, ao tempo que se encontran sen atender centos de miles de persoas en situación de dependencia”.

Os socialistas galegos presentamos unha Proposición de Lei de Dereitos e Garantías da Dignidade dos Enfermos Terminais

22/09/2014
By

Hoxe, martes 30, presentamos aos Medios de Comunicación a Proposición de Lei dos socialistas no Parlamento galego sobre “Dereitos e garantías da dignidade dos enfermos terminais”.

Esta proposta xurdiu pola demanda da poboación de ter garantía de coidados dignos ata nas derradeiras horas da súa vida.

A dignidade dunha persoa non debe de deixar de terse presente, tamén neses intres.

Tamén os profesionais precisan dun marco legal que lles dea garantías á hora de exercer esa demanda dos usuarios e as súas familias, sen temor a seren perseguidos, como nalgún caso ben coñecido en España.

Os socialistas queremos que esas garantías estean reguladas, e que sexa a Administración a que vele por que se cumpran.

Texto da Proposición de Lei: Proposición_de_Lei_de_Dereitos_e_Garantías_da_Dignidade_dos_Enfermos_Terminais

Esiximos á Xunta que paralice a adxudicación integral de espazos no CHUO como ordenou Hacienda, pero o SERGAS asegura que recorrerá a decisión ante o TSXG

03/05/2014
By

O PSdeG esixiu na comisión de Economía do Parlamento galego ao SERGAS que acate a decisión do Tribunal Administrativo Central de Recursos Contractuais, dependente do Ministerio de Hacienda, co que a Xunta ten asinado un convenio de colaboración, e que ordenou desmembrar a complexa licitación da xestión integral de espazos no CHOU.

Porén o Director Xeral de Recursos Económicos do SERGAS anunciou que a Xunta vai a recorre-la paralización ante o TSXG.

O contrato, por quice anos e 225 millóns de euros, dos servizos de limpeza, seguridade, mantemento e consumo enerxético, para unha mesma empresa, que, ao mesmo tempo asumiría o pago de 14 millóns de euros para a construción do Plan Director do CHUO, deixaría fóra ás empresas galegas, incapaces de asumir unha oferta tan completa.

Hai que lembrar que o Goberno central deu a razón ás denuncias socialistas ao paraliza-la adxudicación integral ao grupo Ferrovial, obrigando ao SERGAS ao despece da mesma en tres novos concursos.

O Tribunal de Recursos Contractuais sostén que non se poden mesturar servizos tan diferenciados, e que a licitación incumpre ata dez artigos da Lei de Contratos, esixindo 100 000€ de garantía provisional, 7,5 millóns de garantía definitiva e outorgando o Sergas á beneficiaria un contrato de quince anos e un mes.
Esiximos no Parlamento ao representante do SERGAS “honradez, transparencia, sentido común e que deixe de lado inventos estranos, que só serven para o saqueo da Sanidade Pública, e preguntámonos de que serve que a Xunta colabore co Tribunal de Recursos Contratuais, se despois non cumpre as súas decisións.