Grupo Provincial Socialista

Denunciamos o desleixo do goberno municipal de Leiro, exemplificado no atraso no asfaltado da estrada OU-307 e na perda polo Concello dunha subvención para a adquisición de desfibriladores

Na súa calidade de deputado provincial pola comarca d’O Ribeiro, Nacho Gómez levou á Deputación a denuncia dos compañeiros do Grupo Municipal Socialista no Concello de Leiro, verbo a ausencia de asfaltado, dende hai dous anos e medio, en tramos da estrada provincial OU-0307 que une Leiro e Berán.

Os compañeiros de Leiro explicaron que no lugar d’A Agra se procedera, no 2014, á ampliación dunhas curvas na devandita estrada, intervención que consistiu en amplia-lo radio das mesmas e na colocación de sábrego como firme. Pero dende entón, o tramo segue sen ser asfaltado, co conseguinte risco para a circulación e para a integridade dos veciños e de tódolos usuarios da estrada.

Por aquel entón, o Grupo Municipal Socialista en Leiro lle preguntou ao alcalde, en Pleno, cando se ía proceder ao asfaltado destas perigosas curvas, ao que o rexedor respostou que estaba “en negociacións coa Deputación”. Dende entón, nada se sabe destas e a vía segue en condicións de provisionalidade.

Fartos desta situación de desleixo, os socialistas de Leiro deron traslado ao Grupo Provincial Socialista. Nacho Gómez solicitou explicacións sobre o problema na institución provincial, que é competente no tema. A falta destas, Gómez opina: “esta cuestión non é máis que a evidencia do que veño denunciando en numerosas ocasións: a falta dun plan de estradas provincial rigoroso e serio”, abundando que “ano tras ano, fan pequenas obras e reformas nas estradas que, lonxe de solucionar, xeran problemas aínda meirandes”.

Xa que logo, os socialistas de Leiro piden ao alcalde que explique en qué consistiron as súas xestións coa Deputación para solucionar o problema e, a maiores, o Grupo Provincial Socialista demanda que se informe acerca de cándo está prevista solución dun problema que xera un grave risco para os usuarios da estrada.

Por outra banda, e sen saírmos de Leiro, o noso Grupo Municipal neste municipio tamén vén de informar acerca de que o Concello acaba de perde-la oportunidade de recibir unha axuda para adquirir desfibriladores para seren instalados en lugares públicos. Ao contrario que outros concellos da contorna, o alcalde desaproveitou esta oportunidade que brindaba a Deputación, e non solicitou unha axuda que supoña o financiamento de ata 50% do custo dos destes aparellos. Así, ao contrario que Ribadavia, Melón ou Carballiño, Leiro fica sen subvención para adquirir uns dispositivos que resultan de grande axuda á hora de salvar vidas.

O voceiro municipal socialista, Manuel Rodríguez, esíxelle ao alcalde que dea as razóns da perda desta axuda: se foi por por puro desleixo ou porque coida que o Concello estea tan sobrado de cartos que pense adquirilos sen axuda económica.

E no semella que probábel caso de que a causa da omisión sexa, como os propios socialistas de Leiro veñen advertindo dende hai tempo, a falta de persoal, o panorama sería aínda peor, pois Francisco J. Fernández estaría a ignorar completamente ditas advertencias por pura teima persoal: o alcalde estaría a perder vantaxes e servizos para o pobo, antes que recoñecer unha evidencia

Manuel Rodríguez só agarda que a perda desta subvención non leve aparexada, irremediábelmente, a falta de adquisición dos aparellos, a cal xa fora solicitada polo Grupo Municipal Socialista antes incluso de que se convocase a axuda da Deputación, respostando daquela o alcalde que se disporía dos dispositivos “cando houbera dispoñibilidade” orzamentaria.

WhatsApp Image 2016-12-05 at 18.39.33

Francisco Fraga destaca que o cambio na Portavocía do Grupo Provincial Socialista se debe a decisións políticas amparadas pola lexitimidade e con pleno fundamento legal, democrático e estatutario.

14/11/2016
By

 

HPIM0187

FRAGA CIVEIRA: “A NOSA MÁXIMA NESTE NOVO TEMPO POLÍTICO VAI SER A DE SER ÚTILES PARA A SOCIEDADE OURENSÁ”.

 

Ourense, 14 de novembro de 2016. Francisco Fraga Civeira, acompañado da deputada provincial  Susana Rodríguez, compareceron perante os medios para dar conta da decisión da maioría do grupo provincial de nomear ao propio Fraga Civeira como novo Portavoz do Grupo Provincial Socialista. Nas súas declaracións explicou que, de acordo coa lexislación de réxime local e cos propios Estatutos do Partido Socialista, que esa maioría entendeu que era preciso un cambio na acción política do grupo provincial e solicitaron unha reunión coa dirección política provincial do PSdeG-PSOE de Ourense, que se celebrou o mércores da semana pasada e, trala votación, arroxouse un resultado de 5 votos a favor da designación de Francisco Fraga como novo Portavoz e 1 abstención, así coma dúas ausencias, sendo 8 o número total de deputados e deputadas socialistas. Esta decisión foi comunicada, mediante escrito rexistrado na Deputación de Ourense, para informar ao Presidente do cambio na Portavocía do grupo socialista. Recalcou que se tratou dunha decisión legal e estatutaria e que corresponde coa vontade de cambiar o rumbo político do labor feito ata agora. Así mesmo confirmou que a decisión foi consultada co Secretario da Deputación e que recibiron a conformidade a unha decisión baseada na comunicación dun acordo democrático e maioritario que non admite moita discusión.

En declaracións de Fraga Civeira: “Esto supón o comezo dun tempo novo, un novo rumbo na acción política, unha dedicación total dos deputados á actividade política na Deputación e fóra da mesma mediante o contacto permanente con todos os grupos municipais socialistas, cos Alcaldes e Alcaldesas así coma cos compañeiros e compañeiras que están na oposición, para deste xeito atacar o catro piares que definen a política do Partido Popular nesta provincia: un sistema clientelar na adxudicación das obras,un sistema clientelar no reparto das subvencións en función da afinidade política, o reparto das axudas e convenios coas entidades locais en base a criterios partidistas e, por último, a falta de transparencia na contratación de persoal”.

Reiterou, así mesmo, que nin el nin o resto dos compañeiros/as ían perder o tempo en cuestións orgánicas, posto que para elo xa existían os propios órganos e canles do partido socialista. Recalcou que o seu labor se vai centrar no día a día da Deputación e en mellorar as condicións de vida e o futuro dos habitantes da provincia de Ourense.

Esta no seu ánimo dar un xiro político á acción do grupo, nin mellor nin peor á realizada antes senón diferente e consolidarse como alternativa de goberno. Recalcaron o carácter político da decisión e descartaron calquera tipo de cuestión personalista. Este tipo de decisións políticas teñen carácter de normalidade nas organizacións políticas, sempre tendo en conta o mellor para a cidadanía.

Engadiu, Fraga Civeira, que respecta e valora o labor de Nacho Gómez como deputado e avaliou como magnífico o seu desempeño ao fronte da Alcaldía. Manifestou, así mesmo,que agardan o mesmo respecto cara o seu labor que están a ofrecer, así coma a vontade de traballar xuntos e unidos a prol dos intereses da provincia de Ourense.

Recalcou, Francisco Fraga, que sempre destacou o activo que supoñen os Alcaldes e Alcaldesas socialistas, como el mesmo o foi pero que non hai que esquecer a posta en valor dos concelleiros e concelleiras do partido que son os que escollen aos seus deputados e deputadas provinciais. Nembargante, recordou que son os grupos de deputados/as os que escollen ao seu portavoz e polo tanto, tamén o cambian. O mesmo acontece nos grupos municipais ou noutros grupos doutras institucións. Destacou o máximo respecto            que se lles amosa pola autonomía dos grupos municipais e reclama o mesmo respecto paras as decisións adoptadas polo grupo de deputados e deputadas provinciais.

Quixo deixar claro, así mesmo, saíndo ao paso de falsas informacións que a decisión foi tomada por parte da maioría do grupo da Deputación e que a única e primeira reunión que tivera con Manuel Baltar fora no día de hoxe, por motivos de cortesía institucional. “Cadaquén é refén do que di e dono do que cala”, engadiu para zanxar cuestións de índole orgánica que poden distraer á nova dirección política do grupo do seu labor na Deputación.

Respecto das discrepancias que se están a manifestar no seo da organización, Fraga Civeira, recalcou a súa vontade de que se diriman polas canles e nos órganos adecuados e nunca, en ningún caso, poidan afectar ao traballo conxunto do grupo provincial socialista.

A Agrupación Socialista de Boborás achega máis de 200 sinaturas, diante do Rexistro da Deputación, esixindo o remate inmediato das obras na OU-0415.

17/09/2016
By

OS SOCIALISTAS DE BOBORÁS, FANSE ECO DAS NUMEROSAS QUEIXAS VECIÑAIS, DE USUARIOS E AFECTADOS, ALERTADOS POLA ALTA PERIGOSIDADE DADO O ESTADO DE INSEGURIDADE NO QUE SE ATOPA A ESTRADA

2016-09-16-PHOTO-00000607

A Agrupación Socialista de Boborás cumpre co prometido hai uns días, cando anunciaron a recollida de sinaturas entre a veciñanza, usuarios/as e afectados/as para esixir o urxente remate total das obras na estrada provincial OU-415 entre Brués e Feás. Así pois, hoxe pola mañá, o SX da Agrupación, Javier Lamas, fixo entrega de máis de 200 sinaturas recollidas entre os veciños e veciñas, tanto de Boborás coma da comarca, xa que se trata dunha vía de uso prioritario. Deste xeito, o SX da Agrupación e o Secretario de Organización, Amador Pérez, acudiron ao Rexistro da Deputación provincial, titular da estrada, acompañados polo deputado provincial da zona, Francisco J. Fraga, quen xa leva meses denunciando a lamentable situación que lle trasladan os seus compañeiros de Boborás. No escrito presentado, os asinantes esixen da Deputación o remate inmediato das obras proxectadas e o arranxo total da estrada, nestes intres, insegura e perigosa para os usuarios/as.

Dáse a circunstancia que os veciños e veciñas de Boborás levan agardando máis de 20 anos ao remate dunhas obras que parecen o conto de nunca acabar e que dan moitos quebradeiros de cabeza a quen as transita. O anuncio recorrente dun remate que non chega nunca, fai que a estrada estea permanentemente en obras, que dificultan o tránsito e aminoran, sensiblemente, a seguridade da estrada. Xa hai 8 anos, no 2008, que se anunciaba que a reforma da estrada se ía finalizar tras 20 anos de obras (LR 14/03/2008) e pasado todo este tempo, os usuarios/as seguen agardando. Parece, como ben din dende a Agrupación Socialista, que estes anuncios coinciden sempre con citas electorais, polo que agardan que desta volta, tanto o Concello coma a Deputación, o tomen en realmente en serio e non pequen de oportunismo político.

Tal como destaca Francisco Fraga, trátase dunha vía principal, non só polo seu carácter provincial  do servizo tan amplo que dá a toda a zona, senón porque conecta aos usuarios de Ourense coa provincia de Pontevedra, sendo de vital importancia asegurar o menor risco para os mesmos, cousa que non se está a producir. A ou-415 é unha estrada vital para comunicar e artellar unha parte moi ampla do Concello de Boborás e, ademais, supón unha alternativa ao paso do Alto do Paraño; polo que non é de recibo que estea nas condicións actuais. A este respecto, Javier Lamas, engade que o estado permanente de obras favorece a sinistralidade, sendo varios os casos de accidente que se deron na zona nos derradeiros tempos.

A Agrupación Socialista de Boborás quere destacar que non só recolleron sinaturas para seren entregadas senón o malestar da xente que está farta de aturar esta rexeitable situación. Os afectados e afectadas merecen ser escoitados na institución provincial e, sobre todo, no Concello de Boborás. Tendo en conta as queixas recibidas, os socialistas, solicítanlle ao goberno do PP de Boborás que, dunha vez por todas, esixa á Deputación de Ourense que se remate, de xeito total e non parcial, coas infinitas obras que afectan á OU-415 e, sobre todo, ao benestar, seguridade e tranquilidade da veciñanza e usuarios/as.

A deputada provincial socialista, Isabel Gil, aproveita a visita de Eloína Núñez ao centro de saúde de Celanova, para esixirlle que adquira o compromiso de ampliación do PAC, pola que levan agardando 15 anos.

08/09/2016
By

A deputada provincial polo partido xudicial de Celanova e portavoz socialista en Ramirás, Isabel Gil, tivo a oportunidade, exercendo a súa profesión como médico de familia no Centro de Saúde de Celanova de reivindicar as carencias ante a Xerente de Xestión Integrada de Ourense, Verín e Valdeorras, Eloína Núñez, na visita que está fixo ao ambulatorio da localidade, onte pola mañá. A curmá de Feijóo e máxima responsable do SERGAS na provincia de Ourense, acudiu ao centro de saúde de Celanova, nunha visita de claro corte electoralista, acompañada polo Alcalde do municipio e mais polo responsable de Recursos Económicos da Xerencia da Xestión Integrada de Ourense, Alberto Pedrera; nesta ocasión para, a escasos días do comezo da campaña electoral das autonómicas, dar os parabéns ás obras do teito que se están a realizar no centro.

Máis aló da clara intención de publicitar o traballo feito polo actual goberno da Xunta, do PP, nunha práctica cando menos sospeitosa pola acercamento da cita electoral; os e as sanitarios/as que desenvolven o seu labor no ambulatorio tiveron a ben achegarse a estes máximos responsables dos servizos de saúde en Ourense para facerlle chegar as súas xustas reclamacións de mellora do servizo que prestan e das instalacións nas que traballan.

Nesta ocasión, Isabel Gil, quen desempeña tarefas de medicina de familia así coma gardas e atención de urxencias, acompañou a varios compañeiros, que se achegaron a Eloína Núñez e lle fixeron saber que levan 15 anos agardando a que se solucione a precaria situación na que se atopa o PAC (Punto de Atención Continuada-urxencias) que atende a, nada menos, que 10 Concellos da contorna.

A doutora e deputada provincial explicoulle á xerente do SERGAS que acometen o seu labor nunhas condicións intolerables, sen salas de consultas habilitadas, tendo que atender aos enfermos que van a urxencias nas salas destinadas a raios X e a fisioterapia, sen que estean debidamente acondicionadas e habilitadas para elo. Os pacientes que acoden ao servizo de urxencias de Celanova teñen que soportar que se lles aplique un tratamento, como pode ser unha nebulización ou un soro, e agardar no corredor namentres os dous médicos e enfermeira do PAC, van atendendo a outros enfermos. Os sanitarios de Celanova din estar fartos desta embarazosa situación na que non se asegura a privacidade e intimidade do paciente ademais de non poder exercer o seu traballo nunhas mínimas condicións.

As consultas que empregan para urxencias non están dotadas nin do máis básico, como pode ser un lavabo ou un espazo de aplicación de tratamentos. Hai xa 15 anos que se reivindicou, por parte do persoal do centro de saúde, a ampliación do PAC e, neste tempo, o goberno galego non foi quen de cumprir con esta necesidade imperiosa. Isabel Gil, como afectada directa, fíxolle chegar esta petición a Eloína Núñez e instouna a que adquirira o compromiso dunha vez por todas. A deputada di que a xente está cansa de promesas baleiras e actos faltos de contido con intereses puramente electoralistas e que, na realidade, o partido que máis tempo leva ostentando o poder en Galicia e Ourense, o Partido Popular, non cumpra coas necesidades da cidadanía. Así mesmo, opina, que esta ampliación do PAC de Celanova, beneficiaría á propia xestión integrada de Ourense posto que, moitas veces, vense obrigados a derivar os casos a Ourense ante a ausencia de espazos habilitados para atender tratamentos e observacións. No caso de existiren estes espazos, dende Celanova, poderíase contribuír a desconxestionar o servizo de urxencias do CHUO, conclúe a deputada socialista.

Aproveitando a presenza do Alcalde e do xestor económico do SERGAS en Ourense, Isabel Gil tamén lles fixo chegar unha reivindicación histórica dos sanitarios que teñen que desempeñar o seu labor no centro de Celanova. Os médicos alí adscritos teñen que facer domicilios na vila e, moitas veces, deixan os aparcamentos libres e ao seu regreso xa están ocupados, obrigándoos a perder tempo procurando aparcamento. Así mesmo, cando van a atender nos fogares dos enfermos, teñen que deixar o vehículo mal aparcado ou en zonas non habilitadas e cargan coas conseguintes multas.

Tal como relata Isabel Gil, se tivesen unhas tarxetas de aparcamento, poderían desenvolver mellor o seu traballo sen preocuparse polo sitio ou as sancións. O labor que desempeñan nas atencións a domicilio é vital para a cidadanía e, polo tanto, as administracións local e autonómica deberían facilitar este traballo cos medios necesarios. O tema do aparcamento non só afecta aos doutores e doutoras senón a resto do persoal sanitario que traballa en Celanova e, nomeadamente, ao persoal das ambulancias. A falta de lugares e as propias características do centro, fan que teñan que aparcar os vehículos enriba da beirarrúa para poder atender, con prestancia, as emerxencias. O mesmo acontece cando acoden pacientes en cadeiras de rodas, tanto en vehículos privados coma nas ambulancias, ou ben os teñen que deixar na propia beirarrúa e ir procurar aparcamento ou teñen que subirse e facer un mal aparcamento.

Non é de recibo, reitera o persoal de Celanova, que se estean dando estas lamentables situacións e que os enfermos padezan as consecuencias, polo que demandan a habilitación inmediata de aparcamentos na zona, polo que reclaman o compromiso ineludible do Alcalde da localidade. Así mesmo, tal como lle trasladou a deputada provincial, é hora de que os servizos económicos do SERGAS teñan en conta as xustas reivindicacións dos médicos que fan domicilios e que precisan ver facilitados os seus desprazamentos.

O Portavoz do Grupo Provincial Socialista, Nacho Gómez, esixe responsabilidades a Pablo Pérez pola utilización do local da Mancomunidade Terras de Celanova, por parte da súa familia.

01/06/2016
By

NACHO GÓMEZ COIDA QUE A CIDADANÍA DE OURENSE DEBE SABER QUE GRAO DE IMPLICACIÓN TEN O DEPUTADO DO PP NA CONCESIÓN DE SUBVENCIÓNS A UNHA ENTIDADE PRESIDIDA POLO SEU PROPIO PAI.

 

O ENTRAMADO FAMILIAR QUE CONFORMA A FAMILIA DO DEPUTADO PÉREZ, LEVANTA SOSPEITAS SOBRE O APROVEITAMENTO QUE FAN DOS RECURSOS PÚBLICOS.

 

O Portavoz do Grupo Provincial Socialista, Nacho Gómez, esixe que se coñeza o grao de implicación do deputado provincial, Pablo Pérez, na concesións de subvencións á Mancomunidade Terras de Celanova, que o seu pai preside. Así mesmo, considera que Pablo Pérez, en canto coordinador da cooperación con Concellos e Mancomunidades da Deputación de Ourense, debe asumir responsabilidades pola utilización privada que fixo a súa familia do Centro ocupacional da Fundación para a Protección dos Minusválidos Terras de Celanova, dirixido por seu irmán e que pertence á Mancomunidade que preside seu propio pai, Alcalde de Quintela de Leirado.

 

O Grupo Socialista na Deputación, considera imprescindible, xa que logo, que o Presidente investigado, José M. Baltar e mailo seu Deputado provincial, o señor Pérez, deben respostar inmediatamente ao grao de implicación que ten o propio Pablo Pérez, nos procedementos de concesión de subvencións á Mancomunidade Terras de Celanova. Tamén esixen coñecer a relación de subvencións que lle foron concedidas a esta Mancomunidade dende o 2009, posto que os socialistas, son coñecedores de que receben cartos a esgalla da Deputación, moi por enriba doutras entidades e que, agardan, estean plenamente xustificadas.

 

O clan familiar do deputado do PP, polo tanto, estende as súas ramificación en torno a todo o relacionado coa Mancomunidade  e así, aparte do feito que o pai sexa Presidente, o irmán de Pablo Pérez é director do centro ocupacional do que fixeron uso privado ademais de traballador da propia Deputación de Ourense. A pesares de que, por desgraza, a sociedade ourensá está afeita a estes entramados familiares, o Grupo Provincial Socialista, esixe coñecer se hai incompatibilidade entre o cargo de director do centro ocupacional e o seu traballo na institución provincial. Deste xeito, solicitaron copia da solicitude de compatibilidade para exercer ambos traballos.

 

Así mesmo, dáse a circunstancia que o propio Pablo Pérez, é coordinador da Cooperación coas Mancomunidades, polo tanto, responsable, en última instancia do uso que se faga dos recursos adscritos ás mesmas e, máxime, se é a súa propia familia quen fai un uso inapropiado.

 

“A utilización desa Mancomunidade por parte desa familia, excede ata as actuacións ás que estamos tristemente acostumados nesta provincia. Aparte de usar a Mancomunidade como unha empresa de colocación dos membros desa familia, agora sabemos que empregan os locais e espazos públicos para actividades privadas”, declara Nacho Gómez.

 

Nacho Gómez, considera que Pablo Pérez, debe dimitir se ten responsabilidade sobre a mala utilización de espazos e recursos públicos para actividades da súa propia familia. Así mesmo, coida que toda a provincia, en particular, os veciños/as da Comarca deben coñecer as actuacións do pai do Deputado, en tanto que Presidente da entidade e do irmán, en tanto que director do centro ocupacional pertencente a esa mesma entidade.

 

Os alcaldes e portavoces socialistas das comarcas do Carballiño-Ribeiro, esixen a apertura inmediata do Parque de Bombeiros mediante a xestión pública e directa do servizo.

14/05/2016
By

13179348_474147859462433_7325229121732165215_n

 

Foto cedida por José Antonio Reboiro Rivera.

 

OS SOCIALISTAS DENUNCIAN QUE, O PARQUE COMARCAL DO CARBALLIÑO-RIBEIRO, PARA O QUE TODOS OS CONCELLOS FIXERON ACHEGAS ECONÓMICAS; ESTÁ A SUFRIR DETERIORO MATERIAL, POLO PASO DO TEMPO, SEN QUE A XUNTA DE GALICIA EFECTÚE A PROMETIDA APERTURA

 

O Carballiño, 14 de maio de 2016. Onte pola mañá, déronse cita, diante do edificio do Parque de Bombeiros das comarcas Carballiño-Ribeiro, Alcaldes e Portavoces socialistas dos distintos Concellos que conforman as bisbarras, para reclamar a apertura inmediata do parque e a posta en marcha do servizo. Os socialistas, anunciaron, así mesmo, o inicio de accións conxuntas e coordinadas, coma a presentación dunha moción ante as súas respectivas Corporacións, para esixir, non só a apertura, senón que o Consorcio Provincial asuma a xestión directa do servizo en prol da calidade e eficiencia do mesmo.

 

Tendo en conta que todos os Concellos das comarcas do Carballiño-Ribeiro, aportaron, en torno, a un 20% do custo total do Parque, os Alcaldes e Portavoces socialistas consideran intolerable que o Parque permaneza pechado e sufrindo o paso do tempo sobre as dotacións que tanto custaron ós cidadáns. Fartos de promesas incumpridas por parte da Xunta, que leva anos anunciando unha apertura que nunca acontece e fartos de que as autoridades do PP se vaian facer a foto de rigor, sen solucionar a falta do servizo; os socialistas levarán a cabo, coma ata o de agora, todas accións precisas para que o parque en funcionamento, sexa unha realidade. Após o esforzo económico realizado por todos os Concellos do Carballiño e do Ribeiro, a cidadanía ten que asistir ao deterioro imparable das instalacións, comidas pola maleza, polos toxos e a ferruxe, ó paso de tempo inexpugnable sobre materiais e dotacións e a que corran os seguros dos vehículos sen uso, sen que a Xunta do PP, faga nada.

 

Namentres isto acontece, a Xunta e maila Deputación, andan argallando a privatización do Consorcio provincial de incendios, a pesares dos datos obxectivos que falan dunha merma na calidade do servizo e no encarecemento do mesmo. Por isto mesmo, o representante socialista no Consorcio, Francisco Fraga Civeira, xa amosou a súa desconformidade co proceso de externalización no desenvolvemento do último Pleno. A isto, hai que engadir a situación de precariedade na que se coloca aos traballadores do servizo, expostos á maximización de beneficios por parte das empresas privadas que pode conlevar que non poidan realizar o seu traballo con todas as garantías. Esta precariedade, conlevará consecuencias sobre o servizo recibido polos cidadáns, cando se trata dunha cuestión de suma importancia, garantir a seguridade de todos e todas nós.

 

Pola súa banda, os Alcaldes e Portavoces socialistas, encabezados polo Alcalde do Carballiño, Paco Fumega, o de Ribadavia, Nacho Gómez e o de Carballeda de Avia, Luis Milia; anunciaron accións conxuntas en todos os Concellos afectados pola disolución do Consorcio comarcal e a máis que previsible privatización do Consorcio no que agora están agrupados todos os Parques. Deste xeito, levaranse para o seu debate plenario, mocións coordinadas a nivel comarcal que esixen ao Consorcio Provincial de Ourense para a Prestación do Servizo contra Incendios e Salvamento a que poña en funcionamento de xeito inmediato e baixo as premisas da xestión directa e pública, o Parque de Bombeiros do Carballiño-Ribeiro . Ademais, instan a este mesmo Consorcio e á Xunta de Galicia a que opten pola xestión directa do servizo que van prestar os parques de bombeiros integrados no citado consorcio. E por suposto, os socialistas, esixen do goberno autonómico que elabore e aprobe, de xeito urxente, o Regulamento do Bombeiro Profesional recollido na Lei 5/2007 de Emerxencias de Galicia e que cree o Corpo de Bombeiros de Galicia do que formen parte os empregados públicos que presten o seu servizo nos diferentes parques comarcais.

 

O PSdeG de Ourense, celebra unha reunión interparlamentaria para marcar as liñas extratéxicas do partido, a nivel institucional, desta lexislatura.

23/04/2016
By

DSCN6273

NA REUNIÓN, MANTIDA ENTE O SECRETARIO PROVINCIAL, RAÚL FERNÁNDEZ E O PORTAVOZ MUNICIPAL DO PSOE, JOSÉ ÁNGEL V. BARQUERO, TEN COMA LIÑA ESTRATÉXICA FUNDAMENTAL GARANTIR O DESENVOLVEMENTO SOCIO-ECONÓMICO DA PROVINCIA E DA SÚA CAPITALIDADE.

 

Ourense, 23 de Abril de 2016. No día de onte, tivo lugar unha reunión INTERPARLAMENTARIA na sé do PSdeG de Ourense presidida polo S.X. Provincial Raúl Fernández e o Portavoz do PSdeG no Concello de Ourense, José Ángel Vázquez Barquero, entre outros cargos institucionais e orgánicos; para marcar as liñas estratéxicas nos diferentes ámbitos institucionais nos que temos presenza, o PSdeG de Ourense: Deputación, Parlamento Galego e Cortes Xerais.

O traballo dos e das socialistas ourensáns e os seus representantes será en positivo, co primordial obxectivo de que  os homes e mulleres desta provincia que marchan en idade produtiva, polas pésimas condicións socioeconómicas que imperan nesta provincia logo de longos anos de gobernos populares, teñan a oportunidade de quedar, vivir e traballar na  provincia de Ourense.

Dun xeito máis particular, determinouse que a liña principal de actuación ten que ser a integración do AVE na cidade e o cumprimento das datas de remate da infraestructura. Así coma outras cuestións de enorme importancia para a comarca de Ourense coma poden ser a de dar solución ás demandas cidadáns, particularmente as que reclaman a titularidade pública do Centro de Velle (recollendo a inciativa das ANPAS) e de Vilamarín e a solución definitiva da construcción do centro de saúde do Couto, así coma a importante cuestión do transporte metropolitano, entre outros. Determinouse o mantemento de reunións periódicas, coma a celebrada onte, para facer o seguimento e avaliación destas demandas.

O debuxo político da Provincia de Ourense e, nomeadamente, da capital de provincia baixo os gobernos do PP, non é bo para os e as cidadáns.

Sabemos que o persoal público de amplos servizos básicos da Xunta de Galicia, foron reducidos dende que goberna o Sr.Feijoo. Soamente en Educación e en Sanidade, falamos de perto de 3.000 persoas menos. Pola contra, existen amplos servizos que están a ser privatizados por este goberno, principalmente no ámbito dos servizos públicos e sociais. Baste ver as numerosas licitacións levadas a cabo pola Consellería de Traballo para a xestión de centros sociais.

Son varios, os ámbitos que, principalmente, inciden negativamente no noso entorno:

Por unha banda, a reforma laboral levada a cabo polo goberno de Rajoy supuxo o maior ataque aos dereitos laborais dos traballadores/as, cunhas consecuencias nefastas.

Na reunión celebrada onte, recordáronse algunhas, que teñen incidencia tamén no eido das contratacións públicas:

  • Devaluación salarial.

  • Un aumento das contratacións a tempo parcial. Máis da metade dos traballadores/as galegos a tempo parcial, non cobran nin o salario mínimo: o 55 % gana menos de 638 euros/mes.

Ademais, o que se denomina “postos de traballo equivalentes” , onde se ten en conta tanto o número de persoas que traballan como o tempo de duración de tal traballo, segundo datos da propia contabilidade estatal, no que respecta a Galicia, diminuíu o número de horas traballadas en relación ao ano anterior.

Pese a tales datos, algúns están a defender – sen rubor –  que Galicia saíu xa da crise.

En suma: peores condicións salariais e precarización laboral.No ámbito da lexislación administrativa, reseñar que, o PP  aprobou a lei de calidade dos servizos públicos e da boa administración. Nesta norma, incluíanse os servizos prestados de xeito indirecto e contratados a empresas privadas.

Esta realidade afecta de forma singular á provincia de Ourense. Os ourensáns e ourensás  xa non se apuntan ao paro, senón que optan pola emigración a outros lugares de España ou ao estranxeiro, temos un saldo demográfico negativo que aboca a esta provincia a unha crise permanente. Esta é a radiografía dunha provincia en grave retroceso e abandono polas Administracións Públicas gobernadas polo PP: Xunta, Goberno Central e Deputación Provincial.

INCUMPLIRON TODAS AS SÚAS PROMESAS CON OURENSE:

  • SUBA DE IMPOSTOS: IRPF

  • COPAGO FARMACÉUTICO E SANITARIO (ORTOPEDIA, AMBULANCIAS, ETC.)

  • DESPEDIMENTO DE MÉDICOS, PERSONAL SANITARIO E PROFESORES

  • PECHE DE CENTROS EDUCATIVOS E AULAS

  • CONXELACIÓN DAS PENSIÓNS

  • RETRASO INXUSTIFICADO DA CHEGADA DO AVE

  • EMPRESAS FANTASMAS COCHES ELÉCTRICOS, XAMÓNS, PATACAS FRITIDAS, CIDADE DO MOTOR…)

Déronlle A PUNTILLA Á PROVINCIA CUNHA NOVA LEI DE REFORMA DA ADMINISTRACIÓN LOCAL, QUE LLE QUITA COMPETENCIAS E SERVIZOS AOS CONCELLOS PARA DARLLOS Á DEPUTACIÓN. ESTA LEI SIGNIFICA A PRÁCTICA DESAPARICIÓN DOS CONCELLOS DA PROVINCIA (ningún agás a capital sobrepasa os 20.000 habitantes) E A ASUNCIÓN POLA DEPUTACIÓN DOS SERVIZOS PÚBLICOS.

PÓDESE AFIRMAR CON ROTUNDIDADE QUE AS NOVAS LEIS E A POLÍTICA DA XUNTA E DO GOBERNO CENTRAL XOGAN A FAVOR DO DESEQUILIBRIO TERRITORIAL, CONDENANDO Á PROVINCIA DE OURENSE A SER A RESERVA RURAL DE GALICIA.

En resume, os e as deputadas socialistas imos  traballar de forma insistente en acadar para esta provincia e a súa capital melloras no seu desenvolvemento, a través de propostas reais

  • PLAN DE EMPREGO:

BOLSAS/CONTRATO PARA A MOCIDADE

CONTRATOS PARA MULLERES

  • PULO AO CRECEMENTO:

PLAN EMPRENDEMENTO: EMPRESAS INNOVADORAS

PLAN EMPRENDEMENTO MEDIO RURAL: INICIATIVAS EMPRESARIAIS QUE CREEN EMPREGO NO MEDIO RURAL

PLAN EMPRENDEMENTO ECONOMÍA SOCIAL: EMPRESAS DE SERVIZOS SOCIAIS

  • PULO Á INNOVACIÓN NOS SECTORES ESTRATÉXICOS:

Madeira/Forestal, Viño, Sector agrogandeiro, Sector Termal.

O PSOE de Xinzo denuncia verquidos de augas fecais procedentes da canceira municipal que xestiona a Deputación Provincial.

16/04/2016
By

A Deputación Provincial, encargada da xestión da Canceira de Xinzo, permite a contaminación das augas, con residuos procedentes da instalación que só ten 3 anos de funcionamento.

As augas  fecais va parar a cuneta directamente, por carecer de rede de saneamento ou por falta de limpeza da fosa séptica.

O Grupo Municipal socialista denuncia a grave contaminación que se está provocar a causa das augas fecais procedentes da canceira municipal que, dende o 2014, xestiona a Deputación Provincial.

Una obra que custou 132.296 euros, financiada pola Consellería de Medio  Ambiente, foi acondicionada con posterioridade pola propia Deputación de Ourense,  cando pasou a formar parte da rede de canceiras provinciais, por carecer de espazos para sala de curas, entre outras deficiencias. Aínda así, segue a ter graves problemas, pois verte as augas sen depurar directamente á cuneta que vai paralela a pista de Mosteiro e que entronca coa OU-301.

“O alcalde de Xinzo, Antonio Pérez, non pode permitir que se estea contaminando o entorno polas deficiencias dunha instalación  como a canceira municipal, que xa comezou con mal pé, pois  contaba con persoal antes de ter cans” di Elvira Lama, Portavoz municipal e Deputada provincial por Xinzo.

“A acumulación de augas fecais procedentes dunha instalación onde se tratan animais con medicamentos, ademais de non estar permitida, é altamente contaminante para o entorno e mesmo para a saúde das persoas se entra en contacto con algún acuífero. Non se pode permitir que unha instalación nova con apenas tres anos de funcionamento estea a contaminar o entorno por desidia da propia Deputación Provincial coa permisividade do Concello” di a portavoz socialista.

O Grupo municipal socialista vén de rexistrar un escrito solicitándolle ao Alcalde que “esixa da Deputación provincial, a inmediata conexión á rede de saneamento mais próxima ou a limpeza, con maior frecuencia, da fosa séptica da mencionada canceira”

“De non ser así verémonos obrigados a facer as denuncias pertinentes ante as autoridades competentes”, manifestan dende o Grupo Socialista.

IMG_3751

O Comité Provincial do PSdeG aproba, por unanimidade, unha resolución na que insta á celebración dun Congreso Nacional Galego que dote de dirección ao partido.

09/04/2016
By

IMG_6003

NA MESMA PROPOSTA DE RESOLUCIÓN, CONDÉASE A ACTITUDE DE CONFRONTACIÓN DOS DIRIXENTES DO PARTIDO POPULAR DE OURENSE COS REPRESENTANTES INSTITUCIONAIS DO PSdeG-PSOE, NOMEADAMENTE OS ATAQUES RECIBIDOS POLO GRUPO PROVINCIAL SOCIALISTA E O SEU VOCEIRO.

DO MESMO XEITO, PROCEDEUSE AO NOMEAMENTO DE ÉRIKA PAZ, CONCELLEIRA DO CARBALLIÑO, PARA A COMISIÓN DE CONTROL ECONÓMICO.

 

Ourense, 9 de Abril de 2016. O Comité Provincial do PSdeG-PSOE da provincia de Ourense, máximo órgano de dirección entre congresos, considera que o noso país, Galicia, precisa urxentemente dun cambio de rumbo que recupere as políticas para as persoas. As políticas do Partido popular de Feijóo tiveron un efecto devastador sobre a economía, a demografía e, sobre todo, o benestar dos galegos e galegas. Por isto, o Comité provincial de Ourense, considera que o partido socialista debe preparase para ofrecer a Galicia un proxecto político forte, profundamente galeguista e progresista; que represente o mellor do capital humano do PSdeG, que aúne todas as sensibilidades territoriais e represente, de xeito equilibrado, tanto o interior coma a costa, o mundo urbán e o rural, así coma as vilas, pobos e ciudades. De xeito que, tal como declarou Raúl Fernández, trátase dunha necesidade urxente que se convoque un Congreso que sexa capaz de construír unha dirección política e, a partires de aí, escoller ás mellores persoas para encabezar o goberno de Galicia e construír unha alternativa progresista para o noso país, tal como fixo o partido socialista ata o de agora, amosando a dispoñibilidade para liderar o futuro.

O Secretario Xeral provincial, na súa intervención, tamén se referiu á necesidade de frear a sangría demográfica que afecta a Galicia: “Galicia é, hoxe, un país máis envellecido, con menos poboación e con maís persoas desempregadas e sen prestacións sociais que cando Núñez Feijóo, asumiu o goberno da Xunta. Ourense é unha provincia na que se exemplifica de maneira diáfana, o resultado do goberno do Partido Popular, perdendo poboación e coa xente moza emigrando para atopar un futuro lonxe das súas familias. Por isto, o PSOE é hoxe máis necesario ca nunca, as políticas de Rajoy e de Feijóo, son prexudiciais para a cidadanía, minguando a súa calidade de vida. España precisa dun goberno de esquerdas liderado polo PSOE e Galicia tamén. De facto, Galicia, precisa dun novo pulo que só será modernizador e garantista dos dereitos das persoas, se o lideramos os e as socialistas para reconstruír os vimbios dun país que ten recursos para saír desta resignación á que o PP nos levou”.

Así mesmo, Raúl Fernández, tamén quixo resaltar o apoio unánime do Comité Provincial do PSdeG-PSOE de Ourense ante os ataques indiscriminados por parte do PP de Ourense cara aos representantes institucionais do partido socialista, tanto aos Alcaldes e Alcaldesas, concelleiros e concelleiras e, nomeadamente, ao Grupo Provincial Socialista e ao seu Voceiro.

Neste mesmo Comité aprobouse o orzamento de 2015 e a proposta de orzamento para 2016. No punto de nomeamentos cúbrese o posto correspondente á Comisión de control económico na persoa de Érika Paz Rodriguez, concelleira do Carballiño.

 

 

O Grupo Provincial Socialista presenta unha Moción para que a Deputación, tome as medidas axeitadas para manter as condicións de seguridade e uso da redes viarias provincial e local, afectadas polas obras do AVE.

30/03/2016
By

O Grupo Provincial Socialista, presentou unha moción para someter a debate no vindeiro Pleno da Deputación, este Xoves 31 de Marzo,destinada a que se tomen as medidas axeitadas por parte da institución provincial, en aras de que se protexa a rede viaria de Ourense ante os numerosos danos ocasionados polas obras do AVE. Na mencionada moción, instase a que a Deputación adopte as oportunas disposicións para que as estradas da Rede Viaria Provincial se manteñan nas condicións adecuadas de uso e seguridade mentres duren as obras de construción da alta velocidade ferroviaria.

 

Así mesmo, os socialistas coidan que é imprescindible que se cree unha Comisión Técnica de seguimento do estado e actuacións a levar a cabo na rede viaria provincial afectada con representantes do Ministerio de Fomento e da Deputación Provincial. E que, unha vez se vaia deixando de traballar nos diferentes tramos, se vaian executando as melloras nas estradas utilizadas polas empresas construtoras conforme ós requerimentos feitos polos servizos técnicos desta institución.

Do mesmo xeito, o Grupo Socialista, considera que se deben adoptar, exactamente, as mesmas medidas para coa rede viaria local, posto que as obras da alta velocidade están afectando ao tránsito e á seguridade en numerosos Concellos da nosa provincia.

 

Por outra banda, o Voceiro do Grupo Provincial Socialista, Nacho Gómez, considera que a Ministra de Fomento, Ana Pastor, está a actuar nesta cuestión dun xeito superficial. Recorda, o Voceiro, que na derradeira visita da Ministra ás obras, o pasado 21 de Marzo, ésta culpou ás construtoras dos danos causados e prometeu que serán estas empresas as que van correr cos custos das obras de reparación acometidas pola propia ADIF. Dende o Grupo Socialista, entenden que se debe esixir responsabilidade ás construtoras pero que o Estado e as administracións competentes non poden quedar de brazos cruzados coma ata o de agora. Non é de recibo que Ana Pastor acuda, unha e outra vez, a mirar o estado das obras e os prexuízos ocasionados, namentres se saca a foto de promoción e non se toman medidas inmediatas de reparación. Deixar pasar o tempo só vai a empeorar o estado e a seguridade das estradas provinciais e locais de Ourense e privar aos veciños e veciñas dos Concellos afectados dun uso das mesmas nunhas condicións adecuadas que permitan o normal desenvolvemento da súa vida económica e diaria. O goberno do PP, debe garantir que se acometan esos arranxos e non agardar a que finalicen as obras ferroviarias e se corra o risco de que as empresas non se responsabilicen dos estragos causados.

 

Destaca, así mesmo, Nacho Gómez que é unha das principais obrigas da Deputación de Ourense; a de manter nas condicións axeitadas de seguridade e actualizar estas estradas ás novas demandas e necesidades, en troques, esta institución, considera, non o está a facer de xeito minimamente satisfactorio. Con frecuencia moitas actuacións de melloras no trazado, eliminando curvas ou ancheando a vía, quedan sen rematar por anos e soamente se atenden cando hai citas electorais.