Bande

Demandamos no Parlamento dous plans, de creación de emprego e de cooperación sanitaria, co Norte de Portugal

17/02/2016
By

Os Grupo Socialista no Parlamento galego demandou hoxe na cámara autonómica senllos plans de cooperación transfronteiriza, en materia de creación de emprego e de atención sanitaria, entre Galicia e o norte de Portugal, mediante a presentación de senllas proposicións, que foron rexeitadas polo PP.

A deputada pola nosa provincia Noela Blanco, manifestou, na presentación das dúas proposicións, o seu convencemento de que “as relacións co país luso deberían ser unha parte prioritaria na axenda de acción exterior deste goberno, mais nestes últimos anos é patente a falla de interese e de implicación amosada polo goberno de Feijóo en todo o referente a fortalece-las relacións co país veciño”, denunciando que “a posición do goberno galego en Europa é un paripé que se visualiza na ausencia do presidente da Xunta en Bruxelas, nun momento no que nas institucións europeas se están a tratar temas de especial relevancia para Galicia, como a situación na que se atopan os nosos sectores produtivos”.

Con relación á iniciativa sobre emprego, Blanco lembrou que a zona transfronteiriza, na que destaca o Sur da nosa provincia, “é a que sofre o maior incremento do desemprego en Galicia, máis do 70% dos vinteséis concellos superan a taxa media de paro”. Unha situación que comeza “a reverte-lo novo goberno socialista portugués en poucas semanas, ao que igual que ocorrera en España cando os socialistas cheguemos a presidencia do Goberno”.

Este plan de emprego debería de incidir de maneira urxente “na mocidade, onde se está a reproduci-lo fenómeno da emigración dos anos ‘70, na poboación con máis idade, presa en moitos casos dun desemprego de larga duración, e nas mulleres, xa que o paro feminino segue sendo superior ao masculino”. Xa que logo, para a nosa deputada, e tendo en conta “este marco de tremendas dificultades no mercado laboral, os socialistas consideramos que, de xeito urxente, se debe elaborar e poñer en marcha este plan, que deberá contar con dotación orzamentaria, para favorecer un mercado de traballo inclusivo na zona transfronteiriza, que axude a cohesión social e territorial da mesma”.

Con respecto á Sanidade, a iniciativa demandaba á Xunta “a elaboración, de maneira conxunta co Goberno portugués, e a presentación no Parlamento de Galicia para o seu debate e aprobación no prazo máximo de tres meses, dun plan estratéxico de cooperación transfronteiriza sanitaria, que terá, entre outros, como obxectivos, a eliminación das principais trabas burocráticas: a falta de transparencia e información sobre os procedementos e tratamentos en cada un dos Estados, a incerteza que existe sobre os pagos e reembolsos, e as dificultades no seguimento ou tratamentos posteriores”.

Caso de que tivera sido aprobado, este plan sería “pormenorizado”, contando “cun cronograma e identificación dous recursos financeiros e humanos”, onde se contemplaría a dotación orzamentaria que a Xunta destinaría ao mesmo, así como “as posibles axudas comunitarias”, informou Blanco.

PEPE BLANCO E A DEPUTADA MARIA QUINTAS APOIANDO A CANDIDATURA DO PSOE EN LOBIOS

17/05/2015
By

Ourense a 17 de maio. Mais de 200 persoas asistiron o mitin socialista do alcaldable Francisco Veloso acompañado pola candidatura e arroupado polo parlamentario Europeo e exministro de Fomento Pepe Blanco e a deputada autonómica e secretaria de organización María Quintas.
Recuperar Lobios é obxectivo primordial do PSOE nesta comarca.
O potencial endóxeno de Lobios o Parque Natural e as augas termais teñen que ser elementos de desenvolvemento fundamental así como un plan de emprego e un plan demográfico para recuperar e fixar poboación así como xerar emprego.

IMG-20150517-WA0012

IMG-20150517-WA0011

Seara reprocha ao Goberno central que non conteste no Congreso dos Deputados, pero vaia ao encoro d’As Conchas a “vender” actuacións “de atrezzo” que non solucionan o problema da súa contaminación

11/03/2015
By

A deputada socialista pola nosa provincia, Laura Seara, critica que “o PP case en pleno -delegado e subdelegado do Goberno, presidente da Deputación, delegado da Xunta, presidente da CHMS e alcaldes de Bande e Muíños- foi ao encoro d’As Conchas a facerse a foto e a ‘vender’ actuacións de atrezzo que non solucionan o problema de contaminación que sofre o encoro e o río Limia”.

Seara considera que “esta visita en masa de membros do PP ao encoro prodúcese trala denuncia que os socialistas fixemos no Congreso dos Deputados, hai apenas dúas semanas, sobre o problema de contaminación existente no val do Limia e a preocupación social por este asunto”, e critica que “vaian respondernos ao encoro d’As Conchas con atrezo, en lugar de facelo no Congreso” e que “as actuacións que o PP foi a ‘vender’ á zona -vestiarios, piscinas municipais e aparcadoiro- poden ser positivas como medidas turísticas e de ocio alternativas para o baño ante a contaminación no encoro, pero non solucionan o problema; e o verdadeiro problema é a contaminación difusa existente na bacía do Limia; unha contaminación que o propio Goberno recoñeceu en respostas parlamentarias pero á que non ofrece ningunha solución”.

Fronte a esa atitude, a deputada plantexa que “son necesarias actuacións urxentes de recuperación do sistema fluvial do río Limia, e non é suficiente coa instalación ‘dentro duns meses’ de tres illas vexetais no encoro, nin con dicir que as últimas análises non detectan cianobacterias”, xa que “as temperaturas baixas do inverno favorecen que non se vexan” as mesmas, pero estas “son acumulativas, e as altas temperaturas vindeiras poden provocar unha nova explosión” destes organismos, “como a xa sufrida na zona portuguesa do val no verán do ano pasado”.

Ente as actuacións necesarias, Seara sinala que o Goberno central “debe explicar cómo se resolverán os verquidos agrogandeiros”. Como solución, propón a posta en marcha de actuacións de boas prácticas agroambientais que apoien un equilibrio entre o desenvolvemento agrogandeiro e a sostibilidade ambiental. Así mesmo, a deputada defende que se habiliten subvencións aos produtores agrogandeiros da bisbarra, para que poidan adopta-las súas plantas e instalacións á sostibilidade ambiental.

Respecto da actuación anunciada polo PP sobre as piscinas municipais en Muíños, Seara pregunta ao Goberno central “se se realizarán con cargo ao proxecto de recuperación ambiental ‘Regenera Life’, cuxos fondos deben destinarse a soluciona-la contaminación, e non a ofrecer alternativas de baño”. Neste senso, a deputada engade que “ao PP lle gusta moito ir a anunciar inauguracións e obras, pero non ofrece solucións á contaminación no encoro e no río, e tampouco deixa claro aos veciños que non corren ningún perigo e que as augas están saneadas para uso agrícola, doméstico e de baño”. Seara resúmeo do seguinte xeito: “en ningún caso resolven a ameaza á saúde pública”.

Laura Seara pide ao novo ministro de Xustiza que manteña os partidos xudiciais

02/10/2014
By

Orense_-_Mapa_judicial

A deputada socialista no Congreso, Laura Seara, vén de rexistrar na Cámara baixa diversas iniciativas parlamentarias coas que lle pide ao novo ministro de Xustiza que manteña os partidos xudiciais en Galicia, nomeadamente na nosa provincia.

Seara desexa coñecer, tralo nomeamento de Rafael Catalá como titular de Xustiza, cal será a actuación deste Ministerio respecto de a desaparición dos partidos xudiciais, que está prevista nos anteproxectos de Lei Orgánica do Poder Xudicial e da de Planta e Demarcación Xudicial.

En concreto, pídelle a Catalá resposta sobre se manterá os oito partidos xudiciais que actualmente existen na nos provincia, se cada unha destas unidades xudiciais contarán coa figura de Xuíz, Secretario e funcionarios xudiciais con carácter fixo e permanente, e se os partidos xudiciais continuarán gozando de independencia ou serán considerados como sedes desprazadas dependentes do Tribunal de Instancia.

Seara sostén que “a proposta de modificación da demarcación e planta xudicial ten como único eixo rector, baixo o pretexto dun suposto aforro, a redución da Administración, orientada en última instancia ao desmantelamento do servizo público da Xustiza”.

Así, explica que a proposta “afirma que a implantación do novo modelo condiciona o gasto que as Administracións Públicas poidan realizar en mellora dos medios materiais ao servizo da Administración de Xustiza, sendo así que devandito gasto deberá localizarse nos edificios e instalacións que han de alberga-las sedes reflectidas na presente Lei e soamente nelas, que estarían só radicadas nas capitais de provincia”.

O anteproxecto de Lei prevé a creación de Tribunais de Instancia, de ámbito provincial, que asumirán todas as competencias actuais dos xulgados. Segundo a deputada, isto “provocará, practicamente, a desaparición dos partidos xudiciais e, con iso, de decenas de órganos xudiciais”.

Seara destaca que, se se mantén a lei de Planta Xudicial, tamén “se encarecerán os procesos e se provocará un grande prexuízo ao medio rural e a provincias como Ourense, na que os cidadáns terán grandes dificultades no acceso á Xustiza”.

Por iso, a deputada socialista esixe a Catalá “que aclare canto antes se desaparecerán ou non os partidos xudiciais”; e lembra que o seu antecesor, Gallardón, “veu no verán a Galicia a aplaca-los ánimos e contentar a Feijóo, pero todo apunta a que os partidos xudiciais se converterán en meras sedes”, considerando, xa que logo, “absolutamente necesario que o novo ministro explique os seus plans”.

Miguel Fidalgo pide que o Goberno central retire de tramitación a modificación da Lei de Demarcación e Planta Xudicial, que fai desaparece-los Partidos Xudiciais e Xulgados de Paz en tódalas comarcas da nosa provincia

27/09/2014
By

O noso senador ,Miguel Fidalgo, alédase do cese do ministro que xestionou importantes retrocesos en dereitos e liberdades que forman parte do sistema democrático, en nome da dereita máis retrógrada. Por iso considera que é o momento de retomar tódalas reformas xudiciais, e recolle-lo clamor dos colectivos de avogados, fiscais, traballadores da Xustiza, organizacións sindicais e partidos políticos.

Fidalgo coida que o PP debe retirar inmediatamente a lei que suprime os partidos xudiciais, e que afecta moi gravemente á nosa provincia, xa que supón a desaparición da estrutura actual nas comarcas de Ribeiro, Carballiño, A Limia, Verín, Valdeorras, Trives-Caldelas, Bande e Celanova. A iso hai que sumarlle a desaparición dos Xulgados de Paz e Rexistro actuais, pola súa privatización.

Fidalgo critica o cinismo de Feijóo, cómplice desta medida, que intenta despistar dicindo que se mantén o nome duns partidos xudiciais nos que desaparecen xuíces, secretarios, axentes e demais persoal, e deixa de celebrarse a actividade actual.

O senador anunciou novas preguntas, tal como suxeriron as plataformas en defensa dos partidos xudiciais, e informou de que presentará na Cámara Alta unha moción concreta en defensa de cada un dos partidos xudiciais que existen na provincia.

Fidalgo estima que a segunda lei que o PP debe derrogar é a Lei de Taxas aprobada, que está impedindo que os cidadáns sen recursos poidan defenderse ante as inxustizas que poidan sufrir. O PP divide a sociedade entre cidadáns con diñeiro, que teñen dereitos e cidadáns, e sen cartos, que non teñen dereitos.

Así mesmo, reclamou que se paralice a tramitación da modificación da Lei de Asistencia Gratuíta, que pon imposible a asistencia letrada de oficio para as persoas sen recursos, ademais de excluír a moitos colectivos e persoas ás que deixa sen a posibilidade de defende-los seus dereitos ante a Xustiza, prexudicando aos profesionais máis próximos e pequenos despachos de pobos e cidades.

En definitiva, o senador considera que este é o momento de parar este retroceso en liberdades e dereitos fundamentais para un estado democrático, tendo en conta as peticións dos colectivos e a sociedade civil.

Seara sinala que a desaparición dos partidos xudiciais foi a “crónica anunciada do golpe mortal á Xustiza”

09/04/2014
By

Spanish_gavel

A nosa deputada no Congreso, Laura Seara, lamenta que hoxe sexa xa realidade, nun anteproxecto de Lei, a desaparición dos partidos xudiciais. Este feito, unido ao “taxazo” xudicial, valóraos como unha “patada definitiva ao dereito dos cidadáns a tutélaa xudicial efectiva e a un acceso igual á Xustiza”.

Seara lembra que se trata “dunha crónica anunciada do golpe mortal á Xustiza”. Neste senso, incide en que “os socialistas xa advertimos hai dous anos” das intencións do Goberno central de “suprimi-los partidos xudiciais existentes para crear un único partido xudicial por provincia”. Porén, “o Goberno intentou realizar esta manobra, que atenta de novo contra os dereitos dos cidadáns, de forma velada; pero os socialistas levamos dende o 2012 avisando das verdadeiras intencións do PP, que lamentablemente por fin viron a luz”.

Lembra a compañeira que, tanto ela como outros deputados socialistas viñeron presentando no Congreso, desde hai dous anos, multitude de iniciativas parlamentarias solicitando ao Goberno central explicación sobre a desaparición dos partidos xudiciais. En tódalas respostas parlamentarias, “o Goberno escorreu o vulto, dicindo que só se trataba dun informe e non dunha proposta en firme”. Xa que logo, censura que mentiron e que hoxe a decisión xa estea no anteproxecto de Lei.

A deputada sinala que en varias cabeceiras de partidos xudiciais como Celanova, Ribadavia e Xinzo se fixeron mobilizacións por parte dos funcionarios, outros colectivos e cidadáns de a pé, contra a supresión de devanditos partidos, pero o Goberno central “negouno todo e esperou a agora asesta-lo golpe mortal”.

Seara explica que o anteproxecto do Goberno liquida os partidos xudiciais coa creación dos tribunais “provinciais de instancia”, que serán os que asumirán as competencias actuais dos xulgados e en todos os órganos xurisdiccionais. “O ámbito territorial deses novos tribunais será provincial, desaparecendo así a práctica totalidade dos partidos xudiciais e, con iso, decenas de órganos xudiciais”. Esta situación “provocará situacións paradoxais, como as de Santiago, que sendo a capital de Galicia podería quedar desposuída de órganos xudiciais que agora teñen sé nesa cidade, ou a da de Vigo, que non tería a sé” da súa provincia.

Resalta tamén a compañeira que, respecto de Galicia, e especialmente a Ourense, polas súas especiais características de ruralidade, e dispersión e envellecemento poboacionais, a supresión dos partidos xudiciais supoñerá un total afastamento dos cidadáns á Xustiza, que só a verán “de lonxe”.

“Trátase dun ataque brutal, outro máis, por parte do Goberno do PP, a dereitos fundamentais dos cidadáns, neste caso á Xustiza, que ven como perden o dereito a unha Educación publica gratuíta e de calidade, dereitos en Sanidade, o dereito ao emprego e, en moitos casos ata a unha vivenda digna, e tamén o dereito á Xustiza; un retallo continuo de dereitos e liberdades que é o sinal de identidade do Goberno do PP de Rajoy”, lamenta.

O incendio do Xurés evidencia a ausencia de planificación territorial e a inoperatividade da Xunta na loita contra o lume, incluso en inverno

13/12/2013
By

A nosa deputada no Congreso, Laura Seara, lamenta o novo incendio producido no Parque Natural do Xurés, e pide “que o Goberno Central e a Xunta de Galicia aborden dunha vez un Plan de Recuperación Integral deste Parque, que está declarado como Lugar de Interese Comunitario” (LIC).

A deputada xa rexistrou en xuño do pasado ano no Congreso unha Proposición non de Lei neste senso, coincidindo con outro incendio que entón xa arrasara os montes do Parque Natural así como espazos do mesmo de gran interese paisaxístico e alto valor medioambiental.

Na devandita Proposición non de Lei, Seara solicitou “que o Goberno, de acordo coa Xunta de Galicia, dispoña dos medios técnicos, humanos e económicos necesarios para aborda-la recuperación integral do Parque Natural de Baixa Limia-Serra do Xurés”. Así mesmo, a Seara tamén presentou dende entón unha enmenda aos sucesivos Orzamentos Xerais do Estado para dotar económicamente con 350 000€ esta actuación; enmenda que foi rexeitada sistemáticamente polo PP.

Ante este novo incendio, a deputada ourensá apunta que “este Parque Natural, situado na provincia de Ourense, leva décadas sufrindo o lume e os efectos que este provoca, cada ano no inverno e no verán, deixando a estampa dun desastre ecolóxico cuxas consecuencias son graves tanto para o propio Parque Natural como para os homes e mulleres que o habitan”.

Por iso, incide en que “é absolutamente necesaria a urxente implicación do Goberno Central e da Xunta de Galicia nunha actuación de recuperación integral deste espazo natural, na que tamén deben colabora-los concellos implicados”

Así mesmo, a deputada critica o feito de que o goberno non lle respostase a diversas parlamentarias que ela realizou respecto ao convenio asinado entre Feijóo e Cañete no mes de maio do 2012, baixo a Lei 45/2007 para o Desenvolvemento Sostíbel do Medio Rural, que estableceu un calendario de tres anos co obxectivo de investir 170 millóns de euros en zonas depriminadas ou pouco desenvolvidas. “Unha das accións contempladas no devandito convenio é a de investimentos nos municipios da zona integrados na Reserva Mundial da Biosfera Xurés-Gerês (Lobios, Entrimo, Muiños, Lobeira, Calvos de Randín e Bande), por un total de 1 500 000 euros”, hembra Seara para engadir que o Goberno debe respostar sobre qué actuacións se desenvolveron con cargo a esta partida.

Apunta a compañeira que “o do Xurés non é castigo dos deuses; arde cada ano porque se cometen os mesmos erros cada ano: non se fan tarefas de prevención e non se apoian nin se desenvolven as accións previstas para o Parque e para as poboacións que están dentro do Parque”. “O Goberno non pode mirar para outro lado ante un Parque Natural que é reserva da biosfera transfronteriza xunto ao Parque Nacional Peneda Gerês” portugués, reclama.

Pola súa banda, o voceiro de Medio Rural do Grupo Socialista, Pablo García, ven de afirmar que as máis de 300 hectáreas queimadas no Xurés” (un dos espacios considerados como unha das xoias medio ambientais de Galicia), “corrobora a imposibilidade de atallar de forma efectiva a lacra dos incendios forestais e a actividade incendiaria, sen unha verdadeira política de prevención e de xestión do noso territorio”.

O parlamentario socialista esperaba que, “cando menos, naquelas áreas que, de forma teórica, contan con unha protección especial como é o Parque do Xurés”, se contaría con medios. Porén, vemos cómo as condicións de protección do Parque Natural son vulneradas reiteradamente na práctica sen que se tome ningún tipo de medida especial que o evite.

A situación de frío intenso e ausencia de humidade, a actividade incendiaria sempre perseguíbel, o forte vento… “non deberían ser argumentos suficientes para que, no mes de decembro, cun índice de incendios moi pequeno, poidan queimarse 300 hectáreas dun parque natural” denuncia o parlamentario socialista.

A razón de tal feito atopouna García na “concepción de Parque Natural que ten esta Xunta, que é a de que, por ser Parque Natural, non temos que facer ningún tipo de xestión, non temos nin sequera que voltar por aló ata que dentro de catro ou cinco anos lle toque volver a arder”.

Reitera García que a responsabilidade do Goberno non é a de que se inicie un incendio, “pero si debe asumir responsabilidades  de non ser capaz de atallalo nun tempo razoábel”. Pablo García vai máis aló do número de efectivos que se poidan desprazar (“que parece que neste caso foron escasos nos primeiros momentos”, tal como corroboran os alcaldes da zona), e fai fincapé en que os efectivos non son operativos sen unha mínima xestión do terreo”.

Censura o compañeiro as palabras dos responsables da Xunta de Galicia desprazados á zona, xa que a única explicación que deron aos veciños que, unha vez máis, tiveron que defender as súas aldeas coas súas mans e cos seus  medios, era que “vixíen e denuncien”.

O deputado anunciou que PSdeG solicitará a comparecencia da Conselleira de Medio Rural no Parlamento para que dea unha explicación dos feitos acontecidos, así como do traballo que se desenvolve no operativo de Prevención e de Extinción de Incendios nos meses de inverno.

Os socialistas esiximos explicacións pola denegación de axudas aos afectados polos lumes que se produciron antes de xuño na nosa provincia

29/12/2012
By


A deputada ourensá no Parlamento galego Carmen Acuña, rexistrou no mesmo unha iniciativa na que esixe explicacións ao goberno de Feijóo sobre denegación de axudas aos afectados pola vaga de lumes que se produciron antes do mes de xuño.

Acuña explica que ven de coñecer que o goberno central só contempla axudas para palia-los danos producidos nos lumes se estes se produciron a partir do mes de xuño, e advirte que esta decisión do PP “prexudica, e moito, a Galicia, xa que tres dos máis grandes lumes do ano 2012 se produciron na nosa terra e antes desa data: Fragas do Eume, Xurés e Carballeda de Avia (os dous últimos na nosa provincia).

Por elo, o Grupo Parlamentario Socialista quere obter respostas ás seguintes cuestións: “cómo contempla o goberno galego as axudas aos afectados polo incendio do agosto pasado na comarca de Valdeorras, qué contía van ter esas axudas, cales son as condicións para acceder a elas, cantos afectados cree o goberno que se poderán beneficiar das mesmas, e cando poderán acceder a elas, se as axudas virán do goberno da Xunta de Galicia ou do goberno do Estado, a canto estima o goberno que ascenden as perdas, e qué infraestruturas e instalacións de titularidade municipal resultaron afectadas”, entre outras.