Ourense

Seara denuncia que o Ministerio do Interior non executou “nin o un por cento” dos orzamentos do 2014 para Galicia

14/11/2014
By

A nosa deputada no Congreso, Laura Seara, denunciou onte, na comparecencia do Secretario Xeral de Institucións Penitenciarias, Ángel Yuste, na Comisión de Interior do Congreso dos Deputados, que o Goberno central “non executou nin un céntimo do pouco que orzamentou no 2014 para actuacións en Galicia” relacionadas con ámbito de Interior

Durante a súa intervención, Seara realizou un pormenorizado repaso da falta de execución orzamentaria por parte do Goberno central nas actuacións no eido do Ministerio do Interior en Galicia para o 2014, e sinalou que todo constitúe “un catálogo de promesas incumplidas”.

Así, a deputada sinalou que, segundo diversas respostas parlamentarias do Goberno central á propia Seara, o investimento do Goberno no 2014 para a Dirección Xeral da Policía consistía “nunha cantidade mínima”, 184 000€ para dez actuacións menores, e que “o propio Goberno central recoñece que non executaron, do orzamento do 2014, actuacións por 102 000€, e que tamén faltan por executar outras dezaseis actuacións previstas, para as que nin sequera sinalaron orzamento”. A este respecto, lembrou que “estamos en novembro e non fixeron nada”.

No que se refire ao orzamento para a Garda Civil, Seara incidiu en que “os datos ofrecidos polo Goberno central son opacos, pero o máis grave é que non fixeron ren, tampouco verbo dos 2,3 millóns de euros que orzamentaron para o 2014 en obras de mellora e mantemento”.

A compañeira proseguir a súa enumeración constatando que, “en canto a Institucións Penitenciarias tampouco fixeron ren: orzamentaron 93 000€ para actuacións en catro centros penitenciarios, e tiñan previstas outras actuacións sen sequera consignación” orzamentaria, e non hai executado “nada de nada”, excepto nalgúns cursos de formación.

En concreto, verbo do cárcere de Pereiro, a deputada preguntoulle a Yuste “¿u-los dous millóns de euros que anunciou vostede o ano pasado para o centro penitenciario de Pereiro de Aguiar?; o ano pasado vostede dixo que investían máis de dous millóns de euros para seguridade e salubridade nese centro e, a día de hoxe, mes de novembro, nin un céntimo gastaron nesta institución penitenciaria”, reprochoulle. “Seguen a se amortiza-las prazas de funcionarios, non hai reposición de mobiliario e ata hoxe nin sequera puxeron a calefacción; e casualmente foi hoxe ao mediodía, antes desta comparecencia do Secretario Xeral, cando encenderon a calefacción”.

Tamén se referiu Seara ao “serio problema de saúde pública respecto de os verquidos deste centro penitenciario”, reprobando que “malia que orzamentaron 600 000€ para unha nova Estación Depuradora de Augas Residuaus en Pereiro, e que o Goberno sostivera no 2013, en resposta parlamentaria” á propia deputada, que “o proxecto estaba redactado, a nova EDAR segue sen funcionar”.

A compañeira tamén demandou outras melloras moi necesarias no ámbito do Ministerio, entre elas as relacionadas con:

- o mal estado dos vehículos dos que dispoñen tanto Policía como Garda civil en Galicia.

- a “absoluta necesidade de novos cuarteis” en varias localidades galegas, entre elas Castro Caldelas

- a necesidade de Unidades de Prevención e Reacción (UPRs) na nosa provincia e nas de Pontevedra e Lugo

- o número de efectivos, xa que “en Galicia é un clamor popular o problema da falta de efectivos policiais pola insuficiencia na taxa de reposición das xubilacións, o cal contribúe ao aumento, por exemplo, dos roubos no campo, así como á diminución da seguridade, tanto dos cidadáns como dos propios funcionarios policiais”

E sobre a atitude do comparecente, Seara recriminoulle que “non respostase a nada”, limitándose a “vir a ler un papel; e para iso puido vir un Xefe de Sección”.

Seara pide a Pastor “que se deixe de visitas electoralistas ás obras do AVE e execute as partidas orzamentarias”, e reprocha a Feijóo que “só aplauda”

13/10/2014
By

Perante a visita da ministra de Fomento Ana Pastor, a obras do AVE hoxe n’A Gudiña, a deputada socialista pola nosa provincia, Laura Seara, pídelle “que se deixe de visitas electoralistas e execute as partidas orzamentarias que pinta artificiosamente nos orzamentos xerais do Estado para o AVE a Galicia”.

Seara denuncia que, “a pesar de múltiples iniciativas parlamentarias dos socialistas, o Ministerio négase sistematicamente a ofrecer resposta sobre o grao real de execución orzamentaria das partidas do AVE a Galicia”, e advirte de que esta “opacidade e escurantismo non só é unha falta de respecto democrático e parlamentario, senón que, ademais, demostra que o Goberno central infla os orzamentos xerais do Estado para Ourense e para Galicia con partidas millonarias para o AVE que logo nunca executa”.

Unha mostra máis da falta de execución orzamentaria por parte do Goberno do PP, segundo sinala a deputada, é a ralentización que, durante todo o 2014, viñeron sufrindo as distintas obras do AVE na nosa provincia. Este punto foi denunciado tamén no Congreso dos Deputados o pasado mes de marzo pola propia Seara, con outra batería de iniciativas parlamentarias.

A teor das opacas respostas parlamentarias que ela mesma recibe sobre este asunto, Seara sinala que “todo fai temer que as cifras de execución das partidas orzamentarias non só non son as desexadas, senón que, ademais, están moi por baixo do que inicialmente pensabamos os socialistas”.

Neste senso, apunta que, respecto aos investimentos nas entidades do sector público empresarial (entre as que se encontra ADIF), o Goberno recoñece nos orzamentos xerais do Estado para o 2015, que só gastará 834 millóns de euros dos 1.127 millóns que orzamentou para o 2014, de xeito que, “do que presupostou o Goberno do PP para o 2014, recoñecen que non van a executar un 25%”, teméndonos os socialistas que esta falta execución sobre o presupostado poda alcanzar “mesmo o 40%”. Por iso, a deputada pediu a comparecencia de Pastor no Congreso dos Deputados para que explique con detalle o grao de execución das partidas orzamentarias do AVE a Galicia do último exercicio económico.

Para Seara, “de nada serve que a ministra visitase hoxe as obras do AVE n’A Gudiña, escenificando unha ‘feira de millóns presupostados’ ”, se logo non executa as partidas orzamentarias”, e pídelle que “resposte con claridade se construirá un AVE como Galicia merece, con dobre vía en tódolos tramos, e que explique con detalle a modificación de trazado que o Ministerio prevé no tramo Taboadela-Ourense”.

“Mentres tanto, en Galicia hai un Presidente, o Sr. Feijóo, que só sabe aplaudir”, remata a deputada.

Seara cualifica de “lamentábel”, o afán de Baltar por “colgarse a medalliña” pola decisión do Ministerio de Fomento de someter a nova información pública o tramo d’A Peroxa da A-76

02/07/2014
By

A nosa deputada no Congreso, Laura Seara, cualificou esta mañá de “lamentábel” o que considera “un desmedido afán de Manuel Baltar por colgarse a medalliña” respecto da decisión adoptada polo Ministerio de Fomento de someter a nova información pública o tramo da autovía A-76 ao seu paso pola zona de Penalba.

O pasado 1 de abril, Seara pediu a comparecencia da ministra Pastor no Congreso e denunciou que o Ministerio elixira para o tramo d’A Peroxa da A-76, un trazado diferente aos previstos, que non fora sometido a alegacións nin a información pública. Apuntou xa entón que a alternativa finalmente elixida non se corresponde con ningunha das sometidas a información pública no 2008, e reprobou “a absoluta indefensión á que Fomento somete aos cidadáns afectados, ao non levar a cabo nova alternativa nin a información pública, nin a período de alegacións”.

Así mesmo, Seara criticou “as descaradas mentiras” do Ministerio nunha nota informativa distribuída pola Subdelegación de Goberno en Ourense o pasado 28 de abril, na que se afirmaba que o trazado elixido era un dos que sometera a información pública no 2008.

Ademais, Seara trasladou estas denuncias a unha pregunta oral no Congreso dos Deputados o pasado mes de maio. En resposta ás peticións da nosa deputada, o Secretario Xeral de Infraestructuras, Manuel Niño González, recoñeceu textualmente que “cando avancemos na redacción dos proxectos nese tramo, non descartamos unha nova información pública”.

Durante a súa intervención naquela pregunta oral, a compañeira denunciou o ocultismo do Ministerio, de xeito que “nin sequera o alcalde d’A Peroxa, do PP, sabía que a A-76 pasaría polo seu concello”. Así, sinalou que foi o voceiro municipal socialista n’A Peroxa, Antonio González Fiúza quen, no pleno municipal do 18 de setembro do 2013, advertiu ao alcalde do PP que a A-76 pasaría polo concello. Posteriormente, nun pleno municipal do 28 de novembro dese ano, o alcalde sostivo que o actual presidente da Comisión de Fomento do Congreso e deputado do PP pola nosa provincia, Celso Delgado, lle dixera que non se variaría o trazado da A-76 e que esta non pasaría pola Peroxa. “É incríbel” afirmou daquela Seara, e por iso solicitou entón a Niño González que arroxase “luz sobre este disparate”, na mesma Comisión de Fomento do Congreso.

A compañeira tamén esixiu no Congreso resposta sobre os motivos polos que o Ministerio decidiu non facer enlace en ningún punto do Concello d’A Peroxa coa A-76, e sobre qué criterios técnicos prevaleceron para determinar que dita autovía pasase por ese. Ademais, vén reclamando dende o 2012 a licitación urxente da A-76, trasladando ao Ministerio, no 2013, as demandas realizadas polos alcaldes das comarcas de Valdeorras, Lemos e o Bierzo, recalcando que a licitación desta autovía “é prioritaria, pero nada xustifica que o Ministerio non someta a información pública o trazado elixido, imposibilitando que os posibles prexudicados aleguen o que consideren necesario”.

Xa que logo, ante a nova decisión do Ministerio de levar a cabo a información pública preceptiva para o novo tramo elixido, a deputada celebra “que dean por fin os seus froitos as reiteradas denuncias dos socialistas pola intención de Fomento de aprobar un trazado sen información pública, e as reiteradas solicitudes dos socialistas” para que o Ministerio abrise “un novo período de alegacións”.

Con todo, critica que “a Baltar só lle interesa saír na foto, e non ten ningún escrúpulo para intentar arrogarse un mérito que, dende logo, non é seu”.

Ante as nosas denuncias, O Secretario Xeral de infraestruturas do Goberno central non desbota unha nova información pública para o tramo d’A Peroxa da autovía a Ponferrada

15/05/2014
By

A nosa deputada no Congreso realizou na Comisión de Fomento desa Cámara  Congreso unha pregunta oral ao Secretario Xeral de Infraestruturas, do Goberno central, na que denunciou que o Ministerio de Fomento elixiu para o tramo d’A Peroxa da autovía A-76 “un trazado diferente aos previstos, que non someteu a alegacións nin a información pública”.

Seara lembrou que “o que se someteu a información pública no 2008 foron oito alternativas, e ningunha delas se corresponde co trazado elixido agora” polo Ministerio, que, segundo se pode comprobar na publicación do estudo informativo do 14 de agosto do 2013, denominan “alternativa 9”, e que sería unha mestura das alternativas “2” e “4”.

Este feito, considera a deputada, “deixa en absoluta indefensión aos cidadáns afectados”, e por iso, pediu ao Secretario Xeral de Infraestruturas “a apertura dun espazo de alegacións para o tramo d’A Peroxa sen que iso produza a paralización do resto de licitacións”.

Ante a denuncia e a petición da deputada socialista, o Secretario Xeral negouse a recoñecer abertamente que o trazado elixido polo Ministerio é unha alternativa diferente pero, con todo, si recoñeceu textualmente que “cando avancemos na redacción dos proxectos nese tramo non descartamos unha nova información pública”.

A compañeira lembrou que, hai apenas dúas semanas, o Ministerio “mentiu descaradamente sobre este asunto” nunha nota informativa distribuída o 28 de abril pola Subdelegación de Goberno en Ourense, na que este “pretendía que ‘coase’ que o trazado elixido era un dos sometidos a información pública no 2008, e iso é absolutamente falso”.

Durante a súa intervención, Seara apuntou ao ocultismo de Fomento, de xeito que “nin sequera o alcalde d’A Peroxa, do PP, sabía que a A-76 pasaría polo seu concello”, lembrando que foi o portavoz socialista aló, Antonio González Fiuza quen, no pleno municipal do 18 de setembro do 2013 advertiu ao alcalde de que a A-76 pasaría polo concello. Posteriormente, nun pleno municipal do 28 de novembro de 2013, o alcalde sostivo que o actual Presidente da Comisión de Fomento do Congreso e deputado do PP, Celso Delgado, lle confirmara que non se variaría o trazado da A-76 e esta non pasaría polo concello d’A Peroxa. Para a compañeira, esto resulta “incríbel”, e por iso solicitou ao Secretario Xeral que esclarecese “este disparate” na devandita Comisión.

Con todo, Seara celebra que “por fin, o Goberno, a través do Secretario Xeral de Infraestruturas, recoñeza que existe a necesidade desa nova información pública”, e confía en que a resposta do Secretario Xeral de Infraestruturas “non sexa só para saír do paso e efectivamente así o fagan e deixen de mentir sobre este trazado”, lembrando tamén que “os socialistas sempre defendemos a necesidade da A-76 e, de feito, impulsámola”.

A deputada ten pedida a comparecencia no Congreso da ministra Ana Pastor para que explique o novo trazado elixido por Fomento, e rexistrou unha batería de iniciativas parlamentarias coas que esixe respostas sobre os motivos polos que o Ministerio decidiu non facer enlace en ningún punto do concello da Peroxa coa A-76, e qué criterios técnicos prevaleceron para determinar que dita autovía pase polo devandito concello.

A través de multitude de iniciativas parlamentarias, Seara vén reclamando, dende o 2012, a licitación urxente da A-76, trasladando incluso ao Ministerio, no 2013, as demandas realizadas polos alcaldes das comarcas de Valdeorras, Lemos e o Bierzo en relación coa mesma. “A licitación desta autovía é prioritaria, pero nada xustifica que o Ministerio non someta a información pública o trazado elixido, e imposibilite que os posibles prexudicados aleguen aquilo que consideren necesario”.

Área metropolitana e pobreza, temas tratados na nosa campaña hoxe en Barbadás

11/05/2014
By

IMG-20140511-WA006

Os socialistas de Barbadás, xunto cos deputados autonómicos Pachi Vazquez e María Quintas, e a Deputada no Congreso Laura Seara, reivindicaron ante a cidadanía d’A Valenzá, na visita que fixeron esta mañá, a importancia de Europa á hora de dar resposta ás áreas metropolitanas para que unifiquen servizos, transportes e que faciliten a calidade de vida da cidadanía. Barbadás é un claro exemplo no que os socialistas teñen reclamado a posta en marcha de esta área metropolitana que o PP rexeita sistemáticamente.

Ademáis, os compañeiros reflexionaron acerca dos graves problemas que xenera o nivel de desigualdade que hoxendía soportamos.

Para eles, a loita contra a desigualdade resulta crucial no só por razóns éticas, senón tamén porque garante a sustentabilidade do crecemento económico: está demostrado que a desigualdade dificulta a recuperación económica e a creación de emprego, nunha espiral perversa de empobrecemento xeneralizado.

Lembraron que o 24% da poboación total da Unión Europea (uns 120 millóns de persoas) está en risco de pobreza ou exclusión social, incluíndo o 27% nenos, o 20,5% dos maiores de 65 años e un 9% de persoas que, aínda tendo emprego, non poden cubrir gastos. E España é agora o segundo país da Unión Europea con maior desigualdade, e tamén o segundo con maior índice de pobreza infantil.

Neste senso, lembraron que o vindeiro 25 de maio decidimos se Europa continúa o camiño cara á desigualdade entre personas e países, cun crecente empobrecemento das clases medias, ou se dá un xiro para recupera-las políticas que cohesionan á sociedade e redistribúen riqueza.

Seara acusa ao Ministerio de Fomento de “mentir” sobre o trazado da A-76, no tramo d’A Peroxa

03/05/2014
By

A nosa deputada no Congreso, Laura Seara, denunciou que o Ministerio de Fomento, “minte descaradamente” nunha nota informativa distribuída pola Subdelegación do Goberno en Ourense verbo do trazado do proxecto de Autovía a Ponferrada (A-76) entre Os Peares e a cidade.

Seara afirma que “no tramo d’A Peroxa, Fomento elixiu un trazado diferente, que non someteu a alegacións nin a información pública”, polo que acusa ao Ministerio de “someter aos cidadáns afectados a unha absoluta indefensión”, e lembra que “o que se someteu a información pública no ano 2008 foron oito alternativas, e ningunha delas se corresponde co trazado elixido agora” polo Ministerio, que é o que “segundo se pode comprobar na publicación do estudo informativo do 14 de agosto do 2013, denominan ‘alternativa 9’, e que sería unha mestura das alternativas ‘2’ e ‘4’ ”, sendo que “a alternativa elixida agora por Fomento é diferente, e deixa sen enlace ao concello d’A Peroxa”, polo que é necesario un novo período de alegacións para evita-lo desamparo dos afectados por este novo trazado da A-76, que a ministra Ana Pastor pretende coar pola porta de atrás”.

A situación resúmese, na práctica, en que, dende o Ministerio, “cunha nota informativa, pretenden agora facer coar que o trazado elixido é un dos sometidos a información pública no 2008; e isto é incerto”. A deputada engade tamén, como “proba deste ocultismo de Fomento” o feito de que “nin sequera o alcalde d’A Peroxa, que é do PP, coñecía os cambios do trazado da A-76, e estivo meses negando no pleno municipal que esta infraestrutura percorrese o municipio”.

Seara lembra que “os socialistas defendemos a necesidade da A-76; tanto que fomos quen a impulsamos”. Porén, “o que reclamamos ao Goberno do PP é que faga as cousas ben, que non deixe sen enlace ao concello da Peroxa, que dea información aos concellos afectados e, sobre todo, que cumpra coa posibilidade establecida de que os afectados poidan realizar alegacións”, como xa solicitaran no seu momento, a propia Seara o voceiro socialista no concello d’A Peroxa, Antonio González Fiuza.

A compañeira pediu a comparecencia no Congreso da ministra para que explique este novo trazado, e rexistrou unha batería de iniciativas parlamentarias coas que esixe resposta sobre os motivos polos que o Ministerio decidiu non facer enlace, en ningún punto do concello d’A Peroxa, coa futura A-76, e qué criterios técnicos prevaleceron para determinar que dita autovía atravese o devandito concello.

A través de multitude de iniciativas parlamentarias, Seara vén reclamando dende o 2012 a licitación urxente da A-76, trasladando incluso ao Ministerio, no 2013, as demandas realizadas polos alcaldes das comarcas de Valdeorras, Lemos e o Bierzo en relación coa autovía. A compañeira aclara, xa que logo, que “a licitación desta autovía é prioritaria, pero nada xustifica que o Ministerio non someta a información pública o trazado elixido, e imposibilite que os posibles prexudicados aleguen aquilo que consideren necesario”.

Seara pide que o goberno “priorice” a candidatura da Ribeira Sacra como Patrimonio da Humanidade entre as propostas españolas

12/03/2014
By

800px-Canóns_do_Sil._Ribas_de_Sil_e_Nogueira_de_Ramuín,_Galiza

O PSOE votou hoxe na Comisión de Cultura a favor dunha iniciativa do PP relativa á candidatura da Ribeira Sacra como Patrimonio da Humanidade, pero advertiulle a ese partido de que “o que piden na súa Proposición non de Lei está logrado dende o ano 1996”, e que “agora deben pedi-lo que toca: que a Xunta de Galicia se implique para impulsa-la candidatura, e que o Goberno de España a priorice de entre as vintesete candidaturas españolas que xa están na lista, como no seu día fixo coa Torre de Hércules”.

Seara explicou que “dende o PSOE sempre apoiamos, non só con palabras, senón con feitos a candidatura da Ribeira Sacra como Patrimonio da Humanidade, e por iso votamos hoxe a favor desta iniciativa, aínda que a mesma se centra en que dita candidatura sexa incluída na lista indicativa de Patrimonio Mundial, cando resulta que en dita lista está dende 16 de xullo de 1996”.

Neste sendo, Seara sinalou que o Goberno central lle respostou en novembro do 2013, nunha resposta parlamentaria, que a candidatura está incluída na lista dende 1996 e mostrou a súa contrariedade polo feito de que “o Goberno o saiba, pero o grupo popular non”. Ademais, apuntou que, tal e como se pode comprobar na web de UNESCO, na lista provisional revisada o dia 7 de febreiro de 2014, aparece a candidatura da Ribeira Sacra.

Por iso, indicoulle ao PP que “o que debería pedi-lo Grupo Popular é que o Goberno de España ‘priorice’ a candidatura da Ribeira Sacra” e que “a Xunta impulse a candidatura que formalizaron as Deputacións de Lugo e Ourense, a nivel estatal, realizando as xestións ante os organismos competentes para que o Goberno de España a priorice e a impulse definitivamente, como se fixo coa Torre de Hércules d’A Coruña”.

Durante a súa intervención, a compañeira puxo en valor “a excepcional riqueza paisaxística, ambiental e patrimonial da Ribeira Sacra” e destacou que “é un territorio de peculiaridades únicas en Europa”. Por iso, lembrou que “a proposta da súa candidatura a Patrimonio da Humanidade é tan relevante como antiga no tempo”, e instou ao PP, especialmente na Deputación de Ourense, a que non lles mova o interese de levarse os galóns, e traballen de xeito serio para que dita candidatura sexa pronto unha realidade”.

Aclaracións sobre a situación urbanística de certos inmobles na cidade

05/02/2014
By

Fronte á campaña alarmista distribuída polo PP entre parte dos habitantes da capital, con técnicas de propaganda impropias dun partido político coma ese, que da por certas esaxeradas suposicións sobre as consecuencias do estatus urbanístico de “Fóra de ordenación” para algunhas das plantas superiores de determinados edificios da cidade, o Grupo Municipal Socialista presentará, para evitar futuras operacións de confusionismo semellantes (como a tamén levada a cabo polo PP no seu día na cidade d’A Coruña), unha moción no senso de que, na nova Lei do Solo de Galicia, actualmente en tramitación, se recolla unha definición clarificadora para a devandita clasificación urbanística, semellante á doutras Comunidades Autónomas, e que comprenda só aos inmobles para os que estea prevista a súa desaparición dun determinado prazo, sen misturalos con aqueles para os que só se pretende impedir, no caso dunha futura re-edificación no mesmo solar, que se lle dese ao novo edificio, máis alturas das que, segundo o seu entorno, lle corresponden.

Tamén se aclara dende o Grupo Socialista no Concello da capital:

-   Que os responsables urbanísticos da Xunta están amosando neste tema unha atitude responsábel moi distinta á do Grupo do PP.

- Que a solución non pode ser a de permitir que, nos solares nos que nalgún momento se chegou a construir un edificio con alturas desatinadas, se poidan re-construir, no seu reemprazo, e polos séculos dos séculos, novos edificios con semellante incoherencia urbanística, pois, entre outras cousas, esa desordenación xeneraría unha avalancha de recursos lexítimos de cidadáns terceiros, que poderían levar a unha nova, e non menos calamitosa, anulación da ordenación urbanística da cidade.

- Que, en contra do insinuado polo voceiro do PP ( http://www.laregion.es/opinion/19869/258/ ) en ningún caso a limitación de obras ás de conservación, afecta aos inmobles en chan rústico.

- Que, a título ilustrativo, no PXOM anterior, aprobado polo PP, tamén había certo número de inmobles coa mesma caracterización, como é normal, sen que ninguén se excitase por tan moderada caución urbanística:

Cabezas

O PP rexeitou tódalas enmendas socialistas para a nosa provincia

13/11/2013
By

A nosa deputada no Congreso, Laura Seara, lamenta que “un ano máis, o PP rexeite tódalas enmendas para Ourense do Grupo Socialista, deixando así fóra dos Orzamentos do Estado proxectos que son prioritarios para a provincia”.

Seara sinala que “as enmendas dos socialistas para Ourense pretendían palia-la marxinación á que o PP somete sistematicamente á provincia, e conseguir un maior equilibrio territorial da mesma, dotándoa de servizos e infraestruturas que son esenciais”. As corenta e dúas aportacións do noso Partido para a provincia, presentadas por Laura Seara, pedían un aumento do orzamento estatal para a provincia de máis de 45 millóns de euros, para proxectos que consideramos prioritarios.

Así, coas súas enmendas Seara pediu, por exemplo millón e medio de euros para a estación intermodal da cidade, seis millóns para a conexión de Alta Velocidade Ourense-Vigo, dous para a conexión de AVE Ourense-Lugo, un para o tramo Ourense-Monforte da autovía A-76, cincocentos mil euros para o tramo Ourense-Enlace de Cambeo na A-56, outros tantos para a circunvalación Norte de Ourense, e un millón de euros para a mellora da seguridade vial da N-525, o que, segundo apunta a compañeita, “é un verdadeiro clamor na provincia”.

Ademais, a deputada solicitou incrementa-las contas estatais para a provincia en medio millón de euros para o cambio de titularidade da N-120 no tramo do Boulevard Termal, trescentos mil euros para reactiva-lo Plan Estratéxico Termal de Ourense, máis de dous millóns setecentos mil euros para a recuperación dos ríos Miño, Támega e Limia, e un millón trescentos mil euros para a modernización dos regadíos da comarca da Limia.

Verbo da modernización de regadíos da Limia, Seara denunciou que o Goberno do PP eliminou os vintesete millóns de euros que presupostara no seu día o Goberno do PSOE.

No que se refire a proxectos culturais, a deputada reclamou maior consignación para, entre outros proxectos, a rehabilitación dos castelos de Monterrei e Ribadavia, e a restauración da catedral de Ourense e de diversos mosteiros da provincia.

A compañeira defende que “a aprobación destas enmendas é necesaria para impulsa-lo desenvolvemento económico e social da provincia e, xa que logo, deben sen ser asumibles polo PP e o Goberno”. Porén, constatou que “nin as enmendas de infraestruturas, nin as de vivenda, nin as agricultura e Medio Ambiente, nin as de cultura, para Ourense, nin tampouco para Galicia, atoparon o apoio do PP”.

Especialmente grave, considera Seara o rexeitamento do PP á nosa proposta de investir vinte millóns de euros nun Plan de prevención de incendios e rexeneración forestal para Galicia, do que se beneficiaría en gran parte a provincia de Ourense, xa que “para Galicia, e especialmente para Ourense, é necesaria unha política integral de prevención de incendios, cunha partida económica específica do Estado”.

Seara lembra que xa “hai tempo que os ourensáns só vemos as costas do PP, cunhas contas do Estado para Ourense que se inflan artificiosamente con investimentos para o AVE que non executan”.

Seara e Quintas denuncian “o severo castigo” do Goberno central e da Xunta á nosa provincia e reclaman a súa implicación urxente nun plan de viabilidade para T-Solar que inclúa o mantemento dos postos de traballo

11/07/2013
By

As nosas deputada no Congreso e Sª de Organización Provincial, Laura Seara e María Quintas, denunciaron esta mañá en rolda de prensa o “maltrato” que a nosa provincia está a sufrir por parte dos Gobernos de Galicia e de España, e reclamaron que, nun prazo de dez días, a Xunta, “como administración competente” inicie un plan de viabilidadee de xeito conxunto cos representantes da empresa T-Solar, tódolos accionistas e os representantes dos traballadores, solicitan que o Estado impulse a mesa de diálogo para a posta en marcha de devandito plan.

Así mesmo, piden ao Estado e á Xunta de Galicia que realicen tódalas xestións necesarias para que nun novo escenario para a empresa, ou na súa posible venda, se priorice o mantemento de tódolos postos de traballo na planta de T-Solar en Ourense. Para iso, rexistraron hoxe mesmo no Congreso e no Parlamento de Galicia senllas Proposicións non de Lei.

Seara sostivo que “Ourense está sufrindo un castigo severo por parte dos Gobernos de Galicia e de España, que no único que rivalizan é nos recortes e no maltrato a esta provincia”. Como proba, citou os 109 098 ourensáns afectados pola decisión do Goberno de non revaloriza-las pensións, os 9,6 millóns de euros que deixarán de recibi-los pensionistas da provincia, e os 266 expedientes de FOGASA sen resolver en Ourense.

Tamén lembrou a paralización das infraestructuras na provincia e a “a farsa” que o Goberno e a Ministra Pastor protagonizan respecto ao AVE a Galicia. “Tapian os túneles máis avanzados nos tramos de Ourense, dinlle ás empresas que nos tramos máis atrasados prioricen unha única vía, encargan un informe onde propoñen suprimi-la dobre vía, as empresas constructoras do AVE reducen persoal”, e Pastor di onte no Senado que todo vai segundo os previsto”. “Segundo o previsto por ela e o PP desde fai tempo que é privar a Galicia e a Ourense dun AVE de primeira” “ incide a nosa deputada, quen pediu a comparecencia urxente no Congreso da Ministra Pastor e do Secretario de Estado de Infraestructuras.

“Nin unha soa iniciativa en máis de catro anos de Feijóo e ano e medio de Rajoy en favor de Ourense”, resumiu; engadindo que “Rajoy treme ante Bárcenas, pero saca peito fronte a Ourense e Galicia, condenándoas a un futuro tan negro como os cuartos do seu partido; e Feijóo, está sendo o seu lazarillo”, acusándoos de non moveren “nin un dedo, non só para crear emprego e empresas senón tampouco para evitar que pechen as que xa existen, como T-Solar”.

A compañeira denunciou “a actitude de deixamento e pasotismo do Goberno” respecto de dita empresa, cuxos traballadores se pecharon para evita-lo desmantelamento da súa planta de gases á espera de que se materialice un comprador que permita a reactivación da planta, lembrando que “os principais acreedores de T-Solar son as Administracións públicas, entre elas o Estado”, sendo unha empresa “á que se destinaron recursos públicos, e o Goberno ten a obrigación de ofrecer solucións”. Así, lembrou a subvención de 6,4 millóns de euros do Ministerio de Economía no 2007, 2,6 millóns de euros que aportou no 2008 o Ministerio de Educación e Ciencia nunha liña de investigación, e dous préstamos do Ministerio de Industria de case 7 millóns de euros.

A compañeira pediu hai xa máis dun mes ao Goberno central, a través dunha batería de iniciativas parlamentarias, que estudase un plan de viabilidade que fixese posible a continuidade da empresa, así como o mantemento do emprego dos seus cento setenta traballadores. Seara advertiu xa entón da “obriga” e “a responsabilidade que ten o Estado para evita-la peche de T-Solar e a conseguinte perda de máis postos de traballo que afondase aínda máis na crítica situación de desemprego” que sufrimos, e solicitou ao Executivo “accións de urxencia” para tal fin; aínda que “lamentábelmente o Goberno non fixo ren”.

Pola súa banda, María Quintas sostivo que T-Solar é unha empresa creada co apoio das Administracións e da Xunta, e lembrou que “o Goberno de Galicia é competente en materia de Traballo e de Industria”, polo que aludiu á responsabilidade da Xunta para dotar dun plan de viabilidade á empresa. Amosou tamén o seu apoio aos traballadores, e considerou que coa perda de T-Solar non só se perdería unha empresa punteira a nivel internacional e irían á rúa os seus cento setenta traballadores, senón que tamén quedarían afectadas, en total, unhas “novecentas persoas”.

Por iso realizou un chamamento a toda a sociedade ourensá, tamén aos Medios de Comunicación, para apoia-la continuidade da empresa, e incidiu en que a mesma non debe venderse “a cachos”, reivindicando en que os traballadores formen parte das negociacións da posíbel venda, co propósito de mante-los postos de traballo.