Celanova

O PSOE de Ramirás agradece aos veciños a unión amosada para deter as intencións de “ABanca” de pechar a oficina de Villavidal

15/03/2017
By

Isabel Gil, Portavoz socialista, está segura que só a presión veciñal puido acadar que se manteñan as condicións de apertura actuais

Os socialistas denuncian a actitude escurantista do Alcalde, quen se apresou a desconvocar a mobilización prevista pese a non ter a confirmación por escrito dos directivos da entidade

 

Ourense, 14 de marzo de 2017. Dende o PSOE de Ramirás consideran que o escurantismo co que o alcalde está a levar toda a cuestión da redución de atención ó público da oficina de “ABanca”, indica que xa tiña acordado ceder nas condicións de apertura. Co remate, onte pola mañá, dunha nova xuntanza con directivos da entidade bancaria, quedou máis en evidencia, se cabe, a pouca gana do alcalde de estar xunto ao seu pobo reivindicando o mantemento do servizo. Tal como relata a Portavoz socialista en Ramirás, Isabel Gil, a pesares de que nesa reunión non se adquiriu un compromiso firme, xa que quedou pendente de confirmar por escrito por parte dos directivos do banco; ó alcalde faltoulle tempo para desconvocar a manifestación prevista. O que se deduce de toda a actitude amosada polo alcalde popular de Ramirás é que non ten a valentía suficiente para defender, pase o que pase, os intereses dos veciños e veciñas do concello que preside.

A falta de información e transparencia por parte deste goberno é tanta que os representantes socialistas se tiveron que enterar por outras fontes, da desmobilización, antes de que o Alcalde dese a cara. Todo apunta a que as boas intencións de actuar conxuntamente neste tema de defensa dun servizo fundamental para a cidadanía, quedaron en nada. Tal como lembra Isabel Gil, “Xa dende o inicio do problema tivemos a sospeita de que o Alcalde prefería que nada se soubese e negociar el cos do banco e ceder sen que houbese mobilización cidadá. Canto menos ruído mellor para non ter que dar a cara polo pobo que goberna” . Sen embargo, as circunstancias foron desfavorables para o rexedor posto que os socialistas lideraron a iniciativa de rexeitamento do peche que pretendía “ABanca” e non tivo máis remedio que unirse para non quedar mal. Tanto Pleno Extraordinario coma as medidas de presión acordadas foron iniciativa do PSOE de Ramirás e non van claudicar ante o que pode ser unha tentativa de acalar a protesta dos veciños e veciñas.

Polo momento, os socialistas queren agradecerlle a todas as veciñas e veciños do concello, aos mozos que fixeron súa a protesta en redes sociais e a todas as persoas que se mobilizaron, todo o esforzo realizado posto que están seguros de que a entidade bancaria non desistiría da súa intención de peche senón fose pola presión cidadá. De momento, dende o PSOE indican que só teñen a confirmación de que se vai manter o servizo tal cal está (5 días á semana e unha tarde) ata dentro de 3 ou 4 meses, que se van reunir de novo para avaliar a situación. Esta medida provisional fai pensar que as intencións da entidade bancaria non mudaron pero que, polo momento, non van levar adiante a redución ou peche da oficina de Villavidal. Por isto, dende o Grupo Municipal Socialista de Ramirás anuncian que van estar vixiantes e á expectativa do que aconteza nos vindeiros meses, fiscalizando a cuestión e asegurándose que non hai a máis mínima modificación no acordado. Os socialistas queren deixar claro que non van escatimar en accións se ao final, dende a entidade bancaria, non cumpren coa súa palabra.

Para o PSOE de Ramirás e para a súa Portavoz esta cuestión é fundamental por varias razóns, non só pola estrutura poboacional do concello, avellentado e rural, senón pola supervivencia dos negocios e empresas do municipio e o desenvolvemento económico presente e futuro de Ramirás. Por outra banda, Isabel Gil tamén quere sinalar que o Bloque, terceira forza política na Corporación, non pode ser cómplice de quen queira acalar a cuestión, é dicir, do Alcalde, quen goberna en minoría. É fundamental que o socio nacionalista de goberno do PP en Ramirás, que tanto din defender os servizos no rural galego, tomen parte polos intereses do pobo que os escolleu como representantes.

Para finalizar, Gil, quen tamén é deputada provincial pola comarca, quere que Baltar non agoche a cabeza ante esta problemática xa que se supón que é a súa obriga defender os servizos no rural dos concellos aos que ten que prestar asistencia e axuda. Tal como está configurada a provincia, coa existencia de numerosos concellos pequenos e eminentemente rurais, a existencia da institución provincial só se xustifica se destina parte do seu cuantioso orzamento a asistir, apoiar e axudar a estas entidades, defendendo a pervivencia dos servizos públicos que se prestan á cidadanía.

O PSdeG-PSOE e a corporación de Ramirás impulsan unha manifestación o 14 de marzo para reclamarlle a ABanca que manteña a oficina nas condicións actuais

10/03/2017
By

A voceira socialista, Isabel Gil, participou nunha xuntanza con directivos da entidade, na que seguen mantendo o recorte de días de atención ao público pese á movilización cidadá de rexeitamento

Dende a entidade indicaron que o vindeiro 17 de marzo porán en marcha a redución que afecta a un servizo fundamental para a veciñanza e negocios

 

2017-03-08-PHOTO-00000772 (1)

 

Ourense, 9 de marzo de 2017. O PSdeG-PSOE de Ramirás, coa súa portavoz á fronte, vén de participar nunha reunión cos directores provincial e de zona de Abanca, para tratar a cuestión da redución de apertura da súa oficina no municipio. Dita xuntanza foi unha das accións acordadas pola corporación de Ramirás co obxectivo de manter o servizo nas condicións actuais, despois da mobilización cidadá que provocou a celebración dun pleno extraordinario solicitado polo Grupo Municipal Socialista, facéndose eco da alarma social xerada polo anuncio da entidade. Tanto nese pleno como no celebrado con posterioridade, acordouse que se ían facer todas as accións necesarias para asegurar que a oficina abra todos os días, tal como viña sendo ata agora.

Nembargante, tal como relata a voceira Isabel Gil, nin a recollida de sinaturas nin os contactos realizados logran deter as intencións de Abanca, posto que os seus responsables lle anunciaron onte que ían por en marcha o novo horario, coa apertura de tan só dous días á semana, o vindeiro 17 de marzo. Aos representantes da cidadanía de Ramirás non lle quedou outra que convocar unha manifestación o martes 14 de marzo, ás 11:30, en Villavidal, para reclamar o mantemento do servizo bancario.

Os socialistas de Ramirás entenden que á entidade bancaria “non lle importan as necesidades dos habitantes do concello e só pensan no seu beneficio empresarial, que pasa polo necesario recorte de persoal”. “O mantemento do servizo non é un capricho da xente de Ramirás; é apostar polo futuro do noso concello. As persoas, nun concello rural coma o noso, aproveitan o día que van facer as súas xestións bancarias para facer compras ou utilizar outros servizos”, recorda Gil. “As PEMES só terán opcións de seguir cos seus negocios se teñen un servizo bancario para os seus trámites”, advirte.

“Trátase de apostar polo desenvolvemento económico dun municipio discriminado respecto doutros da contorna, onde, nalgún caso, hai menos habitantes e sen embargo si que lle manteñen a apertura das sucursais”, relata Gil. A edil do PSdeG-psoe anuncioulle aos directivos do banco que están a “menosprezar” aos veciños e veciñas de Ramirás e que, dende o Grupo Municipal Socialista, van loitar para que se respecten os seus dereitos.

Ademais engade que a manifestación só é unha das accións programadas, posto que non van deixar que a entidade “se saia coa súa” e vanse cumprir todos os acordos plenarios, tales coma elevar a cuestión ao resto das administracións , ata que Abanca rectifique. Os socialistas son conscientes dos “métodos de persuasión” da entidade bancaria coas súas grandes contas pero non poden exercer esta discriminación sen que a veciñanza tome cartas no asunto. Dende o Grupo Municipal Socialista de Ramirás agardan unha numerosa asistencia á manifestación convocada e autorizada, onde se repartirán folletos informativos, posto que esta redución de horario está a causar unha grande preocupación entre a poboación do municipio.

 

O PSdeG de Ramirás ve satisfeita a súa esixencia de rexeitamento municipal ao peche dunha oficina bancaria

16/02/2017
By

O grupo socialista de Ramirás acadou onte a unanimidade do pleno do Concello para defende-la permanencia dunha oficina de Abanca no municipio. Ante a inacción do Alcalde e do PP, que non fixeron ren ata que os socialistas se puxeron do lado dos veciños, indignados coa decisión de bota-lo cadeado á sucursal, e tralas numerosísimas queixas por este novo ataque ós servizos no rural, os socialistas de Ramirás reclamaron a celebración dun pleno extraordinario do Concello.

Grazas á iniciativa dos socialistas de Ramirás, no pleno aprobouse un punto único que vai encamiñado a exercer tódalas accións que sexan necesarias, empregando tódolos recursos dispoñibles, para mante-lo servizo da oficina bancaria no pobo, evitando desprazamentos innecesarios para os veciños. Ademais, acordouse que se establezan contactos con todas as Administracións (Xunta, Deputación), o envío de solicitudes a tódolos organismos competentes, e a recollida de sinaturas de tódolos afectados por esta decisión.

Dende o Grupo Municipal Socialista lembran que este peche non só afecta aos particulares senón tamén ás Pemes, empresas e negocios radicados en Ramirás que fan os seus trámites nesta sucursal bancaria, polo que o peche lles ocasionaría un grave prexuízo, ao teren que desprazarse a face-las súas xestións a outras localidades, coa perda de atractivo que iso supón á hora da implantación de novos negocios. Xa que logo, os responsables do peche teñen que ter en conta o prexuízo que supón, para o seu negocio, que importantes activos financeiros marchen para outras entidades.

Os compañeiros membros do Grupo Municipal Socialista cren que a decisión de Abanca –que finalmente optou por abri-la oficina do número 43 da estrada de Villavidal unicamente dous días a semana– segue a supor o que, na argumentación que aportaron ao solicitaren, no seu día, a convocatoria deste pleno, xa definían como “un grave prexuízo, xa que a veciñanza terase que desprazar a outras localidades para face-las súas xestións bancarias pare ser atendida de xeito presencial”, nun territorio cunha “estrutura poboacional con idades moi avanzadas, e deficiente acceso a Internet”, que “dificultan moito a realización de trámites” on-line

Os socialistas consideramos que “os veciños e veciñas de Ramirás merecen atención personalizada”, e que, en xeral, coa perda deste tipo de servizos só se afonda na perda de calidade de vida, o que se traduce nunha perda continuada de poboación, facendo que os pobos esmorezan. A política do Alcalde de Ramirás só fai que se perpetúe esta agonía. Tamén lembran que Abanca é unha entidade bancaria “rescatada” no 2011 con 9000 millóns de euros públicos.

Tódalas persoas interesadas en asinar contra o peche poderán facelo na propia casa do Concello de Ramirás, xa que, grazas ao liderado dos socialistas, toda a Corporación se comprometeu a facer todo o que sexa posíbel para deter este agravio á veciñanza. A pesares da inacción do Alcalde, que sabía do peche dende hai meses, a mobilización dos veciños fixo posíbel que se adoptase unha postura común contra da perda dun servizo fundamental.

Dende o Grupo Municipal Socialista demándase ao Alcalde que abandone a pasividade e indolencia das que fixo gala durante todo este proceso, se faga responsábel dos desafíos que ten que afrontar Ramirás, e defenda os intereses dos veciños. Vén sendo hora de que asuma o mandato que lle foi encomendado e dea a cara polos veciños e veciñas do concello de Ramirás.

A Agrupación Socialista de Ramirás denuncia perante a Garda Civil que lle racharon as faixas de propaganda electoral que colocaron con motivo das eleccións autonómicas.

18/09/2016
By

2016-09-12-PHOTO-00000252

A Agrupación Socialista de Ramirás, vén de denunciar, no día de onte, perante a Garda Civil, uns feitos que atentan, segundo o seu criterio, contra a liberdade democrática. O pasado 12 de setembro, os membros da agrupación caeron na conta que as faixas que colocaran nas marxes da estrada OU-531, aproximadamente á altura dos quilómetros 35 e 37,5, estaban rachadas no que parece unha acción, claramente, intencionada. Así pois, en virtude da defensa dos seus dereitos democráticos e da liberdade á hora de pedir o voto para o Partido Socialista, dende a Agrupación de Ramirás consideran que se debe por en coñecemento das autoridades estes feitos deleznables. A denuncia foi interposta contra autor ou autores descoñecidos, confiando en que aparezan os culpables posto que o Concello é pequeno e non parece complicado que se saiba quen pode ter animadversión contra o Partido Socialista, que, puido gobernar o Concello nas pasadas municipais .

Os membros da Agrupación Socialista confían no labor das forzas da autoridade á hora de descubrir ao/aos culpables de tal desfeita que, ademais, dun custo económico de reposición, ten un custo moral para as persoas con ideoloxía socialista. Non é de recibo, relatan dende a Agrupación, que nestes tempos de democracia se lle falte ao respecto a unhas das liberdades que máis custou acadar na sociedade española: a de voto. Hai formas ben máis democráticas de confrontar as distintas ideas políticas que non sexa atentando contra os bens e a propaganda electoral dun partido legalmente constituído, con tantos anos de historia e que exerce o seu dereito a pedir voto en todos os recunchos da nosa provincia nos que queren facer chegar o seu ideario de xustiza social. Vindo da historia que vimos, como pobo, de 40 anos de represión fascista, é incrible que a día de hoxe, aínda exista xente que pretende amordazar as diferenzas ideolóxicas pola brava. En aras da defensa da liberdade de expresión e do dereito a pedir o voto, os socialistas de Ramirás confían en que este feo asunto se resolva e impida que ningunha forza política teña que sufrir a mesma agresión.

A deputada provincial socialista, Isabel Gil, aproveita a visita de Eloína Núñez ao centro de saúde de Celanova, para esixirlle que adquira o compromiso de ampliación do PAC, pola que levan agardando 15 anos.

08/09/2016
By

A deputada provincial polo partido xudicial de Celanova e portavoz socialista en Ramirás, Isabel Gil, tivo a oportunidade, exercendo a súa profesión como médico de familia no Centro de Saúde de Celanova de reivindicar as carencias ante a Xerente de Xestión Integrada de Ourense, Verín e Valdeorras, Eloína Núñez, na visita que está fixo ao ambulatorio da localidade, onte pola mañá. A curmá de Feijóo e máxima responsable do SERGAS na provincia de Ourense, acudiu ao centro de saúde de Celanova, nunha visita de claro corte electoralista, acompañada polo Alcalde do municipio e mais polo responsable de Recursos Económicos da Xerencia da Xestión Integrada de Ourense, Alberto Pedrera; nesta ocasión para, a escasos días do comezo da campaña electoral das autonómicas, dar os parabéns ás obras do teito que se están a realizar no centro.

Máis aló da clara intención de publicitar o traballo feito polo actual goberno da Xunta, do PP, nunha práctica cando menos sospeitosa pola acercamento da cita electoral; os e as sanitarios/as que desenvolven o seu labor no ambulatorio tiveron a ben achegarse a estes máximos responsables dos servizos de saúde en Ourense para facerlle chegar as súas xustas reclamacións de mellora do servizo que prestan e das instalacións nas que traballan.

Nesta ocasión, Isabel Gil, quen desempeña tarefas de medicina de familia así coma gardas e atención de urxencias, acompañou a varios compañeiros, que se achegaron a Eloína Núñez e lle fixeron saber que levan 15 anos agardando a que se solucione a precaria situación na que se atopa o PAC (Punto de Atención Continuada-urxencias) que atende a, nada menos, que 10 Concellos da contorna.

A doutora e deputada provincial explicoulle á xerente do SERGAS que acometen o seu labor nunhas condicións intolerables, sen salas de consultas habilitadas, tendo que atender aos enfermos que van a urxencias nas salas destinadas a raios X e a fisioterapia, sen que estean debidamente acondicionadas e habilitadas para elo. Os pacientes que acoden ao servizo de urxencias de Celanova teñen que soportar que se lles aplique un tratamento, como pode ser unha nebulización ou un soro, e agardar no corredor namentres os dous médicos e enfermeira do PAC, van atendendo a outros enfermos. Os sanitarios de Celanova din estar fartos desta embarazosa situación na que non se asegura a privacidade e intimidade do paciente ademais de non poder exercer o seu traballo nunhas mínimas condicións.

As consultas que empregan para urxencias non están dotadas nin do máis básico, como pode ser un lavabo ou un espazo de aplicación de tratamentos. Hai xa 15 anos que se reivindicou, por parte do persoal do centro de saúde, a ampliación do PAC e, neste tempo, o goberno galego non foi quen de cumprir con esta necesidade imperiosa. Isabel Gil, como afectada directa, fíxolle chegar esta petición a Eloína Núñez e instouna a que adquirira o compromiso dunha vez por todas. A deputada di que a xente está cansa de promesas baleiras e actos faltos de contido con intereses puramente electoralistas e que, na realidade, o partido que máis tempo leva ostentando o poder en Galicia e Ourense, o Partido Popular, non cumpra coas necesidades da cidadanía. Así mesmo, opina, que esta ampliación do PAC de Celanova, beneficiaría á propia xestión integrada de Ourense posto que, moitas veces, vense obrigados a derivar os casos a Ourense ante a ausencia de espazos habilitados para atender tratamentos e observacións. No caso de existiren estes espazos, dende Celanova, poderíase contribuír a desconxestionar o servizo de urxencias do CHUO, conclúe a deputada socialista.

Aproveitando a presenza do Alcalde e do xestor económico do SERGAS en Ourense, Isabel Gil tamén lles fixo chegar unha reivindicación histórica dos sanitarios que teñen que desempeñar o seu labor no centro de Celanova. Os médicos alí adscritos teñen que facer domicilios na vila e, moitas veces, deixan os aparcamentos libres e ao seu regreso xa están ocupados, obrigándoos a perder tempo procurando aparcamento. Así mesmo, cando van a atender nos fogares dos enfermos, teñen que deixar o vehículo mal aparcado ou en zonas non habilitadas e cargan coas conseguintes multas.

Tal como relata Isabel Gil, se tivesen unhas tarxetas de aparcamento, poderían desenvolver mellor o seu traballo sen preocuparse polo sitio ou as sancións. O labor que desempeñan nas atencións a domicilio é vital para a cidadanía e, polo tanto, as administracións local e autonómica deberían facilitar este traballo cos medios necesarios. O tema do aparcamento non só afecta aos doutores e doutoras senón a resto do persoal sanitario que traballa en Celanova e, nomeadamente, ao persoal das ambulancias. A falta de lugares e as propias características do centro, fan que teñan que aparcar os vehículos enriba da beirarrúa para poder atender, con prestancia, as emerxencias. O mesmo acontece cando acoden pacientes en cadeiras de rodas, tanto en vehículos privados coma nas ambulancias, ou ben os teñen que deixar na propia beirarrúa e ir procurar aparcamento ou teñen que subirse e facer un mal aparcamento.

Non é de recibo, reitera o persoal de Celanova, que se estean dando estas lamentables situacións e que os enfermos padezan as consecuencias, polo que demandan a habilitación inmediata de aparcamentos na zona, polo que reclaman o compromiso ineludible do Alcalde da localidade. Así mesmo, tal como lle trasladou a deputada provincial, é hora de que os servizos económicos do SERGAS teñan en conta as xustas reivindicacións dos médicos que fan domicilios e que precisan ver facilitados os seus desprazamentos.

O Portavoz do Grupo Provincial Socialista, Nacho Gómez, esixe responsabilidades a Pablo Pérez pola utilización do local da Mancomunidade Terras de Celanova, por parte da súa familia.

01/06/2016
By

NACHO GÓMEZ COIDA QUE A CIDADANÍA DE OURENSE DEBE SABER QUE GRAO DE IMPLICACIÓN TEN O DEPUTADO DO PP NA CONCESIÓN DE SUBVENCIÓNS A UNHA ENTIDADE PRESIDIDA POLO SEU PROPIO PAI.

 

O ENTRAMADO FAMILIAR QUE CONFORMA A FAMILIA DO DEPUTADO PÉREZ, LEVANTA SOSPEITAS SOBRE O APROVEITAMENTO QUE FAN DOS RECURSOS PÚBLICOS.

 

O Portavoz do Grupo Provincial Socialista, Nacho Gómez, esixe que se coñeza o grao de implicación do deputado provincial, Pablo Pérez, na concesións de subvencións á Mancomunidade Terras de Celanova, que o seu pai preside. Así mesmo, considera que Pablo Pérez, en canto coordinador da cooperación con Concellos e Mancomunidades da Deputación de Ourense, debe asumir responsabilidades pola utilización privada que fixo a súa familia do Centro ocupacional da Fundación para a Protección dos Minusválidos Terras de Celanova, dirixido por seu irmán e que pertence á Mancomunidade que preside seu propio pai, Alcalde de Quintela de Leirado.

 

O Grupo Socialista na Deputación, considera imprescindible, xa que logo, que o Presidente investigado, José M. Baltar e mailo seu Deputado provincial, o señor Pérez, deben respostar inmediatamente ao grao de implicación que ten o propio Pablo Pérez, nos procedementos de concesión de subvencións á Mancomunidade Terras de Celanova. Tamén esixen coñecer a relación de subvencións que lle foron concedidas a esta Mancomunidade dende o 2009, posto que os socialistas, son coñecedores de que receben cartos a esgalla da Deputación, moi por enriba doutras entidades e que, agardan, estean plenamente xustificadas.

 

O clan familiar do deputado do PP, polo tanto, estende as súas ramificación en torno a todo o relacionado coa Mancomunidade  e así, aparte do feito que o pai sexa Presidente, o irmán de Pablo Pérez é director do centro ocupacional do que fixeron uso privado ademais de traballador da propia Deputación de Ourense. A pesares de que, por desgraza, a sociedade ourensá está afeita a estes entramados familiares, o Grupo Provincial Socialista, esixe coñecer se hai incompatibilidade entre o cargo de director do centro ocupacional e o seu traballo na institución provincial. Deste xeito, solicitaron copia da solicitude de compatibilidade para exercer ambos traballos.

 

Así mesmo, dáse a circunstancia que o propio Pablo Pérez, é coordinador da Cooperación coas Mancomunidades, polo tanto, responsable, en última instancia do uso que se faga dos recursos adscritos ás mesmas e, máxime, se é a súa propia familia quen fai un uso inapropiado.

 

“A utilización desa Mancomunidade por parte desa familia, excede ata as actuacións ás que estamos tristemente acostumados nesta provincia. Aparte de usar a Mancomunidade como unha empresa de colocación dos membros desa familia, agora sabemos que empregan os locais e espazos públicos para actividades privadas”, declara Nacho Gómez.

 

Nacho Gómez, considera que Pablo Pérez, debe dimitir se ten responsabilidade sobre a mala utilización de espazos e recursos públicos para actividades da súa propia familia. Así mesmo, coida que toda a provincia, en particular, os veciños/as da Comarca deben coñecer as actuacións do pai do Deputado, en tanto que Presidente da entidade e do irmán, en tanto que director do centro ocupacional pertencente a esa mesma entidade.

 

Seara reclama ao Goberno central “que cumpra o que aprobou” e inicie coa Xunta os contactos necesarios para incluí-la capela de San Miguel de Celanova na lista de patrimonio europeo

19/11/2014
By

A nosa deputada no Congreso, Laura Seara, rexistrou na Cámara Baixa diversas iniciativas coas que solicita ao Goberno central que explique que actuacións puxo en marcha en relación coa capela mozárabe de San Miguel, en Celanova.

Seara lembra que o pasado mes de marzo, o Congreso dos Deputados aprobou unha Proposición Non de Lei do Grupo Socialista que instaba ao Ministerio de Educación, Cultura e Deporte a implicarse coas comunidades autónomas, para iniciaren os trámites necesarios para acada-la inclusión da arte mozárabe dentro da Lista de Patrimonio Europeo, así como ao Goberno central a apoia-la presentación desta candidatura ante a Comisión Europea. E tamén lembra a deputada que dita Proposición “destaca expresamente a importancia do mosteiro e a capela de San Miguel, en Celanova, como elemento da arquitectura mozárabe, e tamén no Concello de Celanova se aprobou, por unanimidade, unha moción neste mesmo senso”.

A capela de San Miguel se atopa dentro do Mosteiro de Celanova. Foi no ano 940 cando se levantou este oratorio de San Miguel como pequena hospedaría de peregrinos e memoria de Froila, o irmán de San Rosendo, que fixera a primeira dotación do mosteiro. Trátase, segundo tamén incide a compañeira “dun dos edificios relixiosos máis singulares de España, que se declarou Monumento nacional en 1923”.

Porén, Seara sinala que, malia o aprobado no Congreso e no concello de Celanova, “o Goberno non fixo ren, e a Xunta de Galicia tampouco”.

Por iso, coas novas iniciativas parlamentarias que vén de rexistrar, a deputada reclama ao Goberno central “que cumpra co aprobado” (co voto afirmativo do PP), e que “inicie dunha vez os contactos necesarios coa Xunta de Galicia para inclui-la arte mozárabe, e nomeadamente a capela de San Miguel de Celanova, na Lista de Patrimonio Europeo”.

Laura Seara pide ao novo ministro de Xustiza que manteña os partidos xudiciais

02/10/2014
By

Orense_-_Mapa_judicial

A deputada socialista no Congreso, Laura Seara, vén de rexistrar na Cámara baixa diversas iniciativas parlamentarias coas que lle pide ao novo ministro de Xustiza que manteña os partidos xudiciais en Galicia, nomeadamente na nosa provincia.

Seara desexa coñecer, tralo nomeamento de Rafael Catalá como titular de Xustiza, cal será a actuación deste Ministerio respecto de a desaparición dos partidos xudiciais, que está prevista nos anteproxectos de Lei Orgánica do Poder Xudicial e da de Planta e Demarcación Xudicial.

En concreto, pídelle a Catalá resposta sobre se manterá os oito partidos xudiciais que actualmente existen na nos provincia, se cada unha destas unidades xudiciais contarán coa figura de Xuíz, Secretario e funcionarios xudiciais con carácter fixo e permanente, e se os partidos xudiciais continuarán gozando de independencia ou serán considerados como sedes desprazadas dependentes do Tribunal de Instancia.

Seara sostén que “a proposta de modificación da demarcación e planta xudicial ten como único eixo rector, baixo o pretexto dun suposto aforro, a redución da Administración, orientada en última instancia ao desmantelamento do servizo público da Xustiza”.

Así, explica que a proposta “afirma que a implantación do novo modelo condiciona o gasto que as Administracións Públicas poidan realizar en mellora dos medios materiais ao servizo da Administración de Xustiza, sendo así que devandito gasto deberá localizarse nos edificios e instalacións que han de alberga-las sedes reflectidas na presente Lei e soamente nelas, que estarían só radicadas nas capitais de provincia”.

O anteproxecto de Lei prevé a creación de Tribunais de Instancia, de ámbito provincial, que asumirán todas as competencias actuais dos xulgados. Segundo a deputada, isto “provocará, practicamente, a desaparición dos partidos xudiciais e, con iso, de decenas de órganos xudiciais”.

Seara destaca que, se se mantén a lei de Planta Xudicial, tamén “se encarecerán os procesos e se provocará un grande prexuízo ao medio rural e a provincias como Ourense, na que os cidadáns terán grandes dificultades no acceso á Xustiza”.

Por iso, a deputada socialista esixe a Catalá “que aclare canto antes se desaparecerán ou non os partidos xudiciais”; e lembra que o seu antecesor, Gallardón, “veu no verán a Galicia a aplaca-los ánimos e contentar a Feijóo, pero todo apunta a que os partidos xudiciais se converterán en meras sedes”, considerando, xa que logo, “absolutamente necesario que o novo ministro explique os seus plans”.

Miguel Fidalgo pide que o Goberno central retire de tramitación a modificación da Lei de Demarcación e Planta Xudicial, que fai desaparece-los Partidos Xudiciais e Xulgados de Paz en tódalas comarcas da nosa provincia

27/09/2014
By

O noso senador ,Miguel Fidalgo, alédase do cese do ministro que xestionou importantes retrocesos en dereitos e liberdades que forman parte do sistema democrático, en nome da dereita máis retrógrada. Por iso considera que é o momento de retomar tódalas reformas xudiciais, e recolle-lo clamor dos colectivos de avogados, fiscais, traballadores da Xustiza, organizacións sindicais e partidos políticos.

Fidalgo coida que o PP debe retirar inmediatamente a lei que suprime os partidos xudiciais, e que afecta moi gravemente á nosa provincia, xa que supón a desaparición da estrutura actual nas comarcas de Ribeiro, Carballiño, A Limia, Verín, Valdeorras, Trives-Caldelas, Bande e Celanova. A iso hai que sumarlle a desaparición dos Xulgados de Paz e Rexistro actuais, pola súa privatización.

Fidalgo critica o cinismo de Feijóo, cómplice desta medida, que intenta despistar dicindo que se mantén o nome duns partidos xudiciais nos que desaparecen xuíces, secretarios, axentes e demais persoal, e deixa de celebrarse a actividade actual.

O senador anunciou novas preguntas, tal como suxeriron as plataformas en defensa dos partidos xudiciais, e informou de que presentará na Cámara Alta unha moción concreta en defensa de cada un dos partidos xudiciais que existen na provincia.

Fidalgo estima que a segunda lei que o PP debe derrogar é a Lei de Taxas aprobada, que está impedindo que os cidadáns sen recursos poidan defenderse ante as inxustizas que poidan sufrir. O PP divide a sociedade entre cidadáns con diñeiro, que teñen dereitos e cidadáns, e sen cartos, que non teñen dereitos.

Así mesmo, reclamou que se paralice a tramitación da modificación da Lei de Asistencia Gratuíta, que pon imposible a asistencia letrada de oficio para as persoas sen recursos, ademais de excluír a moitos colectivos e persoas ás que deixa sen a posibilidade de defende-los seus dereitos ante a Xustiza, prexudicando aos profesionais máis próximos e pequenos despachos de pobos e cidades.

En definitiva, o senador considera que este é o momento de parar este retroceso en liberdades e dereitos fundamentais para un estado democrático, tendo en conta as peticións dos colectivos e a sociedade civil.

Blanco demandará en Europa un IVE cultural reducido

18/05/2014
By

IMG-20140518-WA0000

O candidato do PSdeG-PSOE ao Parlamento Europeo, José Blanco, anunciou hoxe que traballará no Parlamento Europeo para que exista en Europa un IVE cultural reducido. Asegurou que impulsará iniciativas a prol da nosa cultura e “para que as nosas industrias culturais poidan medrar e crear emprego, e sexan un motor económico e de desenvolvemento”.

Blanco realizou esta mañá unha visita a Celanova, acompañado de Pachi Vázquez e cargos Partido. Na terra de Curros e de Celso Emilio Ferreiro demandou un “novo ceo”, evocando a Díaz Castro, que deixe atrás os retallos, a austeridade e o sufrimento.

No Día das Letras Galegas, dende a Torre de San Salvador de Celanova, restaurada con fondos do 1% cultural aportados na etapa do Goberno Socialista, asegurou que a “cultura e o patrimonio deben ocupar un lugar estratéxico” para Galicia, e afirmou que debemos “promover e reivindica-la nosa língua como vehículo de cultura”

Tamén tivo palabras para o candidato popular, Miguel Arias Cañete, ao avogar por “desterra-la cultura machista” que hai en España, e “nalgúns sectores”, pois a actitude mantida estes días por Arias Cañete “é a dun mal perdedor, que perdeu os papeis”. Demandoulle que rectifique e que pida desculpas “e senón o fai, as mulleres deben de rectificalo o 25 de maio”.