Verín

Seara pide no Congreso a declaración do Entroido de Xinzo como Festa de Interese Turístico Internacional

A deputada no Congreso pola nosa provincia, Laura Seara rexistrou unha Proposición Non de Lei na Cámara Baixa que insta ao Goberno central a, que unha vez cumpridos os requisitos da pertinente Orde Ministerial, declare ao Entroido de Xinzo de Limia como Festa de Interese Turístico Internacional, coa colaboración das administracións implicadas. a Proposición Non de Lei inclúe a petición do apoio do Congreso dos Deputados para dita declaración.

Seara sinala na súa Proposición que en Xinzo se empezaron xa os trámites para que o seu Entroido sexa declarado de Interese Turístico Internacional, apunta que esta declaración, de carácter honorífico, daría un empuxón a unha das festas máis antigas e simbólicas de Galicia e sostén que dita declaración suporía un revulsivo socioeconómico nunha provincia que precisa de medidas de acción positiva en todos os ámbitos e sectores de desenvolvemento

Indica a deputada socialista que o Entroido de Xinzo é unha festa ancestral, popular, que se celebra basicamente na rúa, e que ten no traxe da “Pantalla” o seu símbolo máis recoñecido e importante. “Vistoso e bailarín este personaxe alegre componse dunha peculiar e única careta artesanal que é sen dúbida unha máscara rodeada de misterio, dona e señora do Entroido de Xinzo” que, “xunto ao Peliqueiro e o Cigarrón” representan o carnaval de Galicia.

Precisamente, respecto ao Entroido galego, Seara lembra que, receentemente, en sé parlamentaria, o Grupo Socialista puxo de relevo a importancia do coñecido como “Triángulo Maxico do Entroido” da nosa provincia, que engloba os entroidos de Laza, Verín e Xinzo, tres “dos máis antigos e famosos de España e do mundo”.

Naquel debate, a deputada conseguiu arrincarlle ao Ministro de Industria o compromiso de que o Goberno central apoiaría a declaración do Entroido de Laza como de Interese Turístico Nacional, aínda que recoñecía que o Goberno non recibira ningún documento por parte do Concello desa localidade, que é quen é competente para impulsar dita declaración.

O Entroido de Xinzo de Limia, lembra a deputada, xa posúe a Declaración de Interese Turístico Nacional e agora “está en condicións de recibi-la categoría de Interese Turístico Internacional”. Para iso, desta vez, o concello de Xinzo de Limia iniciou os trámites necesarios, que deben ser continuados por parte da Xunta, para que, finalmente, o Goberno Central outorgue dita Declaración.

Por iso, Seara agarda que a esta Proposición Non de Lei do Grupo Socialista serva para contribuír a que o Entroido de Xinzo teña o recoñecemento que merece.

Demandamos a fin da transformación do castelo de Monterrei nun establecemento hosteleiro, e o PP, a través dunha voceira, so é capaz de mentir vergoñentamente

A nosa deputada no Congreso, Laura Seara defendeu esta tarde na Comisión de Cultura da Cámara Baixa unha Proposición Non de Lei coa que insta ao Goberno central a dirixirse á Xunta “para que paralice de xeito inmediato as obras de rehabilitación e adecuación para o acondicionamento como Parador do Castelo de Monterrei”, e a “poñer en marcha unha investigación sobre os danos que estas obras están a ocasionar no castelo”, trasladar a dita Cámara “os resultados de devandita investigación”, así como “a revoga-la Resolución do 1 de xullo do 2014 pola que a Dirección Xeral do Patrimonio do Estado acordou amplia-lo destino previsto na cesión á Xunta do Castelo de Monterrei e do seu recinto amurallado”.

Durante a súa intervención, Seara denunciou que “estamos ante unha operación escura e aberrante, deseñada pola Xunta co Goberno central de consentidor; un atropelo feito de costas a un pobo, para satisface-los caprichos do seu señor: un Presidente, Feijóo, co cargo subido á cabeza”.

A compañeira explicou que o castelo de Monterrei, que é monumento nacional dende 1931, foi cedido polo Goberno central á Xunta no 2009, establecéndose que o debía destinarse a usos culturais. Con todo, en febreiro deste ano Feijóo anunciou a construción dun Parador de Turismo de luxo no Castelo, malia que a só trescentos metros xa existe un Parador, que permanece pechado ao público por falta de clientela e de investimentos.

Xa no mes de xullo, segundo lembrou a deputada, e “para cumpri-los caprichos de Feijóo, a Dirección Xeral de Patrimonio acordou amplia-lo destino previsto na cesión á Xunta do castelo de Monterrei, para poder así transformalo nun hotel de luxo”. Este cambio de usos é para Seara “unha vergoña”, xa que “supón o saqueo dun ben público, co que se imposibilitan as enormes posibilidades de uso público dunha fortaleza que é emblema dunha grande comarca como Monterrei, o que causa a indignación de todos os veciños e axentes culturais”. Pero ademais, lembra Seara, “é un dispendio, nunhas circunstancias económicas como as actuais; máis nunha provincia como Ourense”.

Pero aínda engade a compañeira que “o que cheira peor é que as obras de construción do novo hotel de luxo no castelo comezaron no 2013, moito antes do anuncio de Feijóo e do cambio de usos do castelo, que logo aprobou o PP a través de Patrimonio, e que devandito proxecto comezou pagándose con Fondos FEDER” habilitados para “rehabilita-lo castelo, e non para construír un hotel nun monumento público; esto é ilegal”, denunciou.

Pola súa banda, a expresidenta provincial de Nuevas Generaciones del PP, representando a ese partido, xustificou o seu voto negativo á nosa proposta, mentindo sen vergoña, pero con total descaro, ao dicir que a Xunta presidida por Emilio Pérez Touriño tería planeado instalar vivendas no castelo, indignidade que foi desmentida por Seara asegurando que elo é “absolutamente falso”, e unha “mentira descarada” no Congreso dos Deputados. “¿Como é posíble ser tan mentirosa e retorta”, preguntouse Seara, quen lembrou que o planificado entón deixaba claro “o uso publico do castelo”, para o que se deseñara “un museo de fortalezas militares que convertería a Monterrei nun centro de referencia sobre a historia da arquitectura militar e das construcións defensivas”, elemento dinamizador ao que acompañaba a promoción do viño da D.O. Monterrei e das augas minerais da zona. A pérfida manipulación da exalcaldesa de Bande usou con descaro o feito de que dito plan do anterior Goberno da Xunta, incluía a restauración de casas abandonadas nun poboado preto do Castelo, o que non ten nada que ver con ningunha actuación parecida na propia fortaleza.

“A este paso imos ter que pedir no Congreso Comisións da Verdade”, expresou Seara ante o descaro da expresidenta provincial de Nuevas Generaciones del PP, cuxa “defensa do indefendíbel” só pode explicarse, para a nosa deputada, como xeito de “oculta-lo “sometemento do PP a intereses privados” dictados por Feijóo.

Seara reclama ante o Ministro de Industria e Turismo que o entroido de Laza sexa declarado de interese turístico nacional

A nosa deputada no Congreso, Laura Seara, realizou esta tarde na Comisión de Industria do da Cámara Baixa, unha pregunta oral ao Ministro José Manuel Soria, coa que reclamou que o entroido de Laza sexa declarado de Interese Turístico Nacional.

Seara lembrou que a nosa provincia “conta cun carnaval ancestral, mítico, tremendamente arraigado e de carácter popular, o ‘Entroido’, que cada ano atrae a miles de persoas de España e Europa“, e explicou que o Entroido “pivota en varias vilas e pobos da provincia, sendo o coñecido como ‘triángulo máxico’ o mellor expoñente”. Un triángulo que está formado polos entroidos de Xinzo (declarado de Interese Turístico Nacional en 1997) Verín (declarado así no 2009); e Laza, “que non conta con esta Declaración a día de hoxe”, tamén incidiu a deputada, e elo “malia ser un dos 10 máis antigos do mundo, e malia que haxa xa un ano que o concello aprobou de xeito unánime solicitar esta Declaración”.

Así mesmo, a compañeira defendeu que “esta declaración é necesaria non só en termos etnográficos e culturais senón tamén, en turísticos e socioeconómicos, para unha provincia como a nosa, que presenta un dos índices de despoboamento e envellecemento máis altos de Europa, e precisa de estímulos sobre elementos de desenvolvemento cos que xa conta, e entre os que destacan o termalismo, o medio ambiente e a cultura”.

Porén, Seara contrapuxo o caso do “proxecto do Museo Galego do Entroido en Xinzo de Limia, iniciado hai máis de catorce anos e que segue sen realizarse polo desleixo de Xunta e concello”, lembrando que ela mesma viu rexeitada polo PP unha emenda nese senso aos orzamentos xerais de Estado para o ano que vén.

O Ministro, malia recoñecer o “enorme valor turístico do Entroido de Laza” como “un dos máis famosos de Galicia e do mundo”, desvelou que “a data de hoxe non consta ningunha solicitude no Ministerio” e sostivo que “cando entre a solicitude, dende a Secretaría de Estado de Turismo se estudará e avaliará”.

Ante semellante resposta, Seara criticou que pasase “un ano dende que se aprobou, de xeito unánime polos distintos grupos políticos no Concello de Xinzo o solicitar esta declaración, e nin o alcalde nin a Xunta foron capaces aínda de remiti-lo expediente ao Ministerio”. Por iso, pediulle a Soria “a implicación do Ministerio para que os trámites non se eternicen”, e indicoulle que “iso si sería apoia-la cultura e as tradicións, e non o construír un Parador de Turismo a uns metros doutro que está pechado medio ano”, en referencia ao caso do Castelo de Monterrei, sobre o que lembrou que “os socialistas solicitamos a revogación da Resolución pola que Patrimonio acordou amplia-lo destino previsto na cesión á Xunta de Galicia do Castelo de Monterrei e o seu recinto amurallado para convertelo noutro parador”, xa que resulta “todo un dispendio esnaquiza-lo patrimonio histórico ben rehabilitado para dar capricho a algún mandatario galego”, acusando a Feijóo.

Seara pide a Pastor “que se deixe de visitas electoralistas ás obras do AVE e execute as partidas orzamentarias”, e reprocha a Feijóo que “só aplauda”

Perante a visita da ministra de Fomento Ana Pastor, a obras do AVE hoxe n’A Gudiña, a deputada socialista pola nosa provincia, Laura Seara, pídelle “que se deixe de visitas electoralistas e execute as partidas orzamentarias que pinta artificiosamente nos orzamentos xerais do Estado para o AVE a Galicia”.

Seara denuncia que, “a pesar de múltiples iniciativas parlamentarias dos socialistas, o Ministerio négase sistematicamente a ofrecer resposta sobre o grao real de execución orzamentaria das partidas do AVE a Galicia”, e advirte de que esta “opacidade e escurantismo non só é unha falta de respecto democrático e parlamentario, senón que, ademais, demostra que o Goberno central infla os orzamentos xerais do Estado para Ourense e para Galicia con partidas millonarias para o AVE que logo nunca executa”.

Unha mostra máis da falta de execución orzamentaria por parte do Goberno do PP, segundo sinala a deputada, é a ralentización que, durante todo o 2014, viñeron sufrindo as distintas obras do AVE na nosa provincia. Este punto foi denunciado tamén no Congreso dos Deputados o pasado mes de marzo pola propia Seara, con outra batería de iniciativas parlamentarias.

A teor das opacas respostas parlamentarias que ela mesma recibe sobre este asunto, Seara sinala que “todo fai temer que as cifras de execución das partidas orzamentarias non só non son as desexadas, senón que, ademais, están moi por baixo do que inicialmente pensabamos os socialistas”.

Neste senso, apunta que, respecto aos investimentos nas entidades do sector público empresarial (entre as que se encontra ADIF), o Goberno recoñece nos orzamentos xerais do Estado para o 2015, que só gastará 834 millóns de euros dos 1.127 millóns que orzamentou para o 2014, de xeito que, “do que presupostou o Goberno do PP para o 2014, recoñecen que non van a executar un 25%”, teméndonos os socialistas que esta falta execución sobre o presupostado poda alcanzar “mesmo o 40%”. Por iso, a deputada pediu a comparecencia de Pastor no Congreso dos Deputados para que explique con detalle o grao de execución das partidas orzamentarias do AVE a Galicia do último exercicio económico.

Para Seara, “de nada serve que a ministra visitase hoxe as obras do AVE n’A Gudiña, escenificando unha ‘feira de millóns presupostados’ ”, se logo non executa as partidas orzamentarias”, e pídelle que “resposte con claridade se construirá un AVE como Galicia merece, con dobre vía en tódolos tramos, e que explique con detalle a modificación de trazado que o Ministerio prevé no tramo Taboadela-Ourense”.

“Mentres tanto, en Galicia hai un Presidente, o Sr. Feijóo, que só sabe aplaudir”, remata a deputada.

Laura Seara pide ao novo ministro de Xustiza que manteña os partidos xudiciais

Orense_-_Mapa_judicial

A deputada socialista no Congreso, Laura Seara, vén de rexistrar na Cámara baixa diversas iniciativas parlamentarias coas que lle pide ao novo ministro de Xustiza que manteña os partidos xudiciais en Galicia, nomeadamente na nosa provincia.

Seara desexa coñecer, tralo nomeamento de Rafael Catalá como titular de Xustiza, cal será a actuación deste Ministerio respecto de a desaparición dos partidos xudiciais, que está prevista nos anteproxectos de Lei Orgánica do Poder Xudicial e da de Planta e Demarcación Xudicial.

En concreto, pídelle a Catalá resposta sobre se manterá os oito partidos xudiciais que actualmente existen na nos provincia, se cada unha destas unidades xudiciais contarán coa figura de Xuíz, Secretario e funcionarios xudiciais con carácter fixo e permanente, e se os partidos xudiciais continuarán gozando de independencia ou serán considerados como sedes desprazadas dependentes do Tribunal de Instancia.

Seara sostén que “a proposta de modificación da demarcación e planta xudicial ten como único eixo rector, baixo o pretexto dun suposto aforro, a redución da Administración, orientada en última instancia ao desmantelamento do servizo público da Xustiza”.

Así, explica que a proposta “afirma que a implantación do novo modelo condiciona o gasto que as Administracións Públicas poidan realizar en mellora dos medios materiais ao servizo da Administración de Xustiza, sendo así que devandito gasto deberá localizarse nos edificios e instalacións que han de alberga-las sedes reflectidas na presente Lei e soamente nelas, que estarían só radicadas nas capitais de provincia”.

O anteproxecto de Lei prevé a creación de Tribunais de Instancia, de ámbito provincial, que asumirán todas as competencias actuais dos xulgados. Segundo a deputada, isto “provocará, practicamente, a desaparición dos partidos xudiciais e, con iso, de decenas de órganos xudiciais”.

Seara destaca que, se se mantén a lei de Planta Xudicial, tamén “se encarecerán os procesos e se provocará un grande prexuízo ao medio rural e a provincias como Ourense, na que os cidadáns terán grandes dificultades no acceso á Xustiza”.

Por iso, a deputada socialista esixe a Catalá “que aclare canto antes se desaparecerán ou non os partidos xudiciais”; e lembra que o seu antecesor, Gallardón, “veu no verán a Galicia a aplaca-los ánimos e contentar a Feijóo, pero todo apunta a que os partidos xudiciais se converterán en meras sedes”, considerando, xa que logo, “absolutamente necesario que o novo ministro explique os seus plans”.

Miguel Fidalgo pide que o Goberno central retire de tramitación a modificación da Lei de Demarcación e Planta Xudicial, que fai desaparece-los Partidos Xudiciais e Xulgados de Paz en tódalas comarcas da nosa provincia

O noso senador ,Miguel Fidalgo, alédase do cese do ministro que xestionou importantes retrocesos en dereitos e liberdades que forman parte do sistema democrático, en nome da dereita máis retrógrada. Por iso considera que é o momento de retomar tódalas reformas xudiciais, e recolle-lo clamor dos colectivos de avogados, fiscais, traballadores da Xustiza, organizacións sindicais e partidos políticos.

Fidalgo coida que o PP debe retirar inmediatamente a lei que suprime os partidos xudiciais, e que afecta moi gravemente á nosa provincia, xa que supón a desaparición da estrutura actual nas comarcas de Ribeiro, Carballiño, A Limia, Verín, Valdeorras, Trives-Caldelas, Bande e Celanova. A iso hai que sumarlle a desaparición dos Xulgados de Paz e Rexistro actuais, pola súa privatización.

Fidalgo critica o cinismo de Feijóo, cómplice desta medida, que intenta despistar dicindo que se mantén o nome duns partidos xudiciais nos que desaparecen xuíces, secretarios, axentes e demais persoal, e deixa de celebrarse a actividade actual.

O senador anunciou novas preguntas, tal como suxeriron as plataformas en defensa dos partidos xudiciais, e informou de que presentará na Cámara Alta unha moción concreta en defensa de cada un dos partidos xudiciais que existen na provincia.

Fidalgo estima que a segunda lei que o PP debe derrogar é a Lei de Taxas aprobada, que está impedindo que os cidadáns sen recursos poidan defenderse ante as inxustizas que poidan sufrir. O PP divide a sociedade entre cidadáns con diñeiro, que teñen dereitos e cidadáns, e sen cartos, que non teñen dereitos.

Así mesmo, reclamou que se paralice a tramitación da modificación da Lei de Asistencia Gratuíta, que pon imposible a asistencia letrada de oficio para as persoas sen recursos, ademais de excluír a moitos colectivos e persoas ás que deixa sen a posibilidade de defende-los seus dereitos ante a Xustiza, prexudicando aos profesionais máis próximos e pequenos despachos de pobos e cidades.

En definitiva, o senador considera que este é o momento de parar este retroceso en liberdades e dereitos fundamentais para un estado democrático, tendo en conta as peticións dos colectivos e a sociedade civil.

Seara esixe ao Goberno central a paralización inmediata das obras no castelo de Monterrei

A deputada socialista no Congreso pola nosa provincia, Laura Seara, rexistrou hoxe unha Proposición Non de Lei no na Cámara Baixa na que denuncia as nefastas consecuencias das obras que se están executando para converter o Castelo de Monterrei en Parador de Turismo.

Seara solicita ao Goberno que se dirixa á Xunta para que paralice de xeito inmediato as obras para a súa adecuación e acondicionamento como Parador; e solicita ao Goberno central que revogue a Resolución de 1 de xullo de 2014, na que a Dirección Xeral do Patrimonio do Estado acordou amplia-lo destino previsto na cesión á Xunta de Galicia do Castelo de Monterrei e o seu recinto amurallado. “O Ministro Montoro debe poñer fin a este despropósito e a este dispendio froito do capricho do Presidente Feijóo”, reclama.

A deputada lembra que “foi o Goberno Socialista o que cedeu á Xunta, en xullo do 2010, o uso da fortaleza amurallada de Monterrei, pero con usos ben distintos aos que agora lle deu o actual Goberno: naquel intre, o Castelo foi cedido para usos culturais, etnográficos e divulgativos da moda, o viño e as augas medicinais da comarca, así como para a musealización dos edificios e o arquivo das tradicións da fronteira e pobos próximos”, para engadir que “a improvisación da norma aprobada polo PP co fin de amplia-los usos permite construír ao capricho de Feijóo”.

E este capricho, denuncia Seara, “é a construción dun hotel de luxo no castelo, coa previsión de cedelo, unha vez rematada a obra, á administración turística do Estado para a súa explotación a través da Axencia de Turismo de Galicia; e isto coa contestación cidadá e dos axentes culturais e patrimoniais.”

Doutra banda, e ante os graves destrozos que as obras no castelo están provocando, na Proposición Non de Lei tamén se esixe ao Goberno central “que abra unha investigación e que dea traslado das conclusións ao Congreso dos Deputados”, xa que “o derrube de muros da fortaleza, as fendas na Torre das Damas, e a aparición nun vertedoiro de obxectos que se atopaban dentro do propio Castelo, deu o sinal de alarma a unha poboación xa indignada con esta aberración”.

Tras informar que o Consello dá Cultura Galega está rematando un informe ao respecto, Seara sostivo que “é evidentemente incoherente que, nas actuais circunstancias económicas” que atravesa todo o Estado e que “se agravan na provincia de Ourense, se leve a cabo un investimento desta magnitude, cando xa existe un Parador a escasos metros da fortaleza de Monterrei, que ten que pechar catro meses ao ano por falta de demanda hoteleira”.

O PSdeG defende que a política agraria comunitaria priorice as súas axudas aos produtores

Esta tarde se celebrou na sede socialista en Ribadavia un acto organizado polo Comité Electoral Provincial do PSdeG, presidido polo noso Secretario Provincial, Raúl Fernández, no que tamén interviron outros cargos, como varios dos nosos deputados autonómicos e ao que asistiron alcaldes, concelleiros e cargos orgánicos do PSdeG da comarca d’O Ribeiro, así como representantes do movemento asociativo da mesma.

Na reunión se explicitou que unha das máximas prioridades do PSdeG con respecto á Política Agraria Común da Unión Europea é que as axudas comunitarias, a nivel vitivinícola, se centren nos colleiteiros e non nos terratenentes; que as axudas se dirixan á produción, en detrimento da superficie xa que, neste caso, se produce unha grande inxustiza coa produción vinícola das Denominacións de Orixe da nosa provincia, e en xeral, de toda a produción agraria galega.

Na situación actual, os produtores de viño de Ourense e de Galicia perciben a cuarta parte das axudas que obteñen os estremeños, e unha quinta da que reciben os de Castela-A Mancha, o cal supón un agravio comparativo para os nosos viticultores. Así, mentres os produtores d’O Ribeiro reciben uns 2 200 €, os estremeños perciben 8 000€, e os casteláns-manchegos 10 000€. Unha situación que -concluiuse na cita- hai que cambiar; para o que cómpre un cambio de rumbo cara a esquerda do Parlamento e da Comisión europeos.
Para o PSdeG de Ourense, as eleccións europeas do 25 de maio son capitais para o futuro da comarca d’O Ribeiro e de toda a nosa provincia, por canto está en xogo o destino dos fondos comunitarios para os vindeiros cinco anos.

Seara sinala que a desaparición dos partidos xudiciais foi a “crónica anunciada do golpe mortal á Xustiza”

Spanish_gavel

A nosa deputada no Congreso, Laura Seara, lamenta que hoxe sexa xa realidade, nun anteproxecto de Lei, a desaparición dos partidos xudiciais. Este feito, unido ao “taxazo” xudicial, valóraos como unha “patada definitiva ao dereito dos cidadáns a tutélaa xudicial efectiva e a un acceso igual á Xustiza”.

Seara lembra que se trata “dunha crónica anunciada do golpe mortal á Xustiza”. Neste senso, incide en que “os socialistas xa advertimos hai dous anos” das intencións do Goberno central de “suprimi-los partidos xudiciais existentes para crear un único partido xudicial por provincia”. Porén, “o Goberno intentou realizar esta manobra, que atenta de novo contra os dereitos dos cidadáns, de forma velada; pero os socialistas levamos dende o 2012 avisando das verdadeiras intencións do PP, que lamentablemente por fin viron a luz”.

Lembra a compañeira que, tanto ela como outros deputados socialistas viñeron presentando no Congreso, desde hai dous anos, multitude de iniciativas parlamentarias solicitando ao Goberno central explicación sobre a desaparición dos partidos xudiciais. En tódalas respostas parlamentarias, “o Goberno escorreu o vulto, dicindo que só se trataba dun informe e non dunha proposta en firme”. Xa que logo, censura que mentiron e que hoxe a decisión xa estea no anteproxecto de Lei.

A deputada sinala que en varias cabeceiras de partidos xudiciais como Celanova, Ribadavia e Xinzo se fixeron mobilizacións por parte dos funcionarios, outros colectivos e cidadáns de a pé, contra a supresión de devanditos partidos, pero o Goberno central “negouno todo e esperou a agora asesta-lo golpe mortal”.

Seara explica que o anteproxecto do Goberno liquida os partidos xudiciais coa creación dos tribunais “provinciais de instancia”, que serán os que asumirán as competencias actuais dos xulgados e en todos os órganos xurisdiccionais. “O ámbito territorial deses novos tribunais será provincial, desaparecendo así a práctica totalidade dos partidos xudiciais e, con iso, decenas de órganos xudiciais”. Esta situación “provocará situacións paradoxais, como as de Santiago, que sendo a capital de Galicia podería quedar desposuída de órganos xudiciais que agora teñen sé nesa cidade, ou a da de Vigo, que non tería a sé” da súa provincia.

Resalta tamén a compañeira que, respecto de Galicia, e especialmente a Ourense, polas súas especiais características de ruralidade, e dispersión e envellecemento poboacionais, a supresión dos partidos xudiciais supoñerá un total afastamento dos cidadáns á Xustiza, que só a verán “de lonxe”.

“Trátase dun ataque brutal, outro máis, por parte do Goberno do PP, a dereitos fundamentais dos cidadáns, neste caso á Xustiza, que ven como perden o dereito a unha Educación publica gratuíta e de calidade, dereitos en Sanidade, o dereito ao emprego e, en moitos casos ata a unha vivenda digna, e tamén o dereito á Xustiza; un retallo continuo de dereitos e liberdades que é o sinal de identidade do Goberno do PP de Rajoy”, lamenta.

Seara insta ao PP a que vote contra un imposto para o viño

ribeiro_á_beira_do_Miño_-_Galiza

A deputada socialista no Congreso pola nosa provincia, Laura Seara, instou ao ministro de Agricultura e ao grupo do PP nesa Cámara, a votaren a favor dunha moción rexistrada nela polo PSOE (e que será debatida o vindeiro martes) na que pedimos “asegura-lo mantemento do actual sistema de módulos e a fiscalidade cero para o viño”, así como “asegura-los actuais tipos impositivos do IVA da alimentación, sen que se produzan subidas, nin no tramo superreducido nin no reducido”. O debate desta moción terá lugar o vindeiro martes.

“Coa votación desta moción poderemos comprobar se é certo que Cañete e o PP están en contra do imposto do viño ou se, pola contra, e como é xa habitual no PP de Madrid e no de Galicia, din unha cousa e votan a contraria” explica a compañeira.

Como deputada ourensá, Seara resalta “a alta importancia que o viño ten en Ourense, tanto dende o punto de vista económico, como cultural”, e apunta que “o establecemento dun imposto ao viño sería moi prexudicial para o Medio Rural e para as familias que viven do viñedo”.

Neste senso, destaca “o esforzo que o sector vitivinícola realizou para a súa modernización”, e considera que “o pago a ese esforzo non pode ser unha traba ao seu desenvolvemento, e que claramente danaría os intereses do sector”. Por iso, a deputada anunciou a presentación de novas iniciativas parlamentarias.