Verín

O Concello de Vilardevós volta a perder unha subvención, desta vez básica na loita contra os incendios

03/08/2017
By

Os socialistas de Vilardevós denuncian que o goberno municipal voltou a perder unha subvención moi necesaria para os intereses do Concello. Desta volta, o desleixo municipal afecta á loita contra os incendios, lacra que verán tras verán asedia a zona de xeito moi especial, e, concretamente, non se dispón de condutor do tractor-desbrozadora ao non lIe ter solicitado a correspondente subvención á Deputación.

Interpelado polo Grupo Municipal Socialista no último pleno, o alcalde tivo que recoñecer que non pedira a axuda provincial porque, segundo el, a Deputación o usa para Iimpa-las cunetas das estradas provinciais. Porén, mentres o goberno municipal do PP acusa ao goberno provincial, do seu mesmo partido, de facer un mal uso dun recurso do Concello, a maleza segue a medrar nos camiños Vilardevós.

O voceiro socialista no concello, Julio Prada, denuncia que “mentres eles dirimen as súas diferenzas e o noso alcalde pasa de conseguir recursos vitais para o municipio, os veciños seguen sen o servizo por falta de cartos para contratar ao condutor, e hai moitas áreas sen limpar expostas a que prenda o lume nelas”.

O contrato que se derivaría da percepción da subvención suporía un posto de traballo de tres a catro meses de duración, que redundaría no beneficio de todo o concello, que contaría así cun servizo de maquinaria especializada para face-las rozas contra os incendios.

Asemade, o Concello de Vilardevós non foi quen de reunir este ano xente suficiente para conforma-la brigada anti-incendios que se contrata cunha subvención da Xunta, co que tiveron que publicar de novo as súas bases. Tal como denuncian os compañeiros: “metidos xa en agosto, non contamos nin con brigada nin con tractor para rozar: a desprotección fronte aos lumes é practicamente absoluta”.

Nestes intres, o Concello só conta, en materia de loita contra o lume, cunha subcontrata feita a través dunha empresa de construción, que só permite destinar a face-las rozas a dúas persoas usando desbrozadoras de man. Como resultado destas decisións, as rozas feitas hoxe por hoxe no municipio de Vilardevós, resultan claramente insuficientes.

A pesares de que o historial de perdas de subvencións por parte do goberno municipal de Vilardevós é notorio e crecente, non deixa de sorprender que nin sequera estean cómodos coas subvencións dos seus propios compañeiros do PP, de xeito que lle aquel lle pon pegas a todo, deixando aos veciños “a velas vir”. Así, ao desleixo habitual que fai perder axudas, tamén da Deputación, para actividades físico-deportivas, hai que suma-lo inflado das cantidades solicitadas, coa conseguinte perda das propias subvencións: non hai moito que se pediu unha axuda para facer un parque engomado, que custou máis do dobre que o mesmo tipo de parque no veciño Concello de Oímbra.

Os socialistas, xa que logo, denunciamos que a mala xestión e o desleixo, están a levar a unha perda progresiva de recursos para un concello precisado deles, ademais de servizos esenciais para o medio natural a e a seguridade das persoas.

A Dirección Provincial do PSdeG-PSOE fai un chamamento á cidadanía para que participe na manifestación en defensa da sanidade pública na comarca de Monterrei

16/03/2017
By

Raúl Fernandez anima aos cargos públicos e orgánicos e aos militantes para que apoien coa súa prensenza as reivindicacións da Plataforma en Defensa da Sanidade Pública, o vindeiro sábado

Os socialistas amosan a súa preocupación polos recortes, reducións de persoal e na atención que está a sufrir a importante área sanitaria do hospital de Verín

 Plataforma en Defensa da Sanidade Pública Comarca de Monterrei 

Ourense, 16 de marzo de 2017. A dirección provincial do PSdeG-PSOE de Ourense, en nome do seuSecretario Xeral, Raúl Fernández, quere manifestar o total apoio da organización á manifestación convocada pola Plataforma en Defensa da Sanidade Pública da Comarca de Monterrei prevista para o vindeiro sábado en Verín. Do mesmo xeito, Raúl Fernández, fai un chamamento a todos os cargos públicos e orgánicos do Partido Socialista na zona para que acudan á mobilización en defensa da calidade da atención sanitaria na comarca de Monterrei. Lembra que xa foron varios os compañeiros que se pronunciaron nos distintos Plenos dos concellos da bisbarra para reclamar unha sanidade totalmente pública, gratuíta, digna e de calidade para os veciños e veciñas da área sanitaria de Verín.

Os socialistas ourensáns queren facer súas as reivindicacións da Plataforma, en sintonía co que sempre defenderon, e amosan moita preocupación ante a redución de efectivos no servizo de medicina interna e no persoal nos centros de saúde da comarca. Así mesmo, consideran que a plataforma fai unha esixencia máis que xusta ao reclamar o servizo de pediatría hospitalaria para a unidade paritorio. Como é ben sabido, o hospital comarcal de Verín, dependente da Xestión Integrada de Ourense, non só atende aos  veciños da comarca de Monterrei  senón que supón o centro de referencia, para algunhas especialidades, para outros municipios, coma os da veciña comarca de Xinzo, por exemplo.

Garantir a calidade do servizo é algo prioritario e fundamental para os socialistas da provincia que non están dispostos a permitir as derivacións de pacientes a centros privados que se están a producir.

Por outra banda, o Secretario Xeral quere destacar que os problemas que se viven na comarca de Monterrei, son comúns ao que está a pasar no resto da provincia e do país, onde os recortes dos gobernos do PP están deixando o seu sentir, por exemplo, nos atrasos incomprensibles nas listas de agarda para as cirurxía.

Se ben, dende o PSOE, sempre se defenderon os servizos públicos, no caso da sanidade, pódese afirmar que se trata dun caso de extrema prioridade posto que se está a xogar coa saúde de todas e todos. Por todo isto, dende o PSdeG-PSOE de Ourense consideran fundamental que o vindeiro sábado, ás 18:30 horas, na praza do Concello de Verín, se sumen todas e todos aqueles que defenden unha sanidade pública de calidade.

Os socialistas critican a sectaria e excluínte reunión do conselleiro José Manuel Rey e Manuel Baltar con cargos do PP da comarca de Monterrei

14/02/2017
By

 

2017-02-14-PHOTO-00000395

 

Unha reunión sectaria, excluínte e un uso partidista das institucións públicas. Iso é o que pensan os socialistas da provincia de Ourense do encontro que o conselleiro, José Manuel Rey, e o presidente da Deputación, Manuel Baltar, mantiveron onte no reformado edificio do Concello de Oimbra, única e exclusivamente con alcaldes e cargos do PP. Rey incluso presumiu nas redes sociais do acto. O conselleiro asegurou que mantivo o encontro para “prestar uns mellores e máis amplos servizos a todos os galegos” e para “acadar un maior benestar para todas as persoas”.

O secretario provincial do PSdeG-PSOE de Ourense, Raúl Fernández, califica a reunión dos populares como “sectaria” e “excluinte”, xa que discriminaron deliberadamente a máis da metade dos veciños e veciñas da comarca de Monterrei. “Foron excluídos do encontro os alcaldes socialistas de Verín e Castrelo do Val, que representan ó 50% dos habitantes da comarca de Monterrei e, sen embargo, sí estaba o exalcalde e actualmente senador, José Manuel Jiménez Morán”, recorda Fernández.

O deputado galego e líder dos socialistas na provincia de Ourense pregúntanse qué concepto de “todos os galegos” e “todas as persoas” teñen Rey, Baltar e os demais populares da fotografía, cando marxinan dunha forma tan evidente e bochornosa a miles de ourensáns. “O tempo do NODO xa pasou”, alerta. “O PP non pode usar en beneficio propio as institucións públicas, discriminando a 16.000 veciños e veciñas gobernados polos socialistas na vila cabeceira de comarca e en Castrelo do Val”, insiste

A Xunta do PP tenta agochar un posíbel “pelotazo” do sogro de Baltar Blanco na venda dun Pazo a Mario Conde

16/06/2016
By

A nosa deputada no Parlamento galego Noela Blanco, acusou á Xunta de “intentar agochar un posíbel “pelotazo” do sogro de Baltar Blanco e ex alcalde d’A Mezquita, Gabriel Caldelas, coa rehabilitación e venda da antiga casa reitoral de Chaguazoso ao ex-banqueiro, actualmente detido por fraude fiscal, Mario Conde.

Así o sostivo a nosa compañeira logo da resposta da Xunta a unha pregunta parlamentaria, contestación na que o goberno galego admite as irregularidades nas axudas concedidas para a rehabilitación do inmoble en 1998, ter confirmado a inactividade da reitoral no 2013, e ter sancionando ao titular do establecemento, que deberá devolve-las axudas públicas obtidas, por incumpri-la obriga de adica-lo inmoble a turismo rural durante os quince anos posteriores a ter recibido ditas axudas. Blanco reclama saber se a sanción que agora anuncia a Xunta “pretende se-la maquillaxe coa que tapar un posíbel ‘pelotazo’ da familia de Baltar”.

A deputada cre que, en realidade, o establecemento non estaba sendo adicado ao turismo rural, por moito que figurara na oferta turística da Xunta, alomenos dende o intre en que foi adquirido por Conde; e quere que a Xunta clarifique se foi adicado a ese fin mentres era propiedade do sogro de Baltar Blanco.

A compañeira reclamará, ademais, as facturas que aclaren se as axudas que Caldelas percibiu, un total de 490 000€ procedentes do Fondo Europeo de Desenvolvemento Rural -incluíndo 120 000€ da Administración autonómica-, se corresponden con gastos reais de rehabilitación das instalacións; e esíxelle á Xunta que clarifique, ademais, se a obriga de devolve-las axudas afecta tamén ao beneficiario inicial das mesmas, -o sogro de Baltar Blanco-, se a mesma incluirá tamén á contía recibida da UE, e se se lle ten dado conta desta situación ás autoridades comunitarias encargadas de loitar contra a fraude e a corrupción.

Asemade, a nosa deputada censura o “escurantismo” co que a Xunta ten tratado esta fraude ás arcas públicas, que o goberno galego agochou ata que os socialistas presentamos unha pregunta parlamentaria ao respecto; e considera que o goberno galego “debe aclarar se houbo algunha cooperación pola súa banda para que este persoeiro ocultara responsabilidades polos delictos que lle imputa a Audiencia Nacional”.

A compañeira reclama, pois, á Xunta, que “despexe tódalas dúbidas” sobre “calquera tipo de relación triangular de cooperación entre Baltar Blanco, Feijóo e Mario Conde” no referente á dita casa rural.

O Concello de Castrelo do Val vén de renovar a súa páxina web e muda o seu dominio ao .gal, o dominio galego en internet.

16/05/2016
By

O Concello de Castrelo do Val vén de renovar a súa páxina web, e mellora a súa arquitectura da información para ofrecer un mellor servizo aos cidadáns.

Na nova web cobra especial importancia a transparencia da información municipal, e por ese motivo estarán dispoñibles os datos económicos.

Ademais, tamén será posible coñecer, un a un, os dezaséis núcleos de poboación que conforman o noso concello, na sección “os nosos pobos“.

Tamén está dispoñible para todos os veciños o arquivo histórico das revistas municpais que edita o propio concello e que reparte en papel aos seus veciños, na sección “revista de información muncicipal

A “Estela de Pedra Alta” tamén terá o seu oco nesta páxina web, con información sobre o achádego arqueolóxico

Aproveitando o lanzamento da nova web, o concello muda o seu dominio ao .gal, o dominio galego en internet.

O DECRETO 74/2015, do 13 de maio que regula a organización da presenza na internet na administración galega baixo o dominio .gal. Este decreto será de aplicación a todos os órganos e entidades da Administración xeral e do sector público autonómico de Galicia. A finalidade é a proxección dunha imaxe homoxénea da presenza da Administración xeral e do sector público autonómico baixo o dominio .GAL.

Con esta medida, a web do concello pasa a ser castrelodoval.gal, e convértese no primeiro concello da comarca en asumir o .gal como dominio principal para a súa presenza en internet.

 

Preguntamos á Xunta por posibles irregularidades na rehabilitación da antiga reitoral de Chaguazoso, propiedade de Mario Conde

28/04/2016
By

543545176_1280x720
A nosa deputada no Parlamento galego Noela Blanco, presentou unha serie de iniciativas para que a Xunta despexe tódalas dúbidas diante de calquera posible relación co ex banqueiro Mario Conde, detido por repatriar diñeiro supostamente substraído de Banesto. A deputada lembra que a antiga casa reitoral de Chaguazoso, propiedade de Conde, foi primeiro alugada e logo comprada polo ex banqueiro á familia política do presidente da Deputación, José Manuel Baltar.

A compañeira sinala que o inmoble foi rehabilitado con cargo a fondos comunitarios por parte do ex alcalde da Mezquita polo PP, Gabriel Caldelas, con 490 000€ procedentes do Fondo Europeo de Desenvolvemento Rural, xestionado pola Xunta e o Concello, agás 120 000 do goberno galego, que obrigaba á súa utilización no turismo rural durante quince anos.

O pazo foi primeiro alugado e a continuación comprado no 2009 por Mario Conde (antes de que expirara o dito prazo de tres lustros), cando o inmoble era anunciado en Turgalicia; pero “as reservas eran materialmente imposibles, ninguén atendía aos teléfonos que aparecían na web, e os epígrafes sobre prezo e dispoñibilidade quedaran en branco”, e finalmente o anuncio era retirado en 2014, pouco antes de que expirara o prazo.

Blanco sinala que o goberno de Feijóo “debe aclarar se houbo algunha cooperación pola súa parte” para que Conde ocultara “responsabilidades polos delictos que lle imputa a Audiencia Nacional”; lembra que, no 2007, foi proposto para encabeza-la candidatura do PP na cidade, e reclama que o goberno galego “despexe tódalas dúbidas diante de calquera tipo de relación de cooperación triangular entre Baltar, Feijóo e Mario Conde”, no referente á dita casa rural.

Demandamos no Parlamento dous plans, de creación de emprego e de cooperación sanitaria, co Norte de Portugal

17/02/2016
By

Os Grupo Socialista no Parlamento galego demandou hoxe na cámara autonómica senllos plans de cooperación transfronteiriza, en materia de creación de emprego e de atención sanitaria, entre Galicia e o norte de Portugal, mediante a presentación de senllas proposicións, que foron rexeitadas polo PP.

A deputada pola nosa provincia Noela Blanco, manifestou, na presentación das dúas proposicións, o seu convencemento de que “as relacións co país luso deberían ser unha parte prioritaria na axenda de acción exterior deste goberno, mais nestes últimos anos é patente a falla de interese e de implicación amosada polo goberno de Feijóo en todo o referente a fortalece-las relacións co país veciño”, denunciando que “a posición do goberno galego en Europa é un paripé que se visualiza na ausencia do presidente da Xunta en Bruxelas, nun momento no que nas institucións europeas se están a tratar temas de especial relevancia para Galicia, como a situación na que se atopan os nosos sectores produtivos”.

Con relación á iniciativa sobre emprego, Blanco lembrou que a zona transfronteiriza, na que destaca o Sur da nosa provincia, “é a que sofre o maior incremento do desemprego en Galicia, máis do 70% dos vinteséis concellos superan a taxa media de paro”. Unha situación que comeza “a reverte-lo novo goberno socialista portugués en poucas semanas, ao que igual que ocorrera en España cando os socialistas cheguemos a presidencia do Goberno”.

Este plan de emprego debería de incidir de maneira urxente “na mocidade, onde se está a reproduci-lo fenómeno da emigración dos anos ‘70, na poboación con máis idade, presa en moitos casos dun desemprego de larga duración, e nas mulleres, xa que o paro feminino segue sendo superior ao masculino”. Xa que logo, para a nosa deputada, e tendo en conta “este marco de tremendas dificultades no mercado laboral, os socialistas consideramos que, de xeito urxente, se debe elaborar e poñer en marcha este plan, que deberá contar con dotación orzamentaria, para favorecer un mercado de traballo inclusivo na zona transfronteiriza, que axude a cohesión social e territorial da mesma”.

Con respecto á Sanidade, a iniciativa demandaba á Xunta “a elaboración, de maneira conxunta co Goberno portugués, e a presentación no Parlamento de Galicia para o seu debate e aprobación no prazo máximo de tres meses, dun plan estratéxico de cooperación transfronteiriza sanitaria, que terá, entre outros, como obxectivos, a eliminación das principais trabas burocráticas: a falta de transparencia e información sobre os procedementos e tratamentos en cada un dos Estados, a incerteza que existe sobre os pagos e reembolsos, e as dificultades no seguimento ou tratamentos posteriores”.

Caso de que tivera sido aprobado, este plan sería “pormenorizado”, contando “cun cronograma e identificación dous recursos financeiros e humanos”, onde se contemplaría a dotación orzamentaria que a Xunta destinaría ao mesmo, así como “as posibles axudas comunitarias”, informou Blanco.

Laura Seara afirma que “abri-lo debate sobre o AVE a Galicia é só apto para necios”

09/04/2015
By

A deputada socialista pola nosa provincia, Laura Seara, reprocha que algúns partidos políticos como CiU, UPyD e Ciudadanos se “sumen ao carro dos detractores do AVE a Galicia”.

Para Seara “reabri-lo debate sobre a necesidade do AVE a Galicia só é apto para necios”, e sinala que se trata dunha infraestrutura que non ten marcha atrás”, un “proxecto irrenunciábel, malia os atrasos e as dilacións que sufriu por parte do Goberno do PP” e unha “infraestrutura absolutamente necesaria para a vertebración do País e para o desenvolvemento económico do territorio galego”; e “os galegos -engade a deputada- n non queremos ser cidadáns de segunda”.

Seara lamenta que “Albert Rivera, que si celebrou con xúbilo a chegada do AVE a Cataluña” se opoña agora á chegada do AVE a Galicia, unha infraestrutura que é tan estratéxica para Galicia como para o resto de España”, e móstrase convencida de que “se Rivera vivise en Galicia, e máis concretamente en Ourense, ou simplemente coñecese a realidade destes territorios, seguro que non plantearía semellante dislate no seu programa electoral”.

“Espero que os galegos fagan pagar nas urnas a todos aqueles partidos que se apuntan á demagoxia, ou que se disfrazan de nacionais” pero no fondo só defenden os intereses dos seus propios territorios.

Seara admite que lle chama a atención o feito de que coincidan nas críticas ao AVE galego tanto CIU -o partido co que o PP ten a día de hoxe mellor relación no Congreso dos Deputados- como Ciudadanos -ao que o PP pretende achegarse-. E “dende logo” a deputada espera que “o PP, na súa nova esta estratexia de achegamento a Ciudadanos, non se atreva a utiliza-lo AVE como moeda de cambio para suma-lo seu apoio”. Neste Senso, Seara anuncia que “os socialistas promoveremos no Congreso iniciativas para que tódolos partidos políticos, entre os que tamén inclúo ao PP, queden perfectamente retratados”.

Seara pregunta ao Goberno “qué fará” se a Audiencia Nacional o obriga a revoga-la orde que permite converte-lo castelo de Monterrei nun Parador

12/03/2015
By

A deputada socialista pola nosa provincia, Laura Seara, rexistrou hoxe no Congreso dos Deputados unha iniciativa parlamentaria coa que pide ao Goberno central que dea “marcha atrás e revogue o acordo polo que se ampliaron os usos do castelo de Monterrei”.

Seara sinala que a Audiencia Nacional dictou un auto no que desestima as alegacións presentadas pola Avogacía do Estado á denuncia que no seu día interpuxera a Plataforma en Defensa do castelo de Monterrei. Porén, dito auto sinala que a defensa do patrimonio cultural si lexitima aos veciños neste proceso xudicial.

Por iso, a deputada advirte ao Goberno central que “a Audiencia Nacional podería dictar sentenza favorable á denuncia interposta pola Plataforma en Defensa do castelo de Monterrei, e obrigar ao Goberno a revoga-la orde de cambio de usos do castelo”. Xa que logo, Seara pídelle ao Goberno central que resposte acerca de “qué actuacións tería que levar a cabo o Goberno se esto ocorre”.

Seara xa denunciara no Congreso, en setembro do 2014, cunha Proposición Non de Lei, as nefastas consecuencias que estaban tendo para o castelo de Monterrei as obras realizadas para convertelo nun hotel de luxo. Xa entón, a deputada instou ao Goberno central a revoga-la Resolución de 1 de xullo do 2014, na que a Dirección Xeral de Patrimonio do Estado acordara amplia-lo destino previsto na cesión á Xunta do castelo e o seu recinto amurallado. Do mesmo xeito, Seara solicitou que o Goberno central se dirixise á Xunta para paralizar inmediatamente as obras.

A deputada reproba que “aquela Resolución do Goberno do PP foi para satisface-lo capricho de Feijóo, que non é outro que o de construír un hotel de luxo no castelo, coa previsión de cedelo despois á Administración turística do Estado para a súa explotación a través da Axencia de Turismo de Galicia”. Para Seara “o investimento para converter o castelo nun hotel de luxo, é un absurdo desperdicio económico, cando xa existe un Parador a escasos metros da fortaleza de Monterrei, que ten que pechar catro meses ao ano por falla de demanda hoteleira”.

Ademais, Seara sinala que “a día de hoxe, as obras seguen o seu curso, o que pode supoñer un completo malgasto de cartos públicos, se finalmente a sentenza da Audiencia Nacional é favorábel á petición dos veciños”, polo que empraza ao Goberno central a “rectificar canto antes; non só en interese do monumento nacional e dos veciños de Monterrei, senón tamén por decencia, antes de que poida suceder que unha sentenza da Audiencia Nacional lle poda poñe-la cara colorada”.

Seara pide no Congreso a declaración do Entroido de Xinzo como Festa de Interese Turístico Internacional

12/02/2015
By

A deputada no Congreso pola nosa provincia, Laura Seara rexistrou unha Proposición Non de Lei na Cámara Baixa que insta ao Goberno central a, que unha vez cumpridos os requisitos da pertinente Orde Ministerial, declare ao Entroido de Xinzo de Limia como Festa de Interese Turístico Internacional, coa colaboración das administracións implicadas. a Proposición Non de Lei inclúe a petición do apoio do Congreso dos Deputados para dita declaración.

Seara sinala na súa Proposición que en Xinzo se empezaron xa os trámites para que o seu Entroido sexa declarado de Interese Turístico Internacional, apunta que esta declaración, de carácter honorífico, daría un empuxón a unha das festas máis antigas e simbólicas de Galicia e sostén que dita declaración suporía un revulsivo socioeconómico nunha provincia que precisa de medidas de acción positiva en todos os ámbitos e sectores de desenvolvemento

Indica a deputada socialista que o Entroido de Xinzo é unha festa ancestral, popular, que se celebra basicamente na rúa, e que ten no traxe da “Pantalla” o seu símbolo máis recoñecido e importante. “Vistoso e bailarín este personaxe alegre componse dunha peculiar e única careta artesanal que é sen dúbida unha máscara rodeada de misterio, dona e señora do Entroido de Xinzo” que, “xunto ao Peliqueiro e o Cigarrón” representan o carnaval de Galicia.

Precisamente, respecto ao Entroido galego, Seara lembra que, receentemente, en sé parlamentaria, o Grupo Socialista puxo de relevo a importancia do coñecido como “Triángulo Maxico do Entroido” da nosa provincia, que engloba os entroidos de Laza, Verín e Xinzo, tres “dos máis antigos e famosos de España e do mundo”.

Naquel debate, a deputada conseguiu arrincarlle ao Ministro de Industria o compromiso de que o Goberno central apoiaría a declaración do Entroido de Laza como de Interese Turístico Nacional, aínda que recoñecía que o Goberno non recibira ningún documento por parte do Concello desa localidade, que é quen é competente para impulsar dita declaración.

O Entroido de Xinzo de Limia, lembra a deputada, xa posúe a Declaración de Interese Turístico Nacional e agora “está en condicións de recibi-la categoría de Interese Turístico Internacional”. Para iso, desta vez, o concello de Xinzo de Limia iniciou os trámites necesarios, que deben ser continuados por parte da Xunta, para que, finalmente, o Goberno Central outorgue dita Declaración.

Por iso, Seara agarda que a esta Proposición Non de Lei do Grupo Socialista serva para contribuír a que o Entroido de Xinzo teña o recoñecemento que merece.