Ribeiro

O Grupo Socialista denuncia que a Deputación oculta a información relativa ás subvencións que concede a Cortegada

O Voceiro do Grupo Provincial Socialista, Nacho Gómez, denuncia o escurantismo da Deputación respecto á información referida ás diversas subvencións que se teñen concedido, durante o pasado ano, ó Concello de Cortegada.

O compañeiro vén de reiterar, mediante escritos rexistrados perante a Deputación, a súa demanda de que se lle facilite unha relación das axudas e subvencións que se lle concederan ao Concello de Cortegada durante o pasado ano, sen obter resposta algunha ata o momento.

O noso Voceiro socialista na Deputación considera que o Presidente da institución quere oculta-la utilización de fondos públicos para dar soporte á operación de transfuguismo máis indecorosa dos últimos anos, co cambio de partido do alcalde, Avelino de Francisco. Gómez lembra que, aínda máis grave, foi o “cambio de chaqueta” de concelleiros como Víctor González e Diego Álvarez, que buscaron tódalas artimañas para impedir que se presentara unha candidatura socialista. Por iso agora o PP procura premiar estes actos indecentes de transfuguismo con dádivas persoais propias do máis rancio caciquismo, que merecen a condena social.

O compañeiro Gómez insiste en que, tanto o alcalde de Cortegada coma os seus lugartenentes, queren evitar que os veciños de Cortegada coñezan cómo se xestionan os bens e servizos públicos, polo que realizan una intensa labor de ocultación ao respecto, impedindo seu coñecemento desa información e coaccionando aos representantes dos veciños que piden transparencia.

Ignacio Gómez afirma que o noso Grupo na Deputación prestará todo o apoio ao Grupo Municipal Socialista de Cortegada, para denunciar tóodalas falcatruadas dos devanditos “neocaciques” que manchan a vida pública, así coma para dar apoio á loita valente dos tres concelleiros socialistas, encabezados polo seu Voceiro, Alberto Dantas.

Demandamos no Parlamento dous plans, de creación de emprego e de cooperación sanitaria, co Norte de Portugal

Os Grupo Socialista no Parlamento galego demandou hoxe na cámara autonómica senllos plans de cooperación transfronteiriza, en materia de creación de emprego e de atención sanitaria, entre Galicia e o norte de Portugal, mediante a presentación de senllas proposicións, que foron rexeitadas polo PP.

A deputada pola nosa provincia Noela Blanco, manifestou, na presentación das dúas proposicións, o seu convencemento de que “as relacións co país luso deberían ser unha parte prioritaria na axenda de acción exterior deste goberno, mais nestes últimos anos é patente a falla de interese e de implicación amosada polo goberno de Feijóo en todo o referente a fortalece-las relacións co país veciño”, denunciando que “a posición do goberno galego en Europa é un paripé que se visualiza na ausencia do presidente da Xunta en Bruxelas, nun momento no que nas institucións europeas se están a tratar temas de especial relevancia para Galicia, como a situación na que se atopan os nosos sectores produtivos”.

Con relación á iniciativa sobre emprego, Blanco lembrou que a zona transfronteiriza, na que destaca o Sur da nosa provincia, “é a que sofre o maior incremento do desemprego en Galicia, máis do 70% dos vinteséis concellos superan a taxa media de paro”. Unha situación que comeza “a reverte-lo novo goberno socialista portugués en poucas semanas, ao que igual que ocorrera en España cando os socialistas cheguemos a presidencia do Goberno”.

Este plan de emprego debería de incidir de maneira urxente “na mocidade, onde se está a reproduci-lo fenómeno da emigración dos anos ‘70, na poboación con máis idade, presa en moitos casos dun desemprego de larga duración, e nas mulleres, xa que o paro feminino segue sendo superior ao masculino”. Xa que logo, para a nosa deputada, e tendo en conta “este marco de tremendas dificultades no mercado laboral, os socialistas consideramos que, de xeito urxente, se debe elaborar e poñer en marcha este plan, que deberá contar con dotación orzamentaria, para favorecer un mercado de traballo inclusivo na zona transfronteiriza, que axude a cohesión social e territorial da mesma”.

Con respecto á Sanidade, a iniciativa demandaba á Xunta “a elaboración, de maneira conxunta co Goberno portugués, e a presentación no Parlamento de Galicia para o seu debate e aprobación no prazo máximo de tres meses, dun plan estratéxico de cooperación transfronteiriza sanitaria, que terá, entre outros, como obxectivos, a eliminación das principais trabas burocráticas: a falta de transparencia e información sobre os procedementos e tratamentos en cada un dos Estados, a incerteza que existe sobre os pagos e reembolsos, e as dificultades no seguimento ou tratamentos posteriores”.

Caso de que tivera sido aprobado, este plan sería “pormenorizado”, contando “cun cronograma e identificación dous recursos financeiros e humanos”, onde se contemplaría a dotación orzamentaria que a Xunta destinaría ao mesmo, así como “as posibles axudas comunitarias”, informou Blanco.

Reclamamos un acordo de financiamento para garanti-la viabilidade dos conservatorios de música de Ourense

NoelaBlancoRodriguezA nosa deputada autonómica Noela Blanco, presentou unha iniciativa parlamentaria para reclamar un acordo de financiamento da Xunta cos concellos que teñan conservatorios de música e a Deputación, para garanti-la viabilidade destes servizos.

Blanco destaca que estes centros son sostidos polos concellos, cando atenden a alumnos de diferentes localidades da provincia, e advirte de que “as administracións non deben escudarse no puramente financeiro para abandonar aos conservatorios de música, moitos dos cales se atopan en situacións de precariedade de instalacións e medios”, lamentando que este criterio “pode botar por terra os esforzos de toda a comunidade educativa”.

A deputada sinala que algúns destes centros funcionan “dende hai décadas” a costa exclusivamente dos orzamentos de cada concello, co que actualmente se converten nunha carga “difícil de soportar”. Esta situación agrávase en casos como o de Xinzo, así como os de Carballiño, Ribadavia e O Barco, que reciben alumnado doutras vilas que non imparten nos seus centros o Grao profesional, o que acrecenta a carga destes concellos, polo Blanco reclama a participación das administracións supramunicipais, como a Deputación e a Xunta, para que participen e apoien aos conservatorios da nosa provincia.

Alberto Dantas, candidato a alcaldía do PSdeG-PSOE aposta pola recuperación económica de Cortegada.

Mitin onte en Cortegada do Candidato Alberto Dantas acompañado polo Secretario Provincial Raul Fernández e  o Senador Miguel Fidalgo. Pola tarde estiveron recorendo a vila acompañados por el Secretario  Xeral de Galicia Jose Ramón García Besteiro

Alberto Dantas afirmou do importante de que os alcaldes sexan persoas que atendan os veciños durante  os 4 anos. Dixo tamén que recuperaría a vida económica de Cortegada con empresas que den traballo . E Recuperar a convivencia democrática de xeito que cada veciño poida actuar e vivir libremente.

IMG-20150519-WA0005

Os socialistas de Leiro advirten de que o vindeiro mes de abril empezarán as “rebaixas” coa “campaña de obras” por parte do goberno municipal

Os socialistas de Leiro denuncian que o goberno municipal segue a enganar aos veciños, utilizando tódalas canfurnadas habidas e por haber para sacar rédito político cara ás próximas eleccións municipais, ao usaren obras que xa deberían estar iniciadas e/ou rematadas antes deste ano electoral, moitas delas propostas polos socialistas no pleno do Concello; e mostran a súa total indignación pola “tomadura de pelo” que supón a utilización desa “campaña de obras” a menos de dous meses das eleccións.

Pola contra, os compañeiros de Leiro lembran que eles chegan cos “deberes feitos”, ao non deixaren para o final do mandato municipal o seu traballo como oposición, materializado en todo tipo de iniciativas destinadas a cumprir coas súas obrigas de defende-los intereses e dereitos dos veciños, que consideran conculcados polo goberno municipal, así como en fiscalizaren a este último.

En contraposición a esta vocación de traballo polos veciños, os socialistas sitúan a “inacción, inaptitude, pasotismo e ineficacia” do grupo de goberno, que trata de que o alcalde siga na cadeira “custe o que custe” e de disimular que neste mandato municipal se sucedeu “incumprimento tras incumprimento”, co “engano” da devandita “campaña de obras”, feita ás carreiras.

Laura Seara pide ao novo ministro de Xustiza que manteña os partidos xudiciais

Orense_-_Mapa_judicial

A deputada socialista no Congreso, Laura Seara, vén de rexistrar na Cámara baixa diversas iniciativas parlamentarias coas que lle pide ao novo ministro de Xustiza que manteña os partidos xudiciais en Galicia, nomeadamente na nosa provincia.

Seara desexa coñecer, tralo nomeamento de Rafael Catalá como titular de Xustiza, cal será a actuación deste Ministerio respecto de a desaparición dos partidos xudiciais, que está prevista nos anteproxectos de Lei Orgánica do Poder Xudicial e da de Planta e Demarcación Xudicial.

En concreto, pídelle a Catalá resposta sobre se manterá os oito partidos xudiciais que actualmente existen na nos provincia, se cada unha destas unidades xudiciais contarán coa figura de Xuíz, Secretario e funcionarios xudiciais con carácter fixo e permanente, e se os partidos xudiciais continuarán gozando de independencia ou serán considerados como sedes desprazadas dependentes do Tribunal de Instancia.

Seara sostén que “a proposta de modificación da demarcación e planta xudicial ten como único eixo rector, baixo o pretexto dun suposto aforro, a redución da Administración, orientada en última instancia ao desmantelamento do servizo público da Xustiza”.

Así, explica que a proposta “afirma que a implantación do novo modelo condiciona o gasto que as Administracións Públicas poidan realizar en mellora dos medios materiais ao servizo da Administración de Xustiza, sendo así que devandito gasto deberá localizarse nos edificios e instalacións que han de alberga-las sedes reflectidas na presente Lei e soamente nelas, que estarían só radicadas nas capitais de provincia”.

O anteproxecto de Lei prevé a creación de Tribunais de Instancia, de ámbito provincial, que asumirán todas as competencias actuais dos xulgados. Segundo a deputada, isto “provocará, practicamente, a desaparición dos partidos xudiciais e, con iso, de decenas de órganos xudiciais”.

Seara destaca que, se se mantén a lei de Planta Xudicial, tamén “se encarecerán os procesos e se provocará un grande prexuízo ao medio rural e a provincias como Ourense, na que os cidadáns terán grandes dificultades no acceso á Xustiza”.

Por iso, a deputada socialista esixe a Catalá “que aclare canto antes se desaparecerán ou non os partidos xudiciais”; e lembra que o seu antecesor, Gallardón, “veu no verán a Galicia a aplaca-los ánimos e contentar a Feijóo, pero todo apunta a que os partidos xudiciais se converterán en meras sedes”, considerando, xa que logo, “absolutamente necesario que o novo ministro explique os seus plans”.

Miguel Fidalgo pide que o Goberno central retire de tramitación a modificación da Lei de Demarcación e Planta Xudicial, que fai desaparece-los Partidos Xudiciais e Xulgados de Paz en tódalas comarcas da nosa provincia

O noso senador ,Miguel Fidalgo, alédase do cese do ministro que xestionou importantes retrocesos en dereitos e liberdades que forman parte do sistema democrático, en nome da dereita máis retrógrada. Por iso considera que é o momento de retomar tódalas reformas xudiciais, e recolle-lo clamor dos colectivos de avogados, fiscais, traballadores da Xustiza, organizacións sindicais e partidos políticos.

Fidalgo coida que o PP debe retirar inmediatamente a lei que suprime os partidos xudiciais, e que afecta moi gravemente á nosa provincia, xa que supón a desaparición da estrutura actual nas comarcas de Ribeiro, Carballiño, A Limia, Verín, Valdeorras, Trives-Caldelas, Bande e Celanova. A iso hai que sumarlle a desaparición dos Xulgados de Paz e Rexistro actuais, pola súa privatización.

Fidalgo critica o cinismo de Feijóo, cómplice desta medida, que intenta despistar dicindo que se mantén o nome duns partidos xudiciais nos que desaparecen xuíces, secretarios, axentes e demais persoal, e deixa de celebrarse a actividade actual.

O senador anunciou novas preguntas, tal como suxeriron as plataformas en defensa dos partidos xudiciais, e informou de que presentará na Cámara Alta unha moción concreta en defensa de cada un dos partidos xudiciais que existen na provincia.

Fidalgo estima que a segunda lei que o PP debe derrogar é a Lei de Taxas aprobada, que está impedindo que os cidadáns sen recursos poidan defenderse ante as inxustizas que poidan sufrir. O PP divide a sociedade entre cidadáns con diñeiro, que teñen dereitos e cidadáns, e sen cartos, que non teñen dereitos.

Así mesmo, reclamou que se paralice a tramitación da modificación da Lei de Asistencia Gratuíta, que pon imposible a asistencia letrada de oficio para as persoas sen recursos, ademais de excluír a moitos colectivos e persoas ás que deixa sen a posibilidade de defende-los seus dereitos ante a Xustiza, prexudicando aos profesionais máis próximos e pequenos despachos de pobos e cidades.

En definitiva, o senador considera que este é o momento de parar este retroceso en liberdades e dereitos fundamentais para un estado democrático, tendo en conta as peticións dos colectivos e a sociedade civil.

Blanco afirma que “coa abstención non se cambian as cousas” e demanda “rebelarse contra a resignación e o conformismo de Rajoy e Feijóo”

nuevo-1

O candidato do PSdeG ao Parlamento Europeo, José Blanco afirmou esta mañá en Ribadavia que “coa abstención non se cambian as cousas”, porque iso significa “que decidan por ti outros”, polo que demandou á cidadanía “rebelarse contra a resignación e o conformismo de Rajoy e Feijóo”, xa que “se o PP segue recortando, recortará ata o aire que respiramos”.

Blanco visitou esta mañá a Feira do Viño do Ribeiro acompañado do alcalde da vila, compañeiro Marcos Blanco, e deputados e cargos provinciais. Alí subliñou que o sector do viño é un dos principais xeradores de economía e emprego en moitas zonas de Galicia, por iso demandou “incentivos e axudas, e non lastres”.

Afirmou que traballará para forzar ao Goberno a que rexeite de plano a proposta da súa Comisión de Expertos de establecer un imposto para o viño. Denunciou que “Rajoy xa subiu cincuenta impostos”, e replicou “basta xa”, destacando que unha suba de impostos “faría cae-lo consumo de viño en España e dificultaría as exportacións”.

Blanco denunciou que “grazas” á xestión de Arias Cañete “os agricultores e gandeiros galegos van a recibir 140 millóns de euros menos ata o 2020 pola nefasta negociación que fixo da Política Agraria Común en Europa, e polos criterios de reparto de axudas que impuxo en España”. Nese senso, o compañeiro defendeu que é necesario “cambia-la politica agraria común que vén de aproba-la UE e Arias Cañate, xa que é prexudicial para os gandeiros galegos”, e sostivo que moitas das axudas que aproba a UE “son concedidas a grandes terranentes que nin traballan e nin viven do campo”.

Por iso anunciou que traballará no Parlamento Europeo “co fin de cambia-los criterios, que son un lastre para o desenvolvemento do noso sector primario”, lembrando que o sector do viño é un dos principais xeradores de economía e emprego en moitas zonas de Galicia, e para o que sostivo que “o que necesita son incentivos e axudas, non lastres”.

Blanco demandou un “lobby” galego para defende-los intereses de Galicia en Europa, pero criticou que Feijóo só quera “dividir”; “non quere sumar para traballar por este pais”, insistiu.

O candidato afirmou “o meu compromiso é ser altofalante das necesidades e demandas dos nosos sectores produtivos no Parlamento Europeo, e, por suposto, do sector do viño; un sector que aporta valor engadido, calidade e imaxe de marca a Galicia”.

Seara sinala que a desaparición dos partidos xudiciais foi a “crónica anunciada do golpe mortal á Xustiza”

Spanish_gavel

A nosa deputada no Congreso, Laura Seara, lamenta que hoxe sexa xa realidade, nun anteproxecto de Lei, a desaparición dos partidos xudiciais. Este feito, unido ao “taxazo” xudicial, valóraos como unha “patada definitiva ao dereito dos cidadáns a tutélaa xudicial efectiva e a un acceso igual á Xustiza”.

Seara lembra que se trata “dunha crónica anunciada do golpe mortal á Xustiza”. Neste senso, incide en que “os socialistas xa advertimos hai dous anos” das intencións do Goberno central de “suprimi-los partidos xudiciais existentes para crear un único partido xudicial por provincia”. Porén, “o Goberno intentou realizar esta manobra, que atenta de novo contra os dereitos dos cidadáns, de forma velada; pero os socialistas levamos dende o 2012 avisando das verdadeiras intencións do PP, que lamentablemente por fin viron a luz”.

Lembra a compañeira que, tanto ela como outros deputados socialistas viñeron presentando no Congreso, desde hai dous anos, multitude de iniciativas parlamentarias solicitando ao Goberno central explicación sobre a desaparición dos partidos xudiciais. En tódalas respostas parlamentarias, “o Goberno escorreu o vulto, dicindo que só se trataba dun informe e non dunha proposta en firme”. Xa que logo, censura que mentiron e que hoxe a decisión xa estea no anteproxecto de Lei.

A deputada sinala que en varias cabeceiras de partidos xudiciais como Celanova, Ribadavia e Xinzo se fixeron mobilizacións por parte dos funcionarios, outros colectivos e cidadáns de a pé, contra a supresión de devanditos partidos, pero o Goberno central “negouno todo e esperou a agora asesta-lo golpe mortal”.

Seara explica que o anteproxecto do Goberno liquida os partidos xudiciais coa creación dos tribunais “provinciais de instancia”, que serán os que asumirán as competencias actuais dos xulgados e en todos os órganos xurisdiccionais. “O ámbito territorial deses novos tribunais será provincial, desaparecendo así a práctica totalidade dos partidos xudiciais e, con iso, decenas de órganos xudiciais”. Esta situación “provocará situacións paradoxais, como as de Santiago, que sendo a capital de Galicia podería quedar desposuída de órganos xudiciais que agora teñen sé nesa cidade, ou a da de Vigo, que non tería a sé” da súa provincia.

Resalta tamén a compañeira que, respecto de Galicia, e especialmente a Ourense, polas súas especiais características de ruralidade, e dispersión e envellecemento poboacionais, a supresión dos partidos xudiciais supoñerá un total afastamento dos cidadáns á Xustiza, que só a verán “de lonxe”.

“Trátase dun ataque brutal, outro máis, por parte do Goberno do PP, a dereitos fundamentais dos cidadáns, neste caso á Xustiza, que ven como perden o dereito a unha Educación publica gratuíta e de calidade, dereitos en Sanidade, o dereito ao emprego e, en moitos casos ata a unha vivenda digna, e tamén o dereito á Xustiza; un retallo continuo de dereitos e liberdades que é o sinal de identidade do Goberno do PP de Rajoy”, lamenta.

Seara insta ao PP a que vote contra un imposto para o viño

ribeiro_á_beira_do_Miño_-_Galiza

A deputada socialista no Congreso pola nosa provincia, Laura Seara, instou ao ministro de Agricultura e ao grupo do PP nesa Cámara, a votaren a favor dunha moción rexistrada nela polo PSOE (e que será debatida o vindeiro martes) na que pedimos “asegura-lo mantemento do actual sistema de módulos e a fiscalidade cero para o viño”, así como “asegura-los actuais tipos impositivos do IVA da alimentación, sen que se produzan subidas, nin no tramo superreducido nin no reducido”. O debate desta moción terá lugar o vindeiro martes.

“Coa votación desta moción poderemos comprobar se é certo que Cañete e o PP están en contra do imposto do viño ou se, pola contra, e como é xa habitual no PP de Madrid e no de Galicia, din unha cousa e votan a contraria” explica a compañeira.

Como deputada ourensá, Seara resalta “a alta importancia que o viño ten en Ourense, tanto dende o punto de vista económico, como cultural”, e apunta que “o establecemento dun imposto ao viño sería moi prexudicial para o Medio Rural e para as familias que viven do viñedo”.

Neste senso, destaca “o esforzo que o sector vitivinícola realizou para a súa modernización”, e considera que “o pago a ese esforzo non pode ser unha traba ao seu desenvolvemento, e que claramente danaría os intereses do sector”. Por iso, a deputada anunciou a presentación de novas iniciativas parlamentarias.