Comarcas

O PSOE de Ramirás agradece aos veciños a unión amosada para deter as intencións de “ABanca” de pechar a oficina de Villavidal

15/03/2017
By

Isabel Gil, Portavoz socialista, está segura que só a presión veciñal puido acadar que se manteñan as condicións de apertura actuais

Os socialistas denuncian a actitude escurantista do Alcalde, quen se apresou a desconvocar a mobilización prevista pese a non ter a confirmación por escrito dos directivos da entidade

 

Ourense, 14 de marzo de 2017. Dende o PSOE de Ramirás consideran que o escurantismo co que o alcalde está a levar toda a cuestión da redución de atención ó público da oficina de “ABanca”, indica que xa tiña acordado ceder nas condicións de apertura. Co remate, onte pola mañá, dunha nova xuntanza con directivos da entidade bancaria, quedou máis en evidencia, se cabe, a pouca gana do alcalde de estar xunto ao seu pobo reivindicando o mantemento do servizo. Tal como relata a Portavoz socialista en Ramirás, Isabel Gil, a pesares de que nesa reunión non se adquiriu un compromiso firme, xa que quedou pendente de confirmar por escrito por parte dos directivos do banco; ó alcalde faltoulle tempo para desconvocar a manifestación prevista. O que se deduce de toda a actitude amosada polo alcalde popular de Ramirás é que non ten a valentía suficiente para defender, pase o que pase, os intereses dos veciños e veciñas do concello que preside.

A falta de información e transparencia por parte deste goberno é tanta que os representantes socialistas se tiveron que enterar por outras fontes, da desmobilización, antes de que o Alcalde dese a cara. Todo apunta a que as boas intencións de actuar conxuntamente neste tema de defensa dun servizo fundamental para a cidadanía, quedaron en nada. Tal como lembra Isabel Gil, “Xa dende o inicio do problema tivemos a sospeita de que o Alcalde prefería que nada se soubese e negociar el cos do banco e ceder sen que houbese mobilización cidadá. Canto menos ruído mellor para non ter que dar a cara polo pobo que goberna” . Sen embargo, as circunstancias foron desfavorables para o rexedor posto que os socialistas lideraron a iniciativa de rexeitamento do peche que pretendía “ABanca” e non tivo máis remedio que unirse para non quedar mal. Tanto Pleno Extraordinario coma as medidas de presión acordadas foron iniciativa do PSOE de Ramirás e non van claudicar ante o que pode ser unha tentativa de acalar a protesta dos veciños e veciñas.

Polo momento, os socialistas queren agradecerlle a todas as veciñas e veciños do concello, aos mozos que fixeron súa a protesta en redes sociais e a todas as persoas que se mobilizaron, todo o esforzo realizado posto que están seguros de que a entidade bancaria non desistiría da súa intención de peche senón fose pola presión cidadá. De momento, dende o PSOE indican que só teñen a confirmación de que se vai manter o servizo tal cal está (5 días á semana e unha tarde) ata dentro de 3 ou 4 meses, que se van reunir de novo para avaliar a situación. Esta medida provisional fai pensar que as intencións da entidade bancaria non mudaron pero que, polo momento, non van levar adiante a redución ou peche da oficina de Villavidal. Por isto, dende o Grupo Municipal Socialista de Ramirás anuncian que van estar vixiantes e á expectativa do que aconteza nos vindeiros meses, fiscalizando a cuestión e asegurándose que non hai a máis mínima modificación no acordado. Os socialistas queren deixar claro que non van escatimar en accións se ao final, dende a entidade bancaria, non cumpren coa súa palabra.

Para o PSOE de Ramirás e para a súa Portavoz esta cuestión é fundamental por varias razóns, non só pola estrutura poboacional do concello, avellentado e rural, senón pola supervivencia dos negocios e empresas do municipio e o desenvolvemento económico presente e futuro de Ramirás. Por outra banda, Isabel Gil tamén quere sinalar que o Bloque, terceira forza política na Corporación, non pode ser cómplice de quen queira acalar a cuestión, é dicir, do Alcalde, quen goberna en minoría. É fundamental que o socio nacionalista de goberno do PP en Ramirás, que tanto din defender os servizos no rural galego, tomen parte polos intereses do pobo que os escolleu como representantes.

Para finalizar, Gil, quen tamén é deputada provincial pola comarca, quere que Baltar non agoche a cabeza ante esta problemática xa que se supón que é a súa obriga defender os servizos no rural dos concellos aos que ten que prestar asistencia e axuda. Tal como está configurada a provincia, coa existencia de numerosos concellos pequenos e eminentemente rurais, a existencia da institución provincial só se xustifica se destina parte do seu cuantioso orzamento a asistir, apoiar e axudar a estas entidades, defendendo a pervivencia dos servizos públicos que se prestan á cidadanía.

O PSdeG-PSOE de Ourense mantén un encontro coa Mesa Intersindical de Bombeiros de Galicia para traballar na mellora do servizo na provincia

15/03/2017
By

Ourense sería a única provincia do Estado cos seus bombeiros privatizados se prospera o rescate da xestión no que traballan as outras tres deputacións de Galicia

Os socialistas, que xa defenderon a xestión pública dos parques do consorcio provincial, insisten en mellorar os servizos prestados e as condicións dos traballadores

REUNION FRANCISCO FRAGA MESA INTERSINDICAL BOMBEIROS

 

Ourense, 14 de marzo de 2017. O voceiro do PSdeG-PSOE na Deputación de Ourense, Francisco Fraga,mantivo un encontro con Xabier Villar, Álvaro Negreira e Óscar Rodríguez, representantes da mesa intersindical de bombeiros de Galicia, co fin de traballar conxuntamente para mellorar o servizo que prestan os catro parques comarcais da provincia.

Os representantes dos bombeiros galegos expuxeron as súas principais demandas e alertaron dos riscos da xestión privada deste servizo. De feito, dende a mesa intersindical están a traballar coas deputación da Coruña, Lugo e Pontevedra para rescatar as concesión dos seus parques comarcais a medio prazo. Un informe xurídico conxunto avalou o proceso para ese rescate e, actualmente, tamén están elaborando un informe económico que concretará os custes e beneficios exactos do proceso.

Os socialistas de Ourense esperan que a Xunta de Galicia non poña trabas. Mentres, a Deputación Provincial permanece totalmente descolgada deste proceso de rescate aludindo a informes –ninguén os viu– que, supostamente, botan por terra o cambio no modelo de xestión dos parques da provincia. Sen embargo, dende o colectivo de bombeiros recordan con contundencia que a xestión pública suporá un aforro medio duns 100.000 euros o ano por parque (de media teñen un custe anual de entre 800.000 e 900.000 euros); uns cartos que poderían ser destinados posteriormente a mellorar a servizo que se presta ós veciños e veciñas.

O PSdeG-PSOE da Deputación xa aludiu en numerosas ocasións o informe comparativo dos parques do Deza (xestión pública) e Valdeorras (xestión privada) elaborado en 2015. Ese extenso documento conclúe que o parque dezano ten un custe medio anual duns 125.000 euros menos que o parque de Valdeorras, prestando exactamente os mesmos servizos co mesmo persoal e idénticas instalacións. Entre os problemas derivados da xestión privada, os bombeiros galegos denuncian persoal insuficiente, condicións laborais precarias, carencia de condición de autoridade e, sobre todo, a falta de coordinación entre os distintos corpos de emerxencias. De feito, se os parques das comarcas se integran na xestión pública, os efectivos traballarán baixo o mesmo protocolo e cos mesmos sistemas de intercomunicación.

Francisco Fraga asegura que “as consecuencias negativas da xestión privada no consorcio provincial de Ourense acabamos de velas na selección de persoal para o parque do Carballiño”. “O proceso selectivo foron unhas probas baixo a apariencia de igualdade e publicidade que logo foron obxecto de múltiples queixas polo seu escurantismo e supostos casos de enchufismo”, advirte.

Os socialistas da Deputación levan tempo traballando na fiscalización do servizo de bombeiros que se presta fora da capital da provincia e, trala reunión coa mesa intersindical, tamén porán o foco “nos posibles incumprimentos da empresa á que foi adxudicada a xestión e no cambio de modelo de xestión dun servizo e un persoal que deberían ser integramente públicos”. Na actualidade, Galicia é a única comunidade que ten privatizado este servizo de emerxencias e se as outras tres deputacións galegas reverten a situación dos seus parques, Ourense pasaría a ser a única provincia do Estado cos seus bombeiros controlados por unha empresa privada.

O PSOE denuncia o desmantelamento do Concello de Piñor

14/03/2017
By

Os socialistas coidan que o traspaso de servizos á Mancomunidade parece indicar unha posible cadea de favores

Piñor, 13 de marzo de 2016. Dende hai dous anos, o Concello de Piñor, ten a sorte de contar con dous alcaldes, sen embargo, o que a priori podería ser unha vantaxe, está a converterse na súa desgraza. Despois de privatizar o velorio, encarecendo o que pagan os usuarios, de ceder a recadación da auga á Deputación; o goberno bipartito de Piñor quere desfacerse dos servizos sociais e pasarllos á Mancomunidade. Dende o Grupo Municipal Socialista asisten estupefactos a como todo o traballo conseguido durante anos, todos os servizos municipais de alta calidade que se estaban a prestar ós veciños e veciñas, son desmantelados, un tras outro.

O que o Alcalde e o Tenente-Alcalde queren facer pasar coma aforro e eficiencia económica non é máis que non ter ganas de traballar nin de asumir as propias responsabilidades. Namentres noutros concellos, varios do PP, se queixan do caros que saen os servizos mancomunados e por iso se foron da Mancomunidade, o de Piñor quere retroceder no tempo e desentenderse das competencias propias. Dende o PSOE de Piñor pregúntanse a que se vai dedicar un Alcalde que prometeu traballar coma tal 24h/7días se cede ou privatiza todos os servizos públicos que ten que dar o concello. Posiblemente a resposta, apuntan os socialistas, estea na afección do rexedor por pasear todos os eventos,saraos e cuchipandas.

Dende o PSOE de Piñor non entenden como se pode botar por terra e renunciar á xestión duns servizos sociais tan necesarios no rural e que son exemplo de boas prácticas municipais. Respecto do suposto aforro non hai evidencia algunha de que así vaia ser, máis ben, de todo o contrario. Ós únicos que pode beneficiar tal decisión son ós que seguen defendendo as mancomunidades como axencias de colocación de afíns e parentes, posto que cantos máis concellos aporten recursos, máis doados serán de manter os seus chiringuitos. De todos e todas é sabido como se selecciona o persoal das Mancomunidades e resulta, cando menos, curioso que a filla de Uxío Rodríguez estea a traballar no Irixo, contratada pola Mancomunidade ó tempo que ésta é presidida por Manuel Cerdeira, tenente-alcalde popular da localidade veciña. Hai que lembrar que o Partido Popular goberna en Piñor grazas ós votos do partido do Tenente-Alcalde, impedindo que gobernen os socialistas, pese a seren a lista máis votada.

Conclúe Francisco Fraga, Portavoz socialista en Piñor: “Se o único que saben facer é desfacerse dos servizos que tanto esforzo custou poñer en marcha no noso concello, o mellor favor que lle poden facer ós veciños e veciñas é irse para a súa casa. Nin saben nin queren, só andan ao seu”.

O PSOE de Rairiz reclama a posta en marcha dun mercado artesanal na aldea de Congostro para favorecer a súa posta en valor

13/03/2017
By

Ante a falta de actividades socioculturais organizadas polo concello, Pablo Lorenzo propón a creación deste mercado co obxectivo de promocionar a riqueza patrimonial e paisaxística

A posta en marcha desta iniciativa tamén favorecería aos comerciantes locais, exentos de taxas e impulsaría a posta en valor dos seus productos

2017-03-07-PHOTO-00006403

Ourense, 12 de marzo de 2017. O PSOE de Rairiz vén de rexistrar unha moción instando ao goberno municipal para que poña en marcha un mercado artesanal na aldea de Congostro, co obxecto de valorizar o traballo de recuperación da mesma. Tal como comenta o voceiro dos socialistas en Rairiz de Veiga, Pablo Lorenzo, a aldea está nun entorno natural privilexiado e chama a atención dos visitantes polo esmero que se puxo na súa recuperación e posta en valor dos canastros do lugar. Para os socialistas é necesario que se adopte unha medida que dea un último pulo á promoción turística do pobo ao tempo que se oferta un medio para desenvolver unha actividade económica tan atractiva coma o comercio.

Tamén cómpre sinalar que a aldea de Congostro forma parte dun plan de valorización turística e patrimonial que está sen concluír por parte do goberno. Por unha parte, foran iniciados os traballos de soterramento do alumeado público, coa fin de mellorar esteticamente o entorno e aínda non foi rematado. Por outra, o Concello de Rairiz encargou, no 2011, a redacción dun proxecto arqueolóxico que incluíse un plan de actuación para a posta en valor a Vía Nova entre Congostro e A Saínza e que tivo un custo duns 12.000 euros. Nembargante, non se fixo un aproveitamento real desta inversión. De feito, non se están a aproveitar os recursos e potencialidades dun lugar coma Congostro do que parten 3 rutas de sendeirismo que percorren as zonas do concello mellor conservadas e de maior atractivo paisaxístico. Dáse a circunstancia, ademais, que Rairiz é o concello que conta con máis casas de turismo rural da comarca sen que este feito sexa realmente aproveitado.

Por todo isto, Pablo Lorenzo, considera que é hora de que o Concello de Rairiz poña en marcha actividades socioculturais, das que hoxe carece, que poña en valor o rico patrimonio e paisaxe do municipio.

No caso de Congostro, os socialistas de Rairiz coidan que hai que crear, fomentar e promocionar un mercado anual que sirva para dar a coñecer os produtos artesanais da zona. Así mesmo, e para que a iniciativa non quede en simples declaracións de intencións, o PSOE propón que se destine unha partida orzamentaria, neste ano, para a promoción e organización deste mercado que valorizaría o traballo de recuperación da aldea de Congostro, aparte de dar apoio aos artesáns e produtores locais. Neste senso, tamén se reclama a exención de taxas para estes comerciantes interesados en participar neste mercado.

 

Xinzo aproba a cesión da pista a Vilar de Barrio grazas á iniciativa impulsada polos socialistas e a pesares das reticencias do Alcalde

11/03/2017
By

A deputada e voceira, Elvira Lama, celebra a unanimidade e recorda que o principal obxectivo e mellorar a seguridade dos usuarios desta perigosa estrada que atravesa tres concellos

“Os índices de perigo de accidente son os mais altos de toda a provincia de Ourense”, concluíu un informe da Deputación trala reclamación do PSdeG-PSOE

Ourense, 10 de marzo de 2017. Un novo logro que repercutirá na mellora dos servizos prestados ós veciños e veciñas. Iso é o que acadaron novamente os socialistas, despois de que o pleno do Concello de Xinzo de Limia aprobase hoxe, co voto favorable do PSdeG-PSOE, PP e Xinzo Adiante, e a abstención do BNG, a integración da estrada OU-P-0000 na rede viaria dependente da Deputación de Ourense. Este traspaso de titularidade ó inventarioprovincial é fundamental para proceder a deseñar e executar as melloras urxentes de seguridade que require esta vía –ata o de agora en mans dos concellos de Xinzo, Sarreaus e Vilar de Barrio– de 10 quilómetros de lonxitude e que ten unha elevada sinistralidade. Nos últimos oito anos houbo 13 accidentes con cinco vítimas mortais e unha vintena de feridos.

deputada e voceira, Elvira Lama, recorda que se trata dunha pista “fundamental para as comunicacións destes tres concellos que, ademais, ten unha importante taxa de circulación de vehículos agrícolas e camións”. “Co traspaso á Deputación lograremos as reformas necesarias para facer reformas fundamentais e para implantar maiores medidas de seguridade”, recorda. “Atallar a elevada sinistralidade e mellorar a seguridade dos usuarios e usuarias é o noso principal obxectivo”, recorda a tamén voceira do grupo municipal socialista de Xinzo.

Lama explica que o pleno da Deputación asumiu o pasado mes de xaneiro a responsabilidade de facerse cargo da vía para regularizar a situación, despois de ter coñecemento dun informe da Xefatura de Tráfico no que se concluía a “urxencia” na mellora xeral da seguridade e na instalación de barreiras nas curvas e zonas mais perigosas. A moción tamén insta ós concellos a mellorar a sinalización das numerosas pistas que cruzan perpendicularmente a estrada.

 

O PSdeG-PSOE e a corporación de Ramirás impulsan unha manifestación o 14 de marzo para reclamarlle a ABanca que manteña a oficina nas condicións actuais

10/03/2017
By

A voceira socialista, Isabel Gil, participou nunha xuntanza con directivos da entidade, na que seguen mantendo o recorte de días de atención ao público pese á movilización cidadá de rexeitamento

Dende a entidade indicaron que o vindeiro 17 de marzo porán en marcha a redución que afecta a un servizo fundamental para a veciñanza e negocios

 

2017-03-08-PHOTO-00000772 (1)

 

Ourense, 9 de marzo de 2017. O PSdeG-PSOE de Ramirás, coa súa portavoz á fronte, vén de participar nunha reunión cos directores provincial e de zona de Abanca, para tratar a cuestión da redución de apertura da súa oficina no municipio. Dita xuntanza foi unha das accións acordadas pola corporación de Ramirás co obxectivo de manter o servizo nas condicións actuais, despois da mobilización cidadá que provocou a celebración dun pleno extraordinario solicitado polo Grupo Municipal Socialista, facéndose eco da alarma social xerada polo anuncio da entidade. Tanto nese pleno como no celebrado con posterioridade, acordouse que se ían facer todas as accións necesarias para asegurar que a oficina abra todos os días, tal como viña sendo ata agora.

Nembargante, tal como relata a voceira Isabel Gil, nin a recollida de sinaturas nin os contactos realizados logran deter as intencións de Abanca, posto que os seus responsables lle anunciaron onte que ían por en marcha o novo horario, coa apertura de tan só dous días á semana, o vindeiro 17 de marzo. Aos representantes da cidadanía de Ramirás non lle quedou outra que convocar unha manifestación o martes 14 de marzo, ás 11:30, en Villavidal, para reclamar o mantemento do servizo bancario.

Os socialistas de Ramirás entenden que á entidade bancaria “non lle importan as necesidades dos habitantes do concello e só pensan no seu beneficio empresarial, que pasa polo necesario recorte de persoal”. “O mantemento do servizo non é un capricho da xente de Ramirás; é apostar polo futuro do noso concello. As persoas, nun concello rural coma o noso, aproveitan o día que van facer as súas xestións bancarias para facer compras ou utilizar outros servizos”, recorda Gil. “As PEMES só terán opcións de seguir cos seus negocios se teñen un servizo bancario para os seus trámites”, advirte.

“Trátase de apostar polo desenvolvemento económico dun municipio discriminado respecto doutros da contorna, onde, nalgún caso, hai menos habitantes e sen embargo si que lle manteñen a apertura das sucursais”, relata Gil. A edil do PSdeG-psoe anuncioulle aos directivos do banco que están a “menosprezar” aos veciños e veciñas de Ramirás e que, dende o Grupo Municipal Socialista, van loitar para que se respecten os seus dereitos.

Ademais engade que a manifestación só é unha das accións programadas, posto que non van deixar que a entidade “se saia coa súa” e vanse cumprir todos os acordos plenarios, tales coma elevar a cuestión ao resto das administracións , ata que Abanca rectifique. Os socialistas son conscientes dos “métodos de persuasión” da entidade bancaria coas súas grandes contas pero non poden exercer esta discriminación sen que a veciñanza tome cartas no asunto. Dende o Grupo Municipal Socialista de Ramirás agardan unha numerosa asistencia á manifestación convocada e autorizada, onde se repartirán folletos informativos, posto que esta redución de horario está a causar unha grande preocupación entre a poboación do municipio.

 

O PSOE de Xinzo denuncia que a vila é a única, entre as meirandes da provincia, que non programou ningún acto que conmemorase o Día da Muller

09/03/2017
By

Elvira Lama considera indignante que o goberno da cabeceira de comarca non teña previsto ningún acto que honre ás mulleres limiás

O único acto que se realizou foi grazas á Asociación Limisi, de diversidade funcional

Xinzo de Limia, 8 de marzo de 2017. Estupor e indignación, estas foron as sensacións que produciron nos membros do Grupo Municipal Socialista coñecer os actos programados polo concello de Xinzo para conmemorar o Día Internacional da Muller: nada, cero. Tal como relata a Portavoz socialista, Elvira Lama, estiveron agardando algún tipo de comunicación por parte do concello, nomeadamente, por parte da Concelleira de Benestar e Igualdade, sen recibir nen a máis mínima información. Foi máis tarde cando membros da Asociación Limisi, de persoas con diversidade funcional da comarca da Limia, lle comentaron que alertados ante a falta de convocatoria por parte do concello, se puxeron en contacto co goberno para, efectivamente, comprobar que o único acto previsto era o que tiña programado a asociación.

“De feito, se non chega a ser pola asociación, relata Lama, non habería ningunha conmemoración nunha vila da entidade de Xinzo”. Segundo denuncian os socialistas de Xinzo, a desidia é tal que só unha concelleira do grupo socialista asistiu a este acto programado por Limisi na praza maior, sen que contasen co apoio do grupo de goberno do PP.

Dende o Grupo Municipal Socialista, consideran intolerable que a cabeceira dunha comarca que ten tantas e tan bravas mulleres incorporadas ao sector agrícola, teña un goberno que non é capaz nin de programar un acto que as honre a elas e ao seu labor. Após a posta en marcha dunha lei socialista, como foi a de desenvolvemento sostible do medio rural, que anima ás mulleres a asumir o liderado nos sectores produtivos primarios, é inaudito que un concello que vive da agricultura non celebre os fitos das mulleres que contribúen ao desenvolvemento económico.

Elvira Lama tamén sinala que, aparte da indignación que produce tal deixadez e falta de sensibilidade, este suceso vénse a sumar aos moitos que se producen no seu labor ao fronte da oposición en Xinzo, posto que é habitual que a Concelleira encargada de Comunicación e deputada provincial, Montse Lama, non comunique nin informe de nada. Sobra dicir que neste caso estaba case eximida de tal obriga ao non existir programación, declaración ou actividade algunha que puxera en valor ás mulleres limiás.

O PP d´O Bolo fai méritos para gañar o premio ó goberno máis nugallán de Galicia tras enviar recibos de taxas de hai 4 anos ós veciños e veciñas

02/03/2017
By

O inoperante goberno local non ten as bases de datos do padrón municipal actualizadas o que provoca importantes desaxustes no cobro de taxas 

Os socialistas do Bolo inician unha campaña informativa porta por porta para informar ós veciños e veciñas dos seus dereitos e das posibles reclamacións

 

Ourense, 1 de marzo de 2017. O portavoz socialista no Concello de O Bolo, Juan Ferreira, ven de anunciar unha campaña informativa, entre a veciñanza, para suplir a inoperancia do goberno municipal do PP. Dada a alarma social xerada entre  veciños e veciñas, ao recibírense facturas polo saneamento da auga con ata 4 anos de atraso, os socialistas decidiron indagar nas causas para informar á cidadanía dos seus dereitos. O servizo de recadación –delegado na Deputación de Ourense– e de emisión de taxas municipais, faise en base dun padrón elaborado polo concello. No caso de O Bolo todo parece indicar que o censo está desactualizado e mal feito, sen atender aos cambios que se producen nos fogares.

A “desidia” do goberno presidido por Manuel Corzo chega ata o punto de non ter as bases de datos ao día, provocando desaxustes nos cobros de taxas, algo moi prexudicial para as economías familiares bolenses. “Os veciños e veciñas tiñan que estar, a estas alturas, informados dos recibos que teñen que pagar pola depuración das augas residuais e dos seus dereitos á hora de reclamar contra os que fosen emitidos de xeito inxusto”, recordan os socialistas do Bolo. O goberno non só da a calada por resposta, senón que se desentende de toda responsabilidade, delegando na Deputación.

Dáse a circunstancia, tal como sinala o portavoz socialista, que nestes casos de delegación da recadación, a institución provincial só pode actuar en base aos datos que lle proporcione o concello, polo que a responsabilidade última é do que goberna no municipio. No caso de O Bolo “as evidencias falan de desgoberno e pura desidia”, insiste Ferreira. Dende o Grupo Municipal Socialista cren que o alcalde pode estar demasiado ocupado atendendo á imputación por presunta prevaricación administrativa coma para centrarse nas necesidades da vila, polo que lle suxiren que “deixe paso a quen si queira ocuparse dos problemas que afectan á veciñanza”.

Por todo isto, Ferreira vai iniciar unha campaña informativa, porta a porta, para aclarar dúbidas sobre os recibos emitidos con carácter retroactivo e explicar así  os dereitos de posibles reclamacións ás que poden recorrer. “Ante o abandono aos que os somete o alcalde, o Partido Socialista ofrece asistencia e axuda ante posibles casos de cobros inxustos”, conclúe.

 

O PSdeG-PSOE de Boborás denuncia que o desleixo do goberno local do PP cunha aldea impide o paso de ambulancias ante unha emerxencia

27/02/2017
By

Os socialistas deste municipio da provincia de Ourense xa recolleron e rexistraron no concello as sinaturas dos veciños e veciñas nas que mostran o seu malestar e preocupación

Hai meses que o goberno local prometeu arranxar estes calamitosos camiños pero, polo de agora, esas promesas non pasaron de palabrería barata

foto_boboras

 

Ourense, 26 de febreiro de 2017. Os socialistas de Boborás denuncian que “desleixo” do goberno local do PP cos calamitosos camiños da aldea de arriba de Pazos de Arenteiro, está a por en grave risco a seguridade dos veciños e veciñas, xa que no caso dunha emerxencia sanitaria, unha ambulancia non pode chegar ata as vivendas. Os habitantes desta zona reclaman que remate o “abandono” ao que están sometidos por parte do goberno municipal.

E que, hai meses que o goberno local prometeu arranxar estes camiños pero, polo de agora, esas promesas non pasaron de palabrería barata, a pesar de que durante o inverno, as sendas se volven moi perigosas pola choiva e polas evidentes deficiencias. O socialista, Javier Lamas, recorda que “aínda que o turismo non chega á aldea de arriba de Pazos, esta obra é moi necesaria porque alí vive xente de avanzada idade, co risco que comporta para a súa seguridade andar a diario por camiños en estado ruinoso ou os graves problemas de acceso dos servizos de emerxencia”.

O PSdeG-PSOE de Boborás recorda que “non hai escusas para atrasar máis o arranxo porque a veciñanza cedeu numerosos muros para as obras prometidas por edís e cargos do PP en numerosas ocasións”. Durante os últimos meses, os socialistas deste concello de Ourense recolleron e rexistraron as sinaturas dos veciños e veciñas para que, tanto o alcalde, Cipriano Caamaño, coma o seu equipo de goberno, teñan constancia documentada do malestar e non se dediquen a desmentir o evidente problema de acceso pero, sobre todo, as deficiencias de seguridade que se están a dar na aldea de arriba de Pazos. “O peor de todo e que o PP tampouco ten intención de facer nada, segundo as propias palabras da concelleira, Patricia Torres, que dixo que estaban en perfecto estado”, insiste Lamas.

Os habitantes están indignados co trato que están a recibir do executivo local do PP, que traballou activamente nos camiños e espazos públicos da aldea de abaixo, pero non fixo “absolutamente nada” na aldea de arriba. Unha mera comparativa fotográfica do estado actual das sendas nas dúas aldeas destapa a “evidente e intolerable marxinación” a que están sendo sometidos, cos riscos  que implica esta inacción municipal da que alertan os socialistas.

 

O PSdeG-PSOE de Allariz propón a adopción dunha ordenanza de transparencia que asegure o acceso á información por parte da veciñanza

24/02/2017
By

 

Zaida Rodríguez, anuncia a formulación dunha pregunta en pleno para que os veciños e veciñas as coñezan as medidas do goberno local ante o grave suceso acontecido en San Mamede de Urrós

 

Ourense, 23 de febreiro de 2017. Co gallo de mellorar a saúde democrática e ser exemplo de boas prácticas, a portavoz socialista no Concello de Allariz, Zaida Rodríguez, leva, para o seu debate en Pleno, unha moción encamiñada a aprobación dunha ordenanza municipal de transparencia e acceso á información. Coa intención de que Allariz lidere a implementación de medidas que melloren a vida democrática do municipio, a voceira do PSdeG-PSOE quere que se afonde nas medidas encamiñadas a render contas ante a cidadanía. Tal como destaca, “non abonda con cumprir o estipulado na Lei de Transparencia nin cos prazos marcados polo goberno para adaptarnos á mesma, debemos ir un paso máis aló e facer realmente comprensible e accesible toda canta información sexa de interese para os nosos veciños e veciñas”.

Calquera concello, con independencia do seu tamaño, pode mellorar substancialmente en transparencia. Ese é o caso de Allariz, no que se puxeron en marcha medidas a prol dunha maior transparencia nos asuntos públicos e se apostou por estes principios. Nembargante, tal como defende a voceira socialista, non se pode perder ritmo e hai que estar permanentemente innovando e mellorando esta cuestión vital para a vida democrática.

Tal como é coñecido, o pasado 10 de decembro, rematou o prazo de dous anos concedido para adaptarse á Lei de Transparencia. Dende ese día, todos os concellos teñen a obriga legal de teren publicados, nas súas páxinas web, “de maneira clara, estruturada e entendible”, os orzamentos municipais e os salarios dos seus cargos, contratos asinados e subvencións concedidas, entre outros datos. Sen embargo, para cumprir coa normativa, non abonda con publicar estes datos, sen traballalos. “Cómpre que a información que se comparte coa cidadanía sexa comprensible, de fácil acceso e de xeito gratuíto”, engade Zaida Rodríguez. Por isto, o PSOE, insta a que o pleno adopte medidas que faciliten esa accesibilidade e comprensión.

Para os e as socialistas de Allariz, é imprescindible que para mellorar en termos de transparencia e bo goberno, se aposte pola rendición de contas ante os cidadáns. “A crise do noso modelo de democracia que vimos atravesando, onde se pon en cuestión o papel dos representantes políticos, fai que sexa máis necesario ca nunca, apostar pola transparencia na xestión e que entendamos a necesidade de combinar os instrumentos da democracia representativa cos da democracia participativa. A cidadanía non se conforma con ser un mero votante cada certo tempo, esixe participar na toma de decisións e fiscalizar as nosas accións en canto que representantes”, declara Rodríguez. Para a voceira socialista, xa non se trata dunha oportunidade de mellorar a forma de gobernar, senón dunha necesidade derivada das demandas da cidadanía, á que se debe responder dende as institucións públicas, sobre todo, dende a administración máis próxima aos veciños e veciñas. O obxectivo último é recuperar a lexitimidade perdida e a confianza cidadá así coma previr eventuais casos de corrupción e reforzar a eficiencia das administracións públicas nas que, lembremos, se xestionan os recursos de todas e todos.

Nos tempos que corren, reiteran dende o PSOE alaricano, cómpre airear as institucións, abrilas á cidadanía, que os veciños e veciñas se sintan parte da xestión diaria do seu concello. Por isto, Zaida Rodríguez, insta a que o concello de Allariz se poña á vangarda destas medidas de transparencia e bo goberno, apostando por unha administración local máis achegada ás demandas e necesidades da cidadanía. Por todo isto, os e as socialistas de Allariz reclaman ó pleno que o concello se adhira ao portal de transparencia da FEGAMP e que aprobe unha ordenanza propia de transparencia, acceso á información pública e reutilización de datos.

Asalto en San Mamede de Urrós

Nesa mesma sesión plenaria, a concelleira socialista preguntará polo acontecido na parroquia de San Mamede de Urrós, no que dous veciños foron asaltados, agredidos, torturados, extorsionados e roubados, veu a convulsionar a vida diaria dos veciños e veciñas de Allariz ao ver comprometida a súa seguranza. Respecto a este desgrazado acontecemento, os veciños e veciñas precisan coñecer, pormenorizadamente,o tipo de actuacións que se levaron a cabo para salvagardar a integridade dos e das alaricanos. O temor, fundado, que se instalou nunha poboación avellentada e dispersa, propia do noso país, fai que sexa esixible que o goberno de Allariz dea a coñecer todos as medidas postas en marcha para asegurar a protección dos habitantes do concello. Por todo isto, Zaida Rodríguez demanda, da equipa gobernante, que explique que datos manexa sobre este deplorable suceso e se foi convocada a preceptiva Xunta de Seguridade Local, tal como debe ser oportuno, dadas as circunstancias.