Comarcas

Seara acusa a Pastor de facer “trilerismo”co AVE a Ourense e anuncia que pedirá a súa comparecencia para que explique “a gran mentira” que contou aos ourensáns

A nosa deputada no Congreso, Laura Seara anuncia que pedirá a comparecencia na cámara da Ministra de Fomento, Ana Pastor, para que explique a paralización nas obras do AVE na nosa provincia.

A compañeira lembra que “xa o pasado mes de marzo, os parlamentarios socialistas ourensáns nas Cortes advertimos en rolda de prensa da posibilidade de que se paralizasen as obras do AVE nalgúns tramos que estaban en execución na provincia de Ourense por impagos da Administración; despois advertimos da existencia dun informe de ADIF que cambiaría os proxectos; agora vemos que o tempo nos dá a razón”.

A deputada indica que “cando Pastor chegou ao Ministerio, todos sabiamos onde estaba o AVE: estaba camiño de Ourense, coas mesmas prestacións que os do resto do Estado, cun acceso exterior na cidade de 17 km., dende Taboadela, e cunha estación adxudicada a un dos arquitectos máis presitiosos do mundo: Norman Foster” Pero hoxe, segundo denuncia Seara denuncia “o PP e Ana Pastor converteron a Ourense nun tapete, e o AVE nunha boliña que cada día esconden baixo un gobelete distinto”. Neste senso, a deputada incide na “ensalada de cifras” que o Goberno ofrece nas súas respostas parlamentarias sobre a execución do AVE a Galicia e na provincia de Ourense. Este “mareo de datos contraditorios ten un único e perverso obxectivo: confundir á cidadanía para ocultar que se parou o AVE, e que un ano despois da chegada do PP ao Goberno, xa non se sabe cando nin como chegará; só sabemos que non chegará no 2015 como asinara Feijoo tras chegar á Xunta no 2009”.

Por elo, a compañeira destaca que “a realidade é que, mentres a Ministra Pastor anuncia investimentos pantasma, as empresas teñen que comunicar aos seus traballadores que se paralizarán as obras porque Fomento non paga”, habendo “unha clara e nauseabunda estratexia por parte do Goberno, que tamén é dos ourensáns, para enganar a Ourense e a quen vivimos aquí, con relación ao AVE, como antes fixeron coas pensións ou o IVA”.

Seara recrimina que a Ministra “Pastor non quere vir a Ourense a consensuar; vén a pastorear a esta provincia, con novos enganos, vellas mentiras e unha chea de cifras contraditorias, boliñas e gobeletes; sabe perfectamente que hai consenso hai anos: Ourense quere un AVE de primeira, cunha entrada exterior e unha estación xa adxudicada a Foster; todo está decidido e planificado, e Pastor só ten que adxudicalo, pero non o fai, e apúntase ao trilerismo, coa complicidade do PP de Ourense e a connivencia de Feijóo”.

Pachi Vázquez censura que o PP non empregue o diñeiro público para construir hospitais por unha cuestión ideolóxica

O noso Secretario Xeral nacional, Pachi Vázquez, encabezou a nutrida representación de cargos orgánicos e representantes institucionais dos socialistas sa nosa provincia que, coa súa presenza, manifestaron o seu apoio á convocatoria de concentración da Plataforma pola defensa da Sanidade Pública contra a paralización das obras do CHUO e en protesta polas consecuencias dos recortes en materia de Sanidade.

Vázquez afirmou que “hai diñeiro público para facer Sanidade Pública”, denunciando que non hai un problema económico, senón que se trata “dunha cuestión ideolóxica” do Presidente Feijóo e do PP.

Lembrou que a Xunta deixou douscentos millóns de euros sen executar porque prefire que os hospitais se fagan con cartos privados, xa que “prefiren facilitarlle o negocio e volume de traballo a empresas que nin son galegas”, e que “están privatizando a sociedade”.

O compañeiro advertiu do risco severo de quedarmos sen financiamento europeo para ampliación do CHUO, que vai ligada ós proxectos de innovación tecnolóxica do “Hospital 2050” e “Innova Saúde”: “o modelo de financiamento ao que abocou Feijóo aos servizos sanitarios é un fracaso; a paralización é inevitábel”, recriminou Vázquez ao Presidente e aos responsables de Sanidade do Goberno galego. “En Ourense estamos a piques de perde-lo investimento para modernizar este Plan Director”, afirmou ao mesmo tempo que criticou o procedemento negociado polo que optará a Xunta para o edificio de hospitalización, ao quedar deserta a segunda licitación pola falta de interese que ten para as empresas o feito de que se condicione a xestión integral á obra.

O líder dos socialistas galegos remitiuse ao exemplo de Vigo, onde a parálise das obras está a xerar, como denunciaron máis de trescentos cincuenta profesionais da Sanidade, un aumento das listas de espera, que non suman os 6 000 pacientes que asegurara a Xunta, senón de 22 000. Vázquez convidou aos ourensáns a “face-lo mesmo que fixo a cidadanía de Lugo e de Vigo” e saian á rúa a “defende-lo modelo sanitario público”. Comprometeu a presenza dos socialistas a carón deles, e anunciou unha batería de iniciativas parlamentarias para denuncia-lo “risco real de perde-lo financiamento europeo para o hospital de Ourense”, iniciativas para que “con diñeiro público se fagan obras e instalacións sanitarias públicas”.

O Goberno central confirma a Laura Seara que Ourense perderá os 36 millóns de euros de fondos europeos para o “Hospital 2050” se a Xunta non constrúe o edificio

A preguntas da nosa deputada, Laura Seara, sobre a posibilidade de que Ourense perda os 36 millóns de euros comprometidos de fondos europeos FEDER para o proxecto “Hospital 2050” se non se constrúe o novo edificio do hospital, así como sobre a posibilidade de que devanditos fondos puidesen destinarse a outros hospitais de Galicia, a Secretaria de Estado de I+D+i, Carmen Vea, respostoulle, na Comisión de Orzamentos do Congreso dos Deputados, que “a responsabilidade desta Secretaría de Estado e do Ministerio, respecto dos proxectos do ‘Hospital 2050’ en Ourense e Innova Saude non vai máis aló dos convenios asinados” , que “non é responsabilidade do Ministerio se a Xunta executa o proxecto do ‘Hospital 2050’ de forma distinta”, e que “se o hospital non se fai, dificilmente se podera face-la parte tecnolóxica para a que están destinados os fondos FEDER”.

Seara asegura que “malia que a Sra. Vela xogou ao escapismo, na súa resposta, deixou claro que os trinta e seis millóns de euros comprometidos de Fondos FEDER están ligados ao proxecto ‘Hospital 2050’, pero non á cidade de Ourense e, xa que logo, Ourense podería perdelos”. Do mesmo xeito, a compañeira lamenta que “a Secretaria de Estado deixou patente que o Ministerio lavará as mans se a Xunta decide non executa-lo proxecto en Ourense”, e que “a Sra. Vela foi clara ao afirmar que o custo do hospital, catrocentos millóns de euros, excede dos treinta e seis millóns europeos comprometidos e, xa que logo, que se o hospital non se fai, non se poderán investi-los fondos europeos destinados ao proxecto tecnolóxico”.

A deputada socialista ourensá lembrou que, en novembro do 2011, a Ministra Garmendia asinou convenios coa Xunta para os proxectos “Innova Saúde” e “Hospital 2050” e sinalou que “a Xunta veu afirmando que o proxecto ‘Hospital 2050’ se faría no hospital de Ourense”. Con todo, Seara subliñou que “os fondos europeos están ligados ao proxecto Hospital 2050 pero non están ligados concretamente a Ourense”, e lamentou que “hoxe a Secretaria de Estado confirmou o que temiamos, e que incluso a Xunta pode decidir que fondos, se non se perden, non se destinen ao proxecto en Ourense”

Feijóo, sinalou Seara “veu mareando a perdiz sobre o futuro do Plan Director para o Hospital de Ourense e enganou aos cidadáns pensando que “tirando” dos fondos europeos podería reducir custes na construción do edificio. Neste senso, explicou que “Feijóo, primeiro sacou un concurso que ficou deserto porque impuxo a condición de que a empresa adxudicataria puxese catorce millóns de euros para a construción do edificio, despois sacou outro concurso que condicionaba ao primeiro, e agora a realidade é que Feijoo se atopa con que non ten o cartos para construi-la infraestructura“.

Ademais, a deputada incidiu en que “o prego de licitación de construción especifica que, se os contratos (de xestión) previstos non se chegan a adxudicar e formalizar, a Xunta se reserva a facultade de non adxudica-las obras; é dicir, de lava-las mans”. E “a Secretaria de Estado confirmou os nosos peores temores respecto da perda dos fondos FEDER para o proxecto ‘Hospital 2050’ en Ourense e, o que é peor, advertiu que o Ministerio tamén lavará as mans”.

Os socialistas reclamamos á Consellería de Industria a protección do sector da lousa a través dun segundo plan “renove” de tellados que corrixa os erros da primeira convocatoria

A deputada no Parlamento galego Carmen Acuña, preguntou hoxe pola posta en marcha dun segundo plan tipo “renove” para teitos, de vital importancia para a supervivencia do sector da lousa, especialmente do emprego dos colocadores.

Acuña recriminou ao Director Xeral de Minas da Xunta, Ángel Bernardo Tahoces, a falta de definición sobre o compromiso con ese plan, para o que hai consignados 806 000€, e do que o PP xa comezou a facer publicidade en Valdeorras.

Aproveitou a deputada valdeorresa a ocasión para lembrar que o primeiro plan destas características foi froito do “moito insistir” do Grupo Socialista a través de múltiples iniciativas “que sempre foron votadas en contra polo Grupo Popular no Parlamento de Galicia”. Tamén reprochou a nosa deputada que esa primeira convocatoria xerou problemas, especialmente nos prazos formulados para o seu desenvolvemento, que foron insuficientes.

Agarda a compañeira que estas eivas sexan resoltas cando se poña en marcha o novo plan, se finalmente así o decide a Consellería, e tamén esixiu que a súa convocatoria contemple prazos e requirimentos que faciliten o acceso dos interesados ás axudas en cubertas de lousa, e se empregue o total do presuposto reservado a tal fin no Orzamento.

Os socialistas acadamos o compromiso do Director Xeral de Industria e Minas de acelera-la tramitación para evita-lo colapso que se xerou no primeiro plan polos devanditos problemas nas datas de execución dos tellados.

Carmen Acuña insistiu na importancia de que este segundo plan entre en vigor canto antes, para que poidan entrar na súa aplicación as obras nos teitos que se fagan no verán.

Os socialistas esiximos unha actuación integral na N-525 e recriminamos a Pastor, Rajoy e Feijóo o abandono de Ourense

A nosa deputada no Congreso, Laura Seara, presentou hoxe en rolda de prensa unha proposición no de lei pola que se insta ao Goberno central a aprobar, á maior celeridade posíbel e co orzamento necesario, un proxecto de mellora integral da N-525 ao seu paso pola nosa provincia que mellore o seu estado e garanta a seguridade na mesma.

Xunto á deputada ourensá, compareceron o noso coordinador na comarca de Ourense, Álvaro Vila; Euloxio Fernández, coordinador comarcal d’A Limia e Manuel Rodríguez, alcalde de Coles.

Os catro dirixentes coincidiron en denuncia-lo “abandono” ao que teñen sometido á provincia tanto o Goberno de Rajoy como o de Feijóo e da que é reflexo a “deplorábel” situación en que se atopa a N-525, “unha das arterias básicas que atravesa a provincia”, apuntou Seara.

Os compañeiros criticaron os constantes recortes ou abandonos de proxectos que, iniciados polo Goberno socialista está a realizar o Goberno de Rajoy na nosa provincia, alegando falta de recursos, “cando o que non existe é vontade política” por parte dos populares, en verbas de Seara.

Dende a súa entrada en Galicia pol’A Mezquita ata Dozón, a estrada que vai de Benavente a Santiago de Compostela presenta o tramo con peor estado de conservación e sinalización, afirman os socialistas. Nas comarcas de Monterrei, A Limia e Ourense advertiuse por parte dos propios gobernos locais da mala situación do firme, a presenza de buratos e fendas no asfalto, así como corrementos de terra das cunetas, cheas de maleza na maior parte da N-525.

Salienta a deputada de xeito especial, as dificultades de acceso polo estado do firme dos parques empresariais de Verín, Xinzo e San Cibrao. Destacou ademais como eixos máis degradados os de Mezquita -Verín, Xinzo-Sandiás-Allariz, alto das Estivadas e Taboadela-Ourense-Cambeo.

Os comparecentes criticaron a contumaz negativa da ministra de Fomento, Ana Pastor, no abandono desta vía, “a pesares de que os alcaldes populares de Verín e Monterrei lle tiveran solicitado o acondicionamento ao paso por cadanseus territorios, e agardan que a iniciativa prospere e o Goberno tome conciencia sobre o lamentábel estado desta estrada, na que xa se teñen rexistrado accidentes, incluso con resultado de morte, que xustificarían a inmediata actuación sobre o firme.

Os socialistas puxeron especial énfase no “punto negro de Coles-Cambeo”, exemplo de concentración de accidentes, advertindo que o tramo require unha acción inmediata. Este área ten un elevado nivel de sinistralidade, e as melloras a través de actuacións levadas a cabo nos últimos anos amósanse insuficientes para unha estrada pola que transitan miles de coches tódolos días. O Ministerio, segundo denuncia Seara, deixa no “caixón” un estudio existente sobre este tramo.

A deputada Laura Seara e os dirixentes socialistas que a acompañaron, reclamaron unha “actuación integral e inmediata a través dun plan”. Non aceptan “parches” porque reclaman seguridade para os condutores e habitantes das poboacións pola que discorre esta estrada N-525.

Os deputados do PP de Ourense, apuntou Seara, “deberían ser coherentes co que solicitan os seus compañeiros de partido dende outras instancias”.

Os socialistas incrementaremos o contacto coa cidadanía explicando as nosas propostas en materia de emprego e fiscalidade

A Comisión Executiva Provincial do PSdeG-PSOE abordou na súa reunión do pasado luns o recente cese nas súas funcións do presidente do InOrDE, José Manuel Freire Couto. Os socialistas esiximos unha explicación de por qué o presidente da Deputación, José Manuel Baltar, non aceptou a súa demisión ata hoxe, logo de tela solicitado o Grupo Socialista. Entendemos que o presidente da Deputación debe explicar qué proxectos ten para o Inorde, e plantexamos, nos propios orzamentos da Deputación do ano que ven, a disolución do ente.

O recente estudio do Observatorio Económico Ourensán, mostra con claridade as eivas da nosa provincia. Consideramos chegado o tempo de cambiar a tendencia. É tempo de reorienta-la acción política e cambia-la tendencia. Cremos que os fondos europeos non poden destinarse a rehabilitar estacións de tren, sen ningún tipo de uso, ou centros de interpretación etnográficos que non rexistran actividade. Tampouco é unha opción construir hipódromos ou manter centros ecuestres.

Xunto coa devandita disolución do InOrDE, o Grupo Socialista na Deputación solicitará, no próximo pleno da institución, unha auditoría para coñece-la situación real daquel ente, e rexistrará unha solicitude de comparecencia de José Manuel Baltar para coñece-las accións a desenvolver dende a súa nova responsabilidade.

Os socialistas ourensáns tamén avaliamos, na reunión da nosa Executiva Provincial, a acción política do PSdeG de Ourense. O secretario xeral, Raúl Fernández, anunciou que nas próximas datas se continuará co desenvolvemento de reunións sectorais no conxunto da provincia, trasmitindo as propostas do PSdeG-PSOE en materia de emprego, fiscalidade, ensino e servizos sociais. O compañeiro Fernández, anunciou tamén encontros con afectados polas participacións preferentes, así como a celebración dunha conferencia de alcaldes socialistas para avalia-lo impacto na provincia da Lei de Bases de Réxime Local, e a dun acto con todos os responsales locais para avaliar a acción política socialista nos concellos no ecuador da Lexislatura.

Ademáis, respecto á actividade interna do Partido na provincia, cómpre destacar que nos últimos meses véñense desenvolvendo cursos de formación nas diferentes comarcas, e que a Executiva aprobou un novo calendario de cara ás próximas eleccións municipais.

A Comisión Executiva Provincial valora de xeito positivo o proceso de modernización e cambio que está a vivir o PSdeG-PSOE. Os socialistas queremos comprometernos coa cidadanía, recoñecendo os nosos erros, incluso pedindo perdón por eles, pero sabendo que as políticas da dereita só xeneran máis desigualdade, máis sufrimento e máis paro. Neste senso, a celebración de “primarias” para Secretario Xeral, no mes de setembro, supón a mostra visible do compromiso socialista coa democracia interna e co necesario incremento da participación política. Unha vez máis, os socialistas, e neste caso os socialistas galegos, lideran un proceso demandado pola militancia, só deslexitimado pola dereita, que practica a sucesión dinástica ou dixital como método de designación dos seus dirixentes e candidatos.

O obxectivo dos diferentes procesos orgánicos é recupera-la confianza da cidadanía e transmiti-las propostas que dende o PSdeG-PSOE cremos urxentes e necesarias para frena-la lacra de máis de 300 000 parados en Galicia, 32 000 na nosa provincia, e o paro xuvenil superior ao 50%.

Carmen Acuña esixe que se manteña a segunda praza de médico en Rairiz de Veiga

A deputada por Ourense no Parlamento galego Carmen Acuña, ven de defender en comisión unha proposición non de lei para que se manteñan as dúas prazas de mediciña xeral no Centro de Saúde de Rairiz de Veiga.

Este concello, de 1.720 habitantes, contaba ata o de agora con dous profesionais médicos para atender aos doentes do Centro de Saúde.

A Consellería de Sanidade ven de anunciar que se suprimirá unha destas prazas, argumentando que as novas tecnoloxías poden suplir esta asistencia. Sen embargo, os socialistas denunciamos que, precisamente, o rural galego non dispón destes avances tecnolóxicos. Tampouco, lembrou Acuña, se cumpre a ratio de tarxetas individuais sanitarias para desfacerse da praza (1 200), pois Rairiz supera esta cantidade.

A deputada socialista advirte que a redución da presenza a un só facultativo nos centros de saúde do rural retrotrae Galicia á situación de hai medio século, e xera inquedanza pola atención no caso de que xurda unha urxencia e non estea o médico dispoñible por estar con outra persoa.

A Atención Primaria é o servizo encargado de levar a cabo programas de saúde como a atención ao enfermo crónico ou a domiciliaria, que esixen moito tempo, polo que resulta imprescindíbel contar cos recursos humanos necesarios para poder levala a cabo con garantías, o cal “non vai ocorrer en Rairiz se só fica un médico no Centro de Saúde”, segundo Acuña.

A deputada condenou a “complicidade necesaria do alcalde” de Rairiz de Veiga para que esta ameaza se consolide. O rexedor pasou das filas nacionalistas ás populares “non sabemos por qué prezo” preguntouse Acuña, que indicou precedentes da súa participación “na desfeita”que supuxeron os peches da oficina bancaria, da escola infantil e da residencia da terceira idade, existentes no seu concello. Aínda que, como lembra Acuña, a supresión da praza de médico foi decisión da Consellería de Sanidade.

Acuña denuncia que o PP pretende rematar co rural, ou a venta “por catro pesos” de centros da terceira idade e escolas infantís, nun modelo que se está a implantar coa “complicidade dos alcaldes” dese Partido. “Vostedes están pechando o rural”, acusou aos populares, “e non se dan conta de que se pechan o rural, pechan a metade de Galicia”, díxolles Acuña, quen lles lembrou tamén que “non son números, son persoas”.

Pachi Vázquez pide a dimisión de Feijóo polas mentiras sobre a súa relación co narco Marcial Dorado

O Sª Xeral Nacional, Pachi Vázquez, reclamou hoxe a dimisión de Feijóo como presidente da Xunta polas mentiras sobre a súa relación co narco Marcial Dorado. Durante a comparecencia do presidente da Xunta, o líder dos socialistas galegos dixo que “para ser presidente da Xunta e representar aos galegos e galegas hai que demostrar un comportamento ético intachábel antes e durante a ocupación do cargo”.

Vázquez desacreditou os “argumentos completamente inverosímiles” sobre a súa relación de dez anos co coñecido narcotraficante. Advertiulle ao presidente da Xunta que “estes feitos que vostede intenta ocultar e que formaban parte do seu pasado estarán presentes no seu futuro e aféctanlle gravemente como presidente da Xunta de Galicia”.

O compañeiro criticou as “catro grandes mentiras” de Feijóo con relación a este caso, como é que non soubese quén era Marcial Dorado no ano 95, que cortase toda a relación en canto o soubo, que “só son fotos” e que “acabou a infamia”. O líder socialista lembroulle que Dorado fora detido por contrabando en 1983, foi investigado por blanqueo de diñeiro en 1989 ou foi detido na Operación Nécora en 1990.

Sinalou que mentres o actual presidente da Xunta ocupaba altos cargos na Consellería e no Ministerio de Sanidade, entre 1991 e o 2000, Marcial Dorado era sinalado por toda a prensa da época como un dos capos do contrabando en Galicia. Puntualizou que ademais de mentir sobre o seu coñecemento acerca do narcotraficante “seguramente é vostede quen mais sabe del pola súa longa e intensa relación”.

Pachi Vázquez apuntou ademais que as intervencións telefónicas dos anos 2001 e 2003 acreditan que Feijóo non cortou toda relación no ano 1997, en contra do que asegurou publicamente. Ademais, desbotou a afirmación de Feijóo de que “só son fotos”, xa que “é a súa vida durante unha década” e evidencian “unha relación intensa á que vostede chega da man de Manuel Cruz”, amigo de Beccaría e testaferro do narcotraficante.

Finalmente, negou que se trate dun caso de “infamia”, tal e como ten criticado o Presidente da Xunta, xa que, lembrou, o propio Feijóo presentoulle ao entón presidente Manuel Fraga a súa dimisión “por esta relación e a existencia das fotos”. Preguntou se “daquela era causa do seu cese e agora son unha infamia?”.

Vázquez espetoulle a Feijóo que “vostede é unha mentira” logo de “levar quince anos con mentiras” nunha traxectoria na que “demostrou que vostede só está preocupado polo seu futuro, non o está pola imaxe de Galicia, o único importante para vostede é si afecta á súa carreira política”.

O líder socialista criticou o concepto de ética esgrimido por Feijóo, que no 2009 decía que “o Goberno non se pode fotografar en malas compañas, e se o fai ten que dimitir”, facendo alusión a unhas fotos tomadas polo entón vicepresidente Anxo Quintana cando nin sequera era candidato do BNG.

Lamentou que a ética de Feijóo lle permitira, sendo alto cargo da Consellería de Sanidade, “pasearse en iate pola ría” ou ir de viaxe e a pasa-la Fin de Ano cun coñecido narcotraficante, mentres toda Galicia percorría as rúas en contra da droga.

Dixo que “non é só mentir, é que todo isto aconteceu nun momento de drama social, con centros de mozos e mozas vítimas da droga, centos de familias destrozadas por esta causa e milleiros de persoas loitando nas rúas contra os autores desta lacra: os narcotraficantes como Marcial Dorado”.

 

ANEXO: primeira intervención de Pachi Vázquez

 

Sra. Presidenta., Sras. e Sres. Deputados., Sr. Feijóo:

Solicitamos a súa comparecencia no Parlamento de Galicia, para explicar algo que vostede ocultou durante moitos anos: a súa relación cun narcotraficante, Marcial Dorado, que hoxe cumpre condena de catorce anos de cárcere por ser detido cun alixo de 6 500 quilogramos de cocaína.

Intentou vostede, e sigue intentando, negar unha serie de evidencias, que non só o descualifican a vostede, senón que fan un dano inmenso á imaxe de Galicia e do seu goberno.

Non estamos no Tribunal Superior de Xustiza de Galicia, estamos no Parlamento para analizar o seu comportamento ético e político.

Cando saiu á luz esta relación, pedímoslle, pola súa gravidade, explicacións, pero vostede cada vez que fala, en vez de dar explicacións, da argumentos completamente inverosímiles que non cre ninguén.

Estes feitos, que vostede intenta ocultar e que formaban parte do seu pasado, non teña dúbida que estarán presentes no seu futuro, e aféctanlle gravemente como Presidente da Xunta de Galicia.

“Non hai caso nin causa”: parece que non opinan o mesmo os xornais europeos e nacionais:
- Le Monde
- Il Corriere de la Sera

Sr. Feijóo:

O dixo vostede no ano 2009: “O Goberno non se pode fotografar en malas compañías, e se o fai ten que dimitir”. Cando o dixo non lle importaba:
•    Nin que as fotos ás que se refería foran de cinco anos atrás.
•    E ¡que sangue frío! ten vostede cando xa sabía que existían as fotos das que estamos falando.

Sr. Feijóo:

Dende que se soubo isto, vostede está intentando ocultar moitas cousas:

Vostede mantivo una relación persoal con Marcial Dorado dende 1995 ata 2003. Unha relación que non foi ocasional, foi intensa, mantida durante case unha década.

Para explicala, o fai con CATRO MENTIRAS:

1ª MENTIRA:
Que non sabía quen era Marcial Dorado no ano 95.  Un home que:
•    No ano 1983: foi detido por contrabando.
•    No ano 1989: foi obxecto dunha investigación internacional por blanqueo de diñeiro.
•    No ano 1990: foi detido na Operación Nécora, a maior acción xudicial e policial contra o narcotráfico en Galicia.
•    No ano 1992: foi incluído nun informe do Goberno Civil de Pontevedra sobre capos galegos, que circulou por toda Galicia.

COMO RESUMO:
Ensínolle as páxinas de catro xornais do ano 1990:
- ABC
- El Mundo
- El País
- La Voz de Galicia

¿QUEN ERA VOSTEDE DAQUELA?:

1991: Secretario Xeral Técnico da Consellería de Sanidade
1996 Secretario Xeral de Asistencia Sanitaria do Ministerio de Sanidade
2000: Presidente de Correos

¿QUE ESTABA SUCENDENDO EN GALICIA NAQUELES ANOS?

•    En 1994, a droga e a Sida eran a primeira causa de norte da mocidade entre 25 e 34 anos.
•    As asociacións contra a droga denunciaban aos responsables, entre eles, Marcial Dorado.
•    En 1993, máis de 15.000 persoas se manifestaron en Vilagarcía contra o narcotráfico, e mentres miles de galegos e galegas recorrían as rúas de Galicia, vostede recorría as rías no iate deste narcotraficante, sendo o número dous da Consellería de Sanidade.

É MENTIRA QUE VOSTEDE NON SOUBESE QUEN ERA MARCIAL DORADO.

SEGURAMENTE É VOSTEDE QUEN MÁIS SABE DE MARCIAL DORADO, POLA SÚA LONGA E INTENSA RELACIÓN.

2ª MENTIRA:

“Cando o souben no ano 97, cortei toda relación”. As intervencións telefónicas mostran que vostede seguiu falando con el nos anos 2001-2003.

¿Seguía sen saber quen era Dorado?

3ª MENTIRA:

“Sólo son fotos”. Non Sr. Feijóo: non son só fotos.

É a súa vida durante unha década: viaxando en iate, comendo na súa mansión, acompañándoo a Portugal, Andorra, Picos de Europa, Ibiza, Cascais, pasando a noite de fin de ano con el, ¿con quen se pasa a noite de fin de ano?

Sendo un alto cargo, ¿Quen pagou esas viaxes e festas? ¿Por qué? ¿Cal era o motivo desa amizade íntima?
¿Cantas viaxes máis hai?

Austeridade: ¿Non era vostede o austero?: iates, hoteis de luxo, viaxes, festas.
Non son só fotos, é una relación intensa á que vostede chega da man de Manuel Cruz, un bo amigo, chofer do señor Romay Becaría e testaferro de Marcial Dorado, que no ano 96-97, en plena relación súa,  compra gasolineiras para venderllas a persoas vinculadas con Marcial Dorado. Di Romay Beccaría que todo está ben, ¡menudo aval!, tería que explicar el que relación tiña co seu chofer.

4ª MENTIRA:

“Acabou a infamia”, ¿que infamia?

Cando vostede lle presenta a súa dimisión ao Sr. Fraga por esta relación e fotos, non era unha infamia?

¿Daquela era causa do seu cese, e agora son una infamia?

Sr. Feijóo:

Vostede é unha mentira.

Leva 15 anos con mentiras.

Vostede só está preocupado polo seu futuro:

•    Non o está pola imaxe de Galicia
•    O importante é se afecta á súa carreira política

Sr. Feijóo:

Vostede ocultou a Galicia o seu pasado cun narcotraficante, e cando se descubriu lle mentiu a Galicia e a España.

Mentiu dicíndolle que non sabía quen era Marcial Dorado; que só eran unhas fotos como outras moitas.

Mentiu dicíndolle que acabara a súa relación en 1998, e agora sabemos que falaba con el entre 2001 e 2003.

Sr. Feijóo:

Vostede sigue ocultando moitas cousas.
Vostede mentiu reiteradamente.
Eu lle pregunto e conteste. É fácil: si ou non.

•    Segue mantendo vostede que un cargo público non debe fotografarse con malas compañías e debe dimitir? ¿Era vostede un cargo público cando andaba de iates con Dorado? ¿Era Dorado unha mala compañía?
•    ¿Segue mantendo vostede aquí, no Parlamento, diante de toda Galicia, que non sabía quen era Marcial Dorado nin a qué se dedicaba?
•    ¿Segue mantendo vostede que cortou toda relación con Dorado no ano 1997? ¿Minte  a Xustiza ao afirmar que hai conversas gravadas entre vostede e Dorado no 2001, 2002 e 2003? ¿Minte a Xustiza ou minte vostede? ¿No 2003 seguía sen saber quén era Dorado? ¿Por qué falaba con el?
•    Di vostede que o amedrentaron cos estas fotos, que é un ataque persoal e que é una infamia. ¿Cre vostede que as galegas e os galegos teñen dereito a saber se o seu presidente está sendo ameazado e quén o ameaza? ¿Quen o ameazou? ¿Ségueno ameazando? ¿Con qué?
•    Aínda non lle escoitamos pedir perdón nin desculparse por este episodio que vostede cualifica de infamia. ¿Vaise desculpar ou cree vostede que debemos pedirlle perdón aos galegos por pedirlle explicacións e transparencia? ¿Temos que desculparnos os galegos por pedirlle que nos diga a verdade?

 

ANEXO: segunda intervención de Pachi Vázquez

 

Sr. Feijóo:

Está vostede inmerso no gran dilema: ser ou non ser.

•    Ser ético ou non selo.
•    Ser transparente ou non selo.
•    Ser responsábel ou non selo.
•    Asumir o seu comportamento ou non asumilo.
•    Actuar como pide vostede que actúen os demáis, ou non facelo.

Mentir é o peor que se pode facer cando está en xogo a credibilidade das institucións, a credibilidade do seu Goberno, e a súa propia credibilidade.

Vostede cre que negando a evidencia pode borrar  o acontecido, pero nada máis lonxe da realidade.

Vostede, señor Feijóo, é una mentira.

Sr. Feijóo:

Descubrimos que leva vostede máis de quince anos vivindo na mentira, ocultando as súas amistades perigrosas, ocultando os motivos polos que tiña unha estreita relación con Marcial Dorado, polos que viaxaba con el, que celebraba o fin de ano con el.

Quince anos ocultando a súa amizade con Manuel Cruz, o chófer de Romay Beccaría, que compraba empresas e as poñía a nome de Marcial Dorado nas mesmas datas nas que vostede compartía iate, hoteis e viaxes (1996, 97 e 98).

Sr. Feijóo:

Por moito que intente ocultalo, a súa relación de máis dunha década con Marcial Dorado e as súas mentiras, inhabilítano para seguir sendo presidente de Galicia.

Vostede, que esixía ao anterior presidente facturas das súas vacacións, non recorda agora quen lle pagaba as viaxes, os hoteis, as festas, os luxos.

Infamia é mentirlle a Galicia para ocultar que vostede, sendo un alto cargo, viviu dez anos relacionándose cun dos maiores narcotraficantes de Galicia.

Sr. Feijóo:

A ética comeza por un mesmo.
Ninguén cun lastre como este pode continuar dirixindo os designios de todos os galegos e galegas.

Para ser Presidente da Xunta e representar a todos os galegos e galegas, hai que demostrar un comportamento ético intachábel antes e durante a ocupación dese cargo.

Vostede, a día de hoxe, non conta con este aval:

•    Xa non é só o significado destas fotografías e de todos os feitos graves que se coñecen.
•    Xa non é só a súa fráxil memoria e a insuficiencia das súas explicacións.
•    Xa non é só mentir.
•    É que todo isto aconteceu nun momento de auténtico drama social, con centos de mozos e mozas vítimas da droga, centos de familias destrozadas por esta causa, e milleiros de persoas loitando nas rúas contra os autores desta lacra, os narcotraficantes como Marcial Dorado.

Señor Feijóo:

Vostede non veu aquí a dar explicacións, senón a autoexculparse.

Vostede non veu aquí a pedir desculpas, senón a facer de vítima.

Vostede non veu aquí a aclara-lo sucedido, senón a insidiar aos demáis.

Vostede, señor Feijóo, quere pasar polo adaíl da democracia, da ética, da transparencia e da austeridade, pero o seu comportamento demostra que é todo o contrario.

Se isto que lle está pasando a vostede lle ocurrise a calquera dos que estamos nesta Cámara, a calquera deputado ou deputada da oposición, vostede non tería tardado un minuto en pedi-la súa dimisión inmediata.

Diría que é intolerábel e amoral que seguise representando á cidadanía no seu cargo.

Aplíquese vostede a mesma regra que lle reclama aos demáis e dimita.

Vostede non pode seguir sendo o Presidente da Xunta.

Non pode seguir gobernando como se non tivese pasado nada.

O que pasou é o máis grave que nunca lle sucedeu a un Presidente da Xunta de Galicia, e isto só pode resarcirse coa súa dimisión.

Pachi Vázquez afirma que a Feijóo se lle está a cae-lo castelo de naipes de adaíl da transparencia e da austeridade, e cre que aínda se coñecerá máis a fondo a súa relación con Dorado

IMG-20130406-WA0004

O Secretario Xeral do PSdeG, Pachi Vázquez, mantivo hoxe unha xuntanza de traballo con cargos institucionais e orgánicos socialistas da provincia de Ourense e militantes e simpatizantes de Ribadavia. Unha xornada sobre os problemas da xente que contrasta coa parálise e a mentira na que está inmerso o goberno galego e o PP, a xuízo do compañeiro.

Nunha pausa para a atención aos Medios de Comunicación, Vázquez referiuse á publicación das fotos de Marcial Dorado co Presidente Feijóo, para salienta-lo “inmenso dano que lle fan a este país”, porque, explicou, “retrotráennos a unha época na que se vinculaba a Galicia cunha actividade denostada pola sociedade; e, sobre todo, porque cada día que fala el ou alguén do seu entorno, se comproba que está mentindo, ocultando, tratando de tapar algo sobre o que xa ninguén o cre”.

A este Presidente, que era “o adaíl da transparencia e a austeridade”, todo lle está a caer coma se fose un castelo de naipes, afirma o noso compañeiro, quen afirmou que, coma calquera galego ou galega, el pasa o fin de ano en familia e coas persoas que mais estima, mentres que “Feijóo pasaba o Fin de Ano con Marcial Dorado, e non hai ningún galego que non pase o fin de ano con alguén con quen teña moita relación”, sinala o dirixente socialista.

Preguntado polas declaracións do Valedor do Pobo nas que afirmaba que as fotos publicadas non tiñan interese xornalísitico, Pachi Vázquez replicoulle que o pobo ao que ten que defender é ao pobo galego, “o que se manifestaba polas rúas nos anos 90 contra os narcotraficantes, cando o actual Presidente da Xunta paseaba en iate cun dos maiores” deles; e pediulle ao Valedor que defenda “aos que sofren, ás familias que tiveron vítimas do narcotráfico, aos que seguen cunha vinculación co mundo da drogadición”, lémbrándolle que Marcial Dorado está na cadea por estar relacionado cun alixo de 6 500 quilos de cocaína. Vázquez advertiu: “xa está ben de dobre moral: o Valedor ten bastante que facer sen meterse en charcos”.

O Secretario Xeral Nacional anunciou que os socialistas preguntaremos ao Ministro de Xustiza polo feito de que a Policía lle pedira ao xuíz que saíse a defender a Feijóo. “No sistema xudicial que coñezo, nunca a Policía manda ao xuíz, senón ao revés”, lembrou o compañeiro, quen tamén se preguntou acerca de que pintan nesta relación de nove anos de Feijóo con Dorado a Policía e o xuíz. “¿Qué houbo para dicir que non hai nada?; ¿cómo pode absolve-lo xuiz Taín, como di o PP, se non houbo investigación?”, plantexou Vázquez, quen en todo caso, dixo non compartir a visión dese xuíz verbo da relevancia da fotografías atopadas no rexistro ao ‘narco’, e se puxo no caso confesando: “se vexo que o número dous da Consellería de Sanidade está en moitas fotos con este señor non se me ocorrería pensar que non teñen importancia”.

O compañeiro insistiu na diferente acción política de socialistas e populares: “nós estamos a traballar noutra cousa diferente, como, por exemplo, en por qué han ter que paga-lo autobús escolar os rapaces de Ribadavia; porque, aínda que a lei di que os habitantes do rural estarán exentos de paga-lo transporte e o comedor escolar”, a Xunta lles aplica unha taxa, concluindo que Galicia ten “un Goberno que se adica a enganar”.

Pachi Vázquez instou á Xunta de Feijóo a que invite “a ve-los floteis a Vigo, os coches eléctricos de Melón e o dique flotante de Ferrol”, denunciando que o goberno galego “está agochado e agocha ao seu Presidente”, quen pronto, como en Madrid, “fará segui-las rodas de prensa por unha televisión de plasma”.

Preguntado acerca da postura do PP sobre o AVE a Galicia e a estación de Ourense, o compañeiro Vázquez afirmou que “os mesmos empresarios que non lles chegaba co AVE, a estación soterrada, Norman Foster e dous ovos fritidos, agora din que non precisan nada, que non queren líos”, concluindo que existe unha dobre moral da dereita empresarial e política de Ourense que leva a votar unha cousa en Galicia e a contraria en Madrid, á que contrapuxo o feito de que “os socialistas só temos unha postura, o xogamos todo a unha soa carta: a estación central do AVE galego en Ourense”; e advertiu de que traballar contra iso “é alta traizón”, lembrando que “o PP pasou de esixir no pacto do Obradoiro datas e máis cada quince días, a dicir que carece de importancia”.

Nese senso, o Secretario Xeral laiouse de que aos de Ourense “nos toca outra vez apandar e que nos saquen o pouco que temos”, e insistiu en que, sendo realistas, “tócanos á terceira cidade de Galicia se-la estación central” do país, advertindo: “xa está ben de traizoar a esta provincia e a esta cidade”.

O PSOE denuncia no Congreso dos Deputados e no Concello de Vilar de Barrio o atropelo medioambietal e ao patrimonio agrícola que están a provoca-las modificacións nas obras do AVE

O PSOE denuncia ante a mesa do Congreso dos Deputados e ante o Concello de Vilar de Barrio, a través de senllas mocións, que as modificacións do proxecto inicial das obras da liña de Alta Velocidade ferroviaria ao seu paso por ese concello, supoñen un ataque medioambiental e contra o sector produtivo agropecuario de Vilar de Barrio.

A nosa deputada no Congreso, Laura Seara, xunto coa voceira do PSdeG en Vilar de Barrio, Soraya Briz e a secretaria de Medio Rural da Executiva Provincial, Antonia Álvarez,  visitaron hoxe a zona de Porto-Alemparte-Maus, onde denunciaron que ditas modificacións suporán a paralización da concentración parcelaria nesta zona, co fin de crear un área de acopio de material e, presumíbelmente, unha planta de xabre de granito procedente da escavación do túnel de Prado.

“No proxecto inicial respectábase esta zona en fase de proxecto de concentración parcelaria, na que, ademais, existen árbores dun grande valor ecolóxico”, lembrou Seara, que lle esixiu ao Goberno central, xa que logo, que “explique alto e claro o por qué destas modificacións e se a empresa adxudicataria ten as licencias preceptivas para a realización destas novas obras”, tanto “as que se refiren a normativa  medioambiental” como as tocantes “á Lei de Augas”.

Así mesmo, a compañeira denunciou tamén que “na poboación de Borrán, e ao marxe do que estaba proxectado, preténdese acabar con terreos agrícolas coa mesma finalidade que en Prado”, e incidiu en que “existen alternativas propostas polos veciños para que a empresa continúe cos traballos sen perxudicar nin aos propietarios das fincas, nin ás obras” do AVE.

Pola súa banda, a voceira municipal socialista en Vilar de Barrio, Soraya Briz, denunciou que “este atropelo medioambiental e ao sector agropecuario por parte da empresa adxudicataria estase a producir co beneplácito de ADIF e do propio Concello”, e insta ao grupo de goberno municipal a que “defenda os intereses dos seus veciños e realice tódalas xestións necesarias para que a empresa adxudicataria acepte as alternativas formuladas”.

As socialistas sinalaron que “o desenvolvemento de infraestruturas como a liña de Alta Velocidade é fundamental para a cohesión territorial, o crecemento económico, a competitividade e mesmo o emprego, pero, ao mesmo tempo, debe ser sensíbel co modelo agrogandeiro e medioambiental deste concello, o que é perfectamente posíbel”.