Medio rural

Demandamos medidas reais para apoiar aos agricultores afectados pola seca, as xeadas e o pedrazo

28/09/2017
By

A nosa deputada no Parlamento galego Noela Blanco, vén de presentar unha interpelación no seu Pleno para esixir “medidas reais” para que a Xunta apoie aos agricultores, afectados pola seca, as xeadas de abril e o pedrazo de agosto, sinaladamente da nosa provincia “epicentro do desastre agrario”.

Blanco, que compareceu cunha camiseta co lema “Zona Cero da sequía” que aos gandeiros non lles deixaron lucir no salón de Plenos, advertiu que o sindicato Unións Agrarias ten cifrado en máis de 14,5 millóns de euros as perdas para os viticultores derivadas das xeadas de abril e do pedrazo de agosto, mentres que o sector da castaña perdeu 1,5 millóns de euros polos mesmos fenómenos.

A compañeira denunciou que o goberno galego “ou descoñece ou lle da o mesmo” a situación destes profesionais, criticou que a Xunta limite a aprobación de axudas ás datas con eleccións autonómicas (como as de tipo directo aprobadas para a Ribeira Sacra en setembro de 2016), e reivindicou actuacións eficaces para salvar unhas explotacións que “corren o risco de arruinarse e desaparecer”.

Verbo da Conselleira, lembrou que non tivera “a intención de reunirse cos representantes dos gandeiros, agricultores e viticultores” máis alá de “facerse unha foto en Santiago con dous alcaldes da provincia anunciando axudas” para zonas determinadas alonxadas das máis afectadas, como O Ribeiro ou o oriente da provincia, e reclamoulle que “saia do seu despacho e se poña a traballar”.

E no tocante ás axudas para o fomento da contratación de seguros, a deputada afirmou que “son tan miserables que nalgúns casos non chegan nin a unha axuda de dous euros” (mentres a Xunta desbota aprobar liñas de crédito do IGAPE especiais para os afectados), e que están “lonxe de se-la solución” ao problema, mentres a banca non abra o crédito para estes profesionais, que “carecen de ingresos” suficientes para devolve-los préstamos, máxime tendo en conta o desastre que anticipa a seca.

A Conselleira de Agricultura non se reúne cos gandeiros e agricultores ourensáns afectados polas calamidades meteorolóxicas

06/09/2017
By

A nosa deputada no Parlamento galego Noela Blanco, criticou que a Conselleira do Medio Rural non se reunise “cos representantes dos gandeiros e agricultores ourensáns afectados polas graves condicións climatolóxicas”, amosando, ao “pasar de largo”, unha “escandalosa” “falla de diálogo” e “prepotencia co sector”.

Blanco vén de presentar no Parlamento unha serie de iniciativas nas que lle reclama á Xunta axudas para os viticultores e gandeiros ourensáns que este ano tiveron que soportar a seca, as xeadas de abril, e o pedrazo do pasado 27 de agosto, que danou gravemente aos cultivos. As perdas dos viticultores, dacordo coas organizacións agrarias, poden supera-los 14 millóns de euros, nun ano no que, “en moitos casos non terán ningún ingreso, e si un incremento dos gastos de entre o 10 e o 15% para coidar a segunda brotación das vides”. En calquera caso, a situación esténdese ás producións de castaña, gandería de carne ou apicultura, tamén afectadas polas xeadas e a falla de chuvias.

Por iso a nosa deputada lle reclamou á Xunta que poña en marcha axudas directas para os viticultores, que inclúan:

- compensación polas perdas de produción previstas e permitan a recuperación no seguinte ciclo produtivo

- liñas de crédito do IGAPE para que as explotacións gandeiras e vitícolas poidan facer fronte aos gastos

- un plan urxente contra a seca consensuado coa FeGaMP e organziacións ecoloxistas e agrarias

- a intervención do Goberno central con bonificacións do 90% das cotas á Seguridade Social por parte dos viticultores e gandeiros afectados, a redución dos módulos de Facenda para os sectores afectados e a declaración de zona catastrófica nos núcleos máis afectados

En canto á atitude da Conselleira, a compañeira abundou reclamándolle que se esforce menos en “disparar dialecticamente contra tódolos que lle pedimos que faga o seu traballo”, e máis en “responsabilizarse da situación e acordar un plan con medidas concretas de axuda aos agricultores e gandeiros que ven o seu modo de vida en perigo”.

Provocar unha clara insuficiencia cuantitativa de medios tamén é atacar aos servizos públicos: Noela Blanco denuncia escasezas de prazas de Educación Infantil e de Puntos de Encontro Familiar

23/07/2017
By

En senllas iniciativas parlamentarias, a nosa deputada no Parlamento galego e voceira de Política Social do Grupo Parlamentario Socialista, Noela Blanco, denunciou as faltas de prazas públicas de Educación Infantil, e de Puntos de Encontro Familiar.

Verbo da primeira cuestión, defendeu unha Proposición Non de Lei que pedía á Xunta que aumentase o número de prazas públicas de Educación Infantil nesta lexislatura, para acabar coas listas de espera e coa incertidume de 3000 familias que este ano “non saben se lles tocará” esta “lotería”.

A deputada apuntou que 54 das escolas infantís abertas nos últimos anos foron proxectadas na etapa da Xunta progresista, mentres que Feijóo só abriu “oito en oito anos, unha por ano”, de xeito que, “ao ritmo actual”, a Xunta “necesitaría vintecinco anos” para cubri-la demanda existente.

A compañeira criticou que o goberno galego utilice o eufemismo de que “ningún neno quedará sen praza con apoio público” para agocha-lo “apoio público a centros privados” e “crearlle ás familias a necesidade de acabar recorrendo ao salvavidas que significa a privatización de servizos”.

A nosa iniciativa demandaba tamén a apertura de prazas públicas de Educación Infantil en tódolos polígonos industrias de Galicia nos vindeiros catro anos, e a cobertura de toda a demanda existente durante os meses de verán, nun “paso máis a prol da conciliación, para seguir loitando pola igualdade de oportunidades e evitar o desastre de tódolos anos”. O PP rexeitou a proposta socialista.

Blanco criticou ademais o aumento do prezo, de máis do 27% en cada praza, co goberno de Feijóo, así como o feito de que a Xunta asumise un compromiso de frea-la creación de escolas infantís públicas onde existen centros privados, segundo afirmou a Asociación de Escolas Privadas nun comunicado sen que a Xunta o desmentise. Tamén censurou que, no 2016, o goberno galego só cumprise a metade de prazas prometidas na memoria dos Orzamentos, polo que as 402 para 2017, “quedarán, con sorte, en duascentas”.

Por todo iso, a compañeira cualificou como “desastrosa” a política da Xunta coa rede de escolas infantís e pediu que “deixe de facer oposición ao pasado e empece a poñer solucións sobre a mesa”. Así mesmo, pediu emprega-los 14 millóns de euros que se adicarán en dous anos aos centros privados para crea-las prazas públicas necesarias, e lamentou que na intervención do goberno galego no pleno, non houbese “nin unha verba para as familias que non saben se o ano que vén poderán ter unha praza” nas escolas públicas.

Por outra banda, a deputada denunciou tamén a insuficiencia dos Puntos de Encontro Familiar en Galicia, que atribuíu á “falla de vontade política” do PP para incrementalos.

Blanco explicou que Galicia conta con apenas sete Puntos de Encontro Familiar, deles só un na nosa provincia (o que obriga a moitas familias a longos desprazamentos), e lembrou un informe da Valedora do Pobo, que sinala que os seus medios son “poucos e mal dotados”, polo que consideraba “necesario e ata imprescindíbel” reforzalos, para cumprir, correctamente e con seguridade, coas súas funcións (entrega e recollida de menores, visitas tuteladas por un profesional e visitas supervisadas nas que a tutela non é necesaria). Porén, a Xunta adica “cero orzamentos para novos Puntos de Encontro”, visitados por máis de dous milleiros de usuarios, sen contar nenos, durante o pasado ano.

A proposta socialista propoñía aumenta-lo número destes Puntos en “alomenos dous por provincia”, e “reforza-los seus medios humanos e materiais”, para que os nenos poidesen gozar, durante as visitas tuteladas e supervisadas “dunha contorna adecuada para relacionarse, con zonas ao aire libre e espazos de xogo”.

A postura do PP, rexeitando tamén estoutra proposta socialista, non só confirmou a nosa diagnose sobre o motivo de que o problema non se arranxe, senón que foi considerada pola nosa deputada como un voto “contra da calidade de vida de moitos nenos e nenas deste país”, e incluso como unha “ultraxe ás institucións”, ao “votar unha cousa nunha institución e a contraria noutra”, xa que o PP apoiara no Concello de Vilagarcía unha moción socialista para demanda-la posta en marcha dun Punto de Encontro na capital arousá (comarca, por certo, da deputada Marta Rodríguez Arias, que exerceu de voceira do PP neste debate no Parlamento).

Os compañeiros d´O Bolo denuncian que o alcalde usa maquinaría da Deputación para estender compost polos seus viñedos

03/05/2017
By

 

O alcalde aproveita a compostaxe provinte dunha limpeza de cunetas para aboar as súas cepas, axudado por un camión e unha pala da institución provincial

 Os socialistas reclaman que tamén mande retirar os escombros da obra municipal que se verteron na cuneta da estrada que vai aos Lentellais

WhatsApp Image 2017-05-02 at 14.02.56

 Ourense, 4 de maio de 2017. Segundo denuncian os socialistas, o Alcalde do Bolo, Manuel Corzo, segue a dar sobradas mostras do seu uso personalista do poder. Pese a que os e as veciños-as do Bolo xa están maís que acostumados aos seus desmáns, desta volta, parece superarse a si mesmo ao usar recursos de todos en beneficio propio. Tal como relata o portavoz do PSOE no concello, Juan Ferreira,”hai cousa de dous meses que o alcalde mandou limpar unhas cunetas nalgúns pobos, por suposto, os da súa escolla; para, a continuación, deixar a terra amontoada na propia cuneta. Co paso do tempo, esta terra retirada, chea de nutrientes, converteuse en compostaxe natural”. Pese a que este feito xa é suficientemente escandaloso, posto que non se remata o comezado e, ademais, faise unha limpeza selectiva; o que veu despois raia o esperpento. Unha vez que a calidade da compostaxe era a desexada, unha pala e un camión da Deputación de Ourense, chegaron para recoller e cargar esta terra e levala cara a unhas propiedades do propio alcalde do Bolo. Máis tarde, os socialistas puideron comprobar, con total asombro, como a mesma pala procedeu a estender a compostaxe, con sumo coidado, entre os viñedos propiedade de Manuel Corzo.

É dicir, o rexedor do municipio, coa connivencia da institución provincial, emprega recursos de todos e todas para aproveitar restos dunha limpeza selectiva e mellorar os seus propios cultivos. O alcalde imputado nin sequera agochou as súas intencións e procedeu co “aproveitamento” á vista de calquera, tal o testemuñan as imaxes. Á restra de feitos denunciables e de dubidosa ética política cos que Manuel Corzo adorna a súa xestión, hai que sumar este uso impropio dos recursos provinciais para o que fixo gala dunha boa previsión en beneficio das súas cepas.

Sen embargo, o alcalde ten conciencia medioambiental cando se trata das súas propiedades pero non estende este pensamento verde á súa xestión pública. Nestes días estase a facer unha obra no centro do Bolo  e os escombros de dita intervención estanse vertendo na marxe dereita da estrada que une O Bolo co cruce dos Lentellais. Todo isto, segundo denuncian dende o PSOE, conta co permiso expreso de Manuel Corzo, aínda alcalde do municipio, quen está a converter un bo tramo de estrada nunha escombreira. Tal como indica Juan Ferreira: “agardamos que nese afán que ten o sr. Alcalde por aproveitar todos os residuos, teña a ben, tamén, levar para os seus viñedos ou para as súas propiedades, todo o lixo que alí se está depositando e non teñamos que tratar del entre todos os veciños”.

Os socialistas que xa van varias veces que se denuncia publicamente o pouco apego do alcalde polo ben común, destacando a súa negativa a arranxar o saneamento e acabar cun verquido, por unha manifesta animadversión cara aos veciños dese barrio. É de sobra coñecido como desgoberna o alcalde popular do Bolo, a golpe de preferencias e intereses persoais .

 

Os recentes incendios na nosa provincia, nova demostración da necesidade de ampliar a todo o ano o Plan de Prevención contra o Lume

19/04/2017
By

nuevo-1
A nosa deputada no Parlamento, Noela Blanco, alertou do “despropósito da improvisación continua” na xestión da prevención e defensa contra os incendios forestais en Galicia, cun dispositivo que aínda non está ao cen por cen malia a vaga de lumes que está a rexistrar na nosa provincia Ourense.

Blanco anunciou unha serie de iniciativas parlamentarias para “desestacionalizar” a contratación do persoal “de reforzo” do Servizo de Prevención e Defensa contra Incendios Forestais (SPDCIF), agora limitada a tempadas de alto risco. Os socialistas insistimos na necesidade dun Plan de Prevención contra o lume que se estenda aos 365 días do ano, para facer fronte ás numerosas incidencias nos meses de outono e inverno, antes da tempada de verán.

A compañeira reclama “que este persoal de reforzo deixe de ser tal”, e se amplíen as contratacións para permitir unha acaída resposta fronte aos lumes “máis aló de suspender todo tipo de queimas de restos agrícolas e forestais e de pedirlle á cidadanía que extreme as precaucións”.

A deputada sinala que os medios anunciados pola Xunta “ou son escasos, ou teñen pouca efectividade, ou ambas as cousas á vez, por falta de coordenación ou planificación”, e lembra que “o persoal segue reclamando estabilidade laboral, un mando único, a preponderancia do público sobre as empresas privadas do sector, e unha adaptación á desestacionalización do lume”.

Todo o cal consideramos os socialistas demostrado co feito de que, neste último inverno arderon, só en Ourense, 400 hectáreas de monte, sendo en xaneiro a media de catro lumes ao día, chegándose ao case de que, nunha soa fin de semana, en tres municipios da nosa provincia, rexistráronse lumes que sumaron máis de 150 hectáreas queimadas.

Os socialistas d’O Bolo lamentan que a Festa da Vitela non sirva para a promoción do traballo dos produtores de carne, e consideran que, tendo en conta o desleixo do alcalde na xestión de servizos aos veciños, dita “paparota” constitúe un dispendio que agrava a “calamitosa” situación económica do Concello

17/04/2017
By

Ademáis, os compañeiros sumaranse aos doutros concellos da provincia ao propoñeren ao pleno do seu Concello o establecemento dunha taxa ás empresas enerxéticas, o que contribuiría a mellorar ditas contas municipais

Como vén sendo habitual no Concello do Bolo, a celebración dunha nova edición da Festa da Vitela xera polémica polo dispendio que realiza o goberno do señor Corzo, en detrimento dos numerosos servizos que ten sen atender no municipio. Os socialistas, como veñen denunciando dende hai anos, lembran que esta festa está mal enfocada, sen que haxa unha proxección do labor que realizan os produtores de carne da zona e só se fai un festín que serve para maior gloria do alcalde e dos seus convidados. A pesar da fixación dun prezo público, o Grupo Municipal Socialista do Bolo ten demostrado, con datos obxectivos, o buraco negro que supón para as arcas municipais a fastuosa celebración deste evento nos termos nos que se realiza actualmente. O equipo de goberno do PP, con Manuel Corzo á cabeza, “está máis preocupado por quedar ben cos seus convidados ilustres que por atender servizos moi necesarios para os veciños e veciñas do Bolo”. O portavoz socialista no municipio, Juan Ferreira, considera que “mentres estas persoas celebran unha paparota por todo o alto, o pobo ten as fosas sépticas sen saneamento, cun alcalde que se desentende e despreza as demandas dos veciños e veciñas. A situación de desleixo e mala xestión é indignante e só lle dan pulo a proxectos que producen un desaxuste nas contas”.

Tendo en conta a calamitosa situación económica na que está o concello, o propio sería que o PP se preocupase por “procurar novas fontes de financiamento no canto de promocionar dispendios a conta dos cartos de todos e todas”. Xa que Manuel Corzo e o seu equipo son incapaces de xerar novos ingresos cos que atender todos os servizos, son os socialistas quen propoñen novas medidas que permitan aumentar a recadación.

O Grupo Municipal Socialista vén de presentar unha moción para que se estableza unha ordenanza reguladora da taxa por utilización privativa ou aproveitamento especial de dominio público local, por parte das instalacións de transporte de enerxía eléctrica, gas, auga e hidrocarburos. A iniciativa, que foi lanzada polo Partido Socialista a nivel provincial, parte das recentes sentenzas do Tribunal Supremo que afectan á situación das empresas que xestionan as redes de transporte de electricidade, gas, auga e hidrocarburo. Dado o especial aproveitamento que estas compañías fan, no que hai un afán de lucro polo servizo que ofertan, o Tribunal Supremo veu a ratificar o dereito das entidades locais a gravar o uso dun espazo que é de dominio público.

Tendo en conta, ademais, a situación de crise no financiamento dos concellos e a especial atención que deben por para cumprir co seu teito de gasto, a opción de establecer taxas a estas compañías, resulta de interese á hora de captar ingresos locais. Neste senso, os socialistas do Bolo instan ao equipo de goberno para que adopte esta medida e aumente a súa capacidade recadatoria. A este respecto, o portavoz socialista no Bolo, Juan Ferreira, afirma que “esperamos que o alcalde considere esta opción, a pesares da súa animadversión a todo o que veña dos socialistas, e pense no ben común por riba do seu propio interese ou o do seu partido. O establecemento dunha ordenanza reguladora destas taxas dirixidas a unhas empresas que reciben un claro beneficio polo uso dese dominio público, revertería no beneficio de todos os veciños e veciñas que, a día de hoxe, reciben uns servizos municipais deficitarios ou a súa ausencia”.

 

 

O PSdeG-PSOE de Maceda consegue aprobar no Pleno local varias das súas propostas en materia social fronte a parálise gubernamental do PP

04/04/2017
By

Os socialistas logran que o alcalde popular se comprometa a convocar axudas para material escolar para axudar aos pais e nais dos nenos e nenas de entre 3 e 6 anos

Despois da importante alarma social xerada entre os veciños e veciñas, o grupo municipal socialista sacou adiante a iniciativa que eliminará o verquido de augas residuais en Casasoá

 

Ourense, 3 de abril de 2017. Tal como denunciaran os socialistas, o Concello de Maceda vive nun estado de “parálise permanente por culpa da deixadez do goberno do Partido Popular”. A pesares de gravar aos veciños e veciñas con numerosas taxas, o grupo de goberno é incapaz de sacar adiante uns orzamentos ou de presentar iniciativas nun concello que levaba catro meses sen celebrar un pleno. Sen embargo, os socialistas de Maceda entenden que, máis aló de denunciar a desidia, teñen que sacar adiante propostas que revertan no ben común da veciñanza e avanzar na consecución de servizos e recursos. Desta volta, o PSOE conseguiu no pleno que se aprobase unha das iniciativas polas que levan máis tempo pelexando: a das axudas para adquirir material escolar para o alumnado do ensino infantil (3 a 6 anos).

Esta proposta ten como fin ofrecer aos pais e nais unha axuda para afrontar os numerosos gastos que xera a etapa escolar e afondar no asentamento poboacional mediante a oferta de apoios por parte do propio concello. Xa hai abondo tempo que a portavoz socialista, Ana María Rodríguez, pon o acento en denunciar a falta de axudas e recursos á conciliación das familias e a ausencia de incentivos para que a xente quede a vivir en Maceda.

Por outra parte, o PSOE tamén conseguiu a unanimidade da corporación para solucionar un dos temas que máis alarma social leva causado nos últimos tempos: o verquido de augas residuais en Casasoá. Mediante este acordo impulsado polos socialistas, vaise lograr que se depuren estas augas e se deixe de atentar contra a salubridade e o medio ambiente do lugar, algo que tiña moi  preocupada á veciñanza. Pola súa banda, Rodríguez iniciou unha campaña informativa no pobo, anunciando o acordo e contactos con diversos veciños e veciñas coa fin de que, entre todos, non se baixe a garda e o proxecto sexa unha realidade, tantas veces reclamada.

Outro dos temas que conseguiron a aprobación e o compromiso do alcalde, grazas de novo a unha proposta socialista, foi a cuestión do reforzo e dragaxe da ponte sobre o río en Vilar. “Hoxe por hoxe xa sabemos que existen diversos informes, entre eles o da Confederación Hidrográfica, que indican a falta de seguridade da ponte e a necesidade do seu reforzo, así como que é competencia municipal executar esa reparación. Só agardamos que o Alcalde non se bote atrás no acordo acadado e que acometa con valentía este proxecto que pode garantir a seguridade de toda a veciñanza da zona”, afirma Ana María Rodríguez. Dende o PSOE aclaran que están “cansos de agardar a que o grupo de goberno acometa os acordos alcanzados e non van dubidar en voltar levar a pleno todas as cuestións que comprometan a seguridade dos veciños e  veciñas, coma neste caso ou que supoñan unha mellora para a cidadanía”.

Noutra orde de cousas, recalcan dende o PSOE de Maceda, as “incongruencias manifestas dun alcalde que non se aclara nin co seu propio partido”. O xoves, os socialistas levaron para a súa aprobación en sesión plenaria, a moción pola que se insta a redactar unha ordenanza sobre a taxa que grave o uso do dominio público por parte das compañías enerxéticas, entre outras, nembargante a iniciativa foi rexeitada. Cal non foi  a súa sorpresa cando, no día a seguir, se aproba na Deputación de Ourense unha proposta similar, por unanimidade dos grupos. Os socialistas van voltar a retomar esta cuestión para que o Partido Popular de Maceda aclare “se está en sintonía co que se aproba na institución provincial e que reclama a maioría ou se defende os intereses das compañías privadas”. Como xa denunciaron en varias ocasións, dende o PSOE de Maceda, o goberno local “perde moitas ocasións para porse de lado da veciñanza e defender os seus intereses”.

 

A Xustiza abre dilixencias novamente contra o alcalde popular d´O Bolo por presunta prevaricación por non potabilizar auga

22/03/2017
By

Os veciños e veciñas de varias aldeas das Ermidas levan unha década reclamando –sen éxito– ó goberno local que potabilice a auga da traída que sae das súas billas

O voceiro do PSdeG-PSOE neste concello, Juan Ferreira, afirma que as reiteradas irregularidades e desidias do alcalde co servizo que debe prestar ós veciños e veciñas non poden quedar impunes

 

Ourense, 21 de marzo de 2017. O alcalde do PP do Bolo vai camiño de converterse nun alcalde bi imputado. Atitular do xulgado de Primeira  Instancia e Instrución número 1 da Pobra de Trives acaba de abrir dilixencias contra Manuel Corzo, trala denuncia do voceiro socialista neste concello, Juan Ferreira, na que denuncia o “obstrucionismo” do rexedor para arranxar problemas coa traída de agua nas Ermitas. A xuíza instructora afirma que “os feitos que resultan das actuaciones fan presumir a posible existencia dun delito de prevaricación administrativa”. No mesmo auto, cita ó voceiro socialista que presentou a denuncia para que ratifique os feitos relatados.

A denuncia relata a desidia do rexedor para arranxar un problema de saúde pública do que é coñecedor dende hai unha década. E que, os veciños e veciñas se puxeron en contacto con Corzo en reiteradas ocasións, para denunciar a insalubridade da auga que beben, debido a que a traída non está potabilizada. Segundo relatan, o rexedor nunca atendeu ás reclamacións e, por iso, acudiron o Valedor do Pobo, que abriu unha investigación para aclarar os feitos e concretar solucións. O rexedor respondeu que se ía reunir cos habitantes da zona en agosto de 2016 para buscar unha solución a este grave problema de salubridade mais o encontro nunca tivo lugar.

Segunda denuncia que salpica ó alcalde

 O PSdeG-PSOE deste concello da provincia de Ourense xa denunciou que o alcalde non facilita, dende hai anos, a información e documentación solicitada para exercer o control da activade política e administrativa do goberno local, sobre un cento de cuestións de interese pública. Despois daquela denuncia, a xuíza imputou a Corzo por presunta prevaricación administrativa e, trala súa declaración en calidade de investigado, a instrucción continúa o seu curso.

A investigación sobre o caso que xa imputou o rexedor recolleu documentación relacionada cos expedientes e respostas solicitadas polos socialistas dende novembro de 2014, así como copia das instancias nas que reclamaba a celebración de plenos extraordinarios que nunca foron convocados.

A prevaricación administrativa é un delito no que un cargo público emite ou practica unha resolución inxusta a sabendas. Segundo o artigo 404 do Código Penal, a condena por prevaricación administrativa pode supor unha pena de inhabilitación especial para emprego ou cargo público e para o exercicio do dereito de sufraxio pasivo por tempo de nove a quince anos.

O PSdeeG-PSOE de Punxín reclama a mellora do caro servizo de recollida de lixo que o concello presta mediante un convenio coa Deputación

20/03/2017
By

                                                            

Dende o mes de xullo de 2015 os socialistas deste concello de Ourense veñen presentando diferentes solicitudes e mocións acerca da mellora dun servizo

A voceira municipal cree que o servizo prestado non é de calidade e non se axusta ás elevadas taxas cobradas ós veciños e veciñas das diferentes localidades do municipio

CONTEDORES LIXO PUNXIN

 

Ourense, 19 de marzo de 2017. O Grupo Municipal Socialista de Punxín reclama a inmediata mellora do pésimo servizo de recollida de lixo que, neste concello, se presta mediante un convenio subscrito coa Deputación de Ourense.  Dende o mes de xullo de 2015 os socialistas veñen presentando diferentes solicitudes acerca da mellora: a limpeza, substitución, reparación e reposición de distintos contedores en mal estado e a rebaixa na taxa cobrada ós veciños e veciñas porque non é acorde a calidade do servizo prestado. Estas peticións foron reiteradas no tempo, mediante escritos e mocións, sendo totalmente ignoradas pola alcaldía da vila.

voceira socialista en Punxín, Rosa María Outerelo, alerta da “pasividade” do rexedor do PP, Manuel Vázquez, ante este problema xa casi perpetuo con exemplos concretos. “A desidia municipal vai incrementando ano tras ano e agora, na N-541 á entrada de Barbantes en dirección Ourense, un contedor foi levado ó outro lado da estrada e atópase roto no barranco, privando deste servizo ós veciños e veciñas que pagan a súa taxa a pesares de que non teñen o servizo”, relata.

Outerelo esixe ó goberno local que “se controle e fiscalice a prestación do servizo, xa que nun pleno, cos votos en contra do Grupo Municipal Socialista, se acordou manter o servizo de recollida do lixo mediante convenio coa Deputación, co incremento reflectido nos recibos”. Por todo isto, o PSdeG-PSOE de Punxín solicita, unha vez mais, mediante un escrito rexistrado no concello a inmediata substitución ou reparación “dunha vez por todas” daqueles contedores que se encontran en mal estado dende hai anos e a reposición do contedor desaparecido en Barbantes.

 

 

 

 

 

 

 

 

 

 

 

O PSOE de Ramirás agradece aos veciños a unión amosada para deter as intencións de “ABanca” de pechar a oficina de Villavidal

15/03/2017
By

Isabel Gil, Portavoz socialista, está segura que só a presión veciñal puido acadar que se manteñan as condicións de apertura actuais

Os socialistas denuncian a actitude escurantista do Alcalde, quen se apresou a desconvocar a mobilización prevista pese a non ter a confirmación por escrito dos directivos da entidade

 

Ourense, 14 de marzo de 2017. Dende o PSOE de Ramirás consideran que o escurantismo co que o alcalde está a levar toda a cuestión da redución de atención ó público da oficina de “ABanca”, indica que xa tiña acordado ceder nas condicións de apertura. Co remate, onte pola mañá, dunha nova xuntanza con directivos da entidade bancaria, quedou máis en evidencia, se cabe, a pouca gana do alcalde de estar xunto ao seu pobo reivindicando o mantemento do servizo. Tal como relata a Portavoz socialista en Ramirás, Isabel Gil, a pesares de que nesa reunión non se adquiriu un compromiso firme, xa que quedou pendente de confirmar por escrito por parte dos directivos do banco; ó alcalde faltoulle tempo para desconvocar a manifestación prevista. O que se deduce de toda a actitude amosada polo alcalde popular de Ramirás é que non ten a valentía suficiente para defender, pase o que pase, os intereses dos veciños e veciñas do concello que preside.

A falta de información e transparencia por parte deste goberno é tanta que os representantes socialistas se tiveron que enterar por outras fontes, da desmobilización, antes de que o Alcalde dese a cara. Todo apunta a que as boas intencións de actuar conxuntamente neste tema de defensa dun servizo fundamental para a cidadanía, quedaron en nada. Tal como lembra Isabel Gil, “Xa dende o inicio do problema tivemos a sospeita de que o Alcalde prefería que nada se soubese e negociar el cos do banco e ceder sen que houbese mobilización cidadá. Canto menos ruído mellor para non ter que dar a cara polo pobo que goberna” . Sen embargo, as circunstancias foron desfavorables para o rexedor posto que os socialistas lideraron a iniciativa de rexeitamento do peche que pretendía “ABanca” e non tivo máis remedio que unirse para non quedar mal. Tanto Pleno Extraordinario coma as medidas de presión acordadas foron iniciativa do PSOE de Ramirás e non van claudicar ante o que pode ser unha tentativa de acalar a protesta dos veciños e veciñas.

Polo momento, os socialistas queren agradecerlle a todas as veciñas e veciños do concello, aos mozos que fixeron súa a protesta en redes sociais e a todas as persoas que se mobilizaron, todo o esforzo realizado posto que están seguros de que a entidade bancaria non desistiría da súa intención de peche senón fose pola presión cidadá. De momento, dende o PSOE indican que só teñen a confirmación de que se vai manter o servizo tal cal está (5 días á semana e unha tarde) ata dentro de 3 ou 4 meses, que se van reunir de novo para avaliar a situación. Esta medida provisional fai pensar que as intencións da entidade bancaria non mudaron pero que, polo momento, non van levar adiante a redución ou peche da oficina de Villavidal. Por isto, dende o Grupo Municipal Socialista de Ramirás anuncian que van estar vixiantes e á expectativa do que aconteza nos vindeiros meses, fiscalizando a cuestión e asegurándose que non hai a máis mínima modificación no acordado. Os socialistas queren deixar claro que non van escatimar en accións se ao final, dende a entidade bancaria, non cumpren coa súa palabra.

Para o PSOE de Ramirás e para a súa Portavoz esta cuestión é fundamental por varias razóns, non só pola estrutura poboacional do concello, avellentado e rural, senón pola supervivencia dos negocios e empresas do municipio e o desenvolvemento económico presente e futuro de Ramirás. Por outra banda, Isabel Gil tamén quere sinalar que o Bloque, terceira forza política na Corporación, non pode ser cómplice de quen queira acalar a cuestión, é dicir, do Alcalde, quen goberna en minoría. É fundamental que o socio nacionalista de goberno do PP en Ramirás, que tanto din defender os servizos no rural galego, tomen parte polos intereses do pobo que os escolleu como representantes.

Para finalizar, Gil, quen tamén é deputada provincial pola comarca, quere que Baltar non agoche a cabeza ante esta problemática xa que se supón que é a súa obriga defender os servizos no rural dos concellos aos que ten que prestar asistencia e axuda. Tal como está configurada a provincia, coa existencia de numerosos concellos pequenos e eminentemente rurais, a existencia da institución provincial só se xustifica se destina parte do seu cuantioso orzamento a asistir, apoiar e axudar a estas entidades, defendendo a pervivencia dos servizos públicos que se prestan á cidadanía.