Economía

Seara acusa a Pastor de facer “trilerismo”co AVE a Ourense e anuncia que pedirá a súa comparecencia para que explique “a gran mentira” que contou aos ourensáns

A nosa deputada no Congreso, Laura Seara anuncia que pedirá a comparecencia na cámara da Ministra de Fomento, Ana Pastor, para que explique a paralización nas obras do AVE na nosa provincia.

A compañeira lembra que “xa o pasado mes de marzo, os parlamentarios socialistas ourensáns nas Cortes advertimos en rolda de prensa da posibilidade de que se paralizasen as obras do AVE nalgúns tramos que estaban en execución na provincia de Ourense por impagos da Administración; despois advertimos da existencia dun informe de ADIF que cambiaría os proxectos; agora vemos que o tempo nos dá a razón”.

A deputada indica que “cando Pastor chegou ao Ministerio, todos sabiamos onde estaba o AVE: estaba camiño de Ourense, coas mesmas prestacións que os do resto do Estado, cun acceso exterior na cidade de 17 km., dende Taboadela, e cunha estación adxudicada a un dos arquitectos máis presitiosos do mundo: Norman Foster” Pero hoxe, segundo denuncia Seara denuncia “o PP e Ana Pastor converteron a Ourense nun tapete, e o AVE nunha boliña que cada día esconden baixo un gobelete distinto”. Neste senso, a deputada incide na “ensalada de cifras” que o Goberno ofrece nas súas respostas parlamentarias sobre a execución do AVE a Galicia e na provincia de Ourense. Este “mareo de datos contraditorios ten un único e perverso obxectivo: confundir á cidadanía para ocultar que se parou o AVE, e que un ano despois da chegada do PP ao Goberno, xa non se sabe cando nin como chegará; só sabemos que non chegará no 2015 como asinara Feijoo tras chegar á Xunta no 2009”.

Por elo, a compañeira destaca que “a realidade é que, mentres a Ministra Pastor anuncia investimentos pantasma, as empresas teñen que comunicar aos seus traballadores que se paralizarán as obras porque Fomento non paga”, habendo “unha clara e nauseabunda estratexia por parte do Goberno, que tamén é dos ourensáns, para enganar a Ourense e a quen vivimos aquí, con relación ao AVE, como antes fixeron coas pensións ou o IVA”.

Seara recrimina que a Ministra “Pastor non quere vir a Ourense a consensuar; vén a pastorear a esta provincia, con novos enganos, vellas mentiras e unha chea de cifras contraditorias, boliñas e gobeletes; sabe perfectamente que hai consenso hai anos: Ourense quere un AVE de primeira, cunha entrada exterior e unha estación xa adxudicada a Foster; todo está decidido e planificado, e Pastor só ten que adxudicalo, pero non o fai, e apúntase ao trilerismo, coa complicidade do PP de Ourense e a connivencia de Feijóo”.

Os socialistas reclamamos á Consellería de Industria a protección do sector da lousa a través dun segundo plan “renove” de tellados que corrixa os erros da primeira convocatoria

A deputada no Parlamento galego Carmen Acuña, preguntou hoxe pola posta en marcha dun segundo plan tipo “renove” para teitos, de vital importancia para a supervivencia do sector da lousa, especialmente do emprego dos colocadores.

Acuña recriminou ao Director Xeral de Minas da Xunta, Ángel Bernardo Tahoces, a falta de definición sobre o compromiso con ese plan, para o que hai consignados 806 000€, e do que o PP xa comezou a facer publicidade en Valdeorras.

Aproveitou a deputada valdeorresa a ocasión para lembrar que o primeiro plan destas características foi froito do “moito insistir” do Grupo Socialista a través de múltiples iniciativas “que sempre foron votadas en contra polo Grupo Popular no Parlamento de Galicia”. Tamén reprochou a nosa deputada que esa primeira convocatoria xerou problemas, especialmente nos prazos formulados para o seu desenvolvemento, que foron insuficientes.

Agarda a compañeira que estas eivas sexan resoltas cando se poña en marcha o novo plan, se finalmente así o decide a Consellería, e tamén esixiu que a súa convocatoria contemple prazos e requirimentos que faciliten o acceso dos interesados ás axudas en cubertas de lousa, e se empregue o total do presuposto reservado a tal fin no Orzamento.

Os socialistas acadamos o compromiso do Director Xeral de Industria e Minas de acelera-la tramitación para evita-lo colapso que se xerou no primeiro plan polos devanditos problemas nas datas de execución dos tellados.

Carmen Acuña insistiu na importancia de que este segundo plan entre en vigor canto antes, para que poidan entrar na súa aplicación as obras nos teitos que se fagan no verán.

Os socialistas incrementaremos o contacto coa cidadanía explicando as nosas propostas en materia de emprego e fiscalidade

A Comisión Executiva Provincial do PSdeG-PSOE abordou na súa reunión do pasado luns o recente cese nas súas funcións do presidente do InOrDE, José Manuel Freire Couto. Os socialistas esiximos unha explicación de por qué o presidente da Deputación, José Manuel Baltar, non aceptou a súa demisión ata hoxe, logo de tela solicitado o Grupo Socialista. Entendemos que o presidente da Deputación debe explicar qué proxectos ten para o Inorde, e plantexamos, nos propios orzamentos da Deputación do ano que ven, a disolución do ente.

O recente estudio do Observatorio Económico Ourensán, mostra con claridade as eivas da nosa provincia. Consideramos chegado o tempo de cambiar a tendencia. É tempo de reorienta-la acción política e cambia-la tendencia. Cremos que os fondos europeos non poden destinarse a rehabilitar estacións de tren, sen ningún tipo de uso, ou centros de interpretación etnográficos que non rexistran actividade. Tampouco é unha opción construir hipódromos ou manter centros ecuestres.

Xunto coa devandita disolución do InOrDE, o Grupo Socialista na Deputación solicitará, no próximo pleno da institución, unha auditoría para coñece-la situación real daquel ente, e rexistrará unha solicitude de comparecencia de José Manuel Baltar para coñece-las accións a desenvolver dende a súa nova responsabilidade.

Os socialistas ourensáns tamén avaliamos, na reunión da nosa Executiva Provincial, a acción política do PSdeG de Ourense. O secretario xeral, Raúl Fernández, anunciou que nas próximas datas se continuará co desenvolvemento de reunións sectorais no conxunto da provincia, trasmitindo as propostas do PSdeG-PSOE en materia de emprego, fiscalidade, ensino e servizos sociais. O compañeiro Fernández, anunciou tamén encontros con afectados polas participacións preferentes, así como a celebración dunha conferencia de alcaldes socialistas para avalia-lo impacto na provincia da Lei de Bases de Réxime Local, e a dun acto con todos os responsales locais para avaliar a acción política socialista nos concellos no ecuador da Lexislatura.

Ademáis, respecto á actividade interna do Partido na provincia, cómpre destacar que nos últimos meses véñense desenvolvendo cursos de formación nas diferentes comarcas, e que a Executiva aprobou un novo calendario de cara ás próximas eleccións municipais.

A Comisión Executiva Provincial valora de xeito positivo o proceso de modernización e cambio que está a vivir o PSdeG-PSOE. Os socialistas queremos comprometernos coa cidadanía, recoñecendo os nosos erros, incluso pedindo perdón por eles, pero sabendo que as políticas da dereita só xeneran máis desigualdade, máis sufrimento e máis paro. Neste senso, a celebración de “primarias” para Secretario Xeral, no mes de setembro, supón a mostra visible do compromiso socialista coa democracia interna e co necesario incremento da participación política. Unha vez máis, os socialistas, e neste caso os socialistas galegos, lideran un proceso demandado pola militancia, só deslexitimado pola dereita, que practica a sucesión dinástica ou dixital como método de designación dos seus dirixentes e candidatos.

O obxectivo dos diferentes procesos orgánicos é recupera-la confianza da cidadanía e transmiti-las propostas que dende o PSdeG-PSOE cremos urxentes e necesarias para frena-la lacra de máis de 300 000 parados en Galicia, 32 000 na nosa provincia, e o paro xuvenil superior ao 50%.

Pachi Vázquez afirma que a Feijóo se lle está a cae-lo castelo de naipes de adaíl da transparencia e da austeridade, e cre que aínda se coñecerá máis a fondo a súa relación con Dorado

IMG-20130406-WA0004

O Secretario Xeral do PSdeG, Pachi Vázquez, mantivo hoxe unha xuntanza de traballo con cargos institucionais e orgánicos socialistas da provincia de Ourense e militantes e simpatizantes de Ribadavia. Unha xornada sobre os problemas da xente que contrasta coa parálise e a mentira na que está inmerso o goberno galego e o PP, a xuízo do compañeiro.

Nunha pausa para a atención aos Medios de Comunicación, Vázquez referiuse á publicación das fotos de Marcial Dorado co Presidente Feijóo, para salienta-lo “inmenso dano que lle fan a este país”, porque, explicou, “retrotráennos a unha época na que se vinculaba a Galicia cunha actividade denostada pola sociedade; e, sobre todo, porque cada día que fala el ou alguén do seu entorno, se comproba que está mentindo, ocultando, tratando de tapar algo sobre o que xa ninguén o cre”.

A este Presidente, que era “o adaíl da transparencia e a austeridade”, todo lle está a caer coma se fose un castelo de naipes, afirma o noso compañeiro, quen afirmou que, coma calquera galego ou galega, el pasa o fin de ano en familia e coas persoas que mais estima, mentres que “Feijóo pasaba o Fin de Ano con Marcial Dorado, e non hai ningún galego que non pase o fin de ano con alguén con quen teña moita relación”, sinala o dirixente socialista.

Preguntado polas declaracións do Valedor do Pobo nas que afirmaba que as fotos publicadas non tiñan interese xornalísitico, Pachi Vázquez replicoulle que o pobo ao que ten que defender é ao pobo galego, “o que se manifestaba polas rúas nos anos 90 contra os narcotraficantes, cando o actual Presidente da Xunta paseaba en iate cun dos maiores” deles; e pediulle ao Valedor que defenda “aos que sofren, ás familias que tiveron vítimas do narcotráfico, aos que seguen cunha vinculación co mundo da drogadición”, lémbrándolle que Marcial Dorado está na cadea por estar relacionado cun alixo de 6 500 quilos de cocaína. Vázquez advertiu: “xa está ben de dobre moral: o Valedor ten bastante que facer sen meterse en charcos”.

O Secretario Xeral Nacional anunciou que os socialistas preguntaremos ao Ministro de Xustiza polo feito de que a Policía lle pedira ao xuíz que saíse a defender a Feijóo. “No sistema xudicial que coñezo, nunca a Policía manda ao xuíz, senón ao revés”, lembrou o compañeiro, quen tamén se preguntou acerca de que pintan nesta relación de nove anos de Feijóo con Dorado a Policía e o xuíz. “¿Qué houbo para dicir que non hai nada?; ¿cómo pode absolve-lo xuiz Taín, como di o PP, se non houbo investigación?”, plantexou Vázquez, quen en todo caso, dixo non compartir a visión dese xuíz verbo da relevancia da fotografías atopadas no rexistro ao ‘narco’, e se puxo no caso confesando: “se vexo que o número dous da Consellería de Sanidade está en moitas fotos con este señor non se me ocorrería pensar que non teñen importancia”.

O compañeiro insistiu na diferente acción política de socialistas e populares: “nós estamos a traballar noutra cousa diferente, como, por exemplo, en por qué han ter que paga-lo autobús escolar os rapaces de Ribadavia; porque, aínda que a lei di que os habitantes do rural estarán exentos de paga-lo transporte e o comedor escolar”, a Xunta lles aplica unha taxa, concluindo que Galicia ten “un Goberno que se adica a enganar”.

Pachi Vázquez instou á Xunta de Feijóo a que invite “a ve-los floteis a Vigo, os coches eléctricos de Melón e o dique flotante de Ferrol”, denunciando que o goberno galego “está agochado e agocha ao seu Presidente”, quen pronto, como en Madrid, “fará segui-las rodas de prensa por unha televisión de plasma”.

Preguntado acerca da postura do PP sobre o AVE a Galicia e a estación de Ourense, o compañeiro Vázquez afirmou que “os mesmos empresarios que non lles chegaba co AVE, a estación soterrada, Norman Foster e dous ovos fritidos, agora din que non precisan nada, que non queren líos”, concluindo que existe unha dobre moral da dereita empresarial e política de Ourense que leva a votar unha cousa en Galicia e a contraria en Madrid, á que contrapuxo o feito de que “os socialistas só temos unha postura, o xogamos todo a unha soa carta: a estación central do AVE galego en Ourense”; e advertiu de que traballar contra iso “é alta traizón”, lembrando que “o PP pasou de esixir no pacto do Obradoiro datas e máis cada quince días, a dicir que carece de importancia”.

Nese senso, o Secretario Xeral laiouse de que aos de Ourense “nos toca outra vez apandar e que nos saquen o pouco que temos”, e insistiu en que, sendo realistas, “tócanos á terceira cidade de Galicia se-la estación central” do país, advertindo: “xa está ben de traizoar a esta provincia e a esta cidade”.

Seara acusa ao Goberno central de facer “unha sopa de números” cos datos de execución do AVE na nosa provincia durante o ano pasado

A nosa deputada no Congreso, Laura Seara, ven de recibir unha resposta parlamentaria do Goberno central na que este fai unha “sopa de números” cos datos de execución do AVE na nosa provincia durante o 2012. O obxectivo do Goberno con esa lea sería, segundo a compañeira, provocar confusión de datas e demorar aínda máis a chegada do AVE a Galicia. Por a deputada anuncia que presentará unha batería de iniciativas parlamentarias coas que pedirá ao Goberno que detalle a execución en cada un dos tramos do AVE na nosa provincia.

O Goberno sostén na súa resposta que o executado por ADIF na provincia de Ourense con cargo á partida da LAV Olmedo Lubian-Ourense no ano 2012 ascendeu a 531 905 000 €. Pero Seara lembra que, segundo datos aportados polo propio Ministerio de Fomento, a execución do AVE na provincia de Ourense no primeiro semestre de 2012 foi de 59,6 millóns de euros, tan só un 8,43% do orzamentado. Posteriormente, en outubro de 2012 Fomento sostivo que en setembro a execución ascendía a 133 millóns de euros, un 16,6% do que se presupostara. “E agora o Goberno di que a execución do 2012, aínda sen pechar o exercicio foi de 531,9 millóns, o que suporía algo máis dun 75% do orzamento”, di a compañeira, do que infire que “os datos que ofrece o Goberno son contradictorios”. Por iso lle pedirá, con novas iniciativas parlamentarias, “que aclare estes confusos datos e explique se realmente a execución do AVE na provincia pasou en menos de tres meses do 16% ao 75%”

Seara sinala que, en todo caso, “os datos non encaixan; son confusos e caóticos; e o Goberno debe explicar este desaguisado”, xa que “Ourense necesita certezas e non confusións”, e que, “tal e como advertimos os socialistas galegos no seu día, o Goberno non executou a totalidade do orzamento de 2012 para a liña de alta velocidade Olmedo-Lubian-Ourense: ao parecer, a tenor da resposta, dos 701,4 millóns de euros, deixaron sen executar 170 millóns”.

Ante a devandita resposta do Goberno central, a compañeira considera “rechamante que Rajoy se reunira con Feijóo para prometer que o AVE chegará a Galicia no 2018 e asegurar que cumprirá os prazos grazas aos investimentos que está realizando e aos que ten previsto realizar”, pois “se o Goberno de Rajoy non está realizando na súa totalidade os investimentos que se están a executar, tal e como demostra a resposta parlamentaria, e os investimentos dos anos vindeiros están por ver, a credibilidade de Rajoy nestes intres respecto da data da chegada do AVE a Galicia, é máis que cuestionábel”, conclúe. Por iso, Seara insta a Feijoo a “que revise os datos que lle deu Rajoy sobre o AVE a Galicia na reunión que mantiveron, porque as contas de Rajoy son contradictorias”.

“Á confusión que de novo xera o Goberno con esta resposta, engádense os ataques de sinceiridade” da Ministra Pastor cando recoñeceu, en respostas parlamentarias, que o AVE a Galicia se prevé estea rematado para 2018 “en principio”, suxeito ao “cumprimento da programación establecida en estudos e proxectos”. Este novo prazo confirma, para Seara “un atraso de tres anos na chegada do AVE a Galicia”, de xeito que, compracéndose delo, “Feijóo sentenza e enterra o Pacto do Obradoiro”, que fixaba como data límite o 2015, e que “el mesmo asinou”. É máis: con este “mareo de cifras ao que xoga o Goberno”, Seara teme que o atraso “sexa aínda maior”.

Así mesmo, a deputada remarca “as dúbidas sementadas por Pastor e polo Goberno do PP sobre se respectarán o proxecto de integración do AVE” na capital con “plenas características de Alta Velocidade” ou se, ao contrario, aproveitan “o trazado da vergoña”, condenando ao AVE a Galicia ao paradoxo de se-lo único do Estado que non será de alta velocidade. Seara lembra que ela mesma rexistrou no Congreso, en representación dos socialistas ourensáns e galegos, unha Proposición non de Lei para que o Goberno garanta a execución dos tramos Taboadela-Seixalbo e Seixalbo-Estación de Ourense, conforme á declaración de impacto ambiental aprobada no 2011 polo Goberno socialista, e que supón a construción da variante exterior.

Neste senso, a compañeira considera que “tampouco é fiábel que cumpran coa programación establecida, como no caso do proxecto da estación intermodal” da capital, que o Goberno socialista adxudico no 2011, e que o do PP paralizou ao compás da ambigüidade de “soterramento agora si, soterramento agora non, soterramento agora quizáis”.

Os socialistas responsabilizamos ao PP de traer máis paro, corrupción e sufrimento a Galicia

A voceira socialista de Traballo no Parlamento de Galicia e Secretaria de Organización da Executiva Provincial, María Quintas, afirmou que dende que o PP irrompeu de novo en Galicia e no Estado “só trouxeron mentiras, máis paro, corrupción e sufrimento”.

Ao longo da exposición dunha interpelación á Conselleira de Traballo, Beatriz Mato, a parlamentaria ourensá reprochou ao goberno da Xunta que Galicia se convertera na comunidade autónoma na que máis cae a afiliación á Seguridade Social, mentres o Executivo de Feijóo reduce o orzamento en políticas de emprego e “nin sequera o executa”.

Quintas recriminou á Conselleira de Traballo que o paro xuvenil supere o 48% en Galicia, cunha taxa de crecemento do 34%, “das máis elevadas do Estado”; e iso sen contarmos coa fuxida de mozos que, lembrou “a ministra alemá está encantada de recibir” pola súa cualificación, mentres que “o PP está encantado de que setentsa xóvenes se marchen a diario de Galicia”.

Lembrou Quintas que dende a reforma laboral de Rajoy hai 37 000 galegos máis no paro, subiu a taxa de desemprego xuvenil dez puntos, hai 37 600 xóvenes menores de vintecinco anos en paro (5400 máis ca hai un ano), 92 000 fogares teñen a tódolos seus membros no paro, e 129 000 non perciben ningunha axuda. Para a compañeira, a política do PP en materia de emprego lévanos a unha Galicia “insolvente e sen futuro”.

A nosa deputada criticou a constante referencia ao Goberno socialista da conselleira, lembrándolle que en Galicia só houbo cinco anos de Gobernos socialistas en máis de trinta de autonomía. “Señora Mato: vostede hérdase a si mesma”, replicoulle, para cominala a continuación a facer algo en materia de emprego, en lugar de “precarizar, privatizar e desprezar á cidadanía, arrasando cos dereitos e a dignidade das persoas”.

Quintas reduciu a política de emprego da Xunta “ao que fixo sempre a dereita: submisión ou emigración”, e citou o caso da nosa provincia, “onde a política de emprego chámase Baltar”, estilo co que colaborou a propia Consellería “mandándolle uns cartiños” ao presidente da Deputación, para “colocar aos que están nun ERE noutros concellos”.

Tamén mencionou o caso dunha prima do Presidente da Xunta que foi nomeada para ocupa-la dirección da Casa da Xuventude, e á que “se lle crea unha praciña de educadora” ante a previsíbel imposibilidade de optar por méritos ao vindeiro concurso de traslados.

Respecto aos Orzamentos da Xunta, Quintas cualificounos de “decepcionantes e tramposos”, xa que abren a porta á privatización sistemática do sector público, acollen un descenso do 40% nas políticas activas de emprego e o recorte de 464 millóns de euros só nos capítulos de desenvolvemento empresarial, promoción de emprego, I+D+i, Sanidade, Educación e accións social. “Os orzamentos agochan un discurso reaccionario”, resumiu.

A voceira socialista tamén lembrou as perdas de poder adquisitivo dos traballadores nestes últimos anos de gobernos do PP en Galicia e no Estado, nomeadamente a dos pensionistas, os empregados públicos e os traballadores vía depreciación salarial xeral e do Salario Mínimo Interprofesional, reducións de xornada con baixa e salario, e convenios colectivos por baixo do IPC.

En resumen, segundo deputada, o balance da Xunta do PP reflicte que “nos fogares galegos irrompe a pobreza, a desigualdade e o risco de exclusión social en familias que hai pouco formaban parte da clase media”, lembrando que en Galicia 662 000 persoas viven no limiar da pobreza e en risco de exclusión social, e 100 000 en pobreza extrema, e que o 20% dos nenos viven en fogares pobres.

Seara: “Rajoy volta a ignorar a Galicia”

A Secretaria Nacional de Coordinación Institucional e Participación e deputada pola nosa provincia no Congreso, Laura Seara, considera “indignante” o discurso que o Presidente do Goberno, Mariano Rajoy, realizou no Congreso no Debate do Estado da Nación.

Para Seara “nunca houbo un discurso dun Presidente do Goberno máis afastado da realidade dos cidadáns aos que en teoría representa”. Así, sinala que “mentres os cidadáns sobreviven como poden, afogados por un Goberno do PP que leva un ano castigando sistemáticamente aos que menos teñen, o Presidente do Goberno vén hoxe ao Congreso a presumir de salvar ao país”.

“Rajoy faltou de novo ao respecto aos traballadores, aos desempregados, aos anciáns, ás mulleres, aos mozos, aos enfermos, aos estudantes e, especialmente, a un millón e medio de familias nas que ningún dos seus membros recibe ingreso ningún”, sostivo a compañeira.

A deputada destaca “a desastrosa xestión que Rajoy fixo da crise, sen políticas de crecemento e con brutais e arbitarios recortes, levou a España a ser hoxe un país máis empobrecido, máis inxusto, e cunha maior división social entre os que máis e os que menos teñen, entre os que poderán estudar e os que non, entre os que poderán acceder á Xustiza e os que non e, ata entre os que gozarán dunha adecuada asistencia sanitaria e os que non; unha fractura social que será difícil de superar”. Por iso, considera que “Rajoy terá que render contas no futuro da situación á que levou a España”.

Respecto de Galicia, Seara reprocha que “Rajoy voltou a ignorar a Galicia no Debate do Estado da Nación”, demostrando “unha vez máis que Galicia non está entre as prioridades do seu Goberno”. A compañeira remarca que o Presidente do Goberno do PP se esqueceu “dos parados galegos cando anunciou axudas a desempregados noutras Comunidades Autónomas, malia ser Galicia a segunda na que máis creceu o paro”. Neste senso, Seara constata que “é de esperar que Feijóo ficará calado, agochado, cómplice, como en tantas ocasións”.

Pachi Vázquez acusa a Rajoy e Feijóo de darlle a puntilla á Galicia interior coa reforma da Lei de Bases de Réxime Local e os incumprimentos electorais

 
O Secretario Xeral Nacional, Pachi Vázquez, responsabilizou a Rajoy e a Feijóo de “facer inviábel” economicamente a nosa provincia, e de empregar a Ourense como “experiencia piloto” de cómo a dereita está “aniquilando” todo o modelo de vida da Galicia interior.

Vázquez asistiu hoxe á reunión da Permanente da Executiva provincial cos Grupos Socialistas na Deputación, Parlamento galego, Congreso dos Deputados e Senado. Acusou a Rajoy e Feijóo de pretender “da-la puntilla” ao interior galego e suprimir de facto os concellos de Ourense a través da reforma da Lei de Bases de Réxime Local, a aprobar polo Consello de Ministros na súa vindeira reunión. Todos, agás a capital provincial, teñen menos 20 000 habitantes, e quedarán suxeitos, de aprobarse o Decreto, á tutela da Deputación, que, no caso de Ourense, é o órgano de menor transparencia, e o que máis dilapida, e que está inmerso nunha investigación polas súas contratacións.

Neste senso, o máximo responsable dos socialistas galegos sinalou que, a partires de agora os socialistas “só falaremos de Baltar a través dos xulgados”, para así “centrármonos nas accións políticas para garantir que a xente poida vivir aquí”, e non teña que emigrar.

O Secretario Xeral do PSdeG salientou que o obxectivo final da reforma da Lei de Bases de Réxime Local é favorecer “a privatización da vida municipal, para converter os servizos en pingües beneficios para os de sempre”.

Vázquez defende a xestión de proximidade dos municipio: “aínda que os queren facer quedar como culpables, os concellos son as vítimas”, cando a culpábel é a comunidade autónoma, “que non lles paga, e que lles retira a capacidade para achega-las prestacións sociais aos veciños e as subvencións para mantemento das infraestruturas”, lembrando tamén que soben, ademais, as achegas económicas que os municipios deberán abordar para evitar que concorran a axudas.

“Presentaremos o dereito da Galicia interior a vivir con dignidade”, dixo Vázquez en referencia ás iniciativas que levarán a cabo os socialistas nos distintos foros institucionais, pois “non se pode culpabilizar aos cidadáns por vivir onde viviron toda a vida”.

A Permanente da Executiva provincial, celebrada esta mañá, estudou o informe de situación da provincia e acordou a acción coordinada nas institucións municipais, provincial, no Parlamento de Galicia, Congreso e Senado. Salientou Vázquez que as políticas do PP da provincia, de Feijóo e de Rajoy, fixeron acadar a Ourense cifras récord de paro, con 30 000 homes e mulleres “que non só non atopan emprego senón que non lles quedan máis alternativas nin saídas laborais que a emigración”. Outra marca histórica acadada é o número de EREs solicitados na provincia.

O compañeiro salientou que tódalas advertencias feitas durante a campaña electoral se están a cumprir: “non só hai unha suba de impostos, senón que tamén hai copago, de medicinas, ortopedia e transporte en ambulancia”, lembrando tamén que o Goberno xa empeza a admitir que botaría a médicos e docentes (recoñeceu o despedimento de 1200), como advertimos os socialistas.

O líder dos socialistas galegos denunciou tamén o peche de xulgados nas cabeceiras de comarca, e a existencia dun plan para concentrar os PACs e servizos de Urxencia, reprobou que Feijóo consinta que os concellos queden sen unha oficina dunha entidade bancaria, e lembrou a paralización en dous compromisos importantes para a provincia e a cidade: a estación intermodal na cidade, e a Alta Velocidade en xeral. Se alguén non “pon pé en parede”, vai iniciarse “un percorrido sen retorno”, prognosticou Vázquez.

Os socialistas advertimos de que, co actual ritmo de recortes, Ourense chegaría aos 125 000 pobres en nove anos

A nosa deputada no Congreso, Laura Seara, ven de denunciar que, de continuar os recortes ao ritmo actual, a nosa provincia podería acadar a cifra de 125 000 pobres no 2022; o 40% da súa poboación.

A nosa previsión deriva da predición dos analistas para o conxunto do Estado, que sitúa o número de cidadáns catalogables como pobres en España, para dentro de nove anos, en 18 millóns.

A compañeira salienta que ata o de agora, “o aguante das prestacións e das pensións, permitía conte-las taxas de pobreza de Ourense”, pero que “este patrón está a mudar” debido “á non revalorización das pensións, á suba do IRPF, que afecta aos pensionistas, e aos copagos farmaceútico e sanitario en moitos servizos” impostos polos gobernos de Rajoy e de Feijóo.

A estes datos hai que engadir, segundo informa a deputada, que tódalas proxeccións de poboación que se fan sobre a nosa provincia advirten dun envellecemento permanente de poboación, o que “incrementa o risco de pobreza”.

“En Ourense e en Galicia haberá máis pobres, e os pobres serán máis pobres”, prognosticou a compañeira, que tamén advertiu de que, a día de hoxe, o 53% dos ourensáns chegan con moitas dificultades a fin de mes, e de que a fenda salarial entre os que máis e menos teñen, “lonxe de reverter, aumenta” por mor da crise económica.

Para Seara, o PP e Rajoy “seguen poñéndose de costas aos cidadáns”, e recentemente rexeitaron unha proposta socialista no Congreso que perseguía a creación dun fondo contra a pobreza de 1000 millóns de euros.

A compañeira fixo estas declaracións á súa entrada ás instalacións da Cruz Vermella de Ourense, ás que realizaou unha visita na que exerceron de anfitrións Teresa Rodríguez Babarro, presidenta provincial da entidade, e outros membros do seu equipo directivo.

Seara insta ao Goberno a “deixar de marea-la perdiz mentres as familias se afunden no paro”

A nosa deputada no Congreso, Laura Seara, esixiu ao Goberno “que confirme de forma inmediata se prorrogará ou non a axuda de 400€ aos parados que esgotaron as prestacións”.

Seara lembra que o vindeiro mes se cumpre o período de vixencia do “Plan Prepara” e sinala que “é inhumano que o Goberno continúe xogando co sufrimento de moitas familias cuxo único ingreso son eses 400€, e que non saben se en apenas un mes o perderán”; xa que logo, pide ao Executivo “que lles diga a esas familias que é o que vai pasar coa axuda dos 400€ e non aumente a súa angustia con máis incerteza”.

Ademais, a compañeira sinalou a necesidade de “que o Goberno prorrogue o ‘Plan Prepara’, pero sen recortes, como estaba antes da última prórroga, en agosto, que deixou fóra da axuda a moitas persoas”; neste senso, sostén que “a situación do paro no noso país é insostíbel, e xa ficou demostrado que as medidas do Goberno de Rajoy empeoraron o panorama”. Así, apunta que “en tan só un ano, con Rajoy no Goberno, se destruiron dous mil empregos diarios, de xeito que actualmente hai un 10% máis de paro que hai un ano”.

Seara engade que “os grupos da oposición vimos denunciando dende hai un ano que os Orzamentos do Estado do Goberno de Rajoy, baseados só no recorte, carecen de políticas de emprego adecuadas, e non farían senón aumenta-la recesión; e, lamentábelmente, así foi”.

Para a deputada, “a ineficacia das políticas do PP é aínda máis patente en Galicia, que se converteu na comunidade autónoma na que máis subiu o paro; e, mentres, Feijóo aplaude a Rajoy e abandona aos galegos”.

Respecto de Ourense, a compañeira lembra que “hai aproximadamente dez mil familias con tódolos seus membros en paro, e preto de dous mil douscentos beneficiarios do ‘Plan Prepara’ aos que o Goberno non foi capaz de dar unha resposta, ao non estimula-lo emprego, e que polo menos merecen saber se poderán seguir dispoñendo ou non da axuda de 400€”, e advirte de que “dende o Grupo Socialista promoveremos no Congreso as iniciativas que sexan necesarias ata que o Goberno ofreza unha resposta aos cidadáns”.