Economía

María Quintas, deputada socialista por Ourense, esixe á Xunta que reoriente as súas políticas de emprego para aplicar medidas efectivas, non publicidade e propaganda.

15/03/2016
By

 

a026a3d568e2fa9096d5b26d24d852be

Santiago de Compostela, 15 de marzo de 2016. Os socialistas galegos esixiron hoxe no Parlamento á Xunta que “reoriente as súas políticas de emprego” para aplicar “medidas efectivas e acadar un país digno no que vivir, deixando atrás a publicidade e a propaganda”.

 

Na defensa dunha moción no pleno, rexeitada polo PP, a portavoz de Emprego do PSdeG, María Quintas, lembrou que “a situación é dramática para moitas familias e os mozos teñen que emigrar, aumenta o paro pero caen as partidas orzamentarias para atender aos desempregados”.

 

“A lamentable frase electoral do Partido Popular de Galicia e de Feijóo, dicindo en 2009 que remataría co paro en corenta días, amosa as verdadeiras intencións do PP en campañas electorais, mentir”, afirmou a deputada socialista, que demandou medidas urxentes para “parados de longa duración, mulleres e mozos”.

 

“O paro rexistrado chegou a 235.268 persoas no mes de febreiro, 24.606 persoas máis que no mes de abril de 2009, no que Feijóo chegou ao goberno da Xunta, mentres que o 90% dos contratos son temporais”, dixo Quintas, que lamentou que “o PP sexa obstinado na súa ineficacia e na súa mentira, pero os datos reflicten o panorama real de Galicia, estamos á cabeza no número de traballadores pobres”.

 

“O grupo socialista propuxo nas emendas aos orzamentos una partida de 192 millóns de euros para mellorar o mercado laboral, pero foron propostas desatendidas polo goberno”, manifestou. “Hai 131.000 galegos cun salario de menos de 800 euros mensuais e neste colectivo están maioritariamente as mulleres”, engadiu.

 

Os socialistas propoñen “fortalecer o servizo público de emprego” e critican que “a pretendida recuperación económica, sendo certa en termos macroeconómicos, é máis certo que non repercute na cidadanía, nin nas melloras sociais, nin na recuperación das economías familiares; o PP deteriora a calidade do emprego, devalua os salarios e precariza as relacións laborais”.

 

 

En ano e medio, mil oitocentos ourensáns emigraron fóra de España

08/04/2015
By

A deputada socialista pola nosa provincia, Laura Seara, recibiu unha resposta do Goberno central que confirma que, dende o 2012 ao primeiro semestre do 2014, houbo 11 604 galegos que emigraron fóra de España, dos que 1790 eran ourensáns.

A deputada manifestou que “esta situación se produciu como consecuencia da crise económica, pero estivo agravada polas políticas de retallo do PP, en Galicia e en Madrid, que condenaron aos cidadáns á asfíxia”. Así, como principais causas de que os galegos voltemos a emigrar en busca de oportunidades, Seara cita “a ausencia de emprego de calidade e a deficiente estrutura empresarial galega”, pero tamén “as erráticas políticas de emprego e os inasumíbeis retallos sociais levados a cabo polo Goberno de Rajoy, coa compracencia de Feijóo”. Especialmente grave considera que “esta fuga” se produza “sobre todo entre os máis novos e cualificados, o que agrava aínda máis o problema do envellecemento da poboación existente en Galicia, e fai aínda máis difíciles as perspectivas de sustentabilidade da economía galega”.

A deputada lamenta que “hoxe, do mesmo xeito que hai sesenta anos, os mozos teñen que colle-la súa maleta e marchar non só lonxe da súa cidade ou pobo, senón lonxe do seu país”. “Abandonan as súas cidades e pobos, abandonan Galicia e abandonan España”. “A emigración ao exterior estase convertendo nun mal endémico en Galicia”. “Trátase dunha sangría demográfica e económica, coa que se vai o talento, as persoas máis cualificadas, ante a falta de perspectivas de empeza-las súas vidas con empregos acordes ás súas expectativas e a súa preparación”, e reprocha que o Goberno central do PP “metres tanto, presume de que baixa o número de parados”, lembrando Seara que eses “mozos que emigran causan baixa nas listas do paro, polo que este drama axuda ao Goberno a maquilla-las cifras” de desemprego.

Seara destaca que, malia que en termos absolutos é maior o número de persoas das provincias d’A Coruña e Pontevedra que emigran ao estranxeiro debido á súa maior poboación, o peso relativo de ourensáns que o fan é maior na nosa provincia: “para Ourense, a provincia galega xunto con Lugo co índice de poboación máis envellecida, o saldo de persoas que foxen ao estranxeiro coa esperanza de mellora-las súas condicións de vida, é insoportábel: con estes datos, a Galicia interior afúndese aínda máis, pois en Ourense, ao éxodo de mozos tamén se suma a caída demográfica”. Neste senso, a deputada lembra que dende o PSdeG de Ourense denunciamos “centos de veces esta realidade; pero é unha realidade á que os socialistas nos negamos a resignarnos”.

Para a deputada “Ourense e Galicia teñen un potencial inmenso, pero nin se recoñece a dimensión do problema, nin se levan a cabo incentivos e medidas que asenten poboación”, xa que “o PP nunca ha ter nin estratexia, nin intención, de buscar solución ao que é xa o maior problema de Ourense”.

Seara lembra que non debe confundirse o dato do número de galegos que marchan fóra de España, co dato dos que residen no exterior segundo o Padrón de Españois Residentes no Estranxeiro (“PERE”, feito público en marzo deste ano). Neste senso, parécelle “lamentábel que a Xunta sostivese o pasado marzo que o PERE aumenta no 99% dos casos por un maior número de nacementos, cando a resposta parlamentaria do Goberno central (do mesmo PP), demostra que a cifra de galegos que deben de ir a buscar traballo ao estranxeiro é alarmante, estean ou non reflectidos no PERE”.

Seara denuncia que en Ourense hai trescentas vintedúas vivendas baleiras propiedade da SAREB

11/03/2015
By

A deputada socialista no Congreso pola nosa provincia, Laura Seara recibiu unha resposta do Goberno central na que este confirma que na nosa provincia existe un stock de trescentas vintedúas vivendas da Sociedade estatal de Xestión de Activos Procedentes da Reestruturación Bancaria (SAREB). A resposta sinala que, do total de 107 446 vivendas que a SAREB ten en stock en España, un 0,3% están na nosa provincia.

Seara critica que “nunha provincia como Ourense, cun alto grado de empobrecemento, un elevado índice de poboación envellecida, cunha das maiores porcentaxes de pensionistas, onde están as pensións máis baixas de toda España e onde xa hai ata desafiuzamentos, é absolutamente inadmisébel que existan vivendas baleiras”, e reproba que “as políticas do Goberno de Rajoy levaron a moitos cidadáns, a pensionistas e á clase traballadora, á asfíxia, con baixadas salariais e de pensións, con despedimentos, con máis impostos, con copagamentos, con menos prestacións sociais e tamén, a moitos, á condena de vivir nunha vivenda sen as mínimas condicións de habitabilidade ou, o que é peor, a vivir na rúa”.

Lembra Seara que os datos do último ano apuntan que na nosa provincia, “grazas ao PP e a Rajoy, 66 426 fogares teñen declarado que chegan con moita dificultade a fin de mes; o 34% dos fogares na provincia ten como único ingreso as prestacións, e o 15 % dos fogares pasa frío no inverno, como consecuencia de que o Goberno do PP lle retirara a 6094 ourensáns o bono social da luz”, e lamenta que, mentres tanto, “a política do Goberno Rajoy foi a de salvar aos bancos a costa de afundir aos cidadáns, ata con operacións nas que se perdeu diñeiro público, como é o caso da venda de NovaGaliciaBanco a Banesco, coa que o Goberno perdeu 8000 millóns de euros procedentes de impostos de todos os cidadáns”.

“É inasumíbel a existencia de trescentas vintedúas vivendas baleiras en Ourense, mentres hai xente que se vai quedando na rúa sen a súa vivenda porque non pode asumir as débedas que a afogan”, subliña a deputada, quen pide ao Goberno central “a urxente adopción de solucións”. Entre elas, reclama as propostas polo PSOE en materia de vivenda; nomeadamente: elimina-las cláusulas-chan da totalidade dos saldos vivos de préstamos hipotecarios, habilitar procedementos que faciliten que as familias que sufriron un proceso de desafiuzamento poidan usa-las vivendas baleiras propiedade das entidades financeiras que recibiron axudas públicas, impedi-la enaxenación en lotes de vivendas de promoción pública a fondos especulativos de investimento, que se garanta o uso social deste tipo de vivendas, construídas e financiadas para o devandito fin con fondos públicos, e restablece-lo dereito a percibi-la subsidiación de préstamos á vivenda.

O Grupo Socialista no Congreso reclama ao Goberno central que faga públicos os informes que levaron á venda de NovaGaliciaBanco a Banesco

03/03/2015
By

O noso Grupo Parlamentario no Congreso dos Deputados rexistrou nesta Cámara unha Proposición Non de Lei na que reclama ao Goberno central que faga públicos os informes técnicos que levaron á venda de NovaGaliciaBanco ao grupo venezolano Banesco. Esta proposición foi presentada pola deputada pola nosa provincia, Laura Seara.

Trátase de que se dea traslado dos informes pertinentes á Comisión de Economía e Competitividade do Congreso, co fin de analizar e evalua-la situación económico-financeira das antigas caixas de aforros galegas, así como as causas e responsabilidades da súa actual situación, incluíndo as indemnizacións millonarias dos seus ex-directivos. Tamén se pide ao Goberno central que faga público o importe de adquisición de NovaGaliciaBanco por parte de Banesco, así como o investido ata o momento na entidade por este grupo financieiro.

Na exposición de motivos da iniciativa se afírma que a venda de NovaGaliciaBanco a unha entidade bancaria de capital venezolano, por 1003 millóns de euros, a pagar ata o 2018 resulta incomprensible para a cidadanía galega. “O Goberno perde nesta operación de venda, a través do FROB, un total de 8000 millóns de euros procedentes dos impostos de tódolos cidadáns”, precisa a deputada, quen tamén considera que o segredo do proceso fai imprescindíbel que o Goberno central renda contas ante os seus administrados: “O FROB escudouse, para proceder a esta venda con tanta rapidez” no coñecido como “ ‘informe McKinsey’, que aínda non se fixo público”, e que, “segundo o FROB, aseguraba que esperar podería erosiona-lo valor da entidade, e que canto antes se vendese máis se podería obter por ela”.

A Proposición Non de Lei non entende a urxencia da venda e cita ata ao New York Times, que criticou as présas do ministro de Economía por vende-la entidade galega. Así, no texto proposto, se afirma que “os axentes económicos que interviñeron no proceso foron varios, dende os bancos de investimento, (BNP Paribas), encargado da venda, ‘Nomura’, coautor do ‘informe McKinsey’, ‘PwC’, responsable da “due diligence” da entidade, e a auditora ‘Mazars’, para elaborar, ante as presións dos posibles compradores, un informe independente de posibles perdas”, para concluir que “neste contexto de gravísimas perdas para os fondos públicos e, segundo a Lei 19/2013, de 9 de decembro, de Transparencia e Acceso á Información Pública, o FROB está suxeito ás obrigas de dar a información que se lle requira, segundo os artigos 12 e 13”.

Raúl Fernández e Laura Seara explicaron as nosas propostas no Debate sobre el estado de la Nación para unha recuperación xusta de Ourense

28/02/2015
By

O secretario xeral provincial, Raúl Fernández, e a deputada no Congreso, Laura Seara protagonizaron esta mañá unha rolda de prensa para valora-los resultados do “Debate sobre el estado de la Nación” deste ano.

Fernández, que mostrou a súa confianza en que tivera sido “o último de Rajoy como presidente” lembrou que este prometera acabar co paro e crear tres millóns de postos de traballo, e hoxe hai 548 000 empregos menos e 144 000 empresas pechadas máis; que prometera acabar co endebedamento público, e hoxe este ascende ao 100% do PIB, que prometera non retallar na Sanidade, a Educación nin nas pensións, e o que fixo foi introducir copagamentos, retalla-las bolsas e baixa-lo valor das pensións.

Pola súa banda, Laura Seara acusou ao PP de aplicar de novo o rolo parlamentario. Así, das cento vinte resolucións presentadas por tódolos grupos parlamentarios do Congreso, o PP só aprobou dezanove: as súas quince propias, tres de CiU, e unha de UPN.

Para Seara, “Rajoy ocultou os seus propósitos durante estes anos, e agora quere convencernos de que estas novas promesas si se cumprirán.; pero non se pode enganar a todo o mundo todo o tempo”. Fronte a elo, sostivo que o PSOE “presentou unha axenda para unha recuperación xusta, unha alternativa completa ás políticas económicas, sociais e de rexeneración institucional e democrática do goberno do PP”, manifestando a súa convicción de que “o futuro debe ser unha esperanza, nunca unha ameaza; e fronte á resignación que ofrece a dereita, os socialistas queremos oportunidades que eviten que se cree unha nova xeración perdida de xóvenes que teñan que seguir emigrando en busca dun futuro mellor lonxe do seu país, e oportunidades que eviten que os maiores de corenta e cinco anos que perderon o seu emprego. se convertan nunha xeración esquecida”.

Ambos compañeiros criticaron que o PP votara en contra de propostas socialistas para que se subise o salario mínimo, se derrogase a reforma laboral, se suprimisen os copagamentos sanitarios e se revalorizaran as pensións. Tamén criticaron con dureza que o PP rexeitase un Plan contra a Pobreza e unha Lei de Segunda Oportunidade que free os desafiuzamentos. Así, Seara recriminou ao PP as súas mentiras respecto a esta última Lei, que o Goberno central anunciou, xa que “na proposta do Goberno non hai nin segunda oportunidade, nin dación en pago nin se quitan as cláusulas-chan, porque primeiro che quitan todo e despois fan unha exoneración temporal da débeda , pero cando xa perdiches todo”, explicou.

Entre outras resolucións presentadas polo PSOE e que o PP rexeitou, estaban: elaborar unha lei de igualdade salarial entre homes e mulleres, que non se modificase a lei do aborto, a prohibición de indultos por corrupción política, potencia-la universidade pública, derroga-la LOMCE e frea-las carreiras de tres anos, e a que pedía que se remitise ao Congreso dos Deputados un proxecto de Lei de Tarifas Eléctricas de Regadíos que regulase, entre outras cuestións, un IVE reducido para as Comunidades de Regantes, e o establecemento de contratos de tempada.
,

Alertamos de que a nosa é a provincia galega con maior índice de pobreza infantil, con cifras “insoportábeis”

03/11/2014
By

A deputada e o senador socialistas pola nosa provincia, Laura Seara e Miguel Fidaldo denunciaron a semana pasada, en roda de prensa, que “as cifras de pobreza infantil en Ourense e en España son insoportables” e defenderon que “vence-la pobreza infantil é unha necesidade non só como elemento de xustiza, senón como cuestión fundamental para a sostibilidade do País”. Xa que logo, reclamaron “un grande Pacto para a infancia” para dar solución a esa “tremenda situación”, na que case tres millóns de nenos son pobres, con un de cada catro en risco de pobreza, o que leva a España a se-lo terceiro Estado da OCDE con máis pobreza infantil tras Letonia e Grecia.

Neste contexto, Ourense é a provincia galega con maior índice de pobreza infantil, habendo 11 500 nenos entre menores de dezasete anos anos que se atopan en risco de pobreza ou exclusión social, e que 6500 nenos ourensáns viven en fogares en condicións de “infrahabitabilidade” (con goteiras, humidades, etc.). Deste xeito un 19% de fogares ourensáns presentan carencias materiais, e un 8,16% sofren carencias severas.

Seara afirmou que “fronte a estes datos“ o investimento “retallouse en case 800€ por neno”, de xeito que o Goberno central do PP “só investiu 1€ por neno en risco de pobreza”; recriminou que “os ricos son cada vez máis ricos, e os pobres máis pobres”, e apuntou que “os fogares con nenos con tódolos seus membros en paro aumentaron máis dun 200%, mentres que no último ano as vinte persoas máis ricas de España incrementaron a súa fortuna en 15 450 millóns de euros”. Así, “as tres persoas máis ricas en España teñen o dobre que o 20% da poboación máis pobre, e o 1% dos españois máis ricos posúe tanto como o 70% do resto dos españois”.

A deputada denunciou que “algúns soben aos púlpitos a predicar que xa non existe esquerda e dereita cando agora máis que nunca é evidente que o xeito de gobernar é absolutamente diferente: o ‘austericidio’ de Rajoy ten xa cara de neno”.

Miguel Fidalgo, mentres tanto, coida que as anteriores cifras se enmarcan “dentro do proceso de empobrecemento da sociedade española dende que o PP está no Goberno” e remarcou que “co PP, as diferenzas entre ricos e pobres son imparables porque, mentres que se inxecta diñeiro á banca e ás grandes eléctricas, e se amnistía aos defraudadores, Rajoy subiulle os impostos á poboación e retalloulle en Sanidade, Dependencia e Educación”. Así, considera que “o maior problema que ten España é a ruptura entre ricos e pobres”.

Seara informou dos datos dun estudo sobre o benestar das familias en Ourense, no que a provincia baixou do posto 28 en 1900 ao 45 no 2000, e sostivo que “mentres algúns celebran con champán os datos da EPA, vemos como na provincia de Ourense hai 21 650 demandantes de emprego que non reciben ningún tipo de prestación; un 14,4% máis que no 2011”.

Estes últimos datos proceden dunha resposta parlamentaria que a deputada recibiu do Goberno central, na que se reflicte, ademais, que:
-  10 271 ourensáns en paro dende hai máis dun ano non reciben prestación por desemprego, o que supón un 26% máis que no 2011.
-    Deles, 5789 teñen máis de corenta e cinco anos, intervalo de idade no que a ratio de ourensáns sen prestación sobe ao 32%.
-  29.318 demandantes de emprego en Ourense non reciben prestación por desemprego
-  11.200 fogares ourensáns teñen a tódolos seus membros no paro, un 38% máis que en 2010.

Ambos parlamentarios defenderon que “é necesario recupera-lo investimento social na infancia, por xustiza, para garanti-la cohesión social, para xerar competitividade, e por solidariedade interxeneracional”. Por iso, comprometéronse a “facer chega-la proposta socialista a tódolos axentes sociais, económicos, organizacións e institucións”.

Porén, xa trasladaron a súa proposta en forma de enmendas aos orzamentos xerais do Estado, como un Plan de Loita contra a pobreza infantil con 1000 millóns de euros, un subsidio de desemprego de 426 euros, máis 100 euros por fillo a cargo, para parados de máis dun ano, o aumento da prestación por fillo de 291 anuais a 600 euros, aumenta-lo límite de ingresos para recibir prestación de 11 500 euros a 14 000 euros, e o investimento de 50 millóns de euros para recupera-lo “Plan Educa3”.

Os socialistas ourensáns denuncian que “grazas a Rajoy, nun 15% dos fogares da provincia de Ourense se pasará frío este inverno”

18/10/2014
By

A deputada e o senador socialistas por Ourense nas Cortes Xerais, Laura Seara e Miguel Fidaldo, censuraron en rolda de prensa en Ourense o voto contrario do PP esta semana a unha Proposición de Lei do PSOE para garantir unha tarifa social de luz, gas (butano e propano) como un dereito social básico para os consumidores máis vulnerables.

A iniciativa socialista defendía, ademais, que non se corte en inverno a subministración enerxética para as persoas que se encontren en situación e pobreza enerxética, como poden se-las persoas con pensións mínimas, os fogares sen ingresos e con tódolos seus membros no paro. Os socialistas propoñemos que a diferenza entre a tarifa social e o consumo real se financie a través dos orzamentos xerais do Estado.

Laura Seara reprochou a Rajoy que non dixera “ ‘non’ a que no inverno sexa imposíbel corta-la subministración ás familias máis vulnerables” nin a que estes consumidores “non teñan que adicar máis do 10% dos seus ingresos ao pagamento do consumo de enerxía, cando ao ano se producen entre 2300 e 9300 mortes prematuras debido á pobreza enerxética, e hai xa en España sete millóns de persoas en situación de emerxencia social”.

En Ourense, afirmou, “grazas a Rajoy, nun 15% dos fogares da provincia pasarase frío este inverno” e lembrou que “66 426 fogares ourensáns teñen declarado que chegan con moita dificultade a fin de mes” e que “o 34% dos fogares na provincia ten como único ingreso as prestacións”. A iso hai que sumar, sostivo, que “a suba do 11% da luz, un dos recibos máis caros de Europa, é especialmente prexudicial para a provincia de Ourense, porque ademais de ás persoas, afecta aos cultivos agrarios e regadíos”.

A compañeira tamén sostivo que “Rajoy enganou os cidadáns sostivo porque dixo que a electricidade baixaría e a subiu nada menos que o 11%, e ademais, retiroulle o bono social da luz a 6094 ourensáns e a 37 016 galegos dende o 2011″. O número de familias beneficiadas por este bono social na provincia de Ourense, explicou, pasou de 57 479 no ano 2011 a 51 385 a finais do 2013. “Rajoy abandona a miles de persoas que sofren pobreza enerxética mentres lanza falsas mensaxes sobre a recuperación económica”, criticou.

Segundo expuxo a deputada, en Galicia, o gasto total anual en electricidade, gas e outros combustibles é de 1 361 196 000€, cunha media anual de gasto por fogar de 1282 euros. “Neste contexto, un 7% de familias galegas non poden mante-los seus fogares cunha temperatura axeitada, co que Galicia está por riba da media española de fogares que sofren esta situación; e convén lembrarlle a Rajoy que hai 22 552 fogares nos que hai carencias materiais, que hai 42 127 persoas que cobran unha pensión mínima, e que, xa en Ourense, hai 6272 que cobran unha pensión non contributiva e 16 741 que viven dunha prestación por desemprego”.

Así, a compañeira conclúe que “mentres o PP desvaloriza a calidade de vida dos cidadáns cos seus retallos, os socialistas achegamos propostas socialmente xustas e economicamente viables para recupera-la dignidade perdida de millóns de persoas”, para anunciar que os socialistas ourensáns presentarán mocións en tódolos concellos da provincia para frear a pobreza enerxética.

Seara reclamou “un grande pacto contra a pobreza enerxética na provincia, co fin de chegar a un punto de acordo que free este drama con consecuencias desoladoras”. “Pero non unha mesa de braseiro de burócratas senón un auténtico pacto social de institucións pero tamén de expertos, afectados e asociacións veciñais”.

Pola súa banda, Miguel Fidalgo repasou as partidas dos orzamentos xerais do Estado do 2015 para Ourense e afirmou que “son uns orzamentos sen alma”, e fixo fincapé en que “de nada serve que o Goberno central poña presuposto sobre o papel e infle os orzamentos estatais para Ourense coas partidas da AVE, porque son partidas que logo o Goberno non executa”.

Tras lembrar que as contas do Estado para Ourense non inclúen orzamento para proxectos fundamentais, como para a A-76, resumiu que “a realidade é que estes orzamentos son un castigo para Ourense”.

Por outro lado, o senador anunciou que a vindeira semana se debaterán na Cámara Alta diversas iniciativas sobre cuestións fundamentais para Ourense, como regadíos e infraestruturas, e outras sobre asuntos de importante interese social como o Alzheimer.

Máis de 6000 familias da nosa provincia perderon o bono social da luz dende que goberna Rajoy

04/10/2014
By

nuevo-1

A nosa deputada no Congreso, Laura Seara, denuncia que, segundo unha resposta parlamentaria do Goberno central ao Grupo Parlamentario Socialista, o número de beneficiarios do bono social no subministro de enerxía eléctrica reduciuse en máis de 6000 familias na nosa provincia nos dous primeiros anos do goberno do PP (pasando de 57 479 no 2011 a 51 385 a finais do 2013).

Seara critica ao Goberno central que abandone “a miles de persoas que sofren pobreza enerxética mentres lanza falsas mensaxes sobre a recuperación económica”, lamentando que, a pesares de que o bono social estea “destinado aos fogares con menos recursos”, as medidas que adoptou en materia enerxética empuxan “á exclusión social a miles de fogares españois”, lembrando que organizacións como Cáritas xa alertaron de que o número de familias que se atopan en risco de exclusión ascende a dous millóns e medio.

A deputada explica que “coa nova reforma do PP, o prezo do bono social xa non será fixo, senón que se aplicará un desconto” e que, ademais, “o bono social non estará ligado ao número de membros da familia nin unicamente á renda, ao establecerse uns topes por baixo dos cales non terá dereito ao mesmo”, o que suporá que “haberá moitos menos beneficiarios no futuro”

Seara afirma que “Rajoy enganou ás familias, unha vez máis, pois dixo que, coa reforma eléctrica, ía a baixa-lo prezo da luz, e resulta que no canto de baixar, sobe”, a pesares de que “é un dos máis caros de toda Europa”. Neste senso, apunta que “no terceiro trimestre do 2014, a subida se situou por riba do 11%”; e lamenta que, este novo sistema para fixar o prezo da luz “vai a ser impredecíbel e vai a trasladar directamente aos consumidores novas subas no recibo”, tal e como denunciamos os socialistas reiteradamente, a través de múltiples iniciativas parlamentarias que presentamos.

A deputada apunta que “a pobreza enerxética nas familias continúa subindo, o que é especialmente grave, sobre todo agora que se achega o inverno”, e denuncia que “moitos fogares no que todos os seus membros están sen traballo nin recursos, terán que afrontar unha nova suba da luz, xunto a outras de impostos”, o que resume en que “o Goberno de Rajoy sobe todo aos cidadáns, pero báixalles os salarios e recúrtalles en prestacións sociais”.

Seara destaca que esta suba resulta “moi preocupante en provincias como Ourense, cun alto índice de poboación envellecida, cunha das maiores porcentaxes de pensionistas, onde están as pensións máis baixas de toda España” e cun marcado carácter rural, pois “prexudica enormemente aos cultivos agrarios e regadíos”; e informou de que o ministro de Industria non compareceu no Congreso, en todo este ano, para explica-lo novo sistema de fixación de prezos da luz que vai a substituír ao sistema de poxas.

A deputada comunica que os socialistas defenderemos, nun próximo pleno do Congreso dos Deputados, unha a Proposición de Lei sobre pobreza enerxética, e solicitaremos unha auditoría enerxética para coñece-lo custo de cada unha das tecnoloxías, para que os cidadáns realmente saiban cal é a máis cara e a máis barata e sobre as razóns polas que o recibo da luz segue subindo cos custos fixos por riba dos variables. Unha Proposición de Lei que, dada a frecuencia de casos de “flagrante inxustiza ou de exclusión social, que poñen en risco ata a saúde e a integridade das persoas, nos casos máis extremos”, afrontará as mesmas incluíndo a proposta dunha tarifa social, mínima e asequíbel, para a poboación que se ache en tales situacións.

Laura Seara considera que os orzamentos xerais do Estado para o 2015 constitúen “a defunción da esperanza na provincia”

30/09/2014
By

A deputada socialista ourensá no Congreso dos Deputados, Laura Seara, afirma tamén que “se os orzamentos xerais do Estado para o 2015 son ficticios para Galicia, para a provincia de Ourense son absolutamente falsos”.

Apunta que “o Goberno central enzoufa de maquillaxe as contas para a nosa provincia, con cifras que logo nunca cumpre”. Así, explica que “as contas para Ourense baséanse case exclusivamente na partida para o AVE”, xa que, dos 643,3 millóns de euros que o Estado destina para a nosa provincia, 578,3 pertencen á partida para a súa liña AVE Olmedo-Lubián-Ourense. Porén, prognostica que o Goberno central “do mesmo xeito que o ano pasado, non executará esta cifra”, subliñando que o propio Goberno “recoñece” nestes orzamentos que “dos 572 millóns que presupostou no 2014 para o AVE en Ourense, só vai a executar 353”, engadindo que “de feito a cifra que executará será aínda menor, dado o ritmo das obras nesta infraestructura”.

Seara lembra que, por se fora pouco,“os investimentos reais en materia de infraestructuras na provincia son para ‘cubri-lo expediente’ ” e que faltan investimentos “estratéxicos, que dende o Grupo Socialista solicitamos en numerosas ocasións, como o Centro de Interpretación de Parques Naturais, o bulevar termal da cidade, os regadíos d’A Limia e a A-76”.

Do mesmo xeito, a deputada reproba “as irrisorias partidas orzamentarias para o AVE Ourense-Lugo, o AVE Ourense-Vigo, e a estación intermodal (200 000€) e a variante (100 000) na capital”, e mostra a súa sorpresa polo feito de que se inclúa “nominativamente o mosteiro de Melón, pero con cero euros”. Así mesmo, considera insuficientes as partidas para os enlaces de Cambeo coa cidade e coa A-56, e reprocha que “actuacións que dende o Partido Socialista levamos anos pedindo, como a mellora da N-525, da N-120, ou do firme da A-52, non teñen reflexo no orzamento do Ministerio de Fomento senón a través de SEITTSA” (Sociedade Estatal de Infraestructuras del Transporte Terrestre).

Seara engade que “son tamén claramente insuficientes as partidas destinadas aos nosos ríos”, e explica que “o Goberno do PP volta a infla-los orzamentos do Estado para Ourense, misturando partidas de carácter xeral en materia de augas e saneamento, con partidas que son de carácter técnico e que territorializan, inchando así artificiosamente as contas”.

“O resultado destes orzamentos será o maior empobrecemiento dos ourensáns, e a evidencia de que a recuperación da que fala o Goberno do PP é unha falacia a ollos das clases traballadoras e medias, que non só non recuperan nada do que lles arrebatou a crise, senón que seguen vendo como empeora a súa situación”, sostén Seara.

A deputada abunda que “a conxelación do soldo aos funcionarios e o incremento mínimo das pensións (nun 0,25%), así como a redución das prestacións por desemprego nun 15%, cunha previsión de incremento dos parados, son tres estocadas consecutivas á provincia de Ourense”.

Polo tanto, considera que estes “son os orzamentos da defunción da esperanza na provincia de Ourense”, pois “non aportan nada que permita pensar nunha futura reactivación económica”; concluíndo que, nestas contas, “o Goberno do PP faise trampas ao solitario”.

Blanco: “quero decirlle a Rajoy que imos a gañar estas eleccións por toda a xente que o esta pasando mal”

15/05/2014
By

OLYMPUS DIGITAL CAMERA

O candidato do PSdeG ao Parlamento Europeo José Blanco envioulle hoxe unha mensaxe a Mariano Rajoy, de visita na nosa terra: “quero decirlle que imos a gañar estas eleccións por toda esa xente que o está pasando mal”.

No mítin celebrado en Carballiño, acompañado de Pachi Vázquez e Francisco Fumega, asegurou que, en tempo crise, o responsábel é facer que paguen os causantes, e non as vítimas. Por iso se comprometeu a traballar no Parlamento Europeo para acabar “cos paraísos fiscais, aprobando un imposto á riqueza e combatendo a fraude fiscal; non como este Goberno, co que por primeira vez baixou a recadación neste ano”, dixo.

Blanco aludiu tamén a Feijóo e cualificouno “como o capitán dun barco que  está levando o barco a pique. Só un político insensíbel pode facer a política que fai o PP”.

Segundo expuxo, “non hai xustiza social sen xustiza fiscal”, amosando o seu convencemento de que, a partir do 25 de maio, co voto progresista “imos a devolver as persoas ao centro das preocupacións e ao centro da política”.

Tamén defendeu que “quen non provocou a crise, non pode pagar as facturas da mesma”, e demandou dar un xiro na economía, ao considerar que “é hora de poñe-lo emprego, e non os retallos, no centro das prioridades; triplica-los fondos para emprego xuvenil; combate-lo paro de longa duración”.

Blanco emprazou á cidadanía a vota-lo 25 de maio, xa que “os dereitos sociais non se recuperan ficando na casa; o benestar non se conquista sen mobilización, e o investimento e o emprego non se xeran sen cambio”.

O exministro defendeu que “non podemos dar un cheque en branco a quen está destruíndo a xustiza social e a igualdade de oportunidades”, contrapuxo “a política de crecemento e inversión do PSOE” fronte aos retallos PP”.