Desemprego

Seara propón un plan demográfico que evite o despoboamento da provincia co 0,5% dos cartos do rescate de dúas autoestradas privadas de Madrid

 

A nosa deputada no Congreso, Laura Seara, presentou onte en rolda de prensa as nosas emendas aos orzamentos xerais do Estado 2015 para a provincia de Ourense.

Seara sinalou que estes orzamentos retratan a un Goberno central “que minte” e apuntou que, para a nosa provincia, trátase duns orzamentos “maquillados, nos que a práctica totalidade do investimento se vai ao AVE”, a pesares de que, como “xa se demostrou”, é algo que o Goberno do PP logo non executa, chegando a un grao de incumprimento de ata o 40%”. Porén, considerando ao AVE como “unha infraestrutura básica”, a deputada anunciou a presentación de emendas socialistas por 2 millóns de euros para a estación intermodal na cidade, por 3 millóns para a liña de alta velocidade Ourense-Vigo, e por 2 a Ourense-Lugo.

Tamén no eido de infraestruturas, propoñemos destinar 10 millóns de euros para a supresión de pasos a nivel en Galicia, 1 millón para un plan de impulso do transporte de mercadorías por ferrocarril na nosa Comunidade Autónoma, e outras emendas para proxectos de melloras nas estradas N-120, N-525 e N-541 e as autovías A-76 e A-52, ao seu paso pola nosa provincia. No caso desta última, inclúese o seu enlace co parque ambiental de Carballeda de Avia, a pesares de que o PP abandonou a creación deste coa chegada de Feijóo á Xunta, posto que é un proxecto ao que, segundo Seara “non renunciamos”

Como cuestión esencial para a mesma, a compañeira indicou “a necesidade de evitar o despoboamento do territorio, que é o virus que rela incesantemente a Ourense”. Neste senso, apuntou que a nosa é “a terceira provincia máis envellecida da UE, cun 29,6% da poboación que supera os 65 anos”, e que “segundo as proxeccións do INE, no 2023 a provincia terá perdido 52 211 habitantes en vintesete anos”. Por iso os socialistas presentamos unha emenda de 10 millóns de euros para un Plan Demográfico para as provincias de Ourense e Lugo, cantidade que equivalería só ao 0,5% do que o Goberno central “destinará a rescatar dúas autoestradas de Madrid para salvar as empresas que as xestionan”.

Seara tamén reclamou, con outra emenda por 10 millóns de euros, distintas actuacións na Ribeira Sacra, entre outras, o apoio da súa candidatura a Patrimonio da Humanidade, sostendo que a zona “é un dos territorios con maiores recursos naturais, culturais e paisaxísticos, que a fan merecedora desta candidatura, pero ao tempo está afectada por un despoboamento que debe evitarse”.

Tamén no eido cultural e patrimonial, propoñemos destinar 3 millóns de euros á catedral de Ourense e a diferentes castelos, mosteiros e museos da provincia, así como a un Plan específico de apoio ás nosas denominacións de orixe vinícolas. Para o a posta en valor e recoñecemento do Camiño de Santiago de Inverno (por Valdeorras) propoñemos destinar 12 000€.

Verbo do termalismo, Seara presentará outra enmenda aos orzamentos estatais por un montante de 3 millóns de euros, destinada a posta en práctica dun Plan de Termalismo da provincia, outra de 500 000€ para o boulevard da cidade, e unha de 1,3 millóns para os regadíos d’A Limia.

A compañeira tamén presenta emendas de 850 000€ para os colectores e a depuradora de Castrelo do Val, de máis de 2 millóns para melloras diversas de carácter medioambiental e fluvial, e 350 000€ para o Convenio de Recuperación do Parque Natural do Xurés.

Seara tamén se referiu ás propostas socialistas a nivel nacional para estes orzamentos, baseadas no rescate financeiro a familias e autónomos, un Pacto contra a pobreza infantil, a reindustrialización a traverso dun Plan Nacional de Referencia apoiado na Formación Profesional, a suba do Salario Mínimo Interprofesional ata o 60%, unha Lei de Igualdade Salarial entre homes e mulleres, e a necesidade de poñer couto ás escandalosas retribucións de altos executivos. Sobre esta última cuestión, contrastou cos datos de que “en Ourense hai 149 000 persoas inactivas e 26 700 desempregados, dos que 2900 buscan o seu primeiro emprego”, e sinalou a presentación doutra emenda, por valor de 50 millóns de euros, para un Plan de Emprego para Galicia.

Tras incidir en que “estes orzamentos do Goberno do PP consagran o engano como forma de facer política e a desigualdade”, afirmou que “todas estas emendas non son un capricho, e poderían ser executadas perfectamente, se hai vontade”.

Os socialistas ourensáns denuncian que “grazas a Rajoy, nun 15% dos fogares da provincia de Ourense se pasará frío este inverno”

A deputada e o senador socialistas por Ourense nas Cortes Xerais, Laura Seara e Miguel Fidaldo, censuraron en rolda de prensa en Ourense o voto contrario do PP esta semana a unha Proposición de Lei do PSOE para garantir unha tarifa social de luz, gas (butano e propano) como un dereito social básico para os consumidores máis vulnerables.

A iniciativa socialista defendía, ademais, que non se corte en inverno a subministración enerxética para as persoas que se encontren en situación e pobreza enerxética, como poden se-las persoas con pensións mínimas, os fogares sen ingresos e con tódolos seus membros no paro. Os socialistas propoñemos que a diferenza entre a tarifa social e o consumo real se financie a través dos orzamentos xerais do Estado.

Laura Seara reprochou a Rajoy que non dixera “ ‘non’ a que no inverno sexa imposíbel corta-la subministración ás familias máis vulnerables” nin a que estes consumidores “non teñan que adicar máis do 10% dos seus ingresos ao pagamento do consumo de enerxía, cando ao ano se producen entre 2300 e 9300 mortes prematuras debido á pobreza enerxética, e hai xa en España sete millóns de persoas en situación de emerxencia social”.

En Ourense, afirmou, “grazas a Rajoy, nun 15% dos fogares da provincia pasarase frío este inverno” e lembrou que “66 426 fogares ourensáns teñen declarado que chegan con moita dificultade a fin de mes” e que “o 34% dos fogares na provincia ten como único ingreso as prestacións”. A iso hai que sumar, sostivo, que “a suba do 11% da luz, un dos recibos máis caros de Europa, é especialmente prexudicial para a provincia de Ourense, porque ademais de ás persoas, afecta aos cultivos agrarios e regadíos”.

A compañeira tamén sostivo que “Rajoy enganou os cidadáns sostivo porque dixo que a electricidade baixaría e a subiu nada menos que o 11%, e ademais, retiroulle o bono social da luz a 6094 ourensáns e a 37 016 galegos dende o 2011″. O número de familias beneficiadas por este bono social na provincia de Ourense, explicou, pasou de 57 479 no ano 2011 a 51 385 a finais do 2013. “Rajoy abandona a miles de persoas que sofren pobreza enerxética mentres lanza falsas mensaxes sobre a recuperación económica”, criticou.

Segundo expuxo a deputada, en Galicia, o gasto total anual en electricidade, gas e outros combustibles é de 1 361 196 000€, cunha media anual de gasto por fogar de 1282 euros. “Neste contexto, un 7% de familias galegas non poden mante-los seus fogares cunha temperatura axeitada, co que Galicia está por riba da media española de fogares que sofren esta situación; e convén lembrarlle a Rajoy que hai 22 552 fogares nos que hai carencias materiais, que hai 42 127 persoas que cobran unha pensión mínima, e que, xa en Ourense, hai 6272 que cobran unha pensión non contributiva e 16 741 que viven dunha prestación por desemprego”.

Así, a compañeira conclúe que “mentres o PP desvaloriza a calidade de vida dos cidadáns cos seus retallos, os socialistas achegamos propostas socialmente xustas e economicamente viables para recupera-la dignidade perdida de millóns de persoas”, para anunciar que os socialistas ourensáns presentarán mocións en tódolos concellos da provincia para frear a pobreza enerxética.

Seara reclamou “un grande pacto contra a pobreza enerxética na provincia, co fin de chegar a un punto de acordo que free este drama con consecuencias desoladoras”. “Pero non unha mesa de braseiro de burócratas senón un auténtico pacto social de institucións pero tamén de expertos, afectados e asociacións veciñais”.

Pola súa banda, Miguel Fidalgo repasou as partidas dos orzamentos xerais do Estado do 2015 para Ourense e afirmou que “son uns orzamentos sen alma”, e fixo fincapé en que “de nada serve que o Goberno central poña presuposto sobre o papel e infle os orzamentos estatais para Ourense coas partidas da AVE, porque son partidas que logo o Goberno non executa”.

Tras lembrar que as contas do Estado para Ourense non inclúen orzamento para proxectos fundamentais, como para a A-76, resumiu que “a realidade é que estes orzamentos son un castigo para Ourense”.

Por outro lado, o senador anunciou que a vindeira semana se debaterán na Cámara Alta diversas iniciativas sobre cuestións fundamentais para Ourense, como regadíos e infraestruturas, e outras sobre asuntos de importante interese social como o Alzheimer.

Laura Seara considera que os orzamentos xerais do Estado para o 2015 constitúen “a defunción da esperanza na provincia”

A deputada socialista ourensá no Congreso dos Deputados, Laura Seara, afirma tamén que “se os orzamentos xerais do Estado para o 2015 son ficticios para Galicia, para a provincia de Ourense son absolutamente falsos”.

Apunta que “o Goberno central enzoufa de maquillaxe as contas para a nosa provincia, con cifras que logo nunca cumpre”. Así, explica que “as contas para Ourense baséanse case exclusivamente na partida para o AVE”, xa que, dos 643,3 millóns de euros que o Estado destina para a nosa provincia, 578,3 pertencen á partida para a súa liña AVE Olmedo-Lubián-Ourense. Porén, prognostica que o Goberno central “do mesmo xeito que o ano pasado, non executará esta cifra”, subliñando que o propio Goberno “recoñece” nestes orzamentos que “dos 572 millóns que presupostou no 2014 para o AVE en Ourense, só vai a executar 353”, engadindo que “de feito a cifra que executará será aínda menor, dado o ritmo das obras nesta infraestructura”.

Seara lembra que, por se fora pouco,“os investimentos reais en materia de infraestructuras na provincia son para ‘cubri-lo expediente’ ” e que faltan investimentos “estratéxicos, que dende o Grupo Socialista solicitamos en numerosas ocasións, como o Centro de Interpretación de Parques Naturais, o bulevar termal da cidade, os regadíos d’A Limia e a A-76”.

Do mesmo xeito, a deputada reproba “as irrisorias partidas orzamentarias para o AVE Ourense-Lugo, o AVE Ourense-Vigo, e a estación intermodal (200 000€) e a variante (100 000) na capital”, e mostra a súa sorpresa polo feito de que se inclúa “nominativamente o mosteiro de Melón, pero con cero euros”. Así mesmo, considera insuficientes as partidas para os enlaces de Cambeo coa cidade e coa A-56, e reprocha que “actuacións que dende o Partido Socialista levamos anos pedindo, como a mellora da N-525, da N-120, ou do firme da A-52, non teñen reflexo no orzamento do Ministerio de Fomento senón a través de SEITTSA” (Sociedade Estatal de Infraestructuras del Transporte Terrestre).

Seara engade que “son tamén claramente insuficientes as partidas destinadas aos nosos ríos”, e explica que “o Goberno do PP volta a infla-los orzamentos do Estado para Ourense, misturando partidas de carácter xeral en materia de augas e saneamento, con partidas que son de carácter técnico e que territorializan, inchando así artificiosamente as contas”.

“O resultado destes orzamentos será o maior empobrecemiento dos ourensáns, e a evidencia de que a recuperación da que fala o Goberno do PP é unha falacia a ollos das clases traballadoras e medias, que non só non recuperan nada do que lles arrebatou a crise, senón que seguen vendo como empeora a súa situación”, sostén Seara.

A deputada abunda que “a conxelación do soldo aos funcionarios e o incremento mínimo das pensións (nun 0,25%), así como a redución das prestacións por desemprego nun 15%, cunha previsión de incremento dos parados, son tres estocadas consecutivas á provincia de Ourense”.

Polo tanto, considera que estes “son os orzamentos da defunción da esperanza na provincia de Ourense”, pois “non aportan nada que permita pensar nunha futura reactivación económica”; concluíndo que, nestas contas, “o Goberno do PP faise trampas ao solitario”.

Blanco afirma en Ourense que é o momento de impulsar unha auténtica axenda contra a desigualdade en Europa

Blanquito

O candidato do PSdeG-PSOE ao Parlamento Europeo José Blanco emprazou esta mañá á cidadanía a dar un xiro social en Europa, “porque se non, continuará a depresión económica e social en Galicia e en España”. E insistiu “é a hora de impulsar unha auténtica Axenda contra a Desigualdade en Europa porque, ou Europa devolve a esperanza á xente, ou a xente perderá a esperanza en Europa”.

Nun encontro na cidade con axentes económicos e sociais, en compañía do alcalde, Agustin Fernández, o candidato asegurou que Galicia “non pode resignarse” a ter preto de 300 000 persoas no paro, ou a que máis de 130 000 mozos e mozas emigraran nos últimos cinco anos por falta de oportunidades na nosa terra, 13 000 deles ourensáns: “Galicia non pode resignarse a que 8000 empresas desapareceran sen seren reemprazadas por outras”, insistiu.

O exministro de Fomento fixo balance ao asegurar que, “tras dous anos de goberno de Rajoy e cinco de Feijóo, non hai un só indicador que mellorara”, e indicou que a importancia das vindeiras eleccións do 25 de maio radica en que Europa, España e Galicia “deben elixir entre a esquerda do emprego e a defensa dos dereitos sociais, ou a dereita da austeridade e os retallos ao ditado dos mercados”.

O candidato denunciou, ademais, que coa reforma decidida polo Goberno central, os pensionistas galegos van a sufrir un recorte de 5000 millóns de euros nos vindeiros oito anos, 7000€ por persoa. Por iso anunciou que o Grupo Socialista no Parlamento Europeo porá freo aos ataques da dereita e impulsará medidas para garantir pensións públicas suficientes, que permitan manter unhas condicións de vida dignas ás persoas maiores.

Aludiu támen á lei da dependencia que “a dereita esta deixando morrer, e que fixo desaparecer das lista de espera a 30 000 dependentes que xa tiñan recoñecida o dereito a percibila”.

Ademais, anunciou tamén que Grupo Socialista impulsará un Pacto Europeo polo Emprego e o Progreso Social, que incluirá medidas como triplica-los fondos para emprego xuvenil, e combate-lo desemprego de longa duración, aumentando as axudas para parados maiores de 45 anos e desbloquea-lo financiamento para as PeMEs.

Por último, Blanco aludiu ao retallo de fondos de desenvolvemento rural para a provincia, que impulsou Arias Cañete, e por iso demandou un cambio en políticas como a Política Agraria Común, “para que a xente do mundo rural, a que vive directamente del, que crea emprego nel, sexa a beneficiaria real das axudas europeas, e non os rentistas, como impuxo Cañete, coa baixada de cabeza da Xunta de Feijóo”.

Seara lamenta que xa hai na provincia máis de 4700 persoas afectadas polos EREs nos dous últimos anos

A nosa deputada no Congreso, Laura Seara, acaba de recibir unha resposta parlamentaria do Goberno central na que se contempla que os EREs levados a cabo na provincia no 2012 e ata agosto do 2013 afectaron a 4700 traballadores.

Destes afectados, cáseque 3300 perderon o seu emprego por suspensión de contrato, e outros case cincocentos sufriron un despedimento colectivo. O resto, uns novecentos, viron reducida a súa xornada.

A resposta recolle, ademais, que nestes dous últimos anos son xa 314 empresas na provincia que se viron afectadas por expedientes de regulación de emprego.

Seara lamenta estas cifras e critica que “esto non é senón o resultado da nefasta política laboral do Goberno do PP de Mariano Rajoy”.

Así, apunta que dende que goberna o PP destruíronse no Estado Español un millón de empregos, e os cotizantes á Seguridade Social caeron en máis de novecentos mil. A ministra Báñez vén de presentar no Congreso, segundo lembrou a compañeira, un Real Decreto-Lei que supón “a terceira reforma laboral” do Goberno central, que non é máis que “outra nova volta de ozca contra os dereitos dos traballadores” nas “erróneas reformas laborais” dese Goberno, que provocaron, en verbas da deputada, “unha continua sangría no emprego, a precarización do mercado laboral e unha depreciación salarial sen precedentes”, cunha “destrución de emprego masiva: máis do 25% da poboación activa está en paro, nin máis nin menos que preto de 6 millóns de persoas”.

Así mesmo, Seara critica que “o Goberno acompañou as súas dañiñas reformas laborais con retallos sociais que deixan nunha total indefensión aos cidadáns que quedan en paro”. Así, segundo lembra a compañeira, “de seis millóns de parados, máis de tres non teñen ningún tipo de protección, e a cobertura ao desemprego apenas acada o 60% dos parados rexistrados; o desemprego de longa duración incrementouse do 19% ao 50% e os mozos sofren taxas de paro superiores ao 55%”.

Laura Seara reprocha a Báñez a “profunda ingratitude” do PP ao “castigar aos emigrantes retornados, mentres amnistían a delincuentes fiscais e tapan aos que frecuentaron Suíza por outras razóns”

 

A nosa deputada no Congreso, Laura Seara pediulle á ministra Báñez, nunha sesión de control “que se comporte, pida perdón e arranxe dunha vez” a desfeita das sancións fiscais aos emigrantes retornados. “Minte vostede reiteradamente nesta Cámara, ao igual que mentiu Rajoy” afirmou a compañeira.

Seara acusou así a Báñez e ao Goberno do PP de “profunda ingratitude” e de te-la “desmemoria de quen quizáis se avergoña da súa historia” , xa que, segundo sostivo a deputada, “se alguén merece xustiza e sensibilidade, son os nosos emigrantes retornados”, xa que axudaron a construí-lo noso Estado do Benestar, se foron coas maletas baleiras, por un exilio económico ou político, e voltaron con elas cheas do froito do seu traballo”.

Malia iso, Seara reprobou que “á súa volta a España, o Goberno envíalles cartas intimidatorias, cando a realidade é que no seu momento non lles informou adecuadamente das súas obrigas fiscais”. “Compórtese, regularice a súa situación, peche os expedientes sancionadores abertos e pida perdón” díxolle Seara á Ministra antes de engadir que o Goberno do PP “amnistiou a miles de delincuentes fiscais, os tesoureiros do PP frecuentaron durante anos Suíza, e vostedes castigan aos emigrantes que retornaron a España mentres tapan e animan a este selecto clube”.

Ao finaliza-la sesión de control, Seara acudiu á reunión que o Sº Xeral Federal, Alfredo Pérez Rubalcaba e a voceira socialista no Congreso, Soraya Rodríguez mantiveron coa Presidenta da Federación de Asociacións de Emigrantes para mostra-lo apoio do PSOE a este colectivo e, en palabras de Seara, “evitar que o Goberno leve a cabo os seus plans recadatorios cos emigrantes”.

 

Vídeo coa intervención de Seara:  https://www.youtube.com/watch?v=8LC2KvYhL10

 

Comunicado sobre a contratación pola Deputación dun concelleiro do PP

En base á información recollida a semana pasada en varios Medios de Comunicación, relativa á contratación dun concelleiro do PP en Pereiro de Aguiar como peón dun Punto Limpo, o PSdeG de Ourense manifesta o que segue.

Entendemos que a noticia contribúe a clarifica-las prácticas existentes na Deputación, na medida en que non o estivesen xa de abondo coas múltiples denuncias que levamos facendo ao longo dos anos, e despois de coñecerse o enxuizamento ao que se ha ser sometido o ex-Presidente da institución, por comportamentos caciquís e nepotistas semellantes.

Co actual Presidente, lonxe da rectificación, este tipo de conductas aumentan. Sen ir máis lonxe, no devandito proceso, a persoa seleccionada non só é concelleiro do PP, senón tamén familiar dun deputado provincial (o alcalde de Pereiro).

Ante estes feitos, o PSdeG de Ourense manifesta o seu firme propósito de seguir insistindo, como ata agora, na denuncia pública e fiscalización de tódolos procesos semellantes. Así, pediremos nestes días toda a documentación relativa a este expediente  concreto.

O PSdeG de Ourense tamén quere manifesta-la súa satisfacción polo feito de que unha persoa que participou nun proceso selectivo na Deputación, se atreva a denuncia-las irregularidades producidas no mesmo, o que vai na liña do que xa manifestamos no seu día, no senso de que denunciar este tipo de comportamentos non só constitúe unha tarefa da oposición, senón tamén daquelas persoas que participen en calquera daqueles, e, en xeral, de tódolos posibles aspirantes a cubrir prazas convocadas pola Deputación Provincial.

 

Seara e Quintas denuncian “o severo castigo” do Goberno central e da Xunta á nosa provincia e reclaman a súa implicación urxente nun plan de viabilidade para T-Solar que inclúa o mantemento dos postos de traballo

As nosas deputada no Congreso e Sª de Organización Provincial, Laura Seara e María Quintas, denunciaron esta mañá en rolda de prensa o “maltrato” que a nosa provincia está a sufrir por parte dos Gobernos de Galicia e de España, e reclamaron que, nun prazo de dez días, a Xunta, “como administración competente” inicie un plan de viabilidadee de xeito conxunto cos representantes da empresa T-Solar, tódolos accionistas e os representantes dos traballadores, solicitan que o Estado impulse a mesa de diálogo para a posta en marcha de devandito plan.

Así mesmo, piden ao Estado e á Xunta de Galicia que realicen tódalas xestións necesarias para que nun novo escenario para a empresa, ou na súa posible venda, se priorice o mantemento de tódolos postos de traballo na planta de T-Solar en Ourense. Para iso, rexistraron hoxe mesmo no Congreso e no Parlamento de Galicia senllas Proposicións non de Lei.

Seara sostivo que “Ourense está sufrindo un castigo severo por parte dos Gobernos de Galicia e de España, que no único que rivalizan é nos recortes e no maltrato a esta provincia”. Como proba, citou os 109 098 ourensáns afectados pola decisión do Goberno de non revaloriza-las pensións, os 9,6 millóns de euros que deixarán de recibi-los pensionistas da provincia, e os 266 expedientes de FOGASA sen resolver en Ourense.

Tamén lembrou a paralización das infraestructuras na provincia e a “a farsa” que o Goberno e a Ministra Pastor protagonizan respecto ao AVE a Galicia. “Tapian os túneles máis avanzados nos tramos de Ourense, dinlle ás empresas que nos tramos máis atrasados prioricen unha única vía, encargan un informe onde propoñen suprimi-la dobre vía, as empresas constructoras do AVE reducen persoal”, e Pastor di onte no Senado que todo vai segundo os previsto”. “Segundo o previsto por ela e o PP desde fai tempo que é privar a Galicia e a Ourense dun AVE de primeira” “ incide a nosa deputada, quen pediu a comparecencia urxente no Congreso da Ministra Pastor e do Secretario de Estado de Infraestructuras.

“Nin unha soa iniciativa en máis de catro anos de Feijóo e ano e medio de Rajoy en favor de Ourense”, resumiu; engadindo que “Rajoy treme ante Bárcenas, pero saca peito fronte a Ourense e Galicia, condenándoas a un futuro tan negro como os cuartos do seu partido; e Feijóo, está sendo o seu lazarillo”, acusándoos de non moveren “nin un dedo, non só para crear emprego e empresas senón tampouco para evitar que pechen as que xa existen, como T-Solar”.

A compañeira denunciou “a actitude de deixamento e pasotismo do Goberno” respecto de dita empresa, cuxos traballadores se pecharon para evita-lo desmantelamento da súa planta de gases á espera de que se materialice un comprador que permita a reactivación da planta, lembrando que “os principais acreedores de T-Solar son as Administracións públicas, entre elas o Estado”, sendo unha empresa “á que se destinaron recursos públicos, e o Goberno ten a obrigación de ofrecer solucións”. Así, lembrou a subvención de 6,4 millóns de euros do Ministerio de Economía no 2007, 2,6 millóns de euros que aportou no 2008 o Ministerio de Educación e Ciencia nunha liña de investigación, e dous préstamos do Ministerio de Industria de case 7 millóns de euros.

A compañeira pediu hai xa máis dun mes ao Goberno central, a través dunha batería de iniciativas parlamentarias, que estudase un plan de viabilidade que fixese posible a continuidade da empresa, así como o mantemento do emprego dos seus cento setenta traballadores. Seara advertiu xa entón da “obriga” e “a responsabilidade que ten o Estado para evita-la peche de T-Solar e a conseguinte perda de máis postos de traballo que afondase aínda máis na crítica situación de desemprego” que sufrimos, e solicitou ao Executivo “accións de urxencia” para tal fin; aínda que “lamentábelmente o Goberno non fixo ren”.

Pola súa banda, María Quintas sostivo que T-Solar é unha empresa creada co apoio das Administracións e da Xunta, e lembrou que “o Goberno de Galicia é competente en materia de Traballo e de Industria”, polo que aludiu á responsabilidade da Xunta para dotar dun plan de viabilidade á empresa. Amosou tamén o seu apoio aos traballadores, e considerou que coa perda de T-Solar non só se perdería unha empresa punteira a nivel internacional e irían á rúa os seus cento setenta traballadores, senón que tamén quedarían afectadas, en total, unhas “novecentas persoas”.

Por iso realizou un chamamento a toda a sociedade ourensá, tamén aos Medios de Comunicación, para apoia-la continuidade da empresa, e incidiu en que a mesma non debe venderse “a cachos”, reivindicando en que os traballadores formen parte das negociacións da posíbel venda, co propósito de mante-los postos de traballo.

Seara acusa a Pastor de facer “trilerismo”co AVE a Ourense e anuncia que pedirá a súa comparecencia para que explique “a gran mentira” que contou aos ourensáns

A nosa deputada no Congreso, Laura Seara anuncia que pedirá a comparecencia na cámara da Ministra de Fomento, Ana Pastor, para que explique a paralización nas obras do AVE na nosa provincia.

A compañeira lembra que “xa o pasado mes de marzo, os parlamentarios socialistas ourensáns nas Cortes advertimos en rolda de prensa da posibilidade de que se paralizasen as obras do AVE nalgúns tramos que estaban en execución na provincia de Ourense por impagos da Administración; despois advertimos da existencia dun informe de ADIF que cambiaría os proxectos; agora vemos que o tempo nos dá a razón”.

A deputada indica que “cando Pastor chegou ao Ministerio, todos sabiamos onde estaba o AVE: estaba camiño de Ourense, coas mesmas prestacións que os do resto do Estado, cun acceso exterior na cidade de 17 km., dende Taboadela, e cunha estación adxudicada a un dos arquitectos máis presitiosos do mundo: Norman Foster” Pero hoxe, segundo denuncia Seara denuncia “o PP e Ana Pastor converteron a Ourense nun tapete, e o AVE nunha boliña que cada día esconden baixo un gobelete distinto”. Neste senso, a deputada incide na “ensalada de cifras” que o Goberno ofrece nas súas respostas parlamentarias sobre a execución do AVE a Galicia e na provincia de Ourense. Este “mareo de datos contraditorios ten un único e perverso obxectivo: confundir á cidadanía para ocultar que se parou o AVE, e que un ano despois da chegada do PP ao Goberno, xa non se sabe cando nin como chegará; só sabemos que non chegará no 2015 como asinara Feijoo tras chegar á Xunta no 2009”.

Por elo, a compañeira destaca que “a realidade é que, mentres a Ministra Pastor anuncia investimentos pantasma, as empresas teñen que comunicar aos seus traballadores que se paralizarán as obras porque Fomento non paga”, habendo “unha clara e nauseabunda estratexia por parte do Goberno, que tamén é dos ourensáns, para enganar a Ourense e a quen vivimos aquí, con relación ao AVE, como antes fixeron coas pensións ou o IVA”.

Seara recrimina que a Ministra “Pastor non quere vir a Ourense a consensuar; vén a pastorear a esta provincia, con novos enganos, vellas mentiras e unha chea de cifras contraditorias, boliñas e gobeletes; sabe perfectamente que hai consenso hai anos: Ourense quere un AVE de primeira, cunha entrada exterior e unha estación xa adxudicada a Foster; todo está decidido e planificado, e Pastor só ten que adxudicalo, pero non o fai, e apúntase ao trilerismo, coa complicidade do PP de Ourense e a connivencia de Feijóo”.

Laura Seara: “o PP expulsou da Seguridade Social a case ao 75% dos coidadores non profesionais de dependentes en Galicia”

A nosa deputada e voceira do PSOE no Congreso dos Deputados en materia de discapacidade, denuncia que o Goberno central confirma, en resposta parlamentaria escrita, que o número de coidadores non profesionais que figuraban de alta na Seguridade Social en Galicia, a xullo do 2012, era de 7405, e que a 31 de marzo do 2013 só quedan 2075.

Seara destaca que se trata dunha redución de case o 75%, e engadiu que “os poucos que sobreviviron á expulsión viron recortada a súa prestación nun 15%”.

Como deputada ourensá, apunta que “en Ourense a situación non é máis alentadora, pois en xullo do 2012 había 1260 coidadores non profesionais de alta na Seguridade Social, e só quedan 433; unha redución do 65%”.

“Moitísimas das persoas que o PP expulsou da Seguridade Social tiveron que renunciar á súa vida laboral para coidar dos seus familiares; vaia recompensa!”, manifestou a compañeira antes de lembrar que “a Lei de Dependencia se puxo en marcha baixo o Goberno socialista co acordo de todos, e supuxo o recoñecemento dun novo dereito de cidadanía no noso país: o dereito das persoas que non se poden valer por si mesmas a ser atendidas polo Estado, ao tempo que se lles garantía unha serie de prestacións con recursos e servizos”.

O Grupo Socialista ven de presentar no Congreso unha Proposición non de Lei para recupera-la Lei de Dependencia e garanti-lo seu mantemento e desenvolvemento, “pero o PP rexeitouna”, lamenta.

A deputada reproba “o despece absoluto” da Lei de Dependencia que o PP realizou en pouco máis dun ano. Lembra que o Goberno central:

- en decembro do 2012, a través de Decreto-Lei, paralizou a aplicación do calendario de implantación da Lei, impedindo a case 400 000 persoas con dependencia moderada acceder ás súas prestacións

- nos orzamentos xerais do Estado do 2012 realizou un recorte total de 566 millóns de euros, sumando as achegas das CC.AA

- despois, cun novo Decreto-Lei, suprimiu os niveis, deixando simplemente os grados establecidos, e ampliou a dous anos o prazo para resolve-las axudas sen que houbese efecto retroactivo, o que, tendo en conta que o 54% dos dependentes superan os oitenta anos de idade, provoca que estean morrendo moitos deles sen resolución

- eliminou as compatibilidades de servizos, reducindo o 15% da prestación por coidados na contorna familiar, prexudicando a 435 180 persoas

- revisou a regulación do convenio especial no Sistema da Seguridade Social dos coidadores non profesionais, que deixou de pagar o Estado, tendo agora facelo os propios afectados, unhas 180 000 persoas

- reduciu nun 13% a achega do Estado para financia-lo nivel mínimo de protección, deixando a 300 000 persoas “que teñen recoñecido o dereito sen prestación, servizo nin axuda”

- a traverso dos orzamentos xerais do Estado do 2013, recortou 200 millóns no nivel mínimo, e limitou a achega do Estado á Lei de Dependencia a tan só un 18%.