Blog Archives

O PSOE denuncia que o goberno de Xinzo atrasa o urxente pleno sobre a tala masiva de árbores escudándose nunha obra innecesaria adxudicada a dedo a unha empresa do entorno do PP

04/05/2017
By

A voceira do PSdeG-PSOE, Elvira Lamadestaca que o debate sobre a reforma da avenida de Celanova “sí que é urxente e necesario porque ten a meirande parte da vila en pé”

 A moción conxunta impulsada por toda a oposición municipal esixe ó grupo de goberno que se posicione en contra da tala indiscriminada de árbores, debido á alarma social xerada

 reforma pleno xinzo

Proxecto da innecesaria reforma do salón de plenos de Xinzo

 

Ourense, 3 de maio de 2017. O goberno local de Xinzo de Limia aproveita unha obra totalmente innecesaria para porse de lado ante as clamorosas demandas dos veciños e veciñas da vila ó atrasar o urxente e necesario debate sobre o vergoñento proxecto arboricida que o PP pretende executar na avenida de Celanova. E o fai escudándose nunha obra –a reforma do salón de plenos da Casa do Concello– que, para colmo, adxudicou a dedo por mais de 38.000 euros a unha empresa do entorno do PP.

Os populares están encaprichados coa tala masiva a pesar de que a meirande parte dos veciños e veciñas da vila reclaman unha reforma que non afecte dunha forma tan perxudicial ó patrimonio natural mais relevante do concello. Sen embargo, o perentorio debate da moción conxunta presentada pola oposición, na que lle esixen ao grupo de goberno que se posicione en contra da tala indiscriminada, está a ser atrasado deliberadamente porque o goberno local inutilizou o salón de plenos cunhas obras de reforma innecesarias, que foron adxudicadas por 38.187 € mediante un procedemento negociado sen publicidade –e dicir, a dedo– á empresa ‘Anquín Torre SL’, do entorno do PP. Unha vez mais, todo queda na casa.

O pasado 27 de abril celebrouse un pleno extraordinario e urxente, na sala na que se convocan habitualmente as comisións, no que unicamente se tratou o plan económico-financieiro pola desviación da regra de gasto de 2016, xa que a alcaldía se negou a introducir na orde do día a moción sobre tala, que aínda non ten data para o seu debate. Mentres, a Xunta segue a traballar con presa e sen pausa para materializar o atentado contra o patrimonio natural.

voceira do PSdeG-PSOE en Xinzo, Elvira Lama, destaca que o debate sobre a reforma da avenida de Celanova “sí que é urxente e necesario porque ten a meirande parte da vila en pé mentres que o salón de plenos foi remodelado hai 14 ou 15 anos con madeira nobre e na actualidade non precisa de cambio algún porque está en perfectas condicións”. “A vila volveu perder habitantes e nas próximas eleccións locais imos pasar de 17 a 13 concelleiros, así que non se necesita unha maior bancada para a corporación municipal, que é do que fundamentalmente trata a reforma do salón de plenos”, asegura.

Lama cree que “hai intereses escuros do alcalde” para atrasar o debate sobre un arboricidio que ninguén quere salvo o PP. “O alcalde desenténdese porque non a vai pagar pero está claro que el tivo que reclamar esa obra á Xunta de Galicia”, asevera. A concelleira e deputada provincial reclama o debate inmediato da moción conxunta presentada por todos os grupos da oposición, na que se esixe ó grupo de goberno que se posicione en contra da tala indiscriminada de árbores, debido á alarma social xerada.

A iniciativa que o goberno local quere evitar sinala que o proxecto de remodelación impulsado directamente pola consellería contempla a tala de 56 árbores, o que “a todas luces supón un atentado contra a humanización do entorno e contra o patrimonio común”. Lama insiste en que “non se trata de paralizar a remodelación, xa que dende os socialistas non estamos en contra de que se acometa esta reforma necesaria mais si que nos opoñemos a que a obra se a faga a costa de atacar sen sentido o medio natural mais singular”.

 

 

 

Os compañeiros d´O Bolo denuncian que o alcalde usa maquinaría da Deputación para estender compost polos seus viñedos

03/05/2017
By

 

O alcalde aproveita a compostaxe provinte dunha limpeza de cunetas para aboar as súas cepas, axudado por un camión e unha pala da institución provincial

 Os socialistas reclaman que tamén mande retirar os escombros da obra municipal que se verteron na cuneta da estrada que vai aos Lentellais

WhatsApp Image 2017-05-02 at 14.02.56

 Ourense, 4 de maio de 2017. Segundo denuncian os socialistas, o Alcalde do Bolo, Manuel Corzo, segue a dar sobradas mostras do seu uso personalista do poder. Pese a que os e as veciños-as do Bolo xa están maís que acostumados aos seus desmáns, desta volta, parece superarse a si mesmo ao usar recursos de todos en beneficio propio. Tal como relata o portavoz do PSOE no concello, Juan Ferreira,”hai cousa de dous meses que o alcalde mandou limpar unhas cunetas nalgúns pobos, por suposto, os da súa escolla; para, a continuación, deixar a terra amontoada na propia cuneta. Co paso do tempo, esta terra retirada, chea de nutrientes, converteuse en compostaxe natural”. Pese a que este feito xa é suficientemente escandaloso, posto que non se remata o comezado e, ademais, faise unha limpeza selectiva; o que veu despois raia o esperpento. Unha vez que a calidade da compostaxe era a desexada, unha pala e un camión da Deputación de Ourense, chegaron para recoller e cargar esta terra e levala cara a unhas propiedades do propio alcalde do Bolo. Máis tarde, os socialistas puideron comprobar, con total asombro, como a mesma pala procedeu a estender a compostaxe, con sumo coidado, entre os viñedos propiedade de Manuel Corzo.

É dicir, o rexedor do municipio, coa connivencia da institución provincial, emprega recursos de todos e todas para aproveitar restos dunha limpeza selectiva e mellorar os seus propios cultivos. O alcalde imputado nin sequera agochou as súas intencións e procedeu co “aproveitamento” á vista de calquera, tal o testemuñan as imaxes. Á restra de feitos denunciables e de dubidosa ética política cos que Manuel Corzo adorna a súa xestión, hai que sumar este uso impropio dos recursos provinciais para o que fixo gala dunha boa previsión en beneficio das súas cepas.

Sen embargo, o alcalde ten conciencia medioambiental cando se trata das súas propiedades pero non estende este pensamento verde á súa xestión pública. Nestes días estase a facer unha obra no centro do Bolo  e os escombros de dita intervención estanse vertendo na marxe dereita da estrada que une O Bolo co cruce dos Lentellais. Todo isto, segundo denuncian dende o PSOE, conta co permiso expreso de Manuel Corzo, aínda alcalde do municipio, quen está a converter un bo tramo de estrada nunha escombreira. Tal como indica Juan Ferreira: “agardamos que nese afán que ten o sr. Alcalde por aproveitar todos os residuos, teña a ben, tamén, levar para os seus viñedos ou para as súas propiedades, todo o lixo que alí se está depositando e non teñamos que tratar del entre todos os veciños”.

Os socialistas que xa van varias veces que se denuncia publicamente o pouco apego do alcalde polo ben común, destacando a súa negativa a arranxar o saneamento e acabar cun verquido, por unha manifesta animadversión cara aos veciños dese barrio. É de sobra coñecido como desgoberna o alcalde popular do Bolo, a golpe de preferencias e intereses persoais .

 

Os socialistas d’O Bolo lamentan que a Festa da Vitela non sirva para a promoción do traballo dos produtores de carne, e consideran que, tendo en conta o desleixo do alcalde na xestión de servizos aos veciños, dita “paparota” constitúe un dispendio que agrava a “calamitosa” situación económica do Concello

17/04/2017
By

Ademáis, os compañeiros sumaranse aos doutros concellos da provincia ao propoñeren ao pleno do seu Concello o establecemento dunha taxa ás empresas enerxéticas, o que contribuiría a mellorar ditas contas municipais

Como vén sendo habitual no Concello do Bolo, a celebración dunha nova edición da Festa da Vitela xera polémica polo dispendio que realiza o goberno do señor Corzo, en detrimento dos numerosos servizos que ten sen atender no municipio. Os socialistas, como veñen denunciando dende hai anos, lembran que esta festa está mal enfocada, sen que haxa unha proxección do labor que realizan os produtores de carne da zona e só se fai un festín que serve para maior gloria do alcalde e dos seus convidados. A pesar da fixación dun prezo público, o Grupo Municipal Socialista do Bolo ten demostrado, con datos obxectivos, o buraco negro que supón para as arcas municipais a fastuosa celebración deste evento nos termos nos que se realiza actualmente. O equipo de goberno do PP, con Manuel Corzo á cabeza, “está máis preocupado por quedar ben cos seus convidados ilustres que por atender servizos moi necesarios para os veciños e veciñas do Bolo”. O portavoz socialista no municipio, Juan Ferreira, considera que “mentres estas persoas celebran unha paparota por todo o alto, o pobo ten as fosas sépticas sen saneamento, cun alcalde que se desentende e despreza as demandas dos veciños e veciñas. A situación de desleixo e mala xestión é indignante e só lle dan pulo a proxectos que producen un desaxuste nas contas”.

Tendo en conta a calamitosa situación económica na que está o concello, o propio sería que o PP se preocupase por “procurar novas fontes de financiamento no canto de promocionar dispendios a conta dos cartos de todos e todas”. Xa que Manuel Corzo e o seu equipo son incapaces de xerar novos ingresos cos que atender todos os servizos, son os socialistas quen propoñen novas medidas que permitan aumentar a recadación.

O Grupo Municipal Socialista vén de presentar unha moción para que se estableza unha ordenanza reguladora da taxa por utilización privativa ou aproveitamento especial de dominio público local, por parte das instalacións de transporte de enerxía eléctrica, gas, auga e hidrocarburos. A iniciativa, que foi lanzada polo Partido Socialista a nivel provincial, parte das recentes sentenzas do Tribunal Supremo que afectan á situación das empresas que xestionan as redes de transporte de electricidade, gas, auga e hidrocarburo. Dado o especial aproveitamento que estas compañías fan, no que hai un afán de lucro polo servizo que ofertan, o Tribunal Supremo veu a ratificar o dereito das entidades locais a gravar o uso dun espazo que é de dominio público.

Tendo en conta, ademais, a situación de crise no financiamento dos concellos e a especial atención que deben por para cumprir co seu teito de gasto, a opción de establecer taxas a estas compañías, resulta de interese á hora de captar ingresos locais. Neste senso, os socialistas do Bolo instan ao equipo de goberno para que adopte esta medida e aumente a súa capacidade recadatoria. A este respecto, o portavoz socialista no Bolo, Juan Ferreira, afirma que “esperamos que o alcalde considere esta opción, a pesares da súa animadversión a todo o que veña dos socialistas, e pense no ben común por riba do seu propio interese ou o do seu partido. O establecemento dunha ordenanza reguladora destas taxas dirixidas a unhas empresas que reciben un claro beneficio polo uso dese dominio público, revertería no beneficio de todos os veciños e veciñas que, a día de hoxe, reciben uns servizos municipais deficitarios ou a súa ausencia”.

 

 

O PSdeG-PSOE d´O Bolo denuncia a desidia do alcalde do PP á hora de manter en óptimas condicións as vivendas de alugueiro social propiedade do concello

07/04/2017
By

O goberno do PP négase a manter as vivendas nunhas condicións dignas pese a contar con 23.000 euros nos orzamentos anuais para este propósito

 Os socialistas fanse eco das constantes queixas veciñais e van demandar información actualizada sobre a situación dos pisos no vindeiro pleno municipal

 

Ourense, 5 de abril de 2017. O Grupo Municipal Socialista no concello de O Bolo quere denunciar unha nova deixadez de funcións do goberno presidido polo popular Manuel Corzo. Nesta ocasión, os socialistas, fanse eco das queixas veciñais a respecto das vivendas de alugueiro social de titularidade municipal e, polo tanto, responsabilidade do concello. Os veciños e veciñas destas catro vivendas teñen que padecer a falta absoluta de mantemento e remodelación dos seus pisos mentres observan como os cartos destinados a patrimonio municipal nunca se emprega para mellorar as súas condicións. Juan Ferreira, portavoz socialista no Bolo, así o afirma: “Cada ano, o concello, destina uns 23.000 euros nos orzamentos municipais ao mantemento das propiedades de titularidade municipal (entre elas o castelo e varias vivendas) e levamos tempo observando que nunca se usan para mellorar, remodelar e manter estas vivendas de alugueiro social. Os veciños están abandonados á súa sorte”.

O deplorable estado destes pisos é doado de comprobar, denuncian dende o PSOE, sendo habituais os desconchóns en portas e paredes, a falta dunha man de pintura, as tubaxes á vista e sen rematar e instalacións obsoletas. A situación fai que vivir nestas vivendas sexa unha tarefa ardua, á que hai que sumar os numerosos meses que tiveron que agardar a que se baleirase o faiado e se procedera á súa limpeza. Para os veciños e veciñas non cabe dúbida que é, unicamente, responsabilidade do concello do Bolo e do seu alcalde termar destas vivendas e manter unhas mínimas condicións de habitabilidade que, hoxe por hoxe, non existen.

Fartos de agardar por un mantemento que nunca chega, tanto no que respecta á pintura como ás propias instalacións eléctricas, varios destes veciños e veciñas puxéronse en contacto con Juan Ferreira para amosar a súa preocupación e pedirlle que puxera o caso en coñecemento da opinión pública co obxectivo de que o alcalde faga caso das súas demandas.

Pola súa banda, o PSOE pretende preguntar no vindeiro pleno pola situación actual destas vivendas que foron postas en marcha, no seu día, para uso de diversos funcionarios e que hoxe serven para darlle unha solución habitacional a persoas con rendas baixas.  O PSOE esíxelle ao goberno do PP que deixe de facer da mala xestión a súa sinal de identidade e atenda ás súas responsabilidades. Para este vindeiro exercicio, recalcan os socialistas, debería consignarse unha partida específica para atender o mantemento destas vivendas ou, alomenos, empregar parte dos 23.000 euros e procurar que a xente teña unhas condicións de vida dignas.

O PSdeG-PSOE de Rairiz de Veiga denuncia que o goberno local do PP gasta máis en soldos de políticos que en inversións para os veciños e veciñas

07/04/2017
By

A única inversión real que os populares materializaron cos anteriores orzamentos municipais de 2016 foron uns flamantes columpios para nenos e nenas       

 Pablo Lorenzo esíxelle á alcaldesa que teña en conta propostas que favorecen o desenvolvemento do concello e deixe de atender ás necesidades de empresas privadas, coma a que xestiona a residencia

 

Ourense, 6 de abril de 2017. O PSOE de Rairiz critica a falta de orzamentos no concello a estas alturas de ano e reclama que os vindeiros en ser aprobados sexan máis inclusivos e pensando máis nos intereses da veciñanza. Oportavoz socialista en Rairiz de Veiga, Pablo Lorenzo, considera que os orzamentos do ano pasado están “obsoletos e non recolle as necesidades actuais do municipio e da súa cidadanía”. Ademais lembra que o capítulo de inversión nos orzamentos do 2016 recollía unha mellora nos camiños rurais de 68.473 euros, un grupo electróxeno para a residencia por 9.516 euros así coma a alta de subministración eléctrica por un importe de 11.322 €, do cal se deduce que “a única inversión real do concello de Rairiz foi nuns columpios infantís aos que se destinaron 5.570 euros”.

Lorenzo recalca este feito xa que “por unha banda, a mellora nos camiños viña subvencionada polo fondo AGADER e o resto de inversións ían destinadas a unha instalación, a residencia, xestionada por unha empresa privada”. Explicado isto, enténdese porque os socialistas denuncian que a inversión real aportada polo concello, dista moito da que venderon dende o goberno local mediante propaganda.

Sen embargo, as retribucións dos membros da corporación (alcaldesa e concelleira) con dedicacións parciais ascenden a 32.000 euros brutos anuais.                        Pablo Lorenzo sinala: “Dende o PSdeG-PSOE consideramos indecente que se destine mais diñeiro a pagar as retribucións da alcaldesa e da concelleira que a inversións reais nas aldeas de Rairiz”. Con estes antecedentes, os socialistas, urxen a aprobación dos orzamentos para o ano en curso cun capítulo de inversións que, de ningún xeito, sexa superado por as retribucións dos membros do grupo de goberno con dedicación.

Así mesmo, esixen que, dentro desas inversións, se destine expresamente unha partida para a promoción e fomento dun mercado artesanal en Congostro, moción que presentou o grupo socialista e que cos votos do grupo de goberno municipal serviron para deixala sobre a mesa ata o próximo pleno. O Grupo Municipal Socialista amosa a súa estupefacción ante feitos como este, no que se adían propostas novidosas e que axudan ao desenvolvemento do concello mentres se mira polos intereses de empresas privadas. Os socialistas denuncian a parálise á que somete o grupo de goberno, presidido por Asunción Morgade, ao concello de Rairiz, sendo incapaces de recoñecer unha boa proposta cando a teñen diante mentres eles non fan nada por mellorar a situación. Pablo Lorenzo reclámalle á alcaldesa que deixe de gobernar en función dos intereses doutros ou do partido que a acolleu e comece a xestionar o concello en base ao que demandan e precisan os veciños e veciñas do concello limiao.

 

A oposición de Xinzo esíxelle unanimemente ao alcalde que se posicione en contra da tala indiscriminada de árbores na Avenida de Celanova

05/04/2017
By

O PSdeG-PSOE, o grupo mixto-BNG e Xinzo Adiante (XA) veñen de rexistrar unha moción para que o goberno local rectifique un proxecto que contempla a destrucción de 56 árbores

A voceira e deputada socialista, Elvira Lama, recalca que a remodelación da avenida non é incompatible coa protección medioambiental e patrimonial do entorno

REGISTRO MOCION CONJUNTA XINZO

 Ourense, 4 de abril de 2017. O PSdeG-PSOE de Xinzo de Limia vén de rexistrar un moción conxunta, cos grupos municipais de Xinzo Adiante (XA) e o BNG, na que lle esixen ao grupo de goberno que se posicione en contra da tala indiscriminada de árbores prevista na reforma da avenida de Celanova. Debido á alarma social xerada, da que xa se fixeron eco os socialistas hai días, os grupos da oposición presentan esta iniciativa destinada a rectificar o que consideran unha “agresión medioambiental sen precedentes”. No texto da iniciativa sinalan que o proxecto de remodelación da consellería contempla a tala de 56 árbores, o que “a todas luces supón un atentado contra o que chamamos humanización do entorno e contra o patrimonio común”.

portavoz socialista no pleno municipal de Xinzo, Elvira Lama, asegura que “non se trata de paralizar a remodelación da avenida, xa que non estamos en contra de que se acometa esta reforma, moi necesaria, e que se dote á vía de mellores servizos de abastecemento, saneamento, beirarrúas e unha nova pavimentación, pero si que nos opoñemos a que a obra se a faga a costa do noso medio natural mais señeiro”. Como sinala a moción, o proxecto de remodelación non ten porque contemplar a tala indiscriminada dunhas árbores que serven de barreira acústica, de filtros do ar contaminado e de barreira de seguridade natural. Os grupos da oposición esixen que “se rectifique nesta proposta e se contemple unha reforma da avenida sen acabar coa herdanza dos devanceiros”. “As árbores da avenida de Celanova foron prantadas para perdurar no tempo e non se atopa xustificación a rematar con esa planificación despois de case un século”, recordan.

As agresións ao medio ambiente son sempre inxustificadas pero no caso de Xinzo acada unhas “dimensións tráxicas”, posto que se trata dun concello devastado forestalmente pola concentración parcelaria ao redor da vila. Sendo conscientes desta situación, dende o PSdeG-PSOE non entenden como o goberno do PP acepta, sen cuestionar, un proxecto necesario que, sen embargo, plantexado así “atenta contra os intereses do pobo”. Por todo isto, os grupos da oposición esíxenlle unánimemente ó alcalde que faga uso da responsabilidade adquirida e “inicie as accións oportunas para que a consellería reforme o proxecto de mellora e acondicionamento da avenida, mantendo as árbores tal e como se atopan na actualidade”.

Os socialistas consideran que todos os grupos políticos lle deben, cando menos, “respecto e compromiso polo entorno” e, sobre todo, “garantir o dereito dos veciños e veciñas de Xinzo a contar cuns servizos humanizados e sostibles”. Sinalan a grande “incongruencia” do goberno de Xinzo xa que asina plans de concello sostible e, o mesmo tempo, é incapaz de frear un auténtico arborecidio. “O goberno presidido por Antonio Pérez ten a oportunidade de rectificar no vindeiro pleno do 27 de abril, mesmo antes, nas comisións que deben informar sobre a cuestión”, aseguran os socialistas de Xinzo. Elvira Lama recorda que “de non ser pola mobilización popular e polo noso labor á hora de solicitar o  polémico proxecto, estou convencida de que o alcalde e o seu equipo seguirían adiante con este atentado medioambiental, sen estudar posibles alternativas. Agora cómpre ver de lado de quen están, ou da veciñanza ou do que lles ordenan dende a Xunta”.

 

 

O PSdeG-PSOE de Maceda consegue aprobar no Pleno local varias das súas propostas en materia social fronte a parálise gubernamental do PP

04/04/2017
By

Os socialistas logran que o alcalde popular se comprometa a convocar axudas para material escolar para axudar aos pais e nais dos nenos e nenas de entre 3 e 6 anos

Despois da importante alarma social xerada entre os veciños e veciñas, o grupo municipal socialista sacou adiante a iniciativa que eliminará o verquido de augas residuais en Casasoá

 

Ourense, 3 de abril de 2017. Tal como denunciaran os socialistas, o Concello de Maceda vive nun estado de “parálise permanente por culpa da deixadez do goberno do Partido Popular”. A pesares de gravar aos veciños e veciñas con numerosas taxas, o grupo de goberno é incapaz de sacar adiante uns orzamentos ou de presentar iniciativas nun concello que levaba catro meses sen celebrar un pleno. Sen embargo, os socialistas de Maceda entenden que, máis aló de denunciar a desidia, teñen que sacar adiante propostas que revertan no ben común da veciñanza e avanzar na consecución de servizos e recursos. Desta volta, o PSOE conseguiu no pleno que se aprobase unha das iniciativas polas que levan máis tempo pelexando: a das axudas para adquirir material escolar para o alumnado do ensino infantil (3 a 6 anos).

Esta proposta ten como fin ofrecer aos pais e nais unha axuda para afrontar os numerosos gastos que xera a etapa escolar e afondar no asentamento poboacional mediante a oferta de apoios por parte do propio concello. Xa hai abondo tempo que a portavoz socialista, Ana María Rodríguez, pon o acento en denunciar a falta de axudas e recursos á conciliación das familias e a ausencia de incentivos para que a xente quede a vivir en Maceda.

Por outra parte, o PSOE tamén conseguiu a unanimidade da corporación para solucionar un dos temas que máis alarma social leva causado nos últimos tempos: o verquido de augas residuais en Casasoá. Mediante este acordo impulsado polos socialistas, vaise lograr que se depuren estas augas e se deixe de atentar contra a salubridade e o medio ambiente do lugar, algo que tiña moi  preocupada á veciñanza. Pola súa banda, Rodríguez iniciou unha campaña informativa no pobo, anunciando o acordo e contactos con diversos veciños e veciñas coa fin de que, entre todos, non se baixe a garda e o proxecto sexa unha realidade, tantas veces reclamada.

Outro dos temas que conseguiron a aprobación e o compromiso do alcalde, grazas de novo a unha proposta socialista, foi a cuestión do reforzo e dragaxe da ponte sobre o río en Vilar. “Hoxe por hoxe xa sabemos que existen diversos informes, entre eles o da Confederación Hidrográfica, que indican a falta de seguridade da ponte e a necesidade do seu reforzo, así como que é competencia municipal executar esa reparación. Só agardamos que o Alcalde non se bote atrás no acordo acadado e que acometa con valentía este proxecto que pode garantir a seguridade de toda a veciñanza da zona”, afirma Ana María Rodríguez. Dende o PSOE aclaran que están “cansos de agardar a que o grupo de goberno acometa os acordos alcanzados e non van dubidar en voltar levar a pleno todas as cuestións que comprometan a seguridade dos veciños e  veciñas, coma neste caso ou que supoñan unha mellora para a cidadanía”.

Noutra orde de cousas, recalcan dende o PSOE de Maceda, as “incongruencias manifestas dun alcalde que non se aclara nin co seu propio partido”. O xoves, os socialistas levaron para a súa aprobación en sesión plenaria, a moción pola que se insta a redactar unha ordenanza sobre a taxa que grave o uso do dominio público por parte das compañías enerxéticas, entre outras, nembargante a iniciativa foi rexeitada. Cal non foi  a súa sorpresa cando, no día a seguir, se aproba na Deputación de Ourense unha proposta similar, por unanimidade dos grupos. Os socialistas van voltar a retomar esta cuestión para que o Partido Popular de Maceda aclare “se está en sintonía co que se aproba na institución provincial e que reclama a maioría ou se defende os intereses das compañías privadas”. Como xa denunciaron en varias ocasións, dende o PSOE de Maceda, o goberno local “perde moitas ocasións para porse de lado da veciñanza e defender os seus intereses”.

 

O PSOE de Piñor denuncia a traizón á veciñanza que supón a aprobación da cesión dos servizos sociais á Mancomunidade

23/03/2017
By

Os socialistas advirten que este desmantelamento perpetrado polos dous alcaldes supón unha merma na calidade dos servizos que vai recibir a xente  e nun sobrecusto para as arcas municipais 

Francisco Fraga instou a Uxío Rodríguez  a que se abstivera na votación para non sementar dúbidas éticas ó darse o caso de que a súa propia filla vén de ser contratada pola Mancomunidade

 WhatsApp Image 2017-03-21 at 20.03.54 (1)

 

Piñor, 22 de marzo de 2017. Consumada a traizón dos gobernantes ó Concello de Piñor. Iso é o que pasou onte durante a celebración do pleno no que se aprobou a cesión dos servizos sociais á mancomunidade. Os socialistas denuncian que o goberno local bipartito se está a desfacer de servizos que custou moito por en marcha por parte do goberno do PSOE e que eran servizos de cercanía moi ben valorados pola veciñanza.

Dende o Grupo Municipal Socialista xa levan días alertando, mediante unha campaña informativa e unha recollida de sinaturas, que co tempo todos os veciños e veciñas irán notando a merma neses servizos agora mancomunados. Como exemplo deste desmantelamento e perda de autonomía municipal, os socialistas destacan o feito de que a traballadora social xa non vai coordinar o servizo de axuda no fogar dende o concello, senón que pasa a facerse dende O Carballiño. Para o PSOE este traspaso só é o comezo dunha cesión sen sentido que leva por diante o traballo e a atención no territorio, de cercanía e achegado ás necesidades dos veciños. Ata o de agora, a coordinación da asistencia a domicilio facíase dende Piñor, dando grandes resultados.

Ademais, tal como explicaron onte os socialistas, a día de hoxe, a mancomunidade non presta moitos dos servizos sociais que se ofrecían en Piñor: o programa de conciliación “Familias Tardías”; o servizo de intervención psicolóxica; a actividade de alfabetización; a tramitación de bolsas; o servizo de xantar na casa e fisioterapia a domicilio, entre outros. Estes servizos, moitos deles, foron pioneiros na contorna e, pouco a pouco, van se deixar de prestar, algo que vai sufrir a veciñanza.

Francisco José Fraga, Portavoz socialista no Concello de Piñor, xa advertiu: “Ao adherirse á mancomunidade, Piñor terá que asumir e facerse cargo de numerosos gastos tanto ao mancomunar o tractor-desbrozadora coma os servizos sociais. Para comezar xa hai que sufragar outros gastos de persoal, moitos deles da propia mancomunidade e que supoñen un desembolso adicional de 14.000 euros ó ano a costa dos recursos dos veciños”. Así pois, grazas a esta manobra dos dous alcaldes, Piñor vai ter que contribuír ao mantemento e sostén da mancomunidade, a cambio de recibir peores servizos.

O Partido Socialista esixiulle ós dous alcaldes que se puxeran a gobernar e que parasen de acometer esta desfeita do Concello de Piñor. “Comezaron por desfacerse do velorio, despois veu a recadación da auga cedida á deputación e agora ceden o tractor-desbrozadora e os servizos sociais á mancomunidade. Xa só lles queda pechar o concello, que será o seguinte. Non van ser quen de explicar á xente nin a perda de calidade nos servizos nin o sobrecusto que supón este desmantelamento”, sinalou Fraga Civeira.

Os socialistas pregúntanse se foi este o modelo de concello que os dous alcaldes asociados, do PP e de Veciños de Piñor, lle foron prometendo á xente durante a campaña electoral. Se lles foron dicindo á cara que ían desmantelar o Concello de Piñor.

Como remate a tamaño despropósito, o portavoz socialista tivo que instar ó Tenente-Alcalde, Uxío Rodríguez para que, en virtude dos principios éticos que lle esixe ós demais, se abstivese de votar neste punto da cesión, toda vez que a súa propia filla entrou a traballar na mancomunidade. Déuselle esta oportunidade para non dar pé á sospeitas fundadas de que, detrás desta cesión de servizos e de retorno á Mancomunidade, hai certos intereses persoais.

 

A Xustiza abre dilixencias novamente contra o alcalde popular d´O Bolo por presunta prevaricación por non potabilizar auga

22/03/2017
By

Os veciños e veciñas de varias aldeas das Ermidas levan unha década reclamando –sen éxito– ó goberno local que potabilice a auga da traída que sae das súas billas

O voceiro do PSdeG-PSOE neste concello, Juan Ferreira, afirma que as reiteradas irregularidades e desidias do alcalde co servizo que debe prestar ós veciños e veciñas non poden quedar impunes

 

Ourense, 21 de marzo de 2017. O alcalde do PP do Bolo vai camiño de converterse nun alcalde bi imputado. Atitular do xulgado de Primeira  Instancia e Instrución número 1 da Pobra de Trives acaba de abrir dilixencias contra Manuel Corzo, trala denuncia do voceiro socialista neste concello, Juan Ferreira, na que denuncia o “obstrucionismo” do rexedor para arranxar problemas coa traída de agua nas Ermitas. A xuíza instructora afirma que “os feitos que resultan das actuaciones fan presumir a posible existencia dun delito de prevaricación administrativa”. No mesmo auto, cita ó voceiro socialista que presentou a denuncia para que ratifique os feitos relatados.

A denuncia relata a desidia do rexedor para arranxar un problema de saúde pública do que é coñecedor dende hai unha década. E que, os veciños e veciñas se puxeron en contacto con Corzo en reiteradas ocasións, para denunciar a insalubridade da auga que beben, debido a que a traída non está potabilizada. Segundo relatan, o rexedor nunca atendeu ás reclamacións e, por iso, acudiron o Valedor do Pobo, que abriu unha investigación para aclarar os feitos e concretar solucións. O rexedor respondeu que se ía reunir cos habitantes da zona en agosto de 2016 para buscar unha solución a este grave problema de salubridade mais o encontro nunca tivo lugar.

Segunda denuncia que salpica ó alcalde

 O PSdeG-PSOE deste concello da provincia de Ourense xa denunciou que o alcalde non facilita, dende hai anos, a información e documentación solicitada para exercer o control da activade política e administrativa do goberno local, sobre un cento de cuestións de interese pública. Despois daquela denuncia, a xuíza imputou a Corzo por presunta prevaricación administrativa e, trala súa declaración en calidade de investigado, a instrucción continúa o seu curso.

A investigación sobre o caso que xa imputou o rexedor recolleu documentación relacionada cos expedientes e respostas solicitadas polos socialistas dende novembro de 2014, así como copia das instancias nas que reclamaba a celebración de plenos extraordinarios que nunca foron convocados.

A prevaricación administrativa é un delito no que un cargo público emite ou practica unha resolución inxusta a sabendas. Segundo o artigo 404 do Código Penal, a condena por prevaricación administrativa pode supor unha pena de inhabilitación especial para emprego ou cargo público e para o exercicio do dereito de sufraxio pasivo por tempo de nove a quince anos.

O PSdeeG-PSOE de Punxín reclama a mellora do caro servizo de recollida de lixo que o concello presta mediante un convenio coa Deputación

20/03/2017
By

                                                            

Dende o mes de xullo de 2015 os socialistas deste concello de Ourense veñen presentando diferentes solicitudes e mocións acerca da mellora dun servizo

A voceira municipal cree que o servizo prestado non é de calidade e non se axusta ás elevadas taxas cobradas ós veciños e veciñas das diferentes localidades do municipio

CONTEDORES LIXO PUNXIN

 

Ourense, 19 de marzo de 2017. O Grupo Municipal Socialista de Punxín reclama a inmediata mellora do pésimo servizo de recollida de lixo que, neste concello, se presta mediante un convenio subscrito coa Deputación de Ourense.  Dende o mes de xullo de 2015 os socialistas veñen presentando diferentes solicitudes acerca da mellora: a limpeza, substitución, reparación e reposición de distintos contedores en mal estado e a rebaixa na taxa cobrada ós veciños e veciñas porque non é acorde a calidade do servizo prestado. Estas peticións foron reiteradas no tempo, mediante escritos e mocións, sendo totalmente ignoradas pola alcaldía da vila.

voceira socialista en Punxín, Rosa María Outerelo, alerta da “pasividade” do rexedor do PP, Manuel Vázquez, ante este problema xa casi perpetuo con exemplos concretos. “A desidia municipal vai incrementando ano tras ano e agora, na N-541 á entrada de Barbantes en dirección Ourense, un contedor foi levado ó outro lado da estrada e atópase roto no barranco, privando deste servizo ós veciños e veciñas que pagan a súa taxa a pesares de que non teñen o servizo”, relata.

Outerelo esixe ó goberno local que “se controle e fiscalice a prestación do servizo, xa que nun pleno, cos votos en contra do Grupo Municipal Socialista, se acordou manter o servizo de recollida do lixo mediante convenio coa Deputación, co incremento reflectido nos recibos”. Por todo isto, o PSdeG-PSOE de Punxín solicita, unha vez mais, mediante un escrito rexistrado no concello a inmediata substitución ou reparación “dunha vez por todas” daqueles contedores que se encontran en mal estado dende hai anos e a reposición do contedor desaparecido en Barbantes.