Blog Archives

Baltar, referente do emprego do Partido Popular en Galicia

A deputada no Parlamento galego María Quintas, ven de defender no Pleno de hoxe unha Proposición Non de Lei pola que se insta á Xunta a que manteña o servizo de orientación laboral como peza clave das políticas de emprego e destine para elo os fondos nos Orzamentos da Comunidade Autónoma de Galicia para o 2013.

Na súa intervención, Quintas aludiu a José Luis Baltar como “referente do emprego do Partido Popular en Galicia”. A política de Baltar é coñecida en Galicia dende hai moitos anos, afirma a deputada ourensá, quen se gabou de que se admitira finalmente a trámite a denuncia socialista polos enchufes na Deputación, ao tempo que criticaba que non houbera en todos estes anos unha “actuación de oficio”.

Para Quintas, as presuntas prácticas caciquís de Baltar definen a situación do emprego en Galicia: “ou fincar o xeonllo ou coller a maleta”.

A continuación, Quintas dirixiuse á bancada do Goberno para esixir que o Presidente Feijóo cese ao Delegado da Xunta en Ourense, Rogelio Martínez, porque “admitiu que levou fondos europeos, alegando despois que o asunto prescribira”. Quintas tamén reprobou que Feijóo considerara “acertada a política do imputado Sr. Martínez” a quen acusou de estar dende 2005 “xogando co futuro dos ourensáns e quedándose con miles de euros que non sabemos a onde van”.

A parlamentaria lamentou que estas políticas “nos leven a esta situación”, en alusión á presenza arredor da cámara dun cordón policial formado por nove furgóns en previsión de protestas na rúa. “Cada vez resulta máis complicado protestar, nos micrófonos da Cámara e fóra dela”, dixo Quintas, quen acusou ao PP de aplicar un programa de “Goberno de dereitas”, que pretende a privatización do Servizo de Orientación do emprego, o que beneficiaría ás Empresas de Traballo Temporal.

O Orzamento é o verdadeiro programa dun Goberno, afirmou Quintas e o Orzamento da Xunta “constata a despreocupación polos servizos públicos e o emprego; é un programa de dereitas ao que non lle importan os desempregados”, acusou Quintas, “porque queren suplir pola vía do privado, o servizo que prestaban os 109 orientadores laborais” que perderon o seu traballo en decembro.

O Goberno central recoñece unha “deficiente depuración” de augas residuais en Verín e Oímbra

A nosa deputada no Congreso, Laura Seara, acaba de recibir unha resposta parlamentaria na que o Goberno central recoñece que, tras tomar, en outubro do 2012, mostras do vertido de auga residual das depuradoras de Oímbra e de Verín, “constatouse que existe unha deficiente depuración en ambas localidades”.

O Goberno resposta así agora ás preguntas que Seara realizara en setembro de 2012, tras producirse en Verín un novo verquido de augas residuais ao río Támega, e coas que a compañeira pedía solucións.

A tenor da devandita resposta, a nosa deputada rexistrou unha serie de iniciativas parlamentarias coas que lle pide ao Goberno a adopción urxente de medidas que permitan unha adecuada depuración das augas nos concellos de Verín e Oímbra, así como noutros da conca do Támega.

Con estas iniciativas, solicita ademais que o Goberno explique qué actuacións se levaron a cabo nas labores de limpeza, as cales se adxudicaron por vía de urxencia á empresa “Tragsa”, e que deberan consistir na limpeza do Támega ao seu paso pola comarca de Monterrei e a retirada de maleza, troncos e lixo dende o nacente do río en Laza ata a localidade de Feces de Abaixo en Verín.

Seara sinala que, dita actuación fora “absolutamente necesaria”, dende o Grupo Socialista se entende que a situación do río e a calidade das súas augas precisan doutra “moito maior”.

Por iso, e tras recibir hoxe a resposta na que o Goberno recoñece a depuración deficiente de augas residuais en Verín e Oímbra, a nosa deputada rexistrou unha Proposición Non de Lei coa que insta ao Goberno a que -a través da Confederación Hidrográfica do Douro e coordinadamente coa Xunta de Galicia e os concellos de Laza, Castrelo de Val, Monterrei, Verín e Oímbra- poña en marcha urxentemente un Plan de Actuacións Integrais no río Támega, proposición que contempla que o devandito Plan inclúa polo menos: as actuacións de depuración e saneamiento integral das augas a través da construción de novas infraestructuras ou a mellora das existentes, a restauración hidrolóxica forestal tanto no río Támega como nos seus afluentes, e as medidas de protección contra crecidas e limpeza das marxes da canle.

Miguel Fidalgo suxire ao ministro Arias Cañete a necesidade de fortalece-los mecanismos de control e a transparencia informativa na xestión dos fondos públicos

O senador socialista pola nosa provincia, Miguel Fidalgo, suxeriu esta tarde ao Ministro de Agricultura, Alimentación e Medio Ambiente, Miguel Arias Cañete, a necesidade de fortalece-los mecanismos de control e a transparencia informativa na xestión dos fondos públicos.

Fidalgo, que interviña na Comisión de Agricultura, Pesca e Alimentación da Cámara Alta, denunciou a opacidade administrativa e o entorpecemento no acceso aos rexistros, e subliñou que é inexplicábel que non se poida dispoñer de información concreta sobre o destino do diñeiro público, e dirixiuse ao Ministro para preguntarlle polas empresas beneficiadas por subvencións ou axudas con cargo aos programas europeos de desenvolvemento rural en Ourense. Cañete afirmou que se trataba dunha cuestión da Comunidade Autónoma, e que non era competencia do Goberno central.

Miguel Fidalgo tamén se interesou polas irregularidades na xestión de programas de desenvolvemento rural en Galicia, e pola devolución dos fondos do programa comunitario “Leader” cuxo gasto non foi xustificado polo grupo de acción local CEIVAM, encargado da súa xestión. O compañeiro lembrou que o citado grupo estivo presidido polo Delegado da Xunta en Ourense, Rogelio Martínez, que foi denunciado como presunto autor de fraude, falsidade documental e malversación de fondos públicos europeos por valor de 51 900€, destinados, en principio, á construción dunha planta de biomasa e diversos talleres artesanos.

O noso senador sostivo que é un mal sinal para os cidadáns que se oculte información e que un dirixente como o propio Martínez, pendente de ser procesado, se mantéña no seu cargo. Na súa quenda de resposta, Cañete confirmou que estes fondos xa foran reintegrados ás arcas públicas. Fidalgo concluíu insistindo en que o Goberno ten que aprender casos coma este, e estudar medidas para que non haxa zonas escuras en calquera procedemento de gasto público. Tense que saber quen recibe o diñeiro e comprobar que se destina a ese uso; “é a mellor vacuna para que non se repitan este tipo de casos”, dixo.

Os socialistas denunciamos a voladura controlada dos servizos sociais a través da redución de fondos ao Plan Concertado e a retirada de apoio económico á Teleasistencia

A nosa deputada no Congreso, Laura Seara, ven de dar conta, en rolda de prensa, dunha serie de iniciativas rexistradas no Congreso e no Senado e dunha moción para presentar nos concellos de Galicia, instando ao Goberno de Rajoy a recupera-lo financiamento da Teleasistencia e a incrementa-las partidas destinadas nos orzamentos xerais do Estado de 2013 ao Plan Concertado.

Seara chamou a atención sobre os efectos dos recortes sobre o aumento da exclusión social en Galicia e en Ourense. “O risco de exclusión social é cada día maior, e as cifras de pobreza non deixan de medrar, e neste marco social e económico o Goberno de Rajoy toma unha decisión que será dramática para a provincia de Ourense e para Galicia”, como foi a supresión nos orzamentos do Estado do 2013, da partida destinada á Teleasistencia.

Pero o problema agrávase co Plan Concertado, creado polos socialistas a finais dos 80, coa finalidade de contribuír ao desenvolvemento da prestacións básicas dos servizos sociais. “Ponse en risco a supervivencia do propio Plan Concertado e do propio sistema de prestacións sociais básicas”. Estamos a falar, segundo a deputada socialista, do plan no que se sustentaron os servizos sociais básicos que puxeron en marcha e manteñen os concellos, converténdose nun piar básico da propia economía local.

Seara advirte que, dado que a lei limita o endebedamento municipal “estamos ante o risco que desaparezan os servizos sociais básicos no 95% dos concellos de Galicia, pola imposibilidade de mantelos”.

A deputada socialista subliñou que nos orzamentos do Estado do 2011, se adicaron ao Plan Concertado case oitenta e sete millóns de euros, dos que lle corresponderon a Galicia 7 230 000€. Ademais, “se repartiron con criterios que beneficiaban á nosa Comunidade autónoma e a Ourense”, lembra Laura Seara, pois se tiñan en conta a dispersión da poboación e de número de persoas dependentes.

No 2012, primeiro orzamento que aproba o PP no Goberno, “a partida destinada ao Plan Concertado se reduce case á metade”, denuncia a compañeira, e pasa a corenta e sete millóns de euros, correspondendo a Galicia 3 900000€.

Nos orzamentos do 2013, “parece que lle queren dar o tiro de graza ao Plan Concertado”, xa que os fondos voltan mermar, nun 42% respecto ao ano anterior, e nun 65% respecto ao 2011. Queda pois, segundo as cifras que expoñía a socialista, en vintesete millóns de euros destinados para o conxunto do Estado. A cifra para Galicia se reduce a apenas 2 200 000€, “dez veces menos do que levou Bárcenas a Suíza”, comparou.

Se a este dato se lle suma a desaparición dos orzamentos do Estado da Teleasistencia, o Goberno de España adica oitenta céntimos por galego (a mesma ratio para a provincia de Ourense); e iso “pasa en dous anos e nun momento de crise brutal, que afecta ás persoas máis vulnerables” salienta a deputada, para quen as medidas do PP de eliminar dos Presupostos do Estado a Teleasistencia e reducir á mínima expresión as partidas para o Plan Concertado, supoñen condenar a moitos concellos e comunidades autónomas, e comparables a “pechar hospitais en tempos de epidemia”. Por iso se pregunta a compañeira sobre silencio da Conselleira de Traballo, Beatriz Mato, “que non di nada cando en dous anos rebaixáronlle a Galicia nun 65% os orzamentos destinados ao Plan Concertado e reduciron a cero o destinado a Teleasistencia”.

Seara acusa aos populares de ter deseñado unha“demolición controlada”, usurpando os servizos sociais ás persoas que máis o necesitan e cun dano incalculábel, sobre todo no medio rural, xa que, aínda que os servizos sociais da capital e cabeceiras de comarca teñen uns respaldos técnicos, os numerosos pequenos concellos rurais da provincia, “non poderán manter a prestación de servizos sociais” que viñan ofrecendo a unha poboación moi envellecida, o que preocupa a Seara.

Outra consecuencia directa deste recorte é o paro: xa se está a despedir ao persoal dos concellos galegos pola imposibilidade de mante-las prazas de traballadores sociais. “Ao longo deste ano, estes despedimentos irán a máis”, prognostica a deputada.

O drama esténdese ás ONGs, que están saturadas, porque asumen os servizos que non poden da-los concellos, pero recibindo tamén menos axudas, porque se financian menos programas; “a pescada que morde a cola”, describiu Seara, que se preguntou qué lle fixo ao PP Ourense, porque “tódalas decisións que toman a perxudican: anulan concellos, retiran xulgados, se pecharán oficinas das caixas… a provincia leva camiño de converterse nunha reserva natural”.

Pachi Vázquez acusa a Rajoy e Feijóo de darlle a puntilla á Galicia interior coa reforma da Lei de Bases de Réxime Local e os incumprimentos electorais

 
O Secretario Xeral Nacional, Pachi Vázquez, responsabilizou a Rajoy e a Feijóo de “facer inviábel” economicamente a nosa provincia, e de empregar a Ourense como “experiencia piloto” de cómo a dereita está “aniquilando” todo o modelo de vida da Galicia interior.

Vázquez asistiu hoxe á reunión da Permanente da Executiva provincial cos Grupos Socialistas na Deputación, Parlamento galego, Congreso dos Deputados e Senado. Acusou a Rajoy e Feijóo de pretender “da-la puntilla” ao interior galego e suprimir de facto os concellos de Ourense a través da reforma da Lei de Bases de Réxime Local, a aprobar polo Consello de Ministros na súa vindeira reunión. Todos, agás a capital provincial, teñen menos 20 000 habitantes, e quedarán suxeitos, de aprobarse o Decreto, á tutela da Deputación, que, no caso de Ourense, é o órgano de menor transparencia, e o que máis dilapida, e que está inmerso nunha investigación polas súas contratacións.

Neste senso, o máximo responsable dos socialistas galegos sinalou que, a partires de agora os socialistas “só falaremos de Baltar a través dos xulgados”, para así “centrármonos nas accións políticas para garantir que a xente poida vivir aquí”, e non teña que emigrar.

O Secretario Xeral do PSdeG salientou que o obxectivo final da reforma da Lei de Bases de Réxime Local é favorecer “a privatización da vida municipal, para converter os servizos en pingües beneficios para os de sempre”.

Vázquez defende a xestión de proximidade dos municipio: “aínda que os queren facer quedar como culpables, os concellos son as vítimas”, cando a culpábel é a comunidade autónoma, “que non lles paga, e que lles retira a capacidade para achega-las prestacións sociais aos veciños e as subvencións para mantemento das infraestruturas”, lembrando tamén que soben, ademais, as achegas económicas que os municipios deberán abordar para evitar que concorran a axudas.

“Presentaremos o dereito da Galicia interior a vivir con dignidade”, dixo Vázquez en referencia ás iniciativas que levarán a cabo os socialistas nos distintos foros institucionais, pois “non se pode culpabilizar aos cidadáns por vivir onde viviron toda a vida”.

A Permanente da Executiva provincial, celebrada esta mañá, estudou o informe de situación da provincia e acordou a acción coordinada nas institucións municipais, provincial, no Parlamento de Galicia, Congreso e Senado. Salientou Vázquez que as políticas do PP da provincia, de Feijóo e de Rajoy, fixeron acadar a Ourense cifras récord de paro, con 30 000 homes e mulleres “que non só non atopan emprego senón que non lles quedan máis alternativas nin saídas laborais que a emigración”. Outra marca histórica acadada é o número de EREs solicitados na provincia.

O compañeiro salientou que tódalas advertencias feitas durante a campaña electoral se están a cumprir: “non só hai unha suba de impostos, senón que tamén hai copago, de medicinas, ortopedia e transporte en ambulancia”, lembrando tamén que o Goberno xa empeza a admitir que botaría a médicos e docentes (recoñeceu o despedimento de 1200), como advertimos os socialistas.

O líder dos socialistas galegos denunciou tamén o peche de xulgados nas cabeceiras de comarca, e a existencia dun plan para concentrar os PACs e servizos de Urxencia, reprobou que Feijóo consinta que os concellos queden sen unha oficina dunha entidade bancaria, e lembrou a paralización en dous compromisos importantes para a provincia e a cidade: a estación intermodal na cidade, e a Alta Velocidade en xeral. Se alguén non “pon pé en parede”, vai iniciarse “un percorrido sen retorno”, prognosticou Vázquez.

Quintas acusa a Baltar de xestiona-la Deputación de xeito “clientelar, dilapidador e dañino para os ourensáns”

A deputada socialista no Parlamento galego e Secretaria de Organización da Executiva Provincial, María Quintas, fixo dita declaración na comparecencia do presidente da Deputación na Comisión de Orzamentos do Parlamento de Galicia, onde advertiu que o gasto en persoal da institución provincial supón un 42,5 por cento do orzamento dese ente.

Quintas sostivo que Feijóo é “colaborador necesario por acción e omisión” das prácticas de Baltar, xa que “leva abrazado ao caciquismo e ás irregularidades” dende o principio. Denunciou que “o PP utilizou aos ourensáns para os seus fins particulares”, mentres Ourense renuncia de xeito inequívoco ao futuro, con 30 407 desempregados en 2012, un 8 por cento máis que no 2011, e con 13 000 persoas sen ningunha prestación económica.

A compañeira explicou que cada ourensán terá que pagar 92 euros para financia-los salarios dos “enchufados” por Baltar na Deputación, un gasto en persoal que nas outras tres provincias galegas é de 49 euros. Criticou que o actual presidente da Deputación teña utilizado os orzamentos para financiar un “entramado caciquil presuntamente corrupto” en lugar de para mellora-la situación económica da provincia, e o feito de que, nin Baltar nin os seus vicepresidente manteñan os seus salarios intactos, mentres o 80 por cento dos orzamentos da institución provincial para este 2013 é destinado a gasto improdutivo, co que resta tan só un 15 por cento para investimentos na provincia.

A nosa Sª de Organización tamén denunciou que dende o PP teñan feito da Deputación “un instrumento inservíbel”, mentres “por decreto, malgastan o diñeiro dos ourensáns para favorecer intereses persoais e electorais”, e utilicen “as vidas dos traballadores como coartada para dar solución ao despilfarro fachendoso da familia”, enganando ao anunciar que a Deputación sexa a primeira en aplicar un ERE, cando está a crear novas prazas, como a dun “asesor técnico da presidencia, cun custe de 80 000 euros ao ano”.

Quintas criticou a “frivolidade desmedida” de Baltar ao anunciar axustes de persoal, cando mantén a 76 persoas cun custe de entre 50 000 e 60 000 euros ao ano, ou cando no Inorde, cun orzamento dun millón de euros, 893 000 están destinados a persoal, e 3000 a investimento. Explicou que o presidente e o xerente deste último organismo custan 150 000 euros cada ano.

A compañeira advertiu que a Deputación de Ourense, con Baltar á cabeza, “bate récords negativos”, como o de ter unha débeda que rolda o cen por cen, o de ser unha das deputacións de España con mais empregados por habitante, a que ten mais traballadores eventuais, e a que conta con mais empregados con cargos no PP ou familiares destes, xa que tan só 13 dos 700 empregados non teñen relación directa con este partido.

A deputada tamén denunciou que o presidente da Deputación “impide a transparencia e a legalidade nunha institución pública que é de todos, agochándose detrás dos votos maioritarios do Grupo Popular herdado do seu pai, ao pecha-las portas á creación dunha comisión que investigue as contratacións” da institución; e lembrou que o rexeitamento a esta comisión foi irregular, por apoiarse nos votos de deputados con interese persoal, xa que “só un dos quince membros do grupo de goberno da Deputación de Ourense cumpría o requisito”.

A Sª Provincial de Organización comezou esta intervención no Parlamento enviando un saúdo ao alcalde saínte de Vilamartín, que tivoque enfrontarse a unha moción de censura auspiciada por Baltar, utilizando “artimañas” para “quebra-la vontade popular”.

 

Seara solicítalle a Pastor unha reunión para que Fomento se comprometa coas infraestruturas pendentes na nosa provincia

A nosa deputada no Congreso, Laura Seara, enviou unha carta á Ministra de Fomento na que solicita unha reunión con Ana Pastor, para aborda-lo escenario de paralización no que se atopan as infraestruturas na nosa provincia, e co fin de obte-lo compromiso do Ministerio respecto aos proxectos pendentes.

Na súa misiva, Seara alude á “difícil situación económica pola que atravesa o noso país; situación que no último ano non só non mellorou, senón que empeorou, sobre todo para as familias máis vulnerables”, sendo así que “neste complexo escenario económico é absolutamente esencial unha adecuada planificación dos investimentos que, con todo, non debe obviar aquelas infraestruturas que son primordiais para o desenvolvemento dos territorios”, por iso a compañeira lle traslada a Pastor “a necesidade que a provincia de Ourense ten respecto de poder dispoñer das infraestruturas apropiadas que sirvan como elemento de vertebración do territorio, así como de elemento dinamizador da economía e o desenvolvemento da provincia”, sendo así que a deputada considera “absolutamente perentorio que o Goberno concrete prazos e investimentos respecto das diferentes conexións da Alta Velocidade na provincia, así como unha clara definición dos proxectos de entrada do AVE na cidade de Ourense e da estación intermodal”.

Así mesmo, Seara pretende abordar con Pastor a situación de infraestruturas como a A-76, a N-525, a N-120 e diferentes proxectos provinciais que se atopan paralizados.

Tras lembrarlle á Ministra que é deputada elixida por unha circunscrición galega, a compañeira sostén que “Ourense é exemplo de provincia interior necesitada dunha firme aposta polo reequilibrio territorial, que non sempre é asumida polas administracións; e nesa aposta o Ministerio de Fomento debe xogar un papel determinante para vertebrar, dinamizar e abrir espazos de desenvolvemento e progreso en Ourense”.

Xa que logo, pola súa condición de “única deputada da oposición pola provincia de Ourense” no Congreso, Seara espera obter resposta positiva da Ministra respecto de a celebración da reunión que solicita.

Os socialistas instamos ao PP a expresar no seu congreso a súa determinación de erradicar a corrupción en Galicia

O Secretario de Organización do PSdeG-PSOE, Pablo García, criticou a dobre vara de medir do PP, e nomeadamente de Feijóo ante os casos de corrupción que afloran no seu partido. Así, o número dous dos socialistas galegos reproba a actitude “indignada” do Presidente da Xunta á saída da súa audiencia co Rei ao ser preguntado polo caso Bárcenas, cando Feijóo “ten o seu propio caso Bárcenas a 50km. do seu domicilio”, dixo aludindo ás contratacións de Baltar na Deputación de Ourense, “e leva moitos anos mirando cara outro lado”, acusou.

García afirma que o Presidente do PP en Galicia non ten que “rasga-las vestiduras” polo que pasou en Madrid, o mesmo que Dolores de Cospedal, a quen o responsable de Organización dos socialistas galegos insta a falar de Baltar aproveitando a súa presenza no congreso do PP en Lugo.

Para o compañeiro, “non existe un PP bo e un PP malo”, senón que o primeiro “é cómplice do que está pasando e leva pasando moitos anos” na nosa provincia.

García reclamou a Rajoy que se pronuncie tamén sobre a investigación dos contratos de Baltar dende a convención municipal que o PP celebra en Almería, “un foro moi adecuado” para debater sobre este asunto, e coñece-la opinión de quen no seu día dixera que “Baltar é o PP”. O dirixente do PSdeG tamén lembrou que o mesmo Feijóo nomeou superdelegado a Rogelio Martínez, compañeiro de partido ao que “pillaron tarde, porque xa prescribira”, preguntando García “onde está a indignación, o chegar ata o fondo, ou a tolerancia cero; onde está todo iso que di nas rolda de prensa”.
O compañeiro recriminou a Alfonso Rueda, Conselleiro da Presidencia –e, polo tanto, sobre quen recae a responsabilidade de supervisa-las deputacións-, que leve catro anos sendo “cómplice destas actuacións”, e esixiu aos PP que, aproveitando o congreso que celebran esta fin de semana, expresen “a súa determinación de erradica-la corrupción do PP galego, porque teñen aquí casos tan sangrantes e escandalosos como o de Bárcenas”.

Pola súa banda, o noso portavoz na Deputación, Ignacio Gómez, anunciou que pedirán informe de Secretaría sobre a capacidade dos deputados provinciais do PP -a excepción do alcalde de Avión-, para votar-lo pasado venres a investigación das contratacións de Baltar Pumar, moción que foi rexeitada precisamente cos seus votos. Para o noso voceiro, en cumprimento da Lei de Bases de Réxime Local, o Regulamento de Organización, funcionamiento e réximen xurídico das entidades locais, e a lei de Procedemento Administrativo, catorce dos quince deputados provinciais do PP poderían ter incorrido en prevaricación, xa que “está demostrada a relación de parentesco, consanguinidade ou afinidade” dos representantes populares coas persoas relacionadas co devandito asunto debatido no Pleno. Neste senso, os socialistas advertimos que seguiremos a evolución da nosa petición de informe e non descartamos acudir á vía xudicial correspondente.

Respecto aos anuncios do Presidente da Deputación de iniciar accións legais, Gómez non entende ben a quen se dirixe esta advertencia, “se aos Medios, ás persoas ou aos funcionarios que afirman na rúa que isto foi unha fábrica de enchufar durante moitos anos”. Caso de que vaia dirixida ao PSdeG, “xa pode ir correndo mañá mesmo”, emplazouno Gómez, quen afirmou que “os que mancharon o nome da institución foron eles”.

Xornada de asesoramento para concelleiras e concelleiros

portadaRegimenLocalO vindeiro sábado, 12 de xaneiro, terán lugar as primeiras sesións de asesoramento sobre temas de xestión municipal, dirixidas a concelleiras e concelleiros do Partido, membros das executivas locais e, en xeral, a calquera militante interesado. Trátase dunha xornada de resolución de dúbidas, a cargo dun equipo técnico, así como membros do Partido con experiencia en cargos municipais.

Haberá dúas sesións, en Ourense e Ribadavia, para facilitar a asistencia dende diferentes comarcas:

Comarcas de Bande, Caldelas-Trives, e Ourense: 10:00 na sede provincial
Comarcas de Carballiño-Ribadavia e Celanova: 16:00 na casa da cultura de Ribadavia

Nos vindeiros meses organizarase esta mesma xornada para as restantes comarca, en diferentes puntos da provincia, co fin de facilitar a asistencia dos compañeiros e compañeiras de todas as agrupacións. Avisaremos aos coordinadores comarcais e ás agrupacións con antelación.

Os socialistas advertimos de que, co actual ritmo de recortes, Ourense chegaría aos 125 000 pobres en nove anos

A nosa deputada no Congreso, Laura Seara, ven de denunciar que, de continuar os recortes ao ritmo actual, a nosa provincia podería acadar a cifra de 125 000 pobres no 2022; o 40% da súa poboación.

A nosa previsión deriva da predición dos analistas para o conxunto do Estado, que sitúa o número de cidadáns catalogables como pobres en España, para dentro de nove anos, en 18 millóns.

A compañeira salienta que ata o de agora, “o aguante das prestacións e das pensións, permitía conte-las taxas de pobreza de Ourense”, pero que “este patrón está a mudar” debido “á non revalorización das pensións, á suba do IRPF, que afecta aos pensionistas, e aos copagos farmaceútico e sanitario en moitos servizos” impostos polos gobernos de Rajoy e de Feijóo.

A estes datos hai que engadir, segundo informa a deputada, que tódalas proxeccións de poboación que se fan sobre a nosa provincia advirten dun envellecemento permanente de poboación, o que “incrementa o risco de pobreza”.

“En Ourense e en Galicia haberá máis pobres, e os pobres serán máis pobres”, prognosticou a compañeira, que tamén advertiu de que, a día de hoxe, o 53% dos ourensáns chegan con moitas dificultades a fin de mes, e de que a fenda salarial entre os que máis e menos teñen, “lonxe de reverter, aumenta” por mor da crise económica.

Para Seara, o PP e Rajoy “seguen poñéndose de costas aos cidadáns”, e recentemente rexeitaron unha proposta socialista no Congreso que perseguía a creación dun fondo contra a pobreza de 1000 millóns de euros.

A compañeira fixo estas declaracións á súa entrada ás instalacións da Cruz Vermella de Ourense, ás que realizaou unha visita na que exerceron de anfitrións Teresa Rodríguez Babarro, presidenta provincial da entidade, e outros membros do seu equipo directivo.