Blog Archives

Os socialistas denuncian que o goberno de Leiro se nega a retirar o amianto tóxico das construcións do municipio

O PSdeG-PSOE denuncia que o alcalde do PP se nega a debater e votar esta necesaria iniciativa con escusas sen fundamento, e esquece a protección da saúde dos veciños e veciñas

O voceiro municipal, Manuel Rodríguez, demanda a implicación inmediata doutras administracións públicas para axudar na perigosa retirada deste material tan tóxico

O PSdeG-PSOE de Leiro denuncia o vergoñento e perigoso desleixo do goberno local do PP coa protección da saúde da veciñanza deste municipio ourensán, logo de vetar o PP, durante o último pleno municipal, o debate dunha moción sobre a necesaria protección da veciñanza fronte ás construcións levantadas con amianto ou asbesto. O rexedor conservador negouse a aceptar a urxencia da iniciativa, porque a proposta de acordo dos socialistas demanda que, como é lóxico, se inste a outras institucións públicas a colaborar neste inaprazable e necesario compromiso coa saúde das persoas, e polo tanto, a proposta nin sequera chegou a ser debatida.

O portavoz municipal, Manuel Rodríguez, denuncia o “vergoñento e perigoso desleixo do PP cunha cuestión tan relevante como é a saúde pública, ante un material que, como é público e notorio, é moi nocivo para a saúde”. Rodríguez recorda que o amianto é prexudicial e está prohibido en toda a Unión Europea desde hai máis dunha década, polo que “é incomprensible que o alcalde non teña entre a súas prioridades a súa retirada das construcións de Leiro”. O voceiro do PSdeG-PSOE recorda que “ante a absoluta inacción do PP nas administracións públicas ó respecto deste tema fundamental, os socialistas si traballamos activamente para impulsar medidas a prol da protección da saúde e para a eliminación do amianto e doutros tóxicos”. “É misión fundamental do goberno local velar polas demandas e preocupacións veciñais e isto é unha desas preocupacións”, asevera.

Rodríguez considera “imprescindible e inaprazable” retirar o amianto das canalizacións de agua e das restantes edificacións, e cree “fundamental” informar á poboación dos seus riscos. “Debemos dar a coñecer o procedemento adecuado de detección do amianto e os problemas que comporta para a saúde, así como o risco que supón a manipulación inadecuada para evitar problemas durante o proceso de retirada dos seus residuos”, asegura. Os socialistas anuncian que insistirán nesta necesaria proposta a pesar da vergoñenta negativa do alcalde, e salientan que é moi importante a “implicación das administracións autonómica e provincial porque o tratamento e retirada destes materiais é custoso e complicado pola súa perigosidade para ser feito en soidade polos veciños e veciñas e, por iso, moita xente segue a convivir con tóxicos nas súas casas”.

O PSdeG-PSOE de Leiro critica o desleixo do goberno local do PP co patrimonio etnográfico ó negarse a recuperar fontes e lavadoiros públicos

A moción propón unha protección integral para estes elementos singulares, evitando actuacións puntuais en forma de parche como as materializadas ata o de agora que son manifestamente insuficientes

“A realidade é que o alcalde nega esta iniciativa para protexer o noso patrimonio etnográfico e cultural porque non se lle ocorreu a el”, denuncia o portavoz municipal, Manuel Rodríguez

O PSdeG-PSOE de Leiro critica o vergoñento desleixo e monumental desgana do goberno local do PP coa protección do patrimonio etnográfico deste concello ourensán, ó negarse a recuperar as abandonadas fontes e lavadoiros públicos, elementos singulares da cultura local que, para colmo, foron desprezados polo rexedor durante o último pleno municipal. Os socialistas critican o nulo interese dos conservadores por establecer e financiar unha protección integral para estes elementos tan singulares, evitando así actuacións puntuais en forma de parche como as materializadas ata o de agora, que son manifestamente insuficientes.

A moción socialista rexeitada demandaba a elaboración dun plan de rehabilitación de fontes e lavadoiros, habilitando as partidas orzamentarias necesarias para este fin, así como a elaboración dun catálogo actualizado no que se detalle a súa situación e o estado de uso e conservación. Tamén reclama a constitución dunha comisión de seguimento configurada por representantes veciñais, expertos e un concelleiro de cada grupo municipal que establecerá unha orde de prioridades. Por último, solicita unha sinalización adecuada de cara ó seu posible interese turístico, e que se dote de auga a aquelas fontes e lavadoiros que carecen de subministro na actualidade.

O portavoz municipal do PSdeG-PSOE, Manuel Rodríguez, critica o “vergoñento desleixo do PP cun dos elementos máis destacados do patrimonio etnográfico e cultural como son estas fontes e lavadoiros públicos”. “O máis grave é que o alcalde desprezou o patrimonio de todos e todas ó asegurar despectivamente que ningunha das nosas fontes ten interese turístico algún, unha actitude que demostra a absoluta desidia do PP coa cultura e a tradición local, e a falla de visión turística pois, sen ir moi lonxe, outros concellos limítrofes coma Carballiño ou Boborás acaban de recuperar estes elementos patrimoniais para potencialos coma atractivo turístico e cultural”, explica o concelleiro. “A realidade é que o alcalde nega esta iniciativa porque non se lle ocorreu a el”, denuncia.

Rodríguez lamenta a actitude dos conservadores e detalla que “a moción realmente buscaba establecer unhas liñas xerais para a súa protección xa que, ata o de agora, a súa recuperación e conservación dependen en gran medida da importante labor desinteresada realizada por veciños e veciñas que agora, debido a súa avanzada idade, xa non poden facer”. Os socialistas de Leiro insisten en que é “indecente” que o as fontes e lavadoiros estean nun estado tan lamentable por culpa da innación do goberno local do PP e que é “desvergonzado” deixar unicamente nas mans veciñais a conservación do patrimonio público.

O PSdeG-PSOE analizará o papel clave dos socialistas na consecución do Estatuto de Autonomía de Galicia

O PSdeG-PSOE de Ourense analizará nunha mesa de debate o papel clave dos socialistas na consecución do estatuto de autonomía de Galicia. Durante o proceso de elaboración da actual norma institucional básica galega, os socialistas loitaron especialmente para que o texto resultante se aproximase o máximo posible ó espírito progresista, para a máxima asunción de competencias, e para que puidese ser presentado nas Cortes Xerais o 28 de xuño, xusto no 43º aniversario do plebiscito ó primeiro estatuto, que non chegou a entrar en vigor por culpa do golpe de estado fascista dos franquistas e o posterior inicio da guerra.

Mesa debate viernes sede PSOE

O acto organizado pola secretaría provincial de memoria histórica terá lugar o vindeiro venres día 22 de xuño ás 20:30 horas na sede provincial do partido, e contará coa presenza de José Vázquez Fouz, figura política nuclear para acadar o estatuto galego, e de Carlos Pereira Martínez, militante do partido e biógrafo do socialista galeguista Xaime Quintanilla. No acto tamén participarán a secretaria provincial de igualdade, Zaida Rodríguez Camba, e o secretario xeral de Ourense, Rafael Rodríguez Villarino.

José Vázquez Fouz acumula máis de 40 anos de compromiso socialista. Incorporouse ó PSOE en 1976 e, desde entón, participou activamente na vida pública e institucional do partido máis relevante da historia recente do Estado. Destaca o seu papel como membro do equipo redactor do actual Estatuto de Autonomía de Galicia. Foi deputado no Congreso tralas eleccións xerais de 1979 e 1982, e deputado no Parlamento Europeo nas eleccións de 1987 e 1989. En Europa exerceu cargos de importante responsabilidade como a vicepresidencia da delegación para as relacións cos países membros da Asociación de Nacións do Sureste Asiático (ASEAN) e a República de Corea, e da Comisión de Agricultura, Pesca e Desenvolvemento Rural. Tamén foi mediador e negociador en secuestros e conflitos internacionais. Entre outras distincións recibiu a medalla do Parlamento de Galicia.

A figura de Vázquez Fouz foi clave na asemblea de parlamentarios que, cumprindo co mandato da Constitución Española, tiña as competencias para elaborar o proxecto de estatuto de autonomía. E por iso formou parte da ‘comisión dos dezaseis’ encargados de redactar a actual lei básica galega. A primeira reunión desta equipa tivo lugar en xaneiro de 1979, e tres meses despois, a comisión entregou ó presidente da Xunta de Galicia preautonómica un anteproxecto de estatuto que sufriría modificacións antes do seu referendo popular e aprobación definitiva.

Pola súa banda, Carlos Pereira Martínez é un historiador, escritor, investigador e membro numerario da Sociedade Española de Estudios Medievais e da Asociación de Escritores en Lingua Galega. Durante a súa dilatada experiencia profesional tamén asumiu diferentes cargos na Asociación Cultural Estudios Históricos de Galicia, no Padroado e o Consello Reitor da Fundación Instituto de Estudios Políticos e Sociais ou no Ateneo Republicano de Galicia. En 2011 recibiu o premio Luís Tilve de investigación e divulgación histórica pola súa prolixa obra biográfica ‘Xaime Quintanilla Martínez. Vida e obra dun socialista e galeguista ao servizo da República’.

O PSdeG-PSOE de Ourense apoia as mobilizacións para que se cumpra o Pacto contra a Violencia de Xénero

O PSdeG-PSOE de Ourense apoia e súmase ás mobilizacións previstas neste 16 de maio. Esixiremos nas institucións e na rúa que se cumpra o Pacto contra a Violencia de Xénero.

WhatsApp Image 2018-05-16 at 18.01.26

  • Nestes intres, o principal problema en España é a violencia contra as mulleres.
  • Desde o PSOE esiximos ao goberno de Rajoy que cumpra o acordado no Pacto contra a violencia de xénero e que cumpra coa súa responsabilidade coas mulleres vítimas e cos seus fillos e coas súas fillas.
  • O PSOE liderou o Pacto contra a Violencia de Xénero que o PP, co apoio de Ciudadanos, está incumprindo e no que Unidos Podemos nin sequera está.
  • Case un ano despois de asinarse o Pacto, non hai cartos e non se modificaron  as leis para desenvolver as medidas e políticas contra a violencia machista.
  • Esiximos ao goberno que dote con 200 millóns o Pacto contra a Violencia de Xénero.
  • Pedimos a Unidos Podemos que se sume ao Pacto contra a Violencia de Xénero, abandone a abstención e nos axude a que se cumpra.
  • O PP, co apoio de Ciudadanos, está a saltarse o Pacto. A alianza de Ciudadanos co Partido Popular é nefasta para as mulleres.
  • O PSOE é único partido que está cumprindo o Pacto. Demos unha resposta total e contundente á inacción do goberno presentando dúas reformas lexislativas para dar cumprimento ao Pacto e dotalo economicamente.

As vítimas non agardan e as mulleres obxecto de violencia que corren risco tampouco poden agardar:

  • Se o Pacto Contra Violencia se cumprira, habería campañas de prevención, información e concienciación dirixidas a adolescentes e mozos e mozas.
  • Se o Pacto Contra Violencia se cumprira, os concellos volverían ter competencias para atender de maneira especializada ás mulleres vítimas e aos seus fillos e ás súas fillas.
  • Se o Pacto Contra Violencia se cumprira, as mulleres vítimas contarían cun sistema de acompañamento individualizado para evitar a súa desprotección.
  • Se o Pacto Contra Violencia se cumprira, mellorarían as axudas e recursos sociais para atender as necesidades das mulleres vítimas e dos seus fillos e das súas fillas.
  • Se o Pacto Contra Violencia se cumprira, o concepto violencia de xénero abranguería todos os tipos de violencia contra as mulleres segundo o Convenio de Istambul.
  • Se o Pacto Contra Violencia se cumprira, habería liberdade vixiada sobre o maltratador nos momentos nos que a vítima se atopa máis desprotexida.
  • Se o Pacto Contra Violencia se cumprira, reforzaríase a especialización nos xulgados do penal que atenden o maior número de casos.
  • Se o Pacto Contra Violencia se cumprira, as mulleres vítimas contarían con acompañamento xudicial personalizado previo á denuncia ata a fin do procedemento.

Os socialistas analizarán nun encontro en Ourense os retos demográficos da UE

Diversos cargos  socialistas galegos falarán de demografía xunto ós eurodeputados Iratxe García e José Blanco; ó alcalde de Soria e o conselleiro de Presidencia do Principado de Asturias. As catedráticas Mercedes Molina e María Xosé Rodríguez Galdo, e o profesor Alberto Saco, participarán nunha mesa de debate sobre políticas públicas para a recuperación demográfica

Analizaranse os retos demográficos da Unión Europea, centrándose na economía e a poboación no ámbito rexional, nun encontro que terá lugar na cidade de Ourense, durante a mañá do vindeiro venres 11 de maio no restaurante San Miguel.

Nesta xornada estruturada en torno a unha conferencia e dúas mesas de debate, participarán dous deputados no Parlamento Europeo; expertos en cuestións demográficas, económicas e xeográficas; cargos socialistas de institucións públicas doutras provincias de España; e membros do PSdeG-PSOE.

A inauguración da xornada correrá a cargo do secretario xeral do PSdeG-PSOE, Gonzalo Caballero; do eurodeputado, José Blanco; e do secretario provincial do PSdeG-PSOE en Ourense, Rafael Rodríguez Villarino. A conferencia inicial centrada nas estratexias de loita contra a despoboación en Europa, vai ser impartida pola eurodeputada e presidenta da delegación socialista española na UE, Iratxe García. Será presentada por Marina Ortega, secretaria de políticas sociais dos socialistas galegos.

A primeira mesa de debate porá o foco nos factores explicativos da poboación e a actividade económica. Moderada por Alexia Guede, secretaria de demografía da executiva provincial de Ourense, contará coa participación do alcalde de Soria, Carlos Martínez; do conselleiro de Presidencia do Principado de Asturias, Guillermo Martínez; e do portavoz do PSdeG-PSOE no Parlamento de Galicia, Xoaquín Fernández Leiceaga.

A segunda mesa centrará o debate na incertidume e as políticas públicas para a recuperación demográfica, e será moderada pola deputada galega, Noela Blanco. No debate participarán a catedrática de xeografía humana da Universidade Complutense de Madrid, Mercedes Molina; o profesor de socioloxía da Universidade de Vigo, Alberto Saco; e a catedrática de historia e institucións económicas e membro do Observatorio Galego de Dinamización Demográfica, María Xosé Rodríguez Galdo. Por último, a clausura da xornada estará en mans de Pablo Arangüena, vicesecretario xeral e portavoz do PSdeG-PSOE.

Solicitamos en numerosas ocasións á Unión Europea, unha estratexia efectiva fronte ó cambio demográfico, así como o recoñecemento dos territorios que sofren este problema. Non  debemos esquecer que toda Galicia e, especialmente, a provincia de Ourense, son unha das rexións de toda Europa con maior taxa anual de despoboamento e con peor taxa anual de fertilidade, só superada –en negativo– por algunha provincia de Castela e León, a illa de Cerdeña e algunha rexión de Grecia.

Unha das propostas recollidas no último informe dos socialistas europeos sobre despoboamento, pasa por aumentar a eficacia dos fondos europeos nas zonas con problemas demográficos. Ese documento expón unha batería de medidas para que, na aplicación dos instrumentos da futura política de cohesión, tamén se teñan en conta os desafíos demográficos das rexións. Así, o informe reclama maior coordinación entre os instrumentos das distintas políticas europeas, e solicita a creación dunha estratexia sobre o cambio demográfico, así como un marco xurídico europeo que recoñeza especificamente todos os territorios que sofren desvantaxes demográficas.

Consulta o programa a continuación:

 

Acto PSOE 11 mayo retos demograficos Ourense

Denunciamos o timo da estampiña do PP con Ourense

PORTADA

Dende o PSdeG-PSOE de Ourense criticamos que o Ministro de Fomento veña a presentar o timo da estampiña mentras vai a outras cidades con chuvias de millóns
 
“É unha mofa bochornosa que a primeira visita do ministro que cuestionou a variante exterior sexa para presentar só un selo, mentres ten as obras da terceira cidade de Galicia en barbeito”, denuncian
 
O PSdeG-PSOE recorda que Fomento está a regar de cartos Santiago, A Coruña e Vigo mentres a Ourense impónlle o desequilibrio territorioal cunha seca inversora para novas obras moi demandadas
 
Estamos  escandalizados ante a actitude do Ministro de Fomento, Íñigo de la Serna, ó vir á terceira cidade de Galicia a presentar o timo da estampiña, mentres vai ás demais urbes da comunidade con continuadas chuvias de millóns. Os socialistas consideran un “escándalo” que o ministro do PP veña unicamente a facerse unha fotografía cun selo mentres, nos últimos meses, se adicou a pasear por cidades coma Santiago, A Coruña ou Vigo onde inaugurou obras de gran calado ou presentou proxectos millonarios para novas infraestruturas.
 

“É unha mofa bochornosa con Ourense e con toda a provincia que a primeira visita do ministro á cidade sexa para presentar só un selo conmemorativo da Ponte Nova, mentres Fomento ten as grandes obras da terceira cidade de Galicia en barbeito, paralizadas e sen fondos”, denuncian. A mofa do PP é aínda máis ofensiva pois debemos recordar que de la Serna foi o primeiro ministro que cuestionou a necesidade de construír os últimos 17 quilómetros da liña de alta velocidade entre Madrid e Galicia –tramo popularmente coñecido como variante de Ourense– desde Taboadela, porque lle parecía moi caro, unha obra que permitiría liberar o corredor que atravesa a cidade para outros usos. “Alertamos de que, desde que chegou este ministro, nin se adicou un euro nin se moveu papel algún para o último tramo do AVE galego”, din os socialistas.
 

Fomento está a regar de cartos Santiago (ampliación e novos enlaces na AP-9; novos accesos á cidade; enlace orbital; túnel do Hórreo; obras na estación de ferrocarril; ampliación do periférico; conclusión da autovía A-54; etc); A Coruña (porto exterior; túnel da Marina; ampliación da avenida de Alfonso Molina; autovía e tren ó porto exterior; terceira rolda; nova autovía de acceso á cidade desde a A-6; etc.) ou Vigo (ampliación da Ponte de Rande; ampliación AP-9; nova estación intermodal; novos acceso á estación intermodal desde a autopista; remodelación da avenida de Madrid; autovía alternativa á A-55; etc.), mentres a Ourense impónlle o desequilibrio territorial cunha seca inversora para grandes obras. “Non fan nada novo desde hai anos e resulta que cando vén pretende estafarnos co timo da estampiña”, denuncian desde o PSdeG-PSOE.
 

Pedímoslle“seriedade, rigor e compromiso” ó PP, pois Ourense está moi necesitada de investimentos urxentes e dun “reequilibrio territorial real”. “De nada vale que Íñigo de la Serna veña a Galicia a presumir da suposta próxima renovación da conexión ferroviaria con Lugo, cando realmente os orzamentos do Estado estipulan unha mísera partida de 50.000 € para esta liña durante o 2018” aseveran antes de denunciar que “os seus anuncios son ciencia ficción”.
 

Mentres de Íñigo la Serna, Alberto Núñez Feijóo e os demais cargos conservadores do PP pasean polo interior de Galicia para presentar historias de ciencia ficción, co fin de autopromocionar as súas carreiras na sucesión de Mariano Rajoy, marxinan a Ourense e mófanse vergoñentamente duns cidadáns historicamente deixados de lado polas administracións públicas. “Non queremos selos; queremos cartos para obras moi necesarias que o PP nos furta”, conclúen os socialistas antes de recordar que seguimos agardando pola financiación e as obras para a autovía a Lugo; a autovía a Valdeorras e Ponferrada; a circunvalación de Ourense; a ronda norte da cidade; accións de mantemento para a A-52, a N-525 e N-540; a variante exterior ferroviaria entre Taboadela e Ourense; a liña de alta velocidade a Vigo; o tren de cercanías entre Carballiño e o polígono de San Cibrao; a estación intermodal de Norman Foster ou a reforma de N-120 ó seu paso pola cidade, entre outras.

O PSdeG-PSOE de Ourense denuncia que os orzamentos do Estado son un espellismo para Ourense creado por un Partido Popular que se desentende da provincia

O PSdeG-PSOE ven de denunciar que os orzamentos xerais do estado de 2018 son, para Ourense, un espellismo creado por un Partido Popular que se desentende do futuro da provincia.Aa deputada no Congreso, Rocío de Frutos Madrazo, e o secretario provincial, Rafael Rodríguez Villarino, aseguran que “os populares, ano tras ano, cegan a mirada dos ourensáns con cifras fabulosas de inversión na liña do AVE que logo non se executan, mentres propoñen gastos en inversións pírricas e alleas ó desenvolvemento real. Para os dirixentes do PP, o futuro de Ourense non existe”.

Sinalan que “ó longo dos anos de goberno, o PP segue un manual no que se prometen de xeito sistemático grandes inversións, sabendo que nunca se realizarán, porque a finalidade real é tratar de liquidar débeda”. Proba desta estratexia simuladora son os 120.000 millóns que deixaron sen executar desde 2012, dos que uns 2.000 corresponden a Galicia nos catro últimos anos, a maior parte para o tren de alta velocidade en Ourense. De feito, na pasada anualidade só se gastaron 3,4 dos 461 millóns orzamentados para o ferrocarril.

Así, destacan que os investimentos estratéxicos se limitan a dous eclesiásticos e dous museisticos, no mosterio de Melón e en Santa Comba de Bande, así como a cartos insuficientes para o eternamente pechado museo arqueolóxico e o arquivo histórico.  “Unha boa nova sería levar á práctica a inversión prevista para a alta velocidade, a pesares de que non serva para xerar desenvolvementos produtivos rematadas as obras. Trátase dunha intervención que transcorre pola provincia e non dunha inversión finalista para o desenvolvemento de Ourense”.

“Nós non pretendemos realizar ilusionismo político, queremos presupostos executables e axustados ás necesidades de desenvolvemento da nosa terra”, afirman Rodríguez Villarino e de Frutos Madrazo. “Non entendemos a quen se sente a gusto cuns orzamentos ilusorios e pobres ata a exasperación, a nivel de desenvolvemento estratéxico. Ao parecer, eles están a gusto con estes orzamentos inflados, enganosos e desapegados do futuro das nosas fillas e dos nosos fillos, pero nós non”, insisten.

Ante unhas cifras tan vergoñentas, o PSOE presenta emendas estatais con efecto directo en Galicia por valor de 142 millóns de euros, e o PSdeG-PSOE de Ourense propón 56 emendas de adición, que contemplan actuacións estratéxicas provinciais que suman case 78 millóns.

coins-1015125_640

Emendas concretas

No sector agrícola formúlanse cinco intervencións de 37 millóns, destacando os 26 millóns para o regadío na Limia; tres millóns de apoio ás denominacións de orixe vitivinícolas; e 2,5 millóns para o plan da castaña. O apartado medioambiental acumula emendas por valor de 8,7 millóns, entre as que destacan dous millóns para a recuperación do Parque Natural do Xurés, e 1,5 millóns para a recuperación do embalse das Conchas e o río Támega.

No que respecta á liña de AVE, as emendas do socialismo ourensán engaden 4,6 millóns € para a estación intermodal, sen esquecerse dos 10 millóns e os  150.000 € necesarios para un plan de implementación do ferrocarril de cercanías na área da cidade de Ourense. O eido das infraestruturas viarias inclúe tres millóns para a mellora integral da A-52, así como inversións na A-56  no tramo Cambeo-Ourense que, xunto a outras, totalizan case 10 millóns.

A proposta socialista aposta polo termalismo, para o que se solicita unha partida de 7 millóns. Tamén impulsa o patrimonio con perspectivas turísticas, ó reclamar case 10 millóns en total, destacando tres millóns para o museo arqueolóxico (fronte aos 400.000 do PP); dous millóns para o plan director do románico, e a mesma cantidade para o futuro museo do viño de Ribadavia. Por outro lado, entre as emendas estatais específicamente para Galicia destacan o plan integral de emprego (100 millóns); o plan de prevención de incendios e rexeneración forestal (25 millóns); o plan de supresión de pasos a nivel (10 millóns); e o programa do Camiño de Santiago (dous millóns).

 

O PSdeG-PSOE de Ourense lembra a memoria de Secundino Couto, alcalde republicano de Canedo

A agrupación provincial do PSdeG-PSOE de Ourense, por medio da Secretaría de Memoria Histórica, organiza este xoves día 12 de abril, ás 20:00 horas, un acto na lembranza e homenaxe do alcalde republicano-socialista do antigo Concello de Canedo, hoxe coñecido como o barrio da Ponte da terceira cidade de Galicia.

29572229_10211594436561030_5377762980840711824_n

No evento presentarase o libro “Lembranza a Secundino Couto Solla. Alcalde republicano-socialista do Concello de Canedo”, editado pola Agrupación Provincial Socialista e a Fundación Luís Tilve co obxectivo de divulgar e rescatar do esquecemento a figura deste notable político ourensán. No mesmo participarán o secretario provincial do PSdeG-PSOE, Rafael Rodríguez Villarino, e os autores da obra, Francisco Javier Quintas, secretario provincial de Memoria Histórica, e Hilde Couto Serantes, neta do biografado.

Secundino Couto Solla

Natural de Mourente (Pontevedra, 1873), Secundino Couto foi unha das máis importantes figuras do obreirismo ourensán, ocupando diversos cargos de responsabilidade no seo das sociedades obreiras. Presidente do Centro de Sociedades Obreiras de Ourense en 1899 e da Agrupación Socialista de Ourense en 1900, á chegada da Segunda República afiliaríase ó Partido Radical Socialista (PRRS) e a Unión Republicana (UR), chegando a acadar a alcaldía do veciño concello de Canedo, onde máis asentado estaba o seu liderato. Será encausado pola xurisdición de guerra e posto a disposición gobernativa o 27 de agosto de 1936. Sufriu presidio nos mosterios de Celanova e Oseira, regresando finalmente ao seu fogar.

No seu expediente de responsabilidades políticas, a Garda Civil di sempre que é do PSOE, mentres que outras fontes afirman que pertencía ao PRRS ata febreiro de 1936 en que pasou a UR. O propio expedientado recoñece tal militancia, aínda que afirma no ter ingresado de facto en UR. Asemade, foi xulgado polo Tribunal de Represión da Masonería e o Comunismo por ter formado parte da loxa barcelonesa “Democracia”. Sufriu unha importante merma do seu patrimonio por mor das múltiples responsabilidades económicas e incautacións ás que se viu obrigado a facer fronte. Faleceu no seu domicilio en Ponte Canedo en 1960.

Toda a información no blog da secretaría de memoria histórica do PSdeG-PSOE de Ourense.

Manifesto con motivo do día 22 de febreiro, Día Pola Igualdade Salarial

Con motivo do día 22 de Febreiro, Día pola Igualdade Salarial, o PSdeG-PSOE manifesta unha vez máis o seu compromiso político e programático para contribuír a erradicar a brecha salarial existente entre homes e mulleres, marcada pola histórica discriminación que as mulleres han ter e aínda seguen tendo no mundo laboral. A loita pola Igualdade Salarial foi e segue sendo unha das prioridades da nosa axenda política. Desde o PSdeG-PSOE defendemos a implicación dos gobernos en adoptar as medidas necesarias para eliminar a brecha salarial. Porque é obrigación dos gobernos e dos estados defender a igualdade de dereitos das mulleres e cumprir e facer cumprir as leis.

descarga

Porque un goberno non pode eludir a súa responsabilidade, nin un Presidente pode afirmar que “non nos metamos agora en iso” e recoñecer que se incumple a Constitución, o Estatuto dos Traballadores e as resolucións parlamentarias. As mulleres deste país necesitan políticas de igualdade que apoien os seus dereitos e sexan capaces de eliminar as discriminacións de xénero, así como Partidos e Gobernos que implementen con leis e medidas para remover todos os obstáculos que impiden a verdadeira igualdade, tal e como se recolle na nosa Constitución. Por iso, desde o PSdeG-PSOE apostamos porque a recuperación económica tamén sexa social e laboral, en especial para as mulleres. O obxectivo do PSdeG-PSOE neste aspecto é claro e firme.

Levamos 7 anos traballando politicamente nesta liña e por iso, o PSdeG-PSOE no marco do Pacto de Rendas que defendemos os e as socialistas, presentará unha Proposición de Lei para combater a brecha salarial, co fin de erradicar as discriminacións tanto directas como indirectas que provoca as desigualdades salariais. As mulleres deben ter as mesmas posibilidades de acceso ao emprego que os homes e de facer o seu camiño laboral, ademais de ter o mesmo salario por traballo de igual valor, porque corrixir estas desigualdades implica mellorar as pensións e protección social das mulleres.

É unha cuestión de “democracia, xustiza e igualdade” porque non podemos seguir falando de mellorar a democracia si non melloramos as condicións de vida das mulleres como cidadás e como traballadoras. A evidencia dos datos de emprego das mulleres e da brecha salarial esíxenos unha resposta política e institucional integral. Cambiar a realidade da discriminación salarial que viven as mulleres é urxente e prioritaria. As mulleres presentan unha taxa de actividade inferior á dos homes en case 12 puntos, xunto á maior taxa de paro (18,35%) fronte á dos homes (14,97%), á súa vez realizan cerca do 67% do emprego temporal a tempo parcial, sendo o 42% das mulleres as que teñen contrato indefinido a tempo completo fronte ao 58% dos homes.

O salario medio anual das mulleres no ano 2015 foi do 77%, representando un 23% inferior ao dos homes. En definitiva, a situación do emprego das mulleres caracterízase pola maior precarización do emprego, menor taxa de actividade, menor taxa de ocupación, maior taxa de paro, maior temporalidade, que está provocando “feminización da pobreza con contratos lixos” e por todo iso, unha contía menor nas pensións das mulleres. Para rematar, apuntar a importancia da interlocución social e a necesidade da participación das mulleres nos procesos de negociación colectiva, nas mesas de negociación das empresas, así como a presenza das mulleres nos órganos de decisión tanto nas empresas como nas organizacións sindicais e empresariais.

Xuventudes Socialistas e PSdeG-PSOE de Ourense inician as pescudas para recuperar a memoria das vítimas do franquismo na provincia

Os traballos pretenden dignificar e enxalzar a memoria de todas aquelas persoas que sufriron morte ou persecución na nosa provincia por mor da súa militancia política

“Despois de corenta anos de democracia non é permisible que unhas 140.000 vítimas da Guerra Civil permanezan en paradoiro descoñecido”, aseguran desde a secretaría de Memoria Histórica

MEMORIA

 

Ourense, 20 de febreiro de 2018. As Xuventudes Socialistas, en coordinación coa secretaría de Memoria Histórica do PSdeG-PSOE de Ourense, iniciaron hai uns días as pescudas para localizar ás vítimas e represaliados do franquismo e ás súas familias na provincia, co obxectivo de “dignificar e enxalzar a memoria de todas aquelas persoas que sufriron morte ou persecución na nosa provincia por mor da súa militancia política en partidos republicanos e sociedades obreiras de distintos signos”.

“Despois de corenta anos de democracia non é permisible que, en España, unhas 140.000 vítimas da Guerra Civil permanezan en paradoiro descoñecido, como tampouco o pode ser que permanezan ocultos ao gran público os atropelos cometidos polo réxime franquista contra os demócratas superviventes en forma de penas de cadea perpetua, traballos forzados, detencións e arrestos, expedientes de incautación de bens ou prohibición expresa para o exercicio da función ou cargo público”, explican desde a secretaría de Memoria Histórica, encabezada por Francisco Javier Quintas.

A práctica anulación de partidas orzamentarias por parte do goberno do PP á Lei de Memoria Histórica impulsada polo PSOE durante o goberno de Rodríguez Zapatero, impiden que o Estado cumpra coas débedas pendentes en materia de dereitos humanos e memoria histórica, tal e como o demandan Rights International Spain, o Tribunal Europeo de Dereitos Humanos ou a ONU.

É, por iso, o Partido Socialista está a impulsar diferentes iniciativas neste senso encamiñadas a “reparar, protexer, recoñecer e facer xustiza á memoria das vítimas e represaliados, así como a denunciar a sistemática vulneración dos preceptos da vixente Lei de Memoria Histórica por parte dos gobernos do PP”.